Leviticus 19 - Seqa Full Bible

Tamanae tu tataboyna no tuotuongono

¹ Iaova sa voy te kue Mosese,

² Soynani araququnia boysi ni Izireli: Vatoybo mina tu bati Aro, Iaova mina Bangara, ko tataboyna.

³ Susupae mina ram mam padapadani moyna to sinae no tamae mina, no ram mam mia toyke qo tava taboyna. Aro Iaova mina Bangara.

⁴ Kasi vazaka oyra vovoju ba kasi joyjuni tana mina oyra bangara mololo ka joyjuni ni metolo. Aro Iaova mina Bangara.

⁵ Sada ram kam joyjuni kieke vavakatu arakitaki te kue Iaova, joyjuni te zoka me tuqini ro mina keke.

⁶ Zioa pitapupura ram mam oyke te tava ram kam joyjuni vavakatu ba te tava belanae, ka pita sa kuo sua sa doka te vatulua tava ram mam noyko vanuro.

⁷ Sada ka zioa pitapupura ka oyke te vatulua tava, zio ta kama dalo vo no Aro kama tuqini qo.

⁸ Ka oye sa oyke zio noyene me pale takae bati oye sa sele pita sa tataboyna te kue Iaova; boysi ta me vaikuodoko moyna to te kue oyra ona boysi vatasuku.

⁹ Sada ram kam toto pale oyra pita titiba ram kam teba, kasi papala doka te tomana suae mina barue ba kasi jojoka vele napu.

¹⁰ Kasi vele napu la te mina barue vaini te vakeria sada ba kasi joke velini oyra verea vaini sa suru. Toyro koyna oyra boysi oza no oyra boysi kuokapa. Aro Iaova mina Bangara.

¹¹ Kasi soko. Kasi sosolaka. Kasi tatakiu ni noypo tana mina.

¹² Kasi maulu sosolaka te ritongo qu no vasoyloyini ritongoa mina Bangara. Aro Iaova.

¹³ Kasi vaquqo ba soko udinia mina. Kasi korini ngutae kieke boysi ram kam vajaju kasi vakoyini kose keae ngutae.

¹⁴ Kasi setu ni boysi sa kongo ba toyro ka pita te tarakenakae boysi kuba, ba mam padapadani mina Bangara. Aro Iaova.

¹⁵ Kasi peka tutungono; kasi saete koyle boysi oza ba kapata julo te kue boysi tutupari, ba aravirini aratanaenia boysi.

¹⁶ Kasi tiruni soynae boysi te kue oyra boysi vele. Kasi joyjuni ka pita me vataka tu te udinim. Aro Iaova.

¹⁷ Kasi kolini likam te pongom. Poyini oye ona zaqala voy kasi mo zaqala seva oye.

¹⁸ Kasi arasokani jaju zaqala ba kolini kieke te oyra mo boysi, ba re mo noyne udinim seva re ko noyne noypo tamo. Aro Iaova.

¹⁹ Vauteve oyra qo vatovato. Kasi arapupukini oyra pitapupura vekeveke. Kasi aralomirini tebae keri adoa poytu. Kasi vapoka bubute ka joyjuni ni keri adoa pua.

²⁰ Sada ka lieke sa voybo kieke quolesika ka tuqini moyna te kue kieke lieke vele, pitaulomo lieke noyene aba kama kea vo ngutae, quolesika no lieke sa voybo oye muru lipulipu moyna to. Ba kasi doyra voyevale oyru, bati quolesika aba kama talopu vo.

²¹ Lieke noyene me iro moyna me to kieke sipi lieke te ngoyni ka puka tae te toypaka variere me vavakatu supaka te kue Iaova.

²² Boysi sisiama me pale sipi me joyjuni vavakatu supaka me sioroni oye te vakomamanae Iaova te zaqala oye sa joyjuni, no Iaova me marovelini oye.

²³ Sada ram kam puka te vodu no kam teba ka adoa azu sa vere, mam noyne voyna verea kama dalo vo. Tulu ave ram mam noyne voyna azu sa vere ta kama dalo vo, verea kasi mina oyke.

²⁴ Ba te vavatia ave tabae vere me tataboyna, mam kea me mam vazaka Iaova.

²⁵ Ba te valoymae ave ram kam majala oyke verea doyra oyra azu titiba ta. Te zoka goyti oyra mina papala me taba. Aro Iaova mina Bangara.

²⁶ Kasi oyke zio aba sa kue madaka. Kasi joyjuni ka adoadoa taravalu.

²⁷ Kasi pote voyranga te keri nevae boytu mina ba kasi tire tomana suae vomia mina.

²⁸ Kasi pote senini mina sada sa lie torae mina ba kasi koyro vamoylemoyle senini mina. Aro Iaova.

²⁹ Kasi mia vajele toytu quolea mina te vajajua oyra te tu aravabu, ba vodu me lieboro te tu aravabu no me pudae tu roka.

³⁰ Mam mia toyke qo tava taboyna no me kuo mina padapada te ngoyni ka vazaka ni aqo ro. Aro Iaova.

³¹ Kasi la te kue oyra boysi vorevore ka vakangiere potae doyra oyra boysi lie ba kasi poyta arasasaoto, ba aravatarue te kue oyra, bati oyra mara vapoto mina tu. Aro Iaova mina Bangara.

³² Diere te tarakenakae doyra oyra sa veke voyrangae doyra, mam padapada ni oyra kajikaji no padapada ni mina Bangara. Aro Iaova.

³³ Sada kieke boysi kuokapa sa kuo koype ram te mina vodu, kasi vakikisele oye.

³⁴ Boysi kuokapa sa kuo koype ram mam vaseva ni kieke likae mina ni Izireli. Noyne oye sa seva ko noyne noypo tamo, bati ram kam boysi kuokapa ni Ijipi. Aro Iaova mina Bangara.

³⁵ Kasi tatakiu te vajajua pada sada kam pada ngavae, noyqatae ba tabae soy oyra pita.

³⁶ Vajaju pada tutugnono no noyqata me tutugnono, ngava me tutugnono no tabae me tutugnono te oyra pita kam pada. Aro Iaova mina Bangara, ko koype kesini ram Ijipi.

³⁷ Mam vauteve oyra qo vatovato no oyra qo tamana no mina koype soy. Aro Iaova.