Markuq 14 - M-KU MAU SAU 1938ꓬꓰ˗ꓢꓴ ꓡꓰ ꓢꓔ ꓑꓬꓟ ꓣ ꓟ ꓔꓴ 1 ꓧꓮꓴ ꓕꓥ ꓲ ꓠꓲ ꓡꓮꓲ ꓙꓥ ꓡꓮꓲ ꓡꓳ ꓰ ꓑꓳꓲ ꓰ ꓟꓴꓠ ꓛꓶ ꓮ ꓐꓳ ꓟꓴꓗ ꓑꓳꓲ ꓙꓰ ꓐꓰ꓾ ꓧꓮꓴ ꓘꓴꓠ ꓘꓶꓠ ꓙꓳꓥ ꓮ ꓖꓲ ꓑꓰ ꓰ ꓟꓮꓴ ꓢꓮꓴ ꓗ ꓢ ꓣ ꓑꓰ ꓬꓥ ꓡꓰ ꓘ ꓢꓴ ꓗꓴꓔ ꓟꓪꓲ ꓚꓴꓑ ꓬꓴ ꓡꓪꓲ꓾ ꓪꓳ ꓢꓔ ꓑꓬꓟ ꓣ ꓘꓬꓳ ꓧꓳ ꓔꓳ ꓮ ꓗꓳ꓿ 2 ꓥꓴꓔ ꓗꓳ ꓡꓥ ꓬꓥ ꓟꓳ ꓖꓶ ꓟꓶꓥ ꓐꓬꓴ ꓑꓰ ꓮ ꓗʼꓐꓬꓳꓥ ꓡꓳ ꓫꓥ ꓖ꓾ ꓑꓳꓲ ꓗꓴꓔ ꓴ ꓡꓰ ꓮ ꓥꓴꓔ ꓫꓥ ꓖ꓾ ꓖ ꓡꓪꓲ꓾ ꓔꓮꓲ ꓗꓳ ꓰ꓿ ꓟ˗ꓣꓲ ꓖꓶ ꓬꓰ˗ꓢꓴ ꓴ ꓡꓴꓟ ꓕꓳ ꓟ ꓞꓴ ꓫꓳ ꓖꓬꓴꓠ ꓐꓲ ꓰ 3 ꓮ ꓘꓪꓲ ꓬꓰ˗ꓢꓴ ꓖꓶ ꓐꓰ˗ꓕ˗ꓠꓲ ꓓꓴꓟ ꓟ ꓟꓥꓺ ꓖꓟ ꓓꓑ ꓰ ꓢꓲ˗ꓟꓴꓠ ꓬꓴꓟ ꓟ ꓜꓥ ꓜꓳ ꓠꓲ ꓡꓰ꓾ ꓟꓲ ꓪꓰ ꓣ ꓬꓴ ꓙ ꓒꓮꓴ ꓰ ꓠ ꓣ ꓓꓴ ꓙꓰꓔ ꓐꓳ ꓰ ꓡꓴ ꓒꓬꓴ ꓖꓳꓟ ꓛꓴꓥ ꓡꓰ ꓡꓪꓲ꓾ ꓧꓮꓴ ꓡꓰ ꓡꓥ ꓘꓬꓪꓲ ꓡꓪꓲ꓾ ꓬꓥ ꓴ ꓡꓴꓟ ꓕꓳ ꓟ ꓫꓳ ꓖꓬꓴꓠ ꓐꓲ ꓰ꓿ 4 ꓧꓮꓴ ꓟꓴ ꓡꓪꓲ꓾ ꓣ ꓪꓟ ꓖꓶ꓾ ꓪꓴ ꓠꓲꓗ ꓬꓳ ꓐꓴꓟ ꓗꓳ ꓡꓪꓲ꓾ ꓫꓲ ꓠꓟ ꓥꓳꓠ ꓞꓴ ꓡꓰ ꓧꓮꓲ ꓟꓴ ꓮ ꓧ ꓮ ꓖꓳ ꓗꓴꓔ ꓑꓬꓟ ꓡꓰ ꓕ꓾ 5 ꓧꓮꓴ ꓠꓟ ꓥꓳꓠ ꓞꓴ ꓡꓰ ꓢꓴꓟ ꓫꓳ ꓛꓑ ꓰ ꓴꓥ ꓡꓪꓲ꓾ ꓮ ꓫꓳ ꓮ ꓪꓲ ꓐꓥ ꓡꓰ ꓪꓳ ꓖꓟ ꓐꓲ ꓣ ꓥꓴꓔ ꓡꓰ꓾ ꓖ ꓡꓪꓲ꓾ ꓫꓶʼꓓ ꓓ ꓔꓮꓲ ꓡꓴꓟ ꓗꓳ ꓰ꓿ ꓧꓮꓴ ꓟꓲ ꓪꓰ ꓡꓰ ꓬꓥ ꓟꓳ ꓔꓠ ꓑꓬꓟ ꓗꓳ ꓰ꓿ 6 ꓧꓮꓴ ꓟꓴ ꓡꓪꓲ꓾ ꓬꓰ˗ꓢꓴ ꓖꓶ꓾ ꓧꓮꓴ ꓟꓲ ꓪꓰ ꓜꓳ ꓡꓰ ꓠꓲ ꓠꓲ ꓫꓥ ꓖ꓾ ꓠꓴꓥ ꓟꓳ ꓧꓮꓲ ꓟꓴ ꓬꓥ ꓡꓰ ꓫꓶʼꓝꓥ ꓠꓲ ꓮ ꓗꓳ ꓕ꓾ ꓬꓥ ꓖꓶ ꓥꓳ ꓡꓰ ꓖꓰ ꓮ ꓟꓴ ꓗꓴꓔ ꓔꓳ ꓡꓰ꓿ 7 ꓟꓬꓴꓥ ꓐꓥ ꓠꓴꓥ ꓟꓳ ꓰ ꓬꓲ ꓫꓶ ꓣ ꓧ ꓠꓲ ꓠꓲ ꓡꓪꓲ꓾ ꓠꓴꓥ ꓟꓳ ꓳ ꓰ ꓣ ꓙꓴꓥ ꓜ ꓬꓥ ꓟꓳ ꓡꓰ ꓘ ꓠꓟ ꓡꓰ ꓮ ꓗꓬꓴ ꓪꓳ ꓗꓴꓔ ꓗꓳ ꓡꓥ꓾ ꓥꓳ ꓖꓶ ꓠꓴꓥ ꓟꓳ ꓰ ꓬꓲ ꓫꓶ ꓣ ꓧ ꓪꓳ ꓠꓲ ꓠꓲ ꓣ ꓮ ꓥꓴꓔ꓿ 8 ꓬꓥ ꓖꓶ ꓪꓳ ꓗꓴꓔ ꓰ ꓟꓬꓳ ꓗꓴꓔ ꓐꓰ꓿ ꓟꓬꓴꓑ ꓬꓴꓟ ꓣ ꓟ ꓔꓴ ꓬꓥ ꓖꓶ ꓥ ꓖꓴꓥ ꓡꓰ ꓧꓶ ꓐꓴꓔ ꓐꓲ ꓐꓰ꓿ 9 ꓠꓴꓥ ꓟꓳ ꓡꓰ ꓥꓳ ꓔꓰꓥ ꓔꓰꓥ ꓔꓮꓲ ꓰ ꓖꓶ꓾ ꓧꓮꓴ ꓗ ꓐꓴ ꓖ ꓣ ꓓꓥ ꓡꓴ ꓡꓰ ꓟꓲ ꓓꓟ ꓕꓳ ꓟ ꓙꓳ ꓪꓳ ꓘꓥ ꓟꓳ ꓟ ꓠꓬꓳ ꓟꓳ ꓠꓲ ꓡꓰ꓾ ꓬꓥ ꓰ ꓟ ꓢꓔ ꓓꓴꓔ ꓠꓲ ꓣ ꓟ ꓔꓴ꓾ ꓬꓥ ꓗꓴꓔ ꓔꓳ ꓰ ꓮ ꓟꓴ ꓘꓮꓲ ꓫꓲꓔ ꓐ ꓗꓳ ꓣ꓾ ꓖ ꓡꓪꓲ꓾ ꓔꓮꓲ ꓰ꓿ ꓬꓴ˗ꓓ ꓬꓰ˗ꓢꓴ ꓡꓰ ꓮꓑ ꓑꓬꓟ ꓰ 10 ꓧꓮꓴ ꓘꓴꓠ ꓡ ꓖꓬꓳ ꓣ ꓞꓰ ꓲ ꓬꓴ ꓟ ꓰ ꓬꓴ˗ꓓ ꓲꓢ˗ꓘ˗ꓣꓴꓔ ꓖꓶ ꓬꓰ˗ꓢꓴ ꓡꓰ ꓘꓶꓠ ꓙꓳꓥ ꓮ ꓖꓲ ꓑꓰ ꓡꓳ ꓟ ꓮꓑ ꓐꓲ ꓣ ꓟ ꓔꓴ ꓬꓥ ꓟꓳ ꓚꓥ ꓫꓴꓔ ꓕꓳ ꓰ ꓡꓳ ꓰ꓿ 11 ꓬꓥ ꓟꓳ ꓧꓮꓴ ꓘꓬꓳ ꓡꓰ ꓪꓳ ꓖꓬꓳ ꓡꓰ꓾ ꓗ ꓐꓴ ꓐꓴꓟ ꓗꓳ ꓡꓪꓲ꓾ ꓬꓮ ꓡꓰ ꓥꓴꓠ ꓐꓲ ꓣ ꓘꓟ ꓬꓴ ꓗꓳ ꓰ꓾ ꓧꓮꓴ ꓟꓴ ꓡꓪꓲ ꓬꓥ ꓡꓰ ꓘ ꓢꓴ ꓗꓴꓔ ꓪꓳ ꓮꓑ ꓐꓲ ꓣ꓾ ꓖꓰ ꓮꓥ ꓰ ꓘꓬꓳ ꓟꓲꓔ ꓧꓳ ꓠꓲ ꓡꓰ꓿ ꓡꓳ ꓡꓮꓲ ꓑꓳꓲ ꓜꓳ ꓙꓥ ꓡꓰ ꓧꓳ ꓰ 12 ꓮ ꓘꓪꓲ ꓧꓮꓴ ꓡꓮꓲ ꓡꓳ ꓘꓶꓥ ꓖ ꓡꓰ ꓢꓔ ꓗꓳ ꓰ꓾ ꓟꓴꓠ ꓛꓶ ꓮ ꓐꓳ ꓟꓴꓗ ꓑꓳꓲ ꓢꓥ ꓧꓶ ꓠꓲ ꓡꓰ꓾ ꓬꓰ˗ꓢꓴ ꓡ ꓖꓬꓳ ꓑꓰ ꓖꓶ꓾ ꓧꓮꓴ ꓡꓮꓲ ꓡꓳ ꓰ ꓑꓳꓲ ꓠꓥ ꓜꓳ ꓣ꓾ ꓘ ꓙꓳ ꓪꓳ ꓟ ꓠꓥ ꓰ ꓟ ꓔꓴ ꓰ ꓡ ꓙꓥ ꓣ ꓠꓥ ꓳ ꓔꓳ ꓡꓰ ꓡꓴ꓾ ꓖ ꓡꓪꓲ꓾ ꓬꓥ ꓡꓰ ꓟꓲ ꓗꓳ ꓰ꓿ 13 ꓧꓮꓴ ꓘꓴꓠ ꓬꓥ ꓰ ꓡ ꓖꓬꓳ ꓲ ꓬꓴ ꓡꓰ ꓬꓥ ꓠꓥ ꓗꓔ ꓡꓪꓲ꓾ ꓧꓮꓴ ꓪ ꓫꓴꓔ ꓰ ꓡꓳ ꓗꓰ꓾ ꓲ ꓚꓟ ꓮꓴ ꓐꓴꓥ ꓪ ꓢꓴ ꓰ ꓠꓴꓥ ꓠꓲꓗ ꓧꓪꓲ ꓣ꓾ ꓬꓥ ꓚꓥ ꓛꓥ ꓡꓪꓲ꓾ 14 ꓬꓥ ꓘ ꓟ ꓪꓥ ꓗꓳ ꓡꓥ꓾ ꓧꓮꓴ ꓬꓴꓟ ꓰ ꓬꓴꓟ ꓢꓶꓥ ꓡꓰ꓾ ꓥ ꓰ ꓡ ꓖꓬꓳ ꓪꓲ ꓰ ꓣ ꓧ꓾ ꓧꓮꓴ ꓡꓮꓲ ꓡꓳ ꓰ ꓑꓳꓲ ꓡꓰ ꓥꓳ ꓜꓳ ꓣ ꓥ ꓰ ꓐꓶꓥ ꓖꓳꓗ ꓘ ꓟ ꓙꓳ ꓡꓰ꓾ ꓖ ꓡꓪꓲ꓾ ꓢ ꓣ ꓟꓲ ꓠꓥ ꓗꓔ ꓰ꓾ ꓥꓴ ꓗꓰ꓿ 15 ꓧꓮꓴ ꓘꓴꓠ ꓧꓰꓠ ꓔꓳ ꓰ ꓮ ꓕꓳ ꓖꓳꓗ ꓟꓳ ꓬꓥ ꓠꓴꓥ ꓠꓲꓗ ꓡꓰ ꓫꓲꓔ ꓣ ꓥꓴꓔ ꓡꓰ꓾ ꓧꓮꓴ ꓟ ꓲ ꓠꓴꓥ ꓟ ꓔꓴ ꓧꓰꓠ ꓔꓳ ꓡꓥ ꓗꓰ꓾ ꓖ ꓡꓪꓲ꓾ ꓔꓮꓲ ꓗꓔ ꓰ꓿ 16 ꓧꓮꓴ ꓡ ꓖꓬꓳ ꓠꓲꓗ ꓕꓳ ꓡꓳ ꓡꓪꓲ꓾ ꓪ ꓘꓮꓴ ꓒꓬꓥ ꓪꓥ ꓡꓳ ꓡꓰ꓾ ꓬꓥ ꓔꓮꓲ ꓰ ꓣ ꓙꓴꓥ ꓜ ꓟꓬꓥ ꓗꓳ ꓰ ꓟꓴ ꓡꓪꓲ꓾ ꓧꓮꓴ ꓡꓮꓲ ꓡꓳ ꓰ ꓑꓳꓲ ꓧꓰꓠ ꓔꓳ ꓗꓳ ꓰ꓿ ꓬꓰ˗ꓢꓴ ꓡꓰ ꓮꓑ ꓑꓬꓟ ꓣ ꓘꓬꓳ ꓠꓬꓳ ꓟꓳ ꓐꓲ ꓰ 17 ꓮ ꓘꓪꓲ ꓟꓮꓴ ꓛꓴꓔ ꓫꓴꓟ ꓡꓰ ꓧꓮꓴ ꓡ ꓖꓬꓳ ꓣ ꓞꓰ ꓲ ꓬꓴ ꓰ ꓣ ꓧ ꓬꓥ ꓙꓰ ꓡꓰ ꓰ꓾ 18 ꓬꓥ ꓟꓳ ꓜꓥ ꓜꓳ ꓜꓴꓥ ꓔꓳ ꓘꓴꓠ꓾ ꓬꓰ˗ꓢꓴ ꓖꓶ꓾ ꓥꓳ ꓠꓴꓥ ꓟꓳ ꓡꓰ ꓔꓰꓥ ꓔꓰꓥ ꓔꓮꓲ ꓗꓬꓳ ꓗꓳ ꓡꓰ꓾ ꓥꓳ ꓰ ꓣ ꓧ ꓜꓳ ꓠꓲ ꓰ ꓠꓴꓥ ꓟꓳ ꓚꓥ ꓟ ꓣ ꓬꓴ ꓖꓶ ꓥꓳ ꓡꓰ ꓣꓮꓴ ꓴꓥ ꓑꓬꓟ ꓐꓰ꓾ ꓖ ꓰ꓿ 19 ꓬꓥ ꓟꓳ ꓬꓴ ꓖꓶ ꓖꓬꓳ ꓬꓳꓠ ꓡꓪꓲ꓾ ꓣ ꓬꓴ ꓰ ꓣ ꓬꓴ꓾ ꓥꓳ ꓥꓴꓔ ꓔꓳ ꓡꓰ ꓡꓴ꓾ ꓖ ꓡꓪꓲ꓾ ꓬꓥ ꓡꓰ ꓟꓲ ꓗꓳ ꓰ꓿ 20 ꓬꓥ ꓖꓶ꓾ ꓧꓮꓴ ꓣ ꓞꓰ ꓲ ꓬꓴ ꓟ ꓡꓳꓟ ꓰ ꓥꓳ ꓰ ꓘꓳ ꓟ ꓡꓳ ꓣ ꓧ ꓡꓑ ꓢꓴ ꓧꓮꓴ ꓬꓴ ꓥꓴꓔ ꓡꓰ꓿ 21 ꓗ ꓔꓳ ꓐꓰ ꓰ ꓣ ꓙꓴꓥ ꓜ꓾ ꓧꓮꓴ˗ꓐꓬꓴ˗ꓬꓥ˗ꓜꓳ ꓖꓶ ꓡꓳ ꓐ ꓣ꓾ ꓥꓴꓔ ꓗꓳ ꓡꓥ ꓧꓮꓴ˗ꓐꓬꓴ˗ꓬꓥ˗ꓜꓳ ꓡꓰ ꓮꓑ ꓑꓬꓟ ꓢꓴ ꓚꓥ ꓮ ꓓꓟ ꓙꓳ ꓣ ꓥꓴꓔ ꓡꓰ꓾ ꓧꓮꓴ ꓐꓬꓴ ꓮ ꓘꓴ ꓔꓳ ꓡꓰ ꓖꓶ ꓬꓥ ꓟ ꓔꓴ ꓙꓰ ꓖꓰ ꓔꓳ ꓣ꓾ ꓖ ꓡꓪꓲ꓾ ꓬꓥ ꓟꓳ ꓡꓰ ꓔꓮꓲ ꓰ꓿ ꓬꓰ˗ꓢꓴ ꓰ ꓟꓲꓠ ꓜꓥ ꓜꓳ ꓰ ꓡꓲ 22 ꓬꓥ ꓟꓳ ꓜꓥ ꓜꓳ ꓠꓲ ꓡꓰ꓾ ꓬꓥ ꓟꓴꓗ ꓬꓴ ꓡꓪꓲ꓾ ꓫꓶʼꓟꓠ ꓐꓲ ꓟꓴ꓾ ꓮ ꓙꓑ ꓙꓑ ꓗꓴꓔ ꓡꓪꓲ꓾ ꓬꓥ ꓟꓳ ꓡꓰ ꓐꓲ ꓴ ꓚꓥ꓾ ꓬꓴ ꓗꓰ꓾ ꓧꓮꓴ ꓖꓶ ꓥ ꓰ ꓖꓴꓥ ꓥꓴꓔ ꓡꓰ꓾ ꓖ ꓔꓮꓲ ꓰ꓿ 23 ꓖꓳꓟ ꓡꓰ ꓓꓴꓟ ꓬꓴ ꓡꓪꓲ꓾ ꓘꓬ ꓳꓠ ꓬꓮꓴ ꓙꓥ ꓬꓥ ꓟꓳ ꓡꓰ ꓐꓲ ꓡꓪꓲ꓾ ꓬꓥ ꓟꓳ ꓡꓴꓥ ꓡꓥ ꓧꓮꓴ ꓟꓮꓲ ꓫꓴ ꓗꓳ ꓰ꓿ 24 ꓬꓥ ꓟꓳ ꓡꓰ ꓬꓥ ꓔꓮꓲ ꓰ ꓖꓶ꓾ ꓧꓮꓴ ꓖꓶ ꓐꓬꓴ ꓟꓬꓳ ꓟꓬꓳ ꓐꓥ ꓰ ꓟ ꓔꓴ ꓫꓳ ꓑꓬꓟ ꓐꓲ ꓰ ꓧꓮꓴ ꓓꓥ ꓢʼꓓꓲ ꓰ ꓢꓰꓥ ꓰ ꓥ ꓢꓪꓲ ꓥꓴꓔ ꓡꓰ꓾ 25 ꓠꓴꓥ ꓟꓳ ꓡꓰ ꓥꓳ ꓔꓰꓥ ꓔꓰꓥ ꓔꓮꓲ ꓗꓳ ꓡꓰ꓾ ꓗ˗ꓣꓮꓲ ꓗ˗ꓢꓥ ꓟꓶꓥ ꓟ ꓝꓶʼꓐꓲ ꓢꓶꓗ ꓪꓳ ꓫꓴ ꓣ ꓐꓪꓲ ꓠꓲ ꓙꓰ ꓫꓳ꓾ ꓫꓲ ꓝꓶʼꓐꓲ ꓠꓪꓲ ꓰ ꓫꓶ ꓟ ꓣ ꓡꓲꓥ ꓡꓥ ꓓꓴꓟ ꓫꓴ ꓣ ꓮ ꓥꓴꓔ꓾ ꓖ ꓰ꓿ 26 ꓧꓮꓴ ꓕꓥ ꓫꓶʼꓗꓳꓠ ꓘꓬ ꓳꓠ ꓬꓮꓴ ꓙꓥ ꓬꓥ ꓟꓳ ꓖꓶ ꓝꓠ ꓡꓴꓠ ꓐꓴꓟ ꓫꓴꓔ ꓕꓳ ꓡꓳ ꓗꓳ ꓰ꓿ ꓬꓰ˗ꓢꓴ ꓖꓶ ꓑꓰ˗ꓔꓣꓴ ꓬꓥ ꓡꓰ ꓠꓬꓑ ꓑꓬꓟ ꓣ ꓘꓬꓳ ꓢꓥ ꓧꓶ ꓡꓰ ꓔꓮꓲ ꓐꓲ ꓰ 27 ꓧꓮꓴ ꓘꓴꓠ ꓬꓰ˗ꓢꓴ ꓬꓥ ꓟꓳ ꓡꓰ ꓔꓮꓲ ꓰ ꓖꓶ꓾ ꓠꓴꓥ ꓟꓳ ꓡꓴꓥ ꓡꓥ ꓟꓲꓔ ꓡꓲꓥ ꓐꓔ ꓗꓳ ꓣ꓾ ꓘ ꓢꓴ ꓟꓴ ꓖ ꓡꓰ꓾ ꓢꓮꓴ ꓜꓴꓥ ꓢꓴ ꓡꓰ ꓥꓳ ꓐꓔ ꓢꓔ ꓡꓪꓲ꓾ ꓢꓮꓴ ꓑꓰ ꓐꓬꓳ ꓐꓬꓴ ꓐ ꓗꓳ ꓣ꓾ ꓖ ꓡꓪꓲ꓾ ꓗ ꓔꓳ ꓐꓰ꓿ 28 ꓥꓴꓔ ꓗꓳ ꓡꓥ꓾ ꓥꓳ ꓓꓴꓟ ꓔꓳ ꓡꓳ ꓕꓥ ꓡꓰ꓾ ꓖ˗ꓡꓲ˗ꓡꓰ ꓟꓶꓥ ꓟ ꓥꓳ ꓠꓴꓥ ꓟꓳ ꓧꓶ ꓟ ꓰ ꓡꓳ ꓡꓥ ꓣ꓾ ꓖ ꓔꓮꓲ ꓰ꓾ 29 ꓧꓮꓴ ꓘꓴꓠ ꓑꓰ˗ꓔꓣꓴ ꓖꓶ ꓡꓴꓥ ꓡꓥ ꓐꓥ ꓡꓥ ꓟꓲꓔ ꓡꓲꓥ ꓐꓔ ꓐꓬꓴ ꓗꓳ ꓡꓥ ꓥꓳ ꓮ ꓡꓳꓟ ꓣ꓾ ꓖ ꓡꓪꓲ꓾ ꓬꓥ ꓡꓰ ꓔꓮꓲ ꓰ꓿ 30 ꓬꓰ˗ꓢꓴ ꓚꓮꓴ ꓖꓶ꓾ ꓠꓥ ꓡꓰ ꓥꓳ ꓔꓰꓥ ꓔꓰꓥ ꓔꓮꓲ ꓗꓬꓳ ꓡꓰ꓾ ꓘꓴ ꓟꓲꓠ ꓡꓥ ꓪꓳ ꓲ ꓘꓴꓠ ꓮ ꓔꓴꓠ ꓫꓲ ꓡꓰ꓾ ꓠꓥ ꓥꓳ ꓡꓰ ꓢꓴꓟ ꓡꓲꓥ ꓠꓬꓑ ꓑꓬꓟ ꓣ ꓖ ꓰ꓿ 31 ꓑꓰ˗ꓔꓣꓴ ꓚꓮꓴ ꓖꓶ꓾ ꓠꓥ ꓰ ꓣ ꓧ ꓫꓲ ꓗꓳ ꓡꓥ ꓥꓳ ꓠꓥ ꓡꓰ ꓮ ꓠꓬꓑ ꓑꓬꓟ ꓣ꓾ ꓖ ꓡꓪꓲ꓾ ꓙ ꓙ ꓔꓮꓲ ꓰ꓿ ꓬꓥ ꓟꓳ ꓡꓴꓥ ꓡꓥ ꓐꓥ ꓧꓮꓴ ꓰ ꓣ ꓙꓴꓥ ꓜ ꓛꓥ ꓔꓮꓲ ꓗꓳ ꓰ꓿ ꓬꓰ˗ꓢꓴ ꓖꓰ˗ꓝꓰ˗ꓟꓠ ꓢꓴꓠ ꓟ ꓮ ꓗꓬꓴ ꓓꓴꓥ ꓰ 32 ꓖꓰ˗ꓝꓰ˗ꓟꓠ ꓖ ꓰ ꓙꓳ ꓪꓳ ꓫꓴꓔ ꓬꓥ ꓟꓳ ꓙꓰ ꓰ ꓗꓳ ꓡꓪꓲ꓾ ꓬꓥ ꓖꓶ꓾ ꓥꓳ ꓮ ꓗꓬꓴ ꓓꓴꓥ ꓠꓲ ꓡꓰ꓾ ꓠꓴꓥ ꓟꓳ ꓫꓲ ꓟ ꓠꓲ ꓡꓥ ꓗꓰ꓾ ꓖ ꓡꓪꓲ꓾ ꓬꓥ ꓰ ꓡ ꓖꓬꓳ ꓑꓰ ꓡꓰ ꓔꓮꓲ ꓰ꓿ 33 ꓧꓮꓴ ꓘꓴꓠ ꓑꓰ˗ꓔꓣꓴ꓾ ꓬ˗ꓗꓴ꓾ ꓬꓳ˗ꓧꓠ ꓑꓰ ꓡꓰ ꓬꓥ ꓰ ꓣ ꓧ ꓪꓴꓔ ꓫꓪꓲ ꓬꓴ ꓟꓴ꓾ ꓬꓥ ꓰ ꓲ ꓟꓲꓔ ꓟꓗ ꓡꓳ ꓡꓰ ꓰ꓾ ꓟꓲꓔ ꓪꓲ ꓠꓲꓗ ꓘꓲꓗ ꓙ ꓧꓪꓲ ꓡꓪꓲ꓾ 34 ꓥ ꓰ ꓲ ꓟꓲꓔ ꓫꓲ ꓫꓳ ꓟꓲꓔ ꓬꓳꓠ ꓟꓳ ꓧꓪꓲ ꓔꓳ ꓡꓰ꓾ ꓫꓲ ꓟ ꓠꓲ ꓠꓲ ꓡꓪꓲ꓾ ꓟ ꓚ ꓠꓲ ꓡꓥ ꓗꓰ꓾ ꓖ ꓡꓪꓲ꓾ ꓔꓮꓲ ꓔꓳ ꓰ꓿ 35 ꓧꓮꓴ ꓘꓴꓠ ꓧꓮꓴ ꓟꓮꓲ ꓬꓥ ꓣ ꓜꓪꓲ ꓡꓮꓲ ꓰ ꓡꓳ ꓡꓪꓲ꓾ ꓟꓲ ꓖꓴꓥ ꓥꓳꓟ ꓖꓳꓑ ꓴ ꓚꓥ꓾ ꓧꓮꓴ ꓬꓟ ꓡꓰ ꓬꓥ ꓚꓥ ꓟꓮꓲ ꓪꓳ ꓡꓳ ꓡꓮꓲ ꓡꓰ ꓖꓶ꓾ ꓡꓳ ꓡꓮꓲ ꓑꓬꓟ ꓣ꓾ ꓖ ꓡꓪꓲ꓾ 36 ꓮ˗ꓐ ꓪ ꓰ꓾ ꓡꓴꓥ ꓡꓥ ꓡꓰ ꓠꓥ ꓪꓳ ꓗꓴꓔ ꓡꓰ꓾ ꓫꓲ ꓖꓳꓟ ꓡꓰ ꓥ ꓚꓥ ꓟꓮꓲ ꓡꓳ ꓡꓮꓲ ꓑꓬꓟ ꓐꓲ ꓣ꓾ ꓥꓴꓔ ꓗꓳ ꓡꓥ ꓥ ꓰ ꓲ ꓟꓲꓔ ꓮ ꓥꓴꓔ꓾ ꓠꓥ ꓰ ꓲ ꓟꓲꓔ ꓜ ꓥꓴꓔ ꓫꓥ ꓖ꓾ ꓖ ꓡꓪꓲ꓾ ꓓꓴꓥ ꓰ꓿ 37 ꓮ ꓘꓪꓲ ꓬꓥ ꓓꓴꓟ ꓡꓳ ꓡꓰ ꓬꓥ ꓟꓳ ꓬꓴꓑ ꓥꓳꓠ ꓠꓲ ꓗꓳ ꓰ ꓡꓰ ꓡꓳ ꓟꓬꓥ ꓰ ꓥꓴꓔ ꓡꓪꓲ꓾ ꓑꓰ˗ꓔꓣꓴ ꓡꓰ꓾ ꓢꓲ˗ꓟꓴꓠ ꓰ꓾ ꓠꓥ ꓬꓴꓑ ꓥꓳꓠ ꓠꓲ ꓡꓰ ꓡꓴ꓾ ꓣ ꓬꓟ ꓜ ꓡꓥ ꓮ ꓪꓳ ꓟ ꓚ ꓫʼꓣꓥ ꓡꓴ꓿ 38 ꓖꓴꓟ ꓡꓮꓴ ꓰ ꓮ ꓙꓰ ꓫꓥ ꓖ ꓮ ꓗꓬꓴ ꓓꓴꓥ ꓟ ꓚ ꓠꓲ ꓗꓰ꓾ ꓪꓳꓲ ꓠꓲ ꓖꓶ ꓓꓳꓥ ꓠꓲ ꓡꓰ꓾ ꓖꓴꓥ ꓫꓳ ꓡꓴꓟ ꓪꓴꓟ ꓮ ꓐꓳ꓾ ꓖ ꓡꓪꓲ꓾ ꓔꓮꓲ ꓰ꓾ 39 ꓬꓥ ꓓꓴꓟ ꓰ ꓡꓪꓲ꓾ ꓧꓶ ꓟ ꓓꓥ ꓡꓰ ꓑꓴ ꓓꓴꓥ ꓰ꓾ 40 ꓓꓴꓟ ꓔꓮꓴ ꓡꓳ ꓡꓰ꓾ ꓬꓥ ꓟꓳ ꓟꓬꓳ ꓬꓴꓑ ꓟꓪꓲ ꓰ ꓬꓠ ꓟꓮꓲ꓾ ꓬꓥ ꓟꓳ ꓣꓴ ꓬꓴꓑ ꓥꓳꓠ ꓠꓲ ꓗꓳ ꓰ ꓡꓰ꓾ ꓬꓥ ꓟꓬꓥ ꓡꓪꓲ꓾ ꓬꓥ ꓡꓰ ꓘ ꓢꓴ ꓥꓴ ꓔꓴ ꓣ ꓬꓥ ꓟꓳ ꓮ ꓢꓰ ꓗꓳ꓿ 41 ꓢꓴꓟ ꓡꓲꓥ ꓐꓔ ꓔꓮꓴ ꓡꓳ ꓡꓰ꓾ ꓠꓴꓥ ꓟꓳ ꓖꓶ ꓣꓴ ꓬꓴꓑ ꓥꓳꓠ꓾ ꓠꓳ ꓬꓴ ꓫꓲ ꓗꓰ꓾ ꓖꓰ ꓐꓰ꓾ ꓬꓟ ꓙꓰ ꓐꓰ꓾ ꓪꓴ ꓗꓰ꓾ ꓧꓮꓴ˗ꓐꓬꓴ˗ꓬꓥ˗ꓜꓳ ꓖꓶ ꓬꓴ ꓐꓗ ꓓꓑ ꓐꓥ ꓰ ꓡꓳ ꓟ ꓮꓑ ꓑꓬꓟ ꓰ ꓧꓪꓲ ꓐ ꓣ꓾ 42 ꓔꓳ ꓗꓰ꓾ ꓰ ꓡꓳ ꓫꓥ꓾ ꓪꓴ ꓗꓰ꓾ ꓥꓳ ꓡꓰ ꓮꓑ ꓑꓬꓟ ꓣ ꓢꓴ ꓖꓶ ꓚꓥ ꓡꓰ ꓐꓰ꓾ ꓖ ꓡꓪꓲ꓾ ꓬꓥ ꓟꓳ ꓡꓰ ꓔꓮꓲ ꓰ꓿ ꓬꓰ˗ꓢꓴ ꓡꓰ ꓚꓴꓑ ꓬꓴ ꓰ 43 ꓬꓥ ꓓꓥ ꓣꓴ ꓔꓮꓲ ꓠꓲ ꓮ ꓫꓲ ꓡꓰ ꓡꓥ꓾ ꓡ ꓖꓬꓳ ꓣ ꓞꓰ ꓲ ꓬꓴ ꓟ ꓡꓳꓟ ꓰ ꓬꓴ˗ꓓ ꓰ꓾ ꓘꓶꓠ ꓙꓳꓥ ꓮ ꓖꓲ ꓑꓰ ꓟꓮꓴ ꓢꓮꓴ ꓗ ꓢ ꓣ ꓑꓰ ꓮ ꓖꓲ ꓢꓴ ꓪꓴꓠ ꓑꓰ ꓚꓥ ꓟ꓾ ꓫꓟ ꓰ ꓘꓳꓠ ꓛꓴꓥ ꓰ ꓫꓶʼꓪ ꓒꓴꓥ ꓬꓥ ꓰ ꓣ ꓧ ꓙꓰ ꓡꓰ ꓗꓳ ꓰ꓿ 44 ꓬꓥ ꓡꓰ ꓮꓑ ꓑꓬꓟ ꓣ ꓢꓴ ꓬꓴ ꓖꓶ꓾ ꓥꓳ ꓑꓴꓑ ꓰ ꓢꓴ ꓖꓶ ꓧꓮꓴ ꓬꓴ ꓥꓴꓔ ꓔꓳ ꓡꓰ꓾ ꓬꓥ ꓡꓰ ꓚꓴꓑ ꓬꓴ ꓡꓪꓲ꓾ ꓢ ꓓꓲ ꓰ ꓫꓪꓲ ꓡꓳ ꓗꓰ꓾ ꓖ ꓡꓪꓲ꓾ ꓬꓥ ꓟꓳ ꓡꓰ ꓢꓰ ꓣ ꓘꓳ ꓓꓳꓥ ꓫꓲꓔ ꓔꓳ ꓐꓰ꓿ 45 ꓧꓮꓴ ꓟꓴ ꓡꓪꓲ ꓙꓰ ꓰ ꓘꓴꓠ ꓙꓥ ꓬꓥ ꓬꓰ˗ꓢꓴ ꓚꓥ ꓘꓬꓰ ꓗꓴꓔ ꓰ ꓡꓳ ꓟꓴ꓾ ꓣ˗ꓐꓮꓲ ꓰ꓾ ꓖ ꓡꓪꓲ꓾ ꓬꓥ ꓡꓰ ꓑꓴꓑ ꓰ꓾ 46 ꓧꓮꓴ ꓘꓴꓠ ꓬꓥ ꓟꓳ ꓖꓶ ꓬꓥ ꓡꓰ ꓫꓰ ꓡꓪꓲ꓾ ꓚꓴꓑ ꓬꓴ ꓗꓳ ꓰ꓿ 47 ꓥꓴꓔ ꓗꓳ ꓡꓥ ꓠꓟ ꓟ ꓬꓑ ꓠꓲ ꓰ ꓐꓥ ꓚꓥ ꓟ ꓣ ꓬꓴ꓾ ꓫꓟ ꓫꓰ ꓡꓪꓲ꓾ ꓘꓶꓠ ꓙꓳꓥ ꓮ ꓖꓲ ꓰ ꓙꓴꓠ ꓡꓰ ꓜꓠ ꓡꓪꓲ꓾ ꓬꓥ ꓰ ꓠꓳ ꓒꓬꓳ ꓐꓲꓔ ꓐꓬꓴ ꓰ꓿ 48 ꓬꓰ˗ꓢꓴ ꓚꓮꓴ ꓖꓶ꓾ ꓠꓴꓥ ꓟꓳ ꓖꓶ ꓛꓥ ꓓꓮꓴ ꓓ ꓟꓬ ꓡꓰ ꓚꓴꓑ ꓬꓴ ꓣ ꓢꓴ ꓥꓳ ꓡꓰ ꓚꓴꓑ ꓬꓴ ꓣ꓾ ꓫꓟ꓾ ꓘꓳꓠ ꓰ ꓟꓴ ꓡꓪꓲ꓾ ꓕꓳ ꓡꓰ ꓗꓳ ꓡꓴ꓿ 49 ꓧꓮꓴ ꓢꓴ ꓗꓴꓔ ꓠꓬꓳ ꓟꓳ ꓠꓲ ꓴ ꓚꓥ ꓠꓳ ꓗꓴ ꓙꓳꓥ ꓟ ꓥꓳ ꓠꓲ ꓪꓲ ꓠꓴꓥ ꓟꓳ ꓰ ꓣ ꓧ ꓠꓲ ꓗꓳ ꓡꓥ꓾ ꓠꓴꓥ ꓟꓳ ꓥꓳ ꓡꓰ ꓮ ꓚꓴꓑ ꓬꓴ ꓗꓳ꓾ ꓫꓲ ꓚꓮꓴ ꓖꓶ ꓚꓴꓟ ꓟꓮꓴ ꓢꓮꓴ ꓓꓲꓗ ꓡꓳ ꓣ ꓬꓠ ꓟꓮꓲ꓾ ꓓꓴꓔ ꓡꓳ ꓐꓰ꓾ ꓖ ꓡꓪꓲ꓾ ꓬꓥ ꓟꓳ ꓡꓰ ꓔꓮꓲ ꓰ꓿ 50 ꓧꓮꓴ ꓘꓴꓠ ꓡ ꓖꓬꓳ ꓪꓲ ꓡꓴꓥ ꓡꓥ ꓖꓶ ꓬꓥ ꓡꓰ ꓑꓬꓟ ꓔꓳ ꓡꓪꓲ꓾ ꓒꓥ ꓡꓳ ꓐꓬꓴ ꓗꓳ ꓰ꓿ 51 ꓲ ꓣꓟ ꓣ ꓬꓴ꓾ ꓖꓴꓥ ꓛꓲꓠ ꓟ ꓙꓲ ꓟꓰ ꓜ ꓖꓥ ꓡꓪꓲ ꓰ꓾ ꓬꓥ ꓕꓥ ꓛꓥ ꓡꓪꓲ꓾ ꓧꓮꓴ ꓐꓥ ꓬꓥ ꓡꓰ ꓚꓴꓑ ꓬꓴ ꓗꓳ ꓰ꓿ 52 ꓬꓥ ꓚꓮꓴ ꓖꓶ꓾ ꓧꓮꓴ ꓙꓲ ꓟꓰ ꓡꓰ ꓘꓬꓴꓔ ꓑꓬꓟ ꓔꓳ ꓡꓪꓲ꓾ ꓖꓴꓥ ꓛꓲꓠ ꓒꓥ ꓐꓬꓴ ꓡꓳ ꓐꓰ꓿ ꓘꓶꓠ ꓙꓳꓥ ꓮ ꓖꓲ ꓪ ꓟꓳ ꓰ ꓣ ꓧ ꓟꓴ ꓬꓥ ꓡꓰ ꓢꓗ ꓢꓰ ꓧꓳ ꓗꓳ ꓰ 53 ꓧꓮꓴ ꓘꓴꓠ ꓬꓥ ꓟꓳ ꓖꓶ꓾ ꓬꓰ˗ꓢꓴ ꓡꓰ ꓘꓶꓠ ꓙꓳꓥ ꓮ ꓖꓲ ꓪ ꓟꓳ ꓚꓥ ꓫꓴꓔ ꓫꓪꓲ ꓡꓳ ꓗꓳ ꓡꓪꓲ꓾ ꓘꓶꓠ ꓙꓳꓥ ꓮ ꓖꓲ ꓑꓰ ꓮ ꓖꓲ ꓢꓴ ꓪꓴꓠ ꓑꓰ ꓰ ꓟꓮꓴ ꓢꓮꓴ ꓗ ꓰ ꓢ ꓣ ꓑꓰ ꓡꓴꓥ ꓡꓥ ꓬꓥ ꓚꓥ ꓜꓴ ꓒꓴꓥ ꓡꓰ ꓗꓳ ꓰ꓿ 54 ꓑꓰ˗ꓔꓣꓴ ꓚꓮꓴ ꓖꓶ ꓘꓶꓠ ꓙꓳꓥ ꓮ ꓖꓲ ꓟꓳ ꓰ ꓪꓥ ꓘꓮꓴ ꓙꓰ ꓫꓳ ꓪꓰ ꓪꓰ ꓟ ꓬꓥ ꓚꓥ ꓛꓥ ꓡꓪꓲ꓾ ꓓꓪꓲ ꓠꓥ ꓙꓳ ꓫꓥ ꓪꓲ ꓰ ꓣ ꓧ ꓜꓴꓥ ꓴ ꓚꓥ ꓟꓲ ꓖꓥ ꓠꓲ ꓰ꓿ 55 ꓧꓮꓴ ꓘꓴꓠ ꓧꓮꓴ ꓘꓶꓠ ꓙꓳꓥ ꓮ ꓖꓲ ꓑꓰ ꓰ ꓢꓴ ꓪꓴꓠ ꓒꓴꓥ ꓐꓠ ꓫꓳ ꓖꓶ꓾ ꓬꓰ˗ꓢꓴ ꓡꓰ ꓪꓳ ꓢꓔ ꓑꓬꓟ ꓫꓳ ꓢꓗ ꓢꓰ ꓧꓳ ꓠꓲ ꓗꓳ ꓡꓥ ꓮ ꓟꓬꓥ ꓗꓳ꓿ 56 ꓘ ꓢꓴ ꓟꓴ ꓖ ꓡꓰ ꓐꓬꓴ ꓟꓬꓳ ꓟꓬꓳ ꓪ ꓬꓥ ꓘꓬꓳ ꓟꓮꓴ ꓰ ꓢꓗ ꓢꓰ ꓘꓟ ꓗꓳ ꓡꓥ ꓬꓥ ꓟꓳ ꓰ ꓢꓗ ꓢꓰ ꓓꓥ ꓮ ꓧꓪꓲ ꓡꓴꓟ ꓗꓳ꓿ 57 ꓧꓮꓴ ꓘꓴꓠ ꓣ ꓪꓟ ꓔꓳ ꓡꓪꓲ ꓬꓥ ꓰ ꓘꓬꓳ ꓟꓮꓴ ꓰ ꓢꓗ ꓢꓰ ꓘꓟ ꓴ ꓚꓥ꓾ 58 ꓫꓲ ꓬꓴ ꓖꓶ꓾ ꓡꓳ ꓰ ꓢꓮꓲ ꓰ ꓫꓲ ꓠꓳ ꓗꓴ ꓙꓳꓥ ꓡꓰ ꓥꓳ ꓒꓬꓳ ꓑꓬꓟ ꓡꓪꓲ꓾ ꓢꓴꓟ ꓠꓲ ꓖꓬꓳ ꓟ ꓡꓳ ꓰ ꓮ ꓥꓴꓔ ꓰ ꓜ ꓖꓳ ꓔꓴ ꓡꓰ ꓓꓴꓟ ꓪꓳ ꓢꓮꓲ ꓣ꓾ ꓖ ꓡꓪꓲ꓾ ꓬꓥ ꓔꓮꓲ ꓰ ꓓꓥ ꓡꓰ ꓥ ꓟꓳ ꓪꓳ ꓖꓬꓳ ꓐꓰ꓾ ꓖ ꓗꓳ ꓰ꓿ 59 ꓥꓴꓔ ꓗꓳ ꓡꓥ ꓬꓥ ꓟꓳ ꓰ ꓢꓗ ꓢꓰ ꓓꓥ ꓖꓶ ꓙ ꓮ ꓘꓬꓴꓟ ꓗꓳ꓾ 60 ꓧꓮꓴ ꓘꓴꓠ ꓘꓶꓠ ꓙꓳꓥ ꓮ ꓖꓲ ꓟꓳ ꓖꓶ꓾ ꓖꓴꓥ ꓖꓴꓥ ꓟ ꓔꓳ ꓬꓑ ꓡꓪꓲ꓾ ꓠꓥ ꓣ ꓘꓴꓠ ꓡꓥ ꓮ ꓔꓴ ꓡꓴ꓾ ꓬꓥ ꓟꓳ ꓠꓥ ꓰ ꓘꓬꓳ ꓘ ꓢꓴ ꓖ ꓢꓗ ꓢꓰ ꓘꓟ ꓮ ꓗꓳ ꓕ꓾ ꓖ ꓡꓪꓲ꓾ ꓬꓰ˗ꓢꓴ ꓡꓰ ꓟꓲ ꓰ꓿ 61 ꓬꓥ ꓚꓮꓴ ꓖꓶ ꓝꓶꓗ ꓜ ꓠꓲ ꓡꓪꓲ꓾ ꓣ ꓘꓴꓠ ꓡꓰ ꓮ ꓔꓴ꓿ ꓓꓴꓟ ꓘꓶꓠ ꓙꓳꓥ ꓮ ꓖꓲ ꓟꓳ ꓖꓶ꓾ ꓘꓬ ꓳꓠ ꓪꓳ ꓰ ꓢꓴ ꓰ ꓬꓥ ꓜꓳ ꓖ ꓰ ꓘꓣꓲꓢ˗ꓔꓴ ꓖꓶ ꓠꓥ ꓥꓴꓔ ꓠꓲ ꓡꓰ ꓡꓴ꓾ ꓖ ꓡꓪꓲ꓾ ꓬꓥ ꓡꓰ ꓟꓲ ꓰ꓿ 62 ꓬꓰ˗ꓢꓴ ꓖꓶ꓾ ꓥꓳ ꓥꓴꓔ ꓔꓳ ꓡꓰ꓾ ꓧꓮꓴ ꓟꓮꓲ ꓖꓳ ꓔꓴ ꓧꓮꓴ˗ꓐꓬꓴ˗ꓬꓥ˗ꓜꓳ ꓖꓶ ꓒꓴꓥ ꓪꓴꓑ ꓰ ꓡꓳ ꓬꓳ ꓟ ꓜꓴꓥ ꓔꓳ ꓡꓪꓲ꓾ ꓟꓮꓴ ꓘꓴꓥ ꓟ ꓟꓴꓔ ꓟꓮꓴ ꓑꓰ ꓰ ꓙꓰ ꓡꓰ ꓰ ꓡꓰ꓾ ꓠꓴꓥ ꓟꓳ ꓟꓬꓥ ꓗꓳ ꓣ꓾ ꓖ꓾ ꓔꓮꓲ ꓰ꓿ 63 ꓧꓮꓴ ꓟꓴ ꓡꓪꓲ꓾ ꓘꓶꓠ ꓙꓳꓥ ꓮ ꓖꓲ ꓟꓳ ꓪ ꓖꓶ ꓬꓥ ꓰ ꓟꓰ ꓐꓴ ꓡꓰ ꓡꓥ ꓛꓰ ꓴ ꓚꓥ꓾ ꓲ ꓠꓴꓥ ꓧꓮꓲ ꓢꓗ ꓢꓰ ꓣ ꓮ ꓫꓲ ꓕ꓾ 64 ꓧꓮꓴ ꓡꓴ ꓟꓴ ꓓꓥ ꓡꓰ ꓠꓴꓥ ꓟꓳ ꓪꓳ ꓖꓬꓳ ꓐ ꓗꓳ꓾ ꓠꓴꓥ ꓟꓳ ꓧꓮꓲ ꓢꓴ ꓥꓟ ꓔꓳ ꓮ ꓗꓳ ꓕ꓾ ꓖ ꓰ꓿ ꓬꓥ ꓫꓲ ꓖꓶꓥ ꓰ ꓢꓴ ꓥꓴꓔ ꓔꓳ ꓡꓰ꓾ ꓖ ꓡꓪꓲ꓾ ꓬꓥ ꓟꓳ ꓡꓴꓥ ꓡꓥ ꓓꓳ ꓓꓠ ꓗꓳ ꓰ꓿ 65 ꓧꓮꓴ ꓕꓳ ꓟ ꓣ ꓪꓟ ꓖꓶ꓾ ꓬꓥ ꓡꓰ ꓢꓳ ꓗꓠ ꓐꓬꓰ ꓖꓬꓴꓠ ꓡꓰ ꓰ꓾ ꓬꓥ ꓰ ꓟꓬꓳ ꓓꓳꓥ ꓡꓰ ꓥꓳꓑ ꓑꓬꓟ ꓐꓲ ꓟꓴ꓾ ꓬꓥ ꓡꓰ ꓠꓴ ꓡꓪꓲ꓾ ꓟꓲ ꓕꓳꓲ ꓓꓥ ꓔꓮꓲ ꓮ꓾ ꓖ ꓡꓪꓲ꓾ ꓬꓥ ꓡꓰ ꓔꓮꓲ ꓗꓳ ꓰ꓾ ꓓꓪꓲ ꓠꓥ ꓙꓳ ꓫꓥ ꓪꓲ ꓡꓰ ꓡꓳ ꓪ ꓰ ꓬꓥ ꓡꓰ ꓠꓴ ꓗꓳ ꓰ꓿ ꓑꓰ˗ꓔꓣꓴ ꓠꓬꓑ ꓑꓬꓟ ꓰ 66 ꓑꓰ˗ꓔꓣꓴ ꓚꓮꓴ ꓖꓶ ꓮ ꓳ ꓬꓟ ꓟ ꓪꓥ ꓘꓮꓴ ꓫꓴꓔ ꓠꓲ ꓰ ꓘꓴꓠ ꓘꓶꓠ ꓙꓳꓥ ꓮ ꓖꓲ ꓰ ꓡꓥ ꓚꓥ ꓟꓲ ꓪꓰ ꓜꓳ ꓣ ꓬꓴ ꓙꓰ ꓡꓰ ꓡꓪꓲ꓾ 67 ꓑꓰ˗ꓔꓣꓴ ꓟꓲ ꓖꓥ ꓠꓲ ꓰ ꓡꓰ ꓟꓬꓥ ꓙꓥ ꓬꓥ ꓡꓰ ꓐꓬꓴ ꓪꓴ ꓡꓪꓲ꓾ ꓠꓥ ꓡꓰ ꓬꓰ˗ꓢꓴ ꓖ ꓰ ꓠ˗ꓜꓰ˗ꓣꓰꓔ ꓐꓬꓴ ꓰ ꓣ ꓧ ꓠꓲ ꓔꓳ ꓡꓰ꓾ ꓖ ꓰ꓾ 68 ꓬꓥ ꓬꓴ ꓖꓶ ꓠꓬꓑ ꓑꓬꓟ ꓡꓰ ꓰ꓾ ꓠꓥ ꓔꓮꓲ ꓰ ꓓꓥ ꓡꓰ ꓥꓳ ꓮ ꓢꓰ ꓡꓳ꓾ ꓮ ꓐꓴꓠ ꓡꓳ꓾ ꓖ ꓰ꓾ ꓧꓮꓴ ꓕꓥ ꓗꓬꓟ ꓜꓠ ꓫꓴꓔ ꓬꓥ ꓕꓳ ꓰ ꓐꓬꓴ ꓡꓳ ꓙꓥ꓾ ꓪꓳ ꓔꓴꓠ ꓐꓰ꓿ 69 ꓧꓮꓴ ꓡꓥ ꓚꓥ ꓟꓲ ꓪꓰ ꓜꓳ ꓬꓥ ꓡꓰ ꓓꓴꓟ ꓟꓬꓥ ꓙꓥ꓾ ꓡꓲꓥ ꓘꓬꓴ ꓬꓑ ꓔꓳ ꓐꓥ ꓡꓰ꓾ ꓫꓲ ꓬꓴ ꓡꓰ ꓬꓥ ꓟꓳ ꓚꓥ ꓡꓳꓟ ꓠꓲ ꓰ꓾ ꓖ ꓰ꓿ 70 ꓬꓥ ꓚꓮꓴ ꓖꓶ ꓓꓴꓟ ꓠꓬꓑ ꓑꓬꓟ ꓰ꓾ ꓧꓮꓴ ꓕꓥ ꓘ ꓟꓬꓥ ꓮ ꓟꓬꓥ ꓫꓲ ꓡꓰ꓾ ꓡꓲꓥ ꓘꓬꓴ ꓬꓑ ꓠꓲ ꓰ ꓐꓥ ꓖꓶ꓾ ꓖꓰ ꓖꓰ ꓪ ꓠꓥ ꓬꓥ ꓟꓳ ꓚꓥ ꓡꓳꓟ ꓠꓲ ꓔꓳ ꓡꓰ꓾ ꓘ ꓢꓴ ꓟꓴ ꓖ ꓡꓰ ꓖ˗ꓡꓲ˗ꓡꓰ ꓐꓬꓴ ꓡꓰ ꓠꓥ ꓥꓴꓔ ꓔꓳ ꓡꓰ꓾ ꓖ ꓡꓪꓲ꓾ ꓑꓰ˗ꓔꓣꓴ ꓡꓰ ꓔꓮꓲ ꓗꓳ ꓰ꓿ 71 ꓧꓮꓴ ꓟꓴ ꓡꓪꓲ ꓬꓥ ꓖꓶ ꓠꓲꓥ ꓰ ꓓꓥ ꓰ꓾ ꓠꓴꓥ ꓟꓳ ꓔꓮꓲ ꓰ ꓢꓴ ꓡꓰ ꓥꓳ ꓮ ꓢꓰ꓾ ꓖ ꓡꓪꓲ꓾ ꓓ ꓖꓟ ꓰ꓿ 72 ꓧꓮꓴ ꓘꓴꓠ ꓙꓥ ꓪꓳ ꓲ ꓘꓴꓠ ꓔꓴꓠ ꓐꓰ꓿ ꓧꓮꓴ ꓟꓴ ꓡꓪꓲ꓾ ꓑꓰ˗ꓔꓣꓴ ꓖꓶ꓾ ꓪꓳ ꓲ ꓘꓴꓠ ꓮ ꓔꓴꓠ ꓫꓲ ꓡꓰ ꓠꓥ ꓥꓳ ꓡꓰ ꓢꓴꓟ ꓡꓲꓥ ꓠꓬꓑ ꓑꓬꓟ ꓐ ꓣ꓾ ꓖ ꓡꓪꓲ꓾ ꓬꓰ˗ꓢꓴ ꓬꓥ ꓡꓰ ꓔꓮꓲ ꓰ ꓓꓥ ꓡꓰ ꓐꓴꓠ ꓠꓲ ꓡꓰ ꓰ꓾ ꓧꓮꓴ ꓡꓰ ꓟꓲꓔ ꓐꓴꓠ ꓴ ꓚꓥ꓾ ꓥꓮꓴ ꓠꓲ ꓡꓰ꓿ |
First published in Fraser script in 1938.
British & Foreign Bible Society