Leviticus 18 - Seqa Full Bible

Padapada ni tu Arareki

¹ Iaova savoy te kue Mosese,

² Soynani oyra boysi ni Izireli: Aro Iaova mina Bangara.

³ Ram kasi mina joyjuni pita sa seva ka joyjuni Ijipi, te ngoyni ram kam kue moyna me, no ram kasi mina joyjuni pita sa seva ka joyjuni te vodu ni kenani, te ngoyni aro me vadoka ni ram. Kasi koype doyra vato.

⁴ Ram mam vauteve moyna to oyra qo tamana no mam mia tae vanoyi no mam koype oyra qo vatovato. Aro Iaova mina Bangara.

⁵ Vauteve oyra qo vatovato no tamana, boysi sa vauteve oyra qo vatovato no tamana ne me kavele. Aro Iaova.

⁶ Kareo ka boysi me voybo noypo torae. Aro Iaova ko kea tamana goyti.

⁷ Kasi mia vajele tamam te voyboa sinam. Oye sa sinam; kasi voybo oye.

⁸ Kasi voybo ka ona quole vele tamam; sada ko voy ta ne ko mia vajele tamam.

⁹ Kasi voybo vavinim, moyna toytu quolea tamam ba toytu quolea sinam, moyna sa puodo te toke re ko kue ba te ngoyni veke.

¹⁰ Kasi voybo toytu quolea tomlieke ba toytu quolea tom quole, sada ko voy ta ne ko mia vajele noypo to tamo.

¹¹ Kasi voybo toytu quolea ona quole tamam sa puodo te kue tamam, oye sa vavinim.

¹² Kasi voybo vavinia tamam; oye sa vavini peta tamam.

¹³ Kasi voybo likae sinam, bati oye sa likae peta sinam.

¹⁴ Kasi mia vajele liekae tamam te voyboa ona quole kutae; oye sa sinam lata.

¹⁵ Kasi voybo ravam quole. Oye sa quole kutae te tomlieke; kasi voybo oye.

¹⁶ Kasi voybo ona quole kutae likam; sada ko voy ta ne re ko mia vajele likam.

¹⁷ Kasi voybo toytu quolea quole re ko voybo. Kasi voybo toytu quolea toytulieke oye ba toytu quolea toytu quole oye; oyru kuru babunua oye. Tu ta sa zaqala.

¹⁸ Kasi reke likae mo quole kutae sa seva kieke mo quole kutae vele no kasi voybo oye sada aba sa tu mo quole kutae.

¹⁹ Kasi voybo kieke quole sada oye sa pale moro ni quole kama dalo vo te tamana.

²⁰ Kasi voybo quole kutae te udinim moyna voy ko vapoto noypo tamo te kue oye.

²¹ Kasi kea la ka toytu mina mara vavakatua te kue Moleki, bati ram moyna to kam vasoyloyini taritongoa mina Bangara. Aro Iaova.

²² Kareo ka lieke me voybo ka lieke vele sa seva kieke lieke sa voybo kieke quole; tu ta sa zaqala.

²³ Kasi voybo ka pitapupura no me vapoto ni oyra mina tu. Kieke menea quole kasi vo kea noypo tani te kue kieke pitapupura te voyboa pitapupura; tu ta sa zaqala.

²⁴ Kasi vapoto ni noypo tana mina te oyra zoka ta, bati goyti ka voy oyra tubia boysi Aro me sure sia oyra te tarakenakae mina ram ka vapoto doyra tu.

²⁵ Vodu ba sa poto; si aro me vatakani vodu te zaqala te boysi, no vodu me dolani sia oyra boysi ka kue moyna.

²⁶ Ba ram mam sute moyna to oyra qo vatovato no tamana. Ram boysi vatasuku ni Izireli no oyra boysi kuokapa ka me kuo koype ram kasi mina joyjuni ka oyra pita poto goyti,

²⁷ bati tabae oyra pita goyti ka joyjuni oyra boysi ka kuo kinaka moyna te vodu noyene, no vodu sa poto.

²⁸ No sada ram kam vapoto vodu noyene, vodu me dolani sia ram sa seva sa dolani sia oyra tubia boysi ka kuo kinaka moyna.

²⁹ Susupae boysi sa joyjuni kieke te oyra pita poto goyti, boysi sa seva ta me vaikuodoko moyna to te kue oyra ona boysi vatasuku.

³⁰ Vauteve oyra qo tamana no kasi koype vatovato ka koype oyra boysi ka kuo moyna te vodu goyti sinani ram kam me no kasi vapoto ni mina tu oyra pita ta. Aro Iaova mina Bangara.