Xalesia 4 - Ata New Testament

Tamitema ixali Mosinge ta'olu a noxou Kalaisitisi

¹ Xo aloxo 'o. Loxo itema usosovosou olu so uxalisou mimiou la olu ne anu loxo mosou mimi ne lumamo. Ia loxo uxolu molomoloxusio la u'una no anu uasi, uxoxolu loxo silevisi.

² Xo anu uxolu no laxa'a tamitema so isaxila'u mo ipamuxanu xo mo uxali no anu voxosou e momu musosovosou.

³ Laso nenge axone kalumo. Xo texolu loxo tamolomolosio la mimi tavatava'u so upamuxanu xoluxolu so lialia mukalavusunenge mo mupamu­xanengesi.

⁴ Ia loxo voxo e Mosinge musosovosou u'isalili muxalii laso ane, mupalusou Olu. La sema vile mivo'onu kaio muxolu no laxu lo.

⁵ Mo so axone la upilixinu ulusinge nenge ane texolu no laxu lo 'o. Xe no anu vote'i anenesi la texali Mosinge ta'olu.

⁶ La ngexolu Mosinge ta'olu, laso Mosinge mupalusou Ulenu Olu mune'e mo a uxoxolu no tangengi so u'avutinoxu katu noxinge lexe, “Papao, Mamixeo.”

⁷ Laso maixene ngingi ngaxolu loxo tasilevila uasi, ngingi ta'olu ane. Mo ngaxolu Mosinge ta'olu axone laso anu upalasi lexe ngingi ngaxalisou mimi noxou.

Polu oponu kalauai'a Taxalesia

⁸ Ioxe, tatei la ngalavusou Mosinge uasi, mo ngexolu loxo tasilevii'a tami ane tamomosinge maninasou uasi.

⁹ Ia vaimomo 'o ngexalisou mo ngelavusou Mosinge. E uasi, anu molu muxalisinge mo mulavusinge. Laso axova so ngaxiu ngalivu no anu mimi tavatava'u ane mama­laxu mo xalusou to ne? Ngingi ngalivu mo so xoluxolungenge loxo tasi­levila?

¹⁰ Xo ngingi opongengi a ututuluou lavulotosou voxo mutiatila xe so'iso'io xe tautau ie so ngasosovosou.

¹¹ Iauo, eni opoleli kalauainge xo loxo 'o io sasaieli no taingengi tatei ne mulapau vitanisi.

¹² Tavivilo, akatu noxinge aloxo 'o. Ngingi ngamulinu ilixoleli. Xo eni melo e'italonu lavuloto no anu lo so exali a loxo ngingi ne la ngingi ngasusunixilo vile uasisi.

¹³ Ngingi a ngexavutalanusio? Tatei ne etavulenu tu'umaxu no vasimelo la anene muxalixu vote'i so ene'e noxinge alaxu tei ka elanu vaikala laixe ne.

¹⁴ La siki no vasimelo ne mulosinge tu'umaxu ia ngingi ngamatapialeli o ngaleve­tesilo uasi. Ngingi nge'o­sasilo mo nge'unaleli noxinge a loxo eni angelou Mosinge o Kalaisiti Iesua anu molu.

¹⁵ Ai, no voxo ne ngingi nge'osasilo mise­vile. Ia osa anene munavae? Eni avikala manina lexe no voxo ne ngingi masi ngaxexenu iengi lavo'onu ka ngalosilo loxo anu umomomo so usu'ulileli.

¹⁶ Ia masi axova, eni epelototosinge no anu vaikala tu'umaxu mo maninasi laso ngasaxisilo lexe eni aulua­mengi 'o?

¹⁷ Xe ngalomu, ane'i olele ne ixilisingengi ia opone'i ulapu no anu uasi. Ane'i imasaxau so ikakapisinge axone mo so opongengi ututulu noxi'asi.

¹⁸ Loxo oponenge ututulu manina so ta'oxo laixe noxi'a leviani, la anu mi vile uasi. Ngingi utotomu nga'oxo axone, anu mi so eni axolu no taingengisi uasi.

¹⁹ O ta'alixeli, eni axamulinu navunavu aloxo sema itavulenu navunavu no anu lavulo'o. Navunavu ne uxoxolu xo masaxa noxilo lexe ili'ilixou Kalaisiti uxali loloni noxinge.

²⁰ Anu laixe loxo eni axolu no taingengi mo so loxo amaisou iengi la a'isalilinoxu xolileli no anu vaikalaxeli 'o. La eni talelili manina no anu vote'i so asu'uli­ngengi 'o.

Latilovosi'a Axali olie Sala

²¹ Ioxe, ngingi mose'i ngamasaxau so ngaxolu no laxu lo, ia axova? Ngingi menge ngalavusou vaikala no anu lo uasi, ne?

²² Xo loxo Mosinge vaikala mulemolu. Apala'amu ta'olu tamulu tamei. Vile muxalixu noxie sema silevi e Axali. Xe vile muxalixu noxie semau e mixolu lalavulusi.

²³ La olu e muxalixu noxie sema silevi ne anu muxali no anu vote'isinge tamitema mukalusi. Ia olu e muxalixu noxie sema lalavulusi la muxali no anu vote'i e so vavalima noxou Mosinge.

²⁴ La no anu anene, latilovo uxolu no anu. Xo tasema tamei ne isovososou koni­talaki tamei. Ane Axali isosovosou konitalaki so la'olu Sainai, xe ta'ei ixaxali no anu anene la ane'i so tasilevisi.

²⁵ Axali ne isosovosou la'olu Sainai no xale lia ne Alevia. Xe kalumo la isosovosou taoni Ielusalemo 'o. Xo Ielusalemo anu loxo sema silevi xe ta'ilie ane'i tasilevi kalumo.

²⁶ Ia Ielusalemo ane vile e so tualasou Mosinge la uxolu lalavulusi. Anu so neninge ane.

²⁷ Xo loxo Mosinge vaika­laou ulemolu lexe, “O nini sema ane napala uasi, na'osa'ilasi. Nini ane natavulenu navunavu so lavulo'o uasi nalalexe mo na'ava'ava so namaxa'u osa noxine. Xo nini sema e nexolu vitanisi ne navasi'a ta'iline tavu'alo uua'ulixa'a ta'ilie sema ane mulue.”

²⁸ Laso ane, tavivilo. Ngingi ne ngexali Mosinge ta'olu xo no anu vavalimasi. Anu iou vilesisi aloxo Aisaki.

²⁹ Mo aloxo 'o. Molomolo ane muvo'o no anu vote'isinge tamitema mukalusi so tavo'o la muxililiou molomolo e muxali no anu xavi noxou Ulenu Laixe. La anu a uxoxolu axone vaimomo 'osio.

³⁰ Ia vaikala no anu lavukuou Mosinge uvikala axova? Aloxo 'o, “Sema silevi ilou ilie ne, ngakusai'asi. Xo mamu so ilie sema silevi upita noxou ilie sema lalavulusi so ilou ivelunu mimiou mami'a.”

³¹ Ioxe tavivilo, nenge telavu manina lexe nenge sema silevi ta'ilie to uasi. Nenge sema lalavu­lusi ta'ilie a.