Madius 22 - Intas-Etipup Mat u Iesu Kristo 1863 (Aneityum Gospels)

¹ Is lep tas ecsipece ehele ra a Iesu, um ika,

² Nelcau an nohatag et idivaig natimarid is ethi, is auanetha alupas aien an natmehgan o inhalav atamaig o un,

³ um abrai ilpu aheca o un mika eri ahlaig ara vai ra eris imyiacaij ra, mika eri apan u inhag an natmehgan ara: ja eris esjum ara napanvaig.

⁴ Is lep abrai ilpu aheca o un is achei aien, um ika, Asaig ehele ra aijaua eris imyiacaij ra mika, Ek mun ago ehni nitai caig unyak ainyak: eh mun atgei kurimatau im siip upene, um lep imyiecrei ehni niji itai asega: akumu apam aijaua u inhag an natmehgan.

⁵ Ja eris esjum ara, um atga ura, is apan is ethi uman, im lep is ethi par ahtai itai:

⁶ eris arop irai ilpu aheca o un nahaiji ra, um abli ra, um atgei ra.

⁷ Is wat ato a natimarid, is atavaitap aien: um abrai ilpu eucsupo o un, mika eri apan ara um auahas ilpu atimi atgei atmas, um atnamud nuarin-pece ura.

⁸ Is ika ehele ilpu aheca o un aien, Ek mun ago ehni nitai caig unyak ainyak, ja et has nedo ura eris imyiacaij ra:

⁹ akumu apan aijaua irai efalaig, um imyiacaij ra asega aki alum ra aijaua, mika eri apam ara u inhag an natmehgan.

¹⁰ Eris apan a ilpu aheca iji ehki irai efalaig, um asjapicnaig atimi asega eris alum ra ara, ilpu atimi auatatimi im ilpu atimi upene: eris asjapicnaig u inhag an natmehgan ilpu alaig o un is ahinag.

¹¹ Is wat apan a natimarid anliin neom par alum ilpu alaig o un, is ecet natimi is ethi aien is ti napelumai uri natmehgan iran aien:

¹² is um ika ehelen aien, Ak nat eigki, na auri aiek par apam igcaki, et ti napelumai uri natmehgan iram aiek? Ja is eti tas aien.

¹³ Is um ika a natimarid ehele ilpu aheca o un, Arore neduon im nikman aijaua, um atipagki yin, um ethaig yin an naupat itac; erupu aunyauwaig ara eahki, um ataktit eijera.

¹⁴ Er ahlaig va atimi et ahinag, ja er ehtai atimi et eti elpat.

¹⁵ Eris apan a ilpu Farisi, um tas jipe, mika eri tasehlek tas o un ara.

¹⁶ Eris abraig pan ehelen ilpu atimi atahaijeg ra ara im ilpu atimi leh imi Herot. Eris ika ehelen ara, Ak natimi esege, ecra ato aijama mika, na inivaijec aiek, na esege inivaijec nedo o Atua aiek, um eti imtita atimi, um eti aktaktai natimi alupas o un tah:

¹⁷ asuptecnaig aiek ehelema, Nai ikha aiek? et itaup nahtaivaig mune imi Sisar, ka o’o?

¹⁸ Ja is ato nauatatimi ura a Iesu, um ika, Eka auri aijaua, ak ilpu atimi efaifa, par oop nyak?

¹⁹ leh pam aijaua ehelek mune er ahtai, ki almoi ainyak. Eris leh pan ehelen nuari-mune is ethi ara.

²⁰ Is ika ehele ra aien, Nalmui di ineigki, im nidai di eris aged?

²¹ Eris um ika ehelen ara, Sisar. Is um ika ehele ra aien, Alupai Sisar niji itai o Sisar; jam ahtai imi Atua niji itai o Atua.

²² Eris wat atahaijeg intas o un ara, eris imyiali ara, um ude yin, um atga ura.

²³ An nadiat iyehki eris apan ehelen a ilpu Satusi, atimi iji eigki era ika ara eri eti lep anusjai atimi emesmas, eris ahodai yin ara,

²⁴ um ika, Ak Natimi esege, is ika a Moses, El et mas tah natimi eti asvalav, etpu leh ehgan a etoan, um asvalav vai etoan.

²⁵ Eris amen ehelema ilpu raimu is seven: is leh ehgan a inmetto, um mas, is eti eteuc inhal urau, is ude ehgan aien mika yi ehgai etoan:

²⁶ is lep leh yin a etoan is ethi, im lep is ethi, um yetpan irai seven:

²⁷ is par apitac intakata, um mas:

²⁸ inyi ehgan tah ra sji eigki a di aien is seven an nadiat anusjai? eris leh yin ara asega.

²⁹ Ja is tas a Iesu, um ika ehele ra, Eka ahnag aijaua, um eti ato intas eris aged, im nemda o Atua.

³⁰ Eru wit anusjai atimi eri eti lep atmehgan ara, um eti asanlai, ja era idivaig ilpu agelo o Atua an nohatag ara.

³¹ Akis esvi aijaua intas o Atua ehelemia va nanusjai o atimi emesmas, ka o’o, is ika aien,

³² “Ek Atua o Ebraham ainyak, um lep Atua o Aisak, um lep Atua o Jekob”? Et eti Atua o ilpu atimi emesmas a Atua, ja et Atua o ilpu atimi umumoh ache aien.

³³ Eris wat atahaijeg intas ineigki natimi is ahinag, eris um imyiali nesege o un ara.

³⁴ Eris wat atahaijeg a ilpu Farisi, nikavaig, is auud yi aijiraig intas o ilpu Satusi a Iesu, eris asjapicnaig ara.

³⁵ Is oop yin natimi asuptecnaig intas is ethi ira ra, um ahodai yin, um ika,

³⁶ Ak Natimi esege, et esjilid neveh tas alep?

³⁷ Is um ika ehelen a Iesu, “Etmu aiyu inliinmopom aiek vai Ihova Atua unyum anliinmopom asega, im lep an nesgam asega, im lep an naktaktai asega unyum.”

³⁸ Intas alep uhup ineig um esjilid.

³⁹ Im lep napahvaig ineig et ethi, nikavaig, “Etmu aiyu inliinmopom aiek va atimi eblaamnem unyum, et idivaig naiyu u inliinmopom vai euc.”

⁴⁰ Nohuun tas alep asega im intas o ilpu profeta intas alep eraigki.

⁴¹ Eris wat asjapicnaig a ilpu Farisi, is ahodai ra a Iesu,

⁴² um ika, Eka ikha aijaua vai Kristo? et mapoi di aien? Eris um ika ehelen ara, Et mapoi Tevit aien.

⁴³ Is ika ehele ra aien, Is auri a Tevit par anvi nidan irai Nesgan Upene par ika Natimarid, um ika,

⁴⁴ “Is ika a Ihova ehele Natimarid unyak, Namu ateuc aiek an matak, um uhum pan naopan iyehki ekpu ikni ilpu atimi tak atimi iram ainyak mika eri itai atijai neduom iran”?

⁴⁵ Va nitai ineigki el et anvi nidan a Tevit par ika Natimarid, et echamecha et pah mapon aien?

⁴⁶ Is ehka vaig tah intasvaig ehelen, eris imtitaig natimi inlep ahodai yin vaig.