Xalesia 5 - Ata New Testament

Anu laixe so oponenge u'oxoxu xoluxolu lalavulusi noxou Kalaisiti

¹ Ioxe, Kalaisiti mu'umenenge no anu mi e mukalavusunenge tei mo so taxolu lalavulusi. Laso ngatulu pakia'inge mo nga'italongengi so tamitema iuauoingenge ka ngalivu no anu xoluxoluxa'a tasilevi mamu.

² Ai ngalomu, eni Polu avikala­ngengi aloxo 'o. Loxo ngapili­xingengi so ngaxalisou sosovo no anu vasimenge la anu uxalixu xaixai noxou Kalaisiti lexe mi vitanisi.

³ Noxinge tamulu ta'ei a so ngaxalisou sosovo no anu vasimenge la avikala aloxo 'ola. Nini ena'ei na'oxo axone la nini mene napilixineni no laxu lo so namomoxu lavuloto no anu mukalusii ane.

⁴ Ngingi ta'ei nga'oxo lexe ngamulimulinu lo mo so Mosinge umoxo'inge lexe ngingi talapusi no iou, la ngexolu ngekalipala noxou Kalaisiti ne. Ngingi ngexexesou iaiama noxou Mosinge ane.

⁵ Ia nexi 'o tano'u xavi noxou Ulenu Laixe so talopalanu Mosingesi. Laso nexi taxolu se'isisi so talopalanu taxomaiou voxo so xoluxolunexe malemalenga upalasi avile.

⁶ Xo loxo itema uxolu noxou Kalaisiti xe sosovo uxolu no anu vasimolu o uxolu uasi, la anene mi vitanisi to. Ia mi ane mutiatila a so lopala noxou itema ne u'avutinoxu sexela no oponusi.

⁷ Ai, tei la iavengenge ne xavinusi, ia ena'ei utanutanuxu vote'isinge so ngalomuxu vaikala manina uasio?

⁸ Vaikala e uilisou sangalinge ne molu noxou Mosinge uasi, xo anu molu mu'avalingemo.

⁹ Mo loxo ilemolu, “Anu isiti isusu'a se u'oxonu pileti loloni usoxo kena.”

¹⁰ Ia xo nenge ngenge'a taxolu noxou Tatananenge laso eni alopalanu lexe opongengi ukali­pala no anu pelototo noxilo uasi. Xe noxou anu ane uxovulau­launixinge ne anu molu utavulenu lakolisou ilixo noxou ili'i ane. Anu ena'ei ne.

¹¹ Ioxe tavivilo, loxo anu manina lexe vaikala so tamitema ixotosou vasime'a ne alanusio, laso axova so imamasualeli aloxo 'o? Ane'i opone'i la'iaxuou votovoto so ovu valautu alalanu 'o, ia loxo eni avalaxu ilixo so sovovo ne la umomomo so ilosilo tu'umaxu aloxo 'o uasisi.

¹² Ia loxo noxi'a ane'i ane ixovulaulaunixinge no anu vaivaikala so sosovo no anu vasimenge ne, anu laixe so me'a ixotosou putu'a uxexe avile.

¹³ Laso tavivilo, Mosinge molu mu'avalinge so nga'una no anu xoluxolu lalavulusi. Ia mamu so opongengi lexe, “Ai nenge taxolu lalavulusi no anu lo a, laso masaxa aneva no anu vasimenge 'o la tamulinusi.” Nga'oxo axone uasi, nga'oxo aloxo 'o. Ngaxolu no anu sexalasi so ngaxali tamitema so xaixai noxinge ngato'o.

¹⁴ Xo no vaikala so lo mukalusi la uxalixu nene'axu loloni no anu vaikala ano'o, “Ngingi ngasexela'a tamene­xinge aloxo ngingi menge ngasexe­langenge ne.”

¹⁵ Ia loxo ngingi nga'oxo loxo tamisoposi so nganga­ngasinge mo ngateatea­ngengi nga­to'o la ngalaxa'i laixe. Xo loxo 'o io ngingi ngamamulo­ngengi avile ane.

Xoluxolu ane so noxou Ulenu xe ane so vasimenge

¹⁶ Ioxe, vaikalaxeli so alemolu noxinge aloxo 'o. Ngingi ngapili­xingengi noxou Ulenu Laixe so upamuxanu muamua'ingenge mo so ngamulinu masamasaxa no anu vasimenge uasi.

¹⁷ Xo loxo telavu, masamasaxa no anu vasimenge uxililiou Ulenu. Xe Ulenu la uxililiou masamasaxa no anu vasimenge. Ane'i ilou ixililiie'i ngato'o axone laso mi ane ngama­saxau nga'oxonu la umomomo so nga'oxonu uasi.

¹⁸ Xo loxo Ulenu upamuxangengi la ngingi ngaxolu no laxu lo so upamuxangengi uasi ane.

¹⁹ La anu upalasi lexe masama­saxa no anu vasimenge uxalixu nene'axu aloxo 'o. Tamitema ipilipilixinu vasime'a vitanisi no anu ilixo nuni'u mo ukilikalu.

²⁰ Xe i'itinu momosi'a kalavoi mo i'oxonu ta'uluxu masua. Xe ixali tauluai'a ngato'o xo tu'utu'umaxu mo isuisu uxolu no taine'i ka la'ia noxi'a xalo u'elasi. Laso ipelepe­lesou anaxa'a xe kalikalipala uxali no taine'i mole ikalitotone'i avile.

²¹ Xe opone'i sixulai'a ngato'o. Xe isipaki sika ixolaxola mole anaxa'a utautausi. Xe mimi se'i axone uxolusio. A loxo eveletalosinge mala'o mo a alemolu 'ola. No voxo so Mosinge molu u'uli laxune'i tamitemaou la tamitema so ili'ilixo axone ixolu nonano uasisi.

²² Ia nene'axu xaixai noxou Ulenu no anu xoluxolunenge aloxo 'o. Ilixo so sexela mo osa mo xoluxolu lalavulusi. Xe anu upamuxanenge so tapalea no anu la'ia uasi mo ta'oxonu alauna ilou ilixo laixe noxi'a leviani. Xe ilopalanenge no anu xaixai ma'ia la ta'oxonu ulovosi.

²³ Xe oponenge lexasi mo xoluxolu­nenge vuluvulusi uasi, tapamu­xanu u'isalilisi. Anu lo vile so u'apinenge no anu mi aloxo 'o uasisi.

²⁴ Xo ane'i tanoxou Kalaisiti, la mino'u vasime'a xe masamasaxa ilou mimi ane upalu­palusi'a no anu ka mililinu no ovu valautu mole musoli mukalu.

²⁵ Anu mauli noxinge 'o a noxou Ulenu Laixesi, laso nenge tapi­lixinenge so anu molu upamaxunu muamua'inenge.

²⁶ La nenge ta'itinenge mo takusukusu'inge mo taisuisunenge ngato'o mamu.