Xalesia 6 - Ata New Testament

Mi ma'ia tatounu la tano'u nene'axu u'isalilisi

¹ Ioxe tavivilo, loxo ngalavu lexe susu vile muua'ulixu vile noxinge la ngingi ta'ei Ulenu upamuxa­ngengi ne ngalai se'isisi noxou so ngalovinoxu. Ia ngalaxa'i laixe xo loxo 'o io tovotovo uxalisinge kalumo ane.

² Ngingi ngava'isu­ngenge ngato'o no anu tu'utu'u­maxu mo so no anu vote'i anene la ngamomoxu lo noxou Kalaisiti.

³ Xo loxo itema vile uxavutalanu lexe anu mi lailaixe ia loxo manina anu mi vitanisi, la anu molu mukakalavoinu moe!

⁴ Laso ngingi vilevilesi ngatilovosou xaixai noxingemo, mo so loxo ngamaisou nene'axu laixe la nga'osasousi. Anu laixe so ngati­lovosou xaixai noxinge no anu ane noxi'a leviani uasi.

⁵ Xo anu mi noxinge vilevilesi so tatavulenu tavalasou noxinge u'isalili.

⁶ Mo aloxo 'o, itema e uxoxolu so uno'u lavulavu no anu Mosinge vaikalaou la uveluvelunu mimiou laixe noxou tisaou ne.

⁷ Ngingi ngakalavoingengi uasi, vote'i so nga'oxonu loloxu Mosinge uasisi. Xo mi ma'ia so itema utounu la temanu u'isalili no anusi so uxalisou.

⁸ Xo loxo itema ulo­muxu masamasaxa no anu vasimolumo la anu loxo utotou no anu anensi. Laso uxolu xo xe uxalisou temanui la masua xo anu mi so mamulosi. Ia loxo itema ulomuxu Ulenu Laixe la anu loxo utotou no anu anenesi. Laso loxo uxalisou temanu noxou Ulenu ili'i la anu mi so mauli kaluxu uasi.

⁹ Laso oponenge utotosa so ta'oxonu alauna uasi. Xo loxo kalakalanenge no anu ilixo laixe uasi la nenge taxalisou nene'axu laixe no anu voxosou u'isalili.

¹⁰ Laso ane, loxo nenge vote'i la ta'oxonu laixe noxi'a latala mukalusi. Xe loxo tavivinge no anu lopala la xavinengeou avile so ta'oxonu noxi'a.

Mi ane so Polu mu'itinu a ovu valautusou Iesuasi

¹¹ Ngamaisou vaikala pa'usou ano'o ne kaukavusou toxotoxoxu 'o, eni melo akaukavunu a.

¹² La ngalomu, ane'i tamitema mose'i e ixolu no taingengi ne imasaxau ualasi'a utila no ie'i tamitema tosi. Ane'i isoungengi so ngaxalisou sosovo no anu vasimenge xo i'oxo lexe, “Iu, loxo tamitema ilomu lexe talopala no anu ovu valautusou Iesuasi, la masi ilosinge navuna­vusou.”

¹³ Xo ane'i ane sosovo uxolu no anu vasime'a ne, ane'i me'a imomomoxu lo to uasi. Ia ane'i imasaxau lexe ngaxalisou sosovo ne so ualasi'a utila no anu mi e uxali no anu vasimenge tosi.

¹⁴ Ia loxo noxilo la axamulinu lexe mamu so a'itinu ualasilo o mi vilela. Mi ane so a'itinu a ovu valautusou Tatananenge Iesua Kalaisitisi. Xo no anu soli noxou Kalaisiti la xavi no anu ili'ilixo so lialia musoli no anu vasimelo xe eni la esoli ekalipala no anu.

¹⁵ La loxo sosovo uxolu no vasimenge la anu mi vitanisi. Xe loxo uxolu uasi la anu mi vitanisi kalumo. Ia ane so Mosinge ukoinenge taxali tami ta'alavua, la anenesi mi mutiatila.

¹⁶ La noxi'a ane'i ane opone'i ututuluou vote'i nesi so imulinu, la ixalisou xoluxolu lalavulusi ilou iaiama xo ane'i so laili Isilaeli noxou Mosinge u'isalili ane.

¹⁷ La eni amasaxau lexe tamitema ilosilo tu'umaxu no anu vaikala aloxo 'ola uasi. Xo tamitema mimasualeli mo lamalamakisou a uxolu no vasimelo so umaxa'u lexe eni amitema so xaixai noxou Kalaisiti manina.

¹⁸ Tavivilo, amasaxau lexe ngaxa­mulinu iaiama noxou Tatananenge Iesua Kalaisiti no anu ulengengi. Vaikala ano'o maninasi. Anu anesi.