Leviticus 14 - Seqa Full Bible

Vavadalo te Moro roka sa voye Koykoypa

¹ Iaova savoy te kue Mosese,

² goyti oyra tamana te kue boysi sa pale moro roka sa voye koykoypa te sada oye sa dalo, sada oye ka koype la te kue boysi sisiama:

³ Boysi sisiama me zo la te paqarania ngoyni ka kue no me ile oye. Sada boysi ta sa joleke te moro roka sa voye koykoypa,

⁴ boysi sisiama me soynani oyra mara iro me koyna boysi mara vadoylo, keri roroko tu muru dalo no kavia nako seda, nukoso mesiri no azu aesopu.

⁵ Sinani boysi sisiama me soynani oyra, kieke te keri roroko mara voyevale te sarapokae bi dalo sa kuo te sireke lua.

⁶ Boysi sisiama me pale roroko sa tu no me vatopeke toringini azu seda, nukoso mesiri no aesopu, te madakae roroko ka voyevale te sarapokae bi dalo.

⁷ Vetu sada oye me repeni madaka boysi mara vadoylo te moro roka sa voye koykoypa no me soyna vatakabola boysi ta sa dalo. No oye me vazo noypo roroko sa tu.

⁸ Boysi mara vadoylo me tobo oyra ona bubute, me tire sia voyrangae no me sieqe te bi; sinani oye me dalo. Bito ta oye sa majala vele napu te ngoyni ka kue, ba oye me kuo te paqarania ona toypaka pua vetu tava.

⁹ Te vavetua tava oye me tire sia voyrangae; me tire boytu, me tire vomia, me tire voyranga te lenga matae no tabae to voyrangae. Oye me tobo ona bubute no me sieqe te bi, no oye me dalo.

¹⁰ Te vaviua tava oye me iro la keri lami lieke no kieke lami quole sa kieke avea doyra, kasi vo makomako senini doyra, me iro toringini tulu kilo palava ka lomirini oela olivi ona vavakatu vere, no 0.3 lita oela olivi.

¹¹ Boysi sisiama sa soyna vatakabola oye sa dalo me koype la oye mara vadoylo no me iro la oyra ona keke oye te vakomamanae Iaova te ngoyni ka puka tae te toypaka variere.

¹² Boysi sisiama me pale kieke te oyru lami lieke no 0.3 lita oela me vavakatua sa seva kieke vavakatu supaka, oye me kajara puka ni la te vakomamanae Iaova sa seva vavakatu kajara puka.

¹³ Oye me voyevale lami te ngoyni tataboyna ka voyevale ni vavakatu zaqala no vavakatu katunuro. Saseva vavakatu zaqala, vavakatu supaka ona boysi sisiama; sa tataboyna sua.

¹⁴ Boysi sisiama me pale kavia madakae vavakatu supaka no me tilini boylongoa talanga dekanae boysi mara vadoylo, totuku lata koyrisi dekanae no kukubesea nikini dekanae.

¹⁵ Boysi sisiama me pale 0.3 lita oela, me jilingini ngoynisoi te tetepara koyrisi moyria tani,

¹⁶ me vatopeke tomanasuae pirokete koyrisi dekanae te oela te teteparae koyrisi, no me repeni kavia madaka te vakomamanae Iaova vetu sada.

¹⁷ Boysi sisiama me toyro la kavia oela sa kuo sua te tetepara koyrisi te boylongoa talanga dekanae, te totukua koyrisi dekanae no te kukubesea nikini dekanae boysi mara vadoylo, te sarapokae madakae vavakatu supaka.

¹⁸ Sikia oela te koyrisi boysi sisiama me toyro la te boytu boysi mara vadoylo no me sioroni ona zaqala oye te vakomamanae Iaova.

¹⁹ Boysi sisiama me vavakatua vavakatu zaqala no me sioroni boysi mara vadoylo te moro roka sa voye koykoypa. Bito ta, boysi sisiama me voyevale vavakatu katunuro

²⁰ no me vavakatua te sara barasi taboyna, no me toyro toringini la vavakatu vere, no me sioroni oye, no oye me dalo.

²¹ Sada oye sa boysi oza no sa takani me joyjuni oyra pita goyti ne, oye me pale kieke lami lieke me ona vavakatu supaka mara kajarani poka me sioroni ona zaqala, me kea toringini kieke kilo palava me toringini 0.3 lita oela ona vavakatu vere.

²² no keri kokoru kau ba keri kokoru qutuni, oye sa majala joyjuni, kieke ona vavakatu zaqala no kieke ona vavakatu katunuro.

²³ Te vaviua tava oye me iro me oyra pita goyti voy mara vadoylo ni oye te kue boysi sisiama te ngoyni ka puka tae te toypaka variere, te vakomamanae Iaova.

²⁴ Boysi sisiama me pale lami ona vavakatu supaka, me pale toringini 0.3 lita oela, no me kajarani poka te vakomamanae Iaova sa seva kieke vavakatu kajara puka.

²⁵ Oye me voyevale lami ona vavakatu supaka no me pale kavia madakae no me toyro te boylongo talanga dekanae, te totuku koyrisi dekanae no te kukubese nikini dekanae boysi mara vadoylo.

²⁶ Boysi sisiama me jilingini ngoynisoi oela te luboro tetepara koyrisi moyria,

²⁷ no te tomanasua pirokete koyrisi dekanae me repeni ngoynisoi oela sa kuo te tetepara koyrisi vetu sada te vakomamanae Iaova.

²⁸ Ngoynisoi oela sa kuo te teteparae koyrisi oye me toyro la te oyra ngoyni sa toyruni moyna madakae vavakatu supaka- sa seva te boylongo talanga dekanae, te totuku koyrisi dekanae no te kukubese nikini dekanae boysi mara vadoylo.

²⁹ Sikia oela sa kuo te teteparae koyrisi boysi sisiama me toyro la te boytu boysi mara vadoylo, me sioroni oye te vakomamanae Iaova.

³⁰ Boysi sisiama me vavakatua kokoru kau ba kokoru qutuni varoqa, sa majala joyjuni boysi mara vadoylo,

³¹ kieke ona vavakatu zaqala no kieke ona vavakatu katunuro, mara toringini vavakatu vere. Te zoka goyti boysi sisiama me sioroni boysi mara vadoylo te vakomamanae Iaova.

³² Goyti oyra tamana te ka oye sa pale moro roka sa voye koykoypa no kama boysi majala vo no kama majala vo joyjuni oyra pita sa taveni te vavakatua ona vavadalo.

Vavadalo te rosu

³³ Iaova savoy te kue Mosese no Eroni,

³⁴ Sada ram kam puka te vodu ni kenani, vodu aro ko koyna ram mina tungene, no aro ko toyro rosu sa zadava te toke te vodu ta,

³⁵ boysi sa tungene toke me zo moyna to no me soynani boysi sisiama, Aro ko mia pita sa seva rosu te qo toke.

³⁶ Boysi sisiama me voytuni toke me pasa sinani oye me zo la me ile rosu, voy kareo ka pita te luboro toke mara soyna vatakabola kama dalo vo. Te rokusua ta boysi sisiama me puka la no me ile toke.

³⁷ Oye me ile rosu te dodu, no sada sa tutu ba mesiri lala sa takabula sa lavora koye sarapokae dodu,

³⁸ boysi sisiama me julo te mataqamanae toke no me kupene toke vetu tava.

³⁹ Te vavetua tava boysi sisiama me vele la me ile toke. Sada rosu sa zadava te dodu,

⁴⁰ oye me soynani oyra mara pesekesia katorae dodu sa rosu no mara sia la te ngoyni kama dalo vo te paqarania kumala.

⁴¹ Boysi sisiama me voytuni oyra mara pire tabae dodu te luoboro toke no oyra puopo ka piresia mara sia la te ngoyni kama dalo vo te paqarania kumala.

⁴² Savoy ta oye oyra mara pale oyra katora mara sokani oyra katora ka sia no mara pale lua varoqa no mara vakamere ni toke.

⁴³ Sada rosu sa takabula napu te pade te rokusua ka pesekesia katora no ka vure no ka kamere soy pade,

⁴⁴ boysi sisiama me la no me ile toke no, sada rosu sa koybo toke, sa vatakabola rosu ta sa taka mara vabieto; toke ta kama dalo vo.

⁴⁵ Toke mara pirosia oyra katorae, oyra tiba no taba kakamarae no mara iro kesini te kumala mara la sia te ngoyni kama dalo vo.

⁴⁶ Ka oye sa puka la te toke te sada sa kukupana toke, kama dalo vo me doka te vilu.

⁴⁷ Ka oye sa pam ba sa aki te luboro toke noyene me tobo oyra ona bubute.

⁴⁸ Ba sada boysi sisiama sa ile rosu kama koybo vo toke te rokusua ka kamere toke, oye me soyna vatakabola toke sa dalo, bati rosu sa nuro.

⁴⁹ Te vadoyloa toke oye me pale keri roroko no kavia nako seda, nukoso mesiri no aesopu.

⁵⁰ Oye me voyevale kieke te oyru keri roroko te sarapokae bi sa dalo sa kuo te sireke lua.

⁵¹ Sinani oye me pale azu seda, aesopu, nukoso mesiri no roroko tu, me vatopeke te madakae roroko sa lie no te bi dalo, no me repe ni toke vetu sada.

⁵² Oye me vadoylo ni toke madakae roroko, bi dalo, roroko tu, nako seda, aesopu no nukoso mesiri.

⁵³ Sinani oye me vazo roroko tu te ngoyni sa melae te paqarania kumala. Te zoka goyti oye me joyjuni sioroa toke, no toke me dalo.

⁵⁴ Goyti oyra tamanae moro roka sa voye koykoypa, tapa sa koyraka,

⁵⁵ rosu sa kabo te bubute ba toke,

⁵⁶ no buili, tapa ba leve,

⁵⁷ voy mara mia utini pita sa dalo ba kama dalo vo . Goyti oyra tamanae moro roka sa voye koykoypa no rosu.