Gat ta a hat á mbàd’id’a 34 - Bible azumeina

Matna hi Moise-sâ

¹ Moise mi tchol hur ful la Mowap-pa, mi djak akulo yam ahina d’a Nebo-d’a, mi i akulo yam ahina d’a Pisga d’a ngagad’a yam Jeriko d’ara yat ta ked’iwurenga. Ma didina mi tagam ambasa pet,

² tinï ad’ud’a Galät dei gak mba Dan, ki d’a hi Neftali-d’a, ki d’a hi Efraim-mba, ki d’a hi Manase-d’a, ki d’a hi Juda-d’a pet gak mba avun alum ma ngol ma Mediterane-na,

³ ki d’a abo ma sutna kandaga d’a papana d’a avun alum ma Jurdê-nid’a, ki hor ra Jeriko-d’a, ki Jeriko azì ma ngol ma amulongeîna nga kua na gak mba Sowar.

⁴ Ma didina mi dum ala: Wana nambas sa an hle vunan kat ki gun tad’a mi Abraham ki Isak ki Jakob ala: An mba ni hat mandjavagiya d’a. An tagangziya wa; ang wat ki irangû, wani ang mba kal kur ri.

⁵ Moise azongâ hi Ma didinina mi mit sä kolâ yam ambas sa Mowap-pa d’igi Ma didina mi de na.

⁶ Ma didina mi tozom kur hor ra yam ambas sa Mowap pa ngagad’a yam Bet-Peyor d’ara. Gak ini sa wum nga asuwam mbi.

⁷ Ata yima Moise mi mitna, bizamî kis kam dok mbà, mi mit ni kad’engêm bei iram mbi mbut zizimit ba.

⁸ Israel-lâ a tchi Moise hur ful la Mowap-pa gak burâ dok hindi. Bur ma tchina ki ma yor tad’a yam Moise-sâ daba.

⁹ Josue Nun goroma mi oî ki muzuk ma ned’a, kayam Moise mi tin abom kamu. Israel-lâ a ge yazi kä avorom d’igi Ma didina mi he vuna mi Moise na.

¹⁰ Ma djok vun Alona ma tchol aduk Israel-lâ d’igi Moise ma Ma didina mi wum ira ki ira na na nga d’i.

¹¹ Ma didina mi sunum Ezipte á ndak vun ahle suma simata kahle suma atchapma avok Faron kazungeî mama ki sum mama pet.

¹² Moise mi lahle suma mandarâ kad’enga avok Israel-lâ mi.