Jona 1 - Seqa Full Bible

Jona Sa Poykini Buoe

¹ Ngeoro te Buoe sa me te kue Jona toytu Amitai, savoy,

² Deire no mo zola te kumala lata ni Ninive, no mola tarimini vatanae doyra zaqala, bate oyra doyra zaqala sa me takabula beito te kue ro.

³ Ba Jona sa poykini Buoe, me zola Tasisi, savoy. Oye sa suqasuru la Jopa, sa la mia keike vaka me toka voy la Tasisi. Te rokusua sa kea soypakeoa vaka, sinani oye sa gae te vaka sa zo voy la Tasisi, sa soyko poykini Buoe.

⁴ Ba Buoe sa peqani la vovosele karapota te kuolo, no sokoro ta, sa karapota varoka, posakae luka sa pusere vaka no vaka sa vatanga tapoysaka.

⁵ Oyra boysi ka jaju te vaka ka isi varoka, no ka sopiti qila la te kue doyra bangara, no oyra ka sia oyra aquru te luka, voy me siolo vaka ka voy. Ba Jona sa juolo mana la te kongae vaka, sa la bokolo no sa pam.

⁶ Boysi sa kinikini vaka sa la te kue oye no savoy, Be savoy ko pam kuoto re ne? Surutapadire no mo qila la te kue mo bangara! Moyna oye sa majala saete ita, voy oye kasi dia tepere taka, savoy.

⁷ Oyra boysi ka jaju te vaka ka arangeoroa, Me mata sia katora kodukodu, mata utini ada sa zaqala soy oye sa doka te kui ita taka goyti, kavoy. Oyra ka sia katora kokodu no katora kodukodu sa voto te kue Jona.

⁸ Oye si, oyra ka tanani oye, Soynani rami, ada ona zaqala sa doka tae taka goyti te kue ita ne? Ada pita ko joyjuni re ne? Be ngoyni ko kue me ne? Ada mo vodu ne? Be boysi ni re ne? kavoy.

⁹ Oye sa ngeoro vele la, Aro ko boysi ni Iburu, no aro ko padapadani Buoe, Bangara ni rani, oye sa joyjuni masi no vodu kava, savoy.

¹⁰ Savoy ta oye, oyra boysi jaju te vaka ka isi varoka, no oyra ka soynani oye, Be savoy re ko joyjuni pita goyti ne? kavoy. Bate oyra ka utini oye sa poykini Buoe, bate oye sa soynani moyna oyra.

¹¹ Sinani luka sa pukini vakarapota vele la. Oyra ka tanani oye, Ata pita mami joyjuni rami te kue re soy oye me bole luka ne? kavoy.

¹² Oye sa ngeoro vele la te kue oyra, Mam kutopoka aqo no sia la aqo ro te luka, no soy me bole. Aro ko utini, bate aro te soy oye sa doka tae sokoro poyu goyti, te kue ram ne.

¹³ Savoy ta oye , oyra boysi ka jaju te vaka, ka vasevapada qilu juolo la te sare. Ba kama moyuni vo oyra, bate luka sa pukini vakarapota vele la.

¹⁴ Oye si, oyra ka qila la te kue Buoe, Kei Buoe, kami pine amo re, moyna ko voyevale toyini rami lenae boysi goyti. Kasi va pale ni rami voyevalea boysi tuotuongono goyti, te kue re, kei Buoe, joyjuni pita sa va kola amo.

¹⁵ Sinani, oyra ka kutopoka Jona no ka sia la oye te luka, no dasoy sokoro sa bole.

¹⁶ Sada oyra boysi te vaka ka mia pita sa doka, oyra ka isini varoka Buoe, no oyra ka kea la keike vavakatu te kue Buoe no ka puini mara nabulu ni oye.

¹⁷ Ba Buoe sa vene keike koete poyu sa kono Jona, no Jona sa kuo te korua koete tulu tava no tulu kose.