Leviticus 10 - Seqa Full Bible

Lenae Nadabi no Abiu

¹ Keri toytulieke Eroni, Nadabi no Abiu kuru pale doyru sireke tepatepa, kuru koymo la nako te doyru sireke tepatepa no kuru valaeni pitananabu noyi; no kuru kea vavakatu kama tuqini vo Iaova, bati kuru joyjuni te ado kama voytuni vo oyru Iaova.

² Si nako sa tae me te ngoyni sa kue Iaova no sa sebe oyru, no oyru kuru lie te vakomamanae Iaova.

³ Mosese savoy te kue Eroni, Goyti pita sa ngirini Iaova sada oye savoy: Te kue oyra boysi sisiama ka me te kue ro Aro me vatere te kue oyra ko tataboyna; Te tarakenakae doyra oyra boysi taba Aro mara padapadani aqo. Eroni sa vanereke to.

⁴ Mosese sa keleke Misaele no Elazapani, keri toytulieke tamae lata Eroni taritongoa oye Uzaele, no oye savoy te kue oyru, zo me goyti; kuto vajele keri likae lata mibu te paqarania ngoyni kam kue, vaoyleni tarakenakae ngoyni tataboyna.

⁵ Si oyru kuru me no kuru kuto vajele oyru te paqarania ngoyni ka kue, sa seva Mosese sa voytuni, bubute sisiama aba kuo to te senini doyru.

⁶ Savoy ta oye Mosese sa soynani Eroni no keri toytulieke oye Eleaza no Itama, kasi vamoyo voyrangae mina me kalaveviri, no kasi reka mina bubute sa seva oyra ka noyqata, sada ram kam joyjuni pita goyti ne ram mina lie no Iaova me momani votungua doyra oyra boysi ni Izireli. Ba oyra torae mina, no oyra boysi taba ni Izireli, ka majala noyqatani oyru sa voyevale oyru Iaova te nako.

⁷ Kasi kesini ngoyni ka puka tae te toypaka variere, sada ram kam voy ta ne ram mina lie, bati ram ka vatoyboni moyna ram oela vavatabu te Iaova. Si oyra ka koype pita Mosese sa soynani oyra.

⁸ Iaova savoy te kue Eroni,

⁹ Re no keri tomlieke kasi mina turepe vaini ba ka luka karapota te oyra sada kam puka la te toypaka variere, sada kama voy mina ta ne, ram mina lie. Goyti kieke vato me kuo sua te kue ram no te kue oyra sapoko aba ka kuo me.

¹⁰ Voy ram mam mia veleke pita sa tataboyna no pita kama tataboyna vo, pita kama dalo vo no pita sa dalo,

¹¹ no mam vautinini oyra boysi ni Izireli taba tamana Iaova sa koyna ram te kue Mosese.

¹² Mosese savoy te kue Eroni no keri toytulieke oye kuru kuo sua, Eleaza no Itama, pale vavakatu vere sa kuo sua te vavakatu ka joyjuni te nako te kue Iaova no joyjuni bereti kareo isitia no mam oyke te tavelea sara barasi taboyna, bati pitanaki goyti sa tataboyna.

¹³ Oyke pitanaki ta te ngoyni tataboyna, bati pitanaki ta sa kenam re no keri tomlieke te vavakatu ka joyjuni te nako te kue Iaova; ta pita Iaova sa voytuni te kue ro.

¹⁴ Ba re no oyru keri tomlieke no oyra tomquole kam majala oyke mamanae ka kajara ni poka no doyli ka kea te kue Iaova. Oyke te ngoyni sa taveni sa dalo; kenakena ta ka koyna amo re no oyra mo so sa seva mina kenakena te kue oyra boysi ni Izireli te doyra vavakatu arakitaki.

¹⁵ Doyli no mamana ka kajara ni poka mara iro toringini mana to oyra tupurua voa ka joyjuni te nako, mara kajara ni poka te vakomamanae Iaova sa seva kieke vavakatu kajara puka. Goyti me kenam re no oyra mo so tabsadasada, sa seva Iaova sa voytuni.

¹⁶ Sada Mosese sa tanaqoylo zozoa qotia vavakatu zaqala no sa utini qoti ka noyko moyna, oye sa momani Eleaza no Itama, oyru keri toytulieke Eroni kuru kuo sua, no sa tana,

¹⁷ Be savoy rabu kama oyke mibu vavakatu zaqala te ngoyni tataboyna? Vavakatu ta sa tataboyna sua; vavakatu ta ka kea te kue rabu me palesia zaqala te oyra boysi ni Izireli no me siere oyra te vakomamanae Iaova.

¹⁸ Bati madakae pita pupura kama iro la doyra te ngoyni tataboyna, sa gae rabu mibu oyke qoti te ngoyni taboyna, sa seva aro ko voytuni.

¹⁹ Eroni sa vatavele la te kue Mosese, tava ini te oyra boysi ni Izireli ka vavakatua doyra vavakatu zaqala no doyra vavakatu katunuro te vakomamanae Iaova, ba oyra taka goyti sa doka te kue ro. Ini me kemani Iaova sada aro ko oyke vavakatu zaqala te tava ini?

²⁰ Sada Mosese sa ase pita goyti, oye sa kuritini.