Xalesia 2 - Ata New Testament

Polu oli'a ta'aposeli se'ila mipita ne Ielusalemo

¹ Ioxe, tau ie 14 mupolo mukalui la nexi noxou Vanavasi telai ne Ielusalemo. Telai la teno'u Taitusi so noxi'a.

² Elai axone xo Mosinge molu mupala'anixu noxilo lexe alaisi. Elai la noxi'a ane'i ane mi'uli no anu pita nexisisi texolu tevivikala. La epala'anixu vaikala laixe ane elanu noxi'a tamitema noale'ale. Epala'anixu so itilovosou xo loxo 'o io ixililiou la xaixai noxilo tatei xe ane so vaimomo 'o masi ulapau vitanisi.

³ Ia uasi, xo manina Taitusi e noxi'a telai ne, anu itema Kiliki ia ane'i isounexi lexe anu uno'u sosovo no anu vasimolu uasisi.

⁴ Ia se'i ane ikalavoi lexe ane'i tavivinge kalumo mipakisi mi'una noxixe so milakokongonexe no anu xoluxolu lalavusi texalisou noxou Kalaisiti Iesua. Xo opone'i lexe ikalavusu­nenge no anu lo so taxali loxo tasilevila.

⁵ Ia nexi ta'italonexi so ipamuxanexi sevile no anu uasisi. Nexi pakia'ixe manina axone mo so vaikala laixe anu temanu maninasi e ngeno'u ne la uxolu axonesi, uxiu uasi.

⁶ Ioxe, eni elulusou votovoto noxilo noxi'a tatiatila e ualasi'a ne ia ane'i imulaxu vaikala sevile no latanu uasi. Ai, eni amoxo'a lexe tatiatila e ualasi'a, ia noxilo la anu mi vile no anu uasi. Tamitema mukalusi iou vilesisi no iou Mosinge.

⁷ Imulaxu vaikala sevile no latanu uasisi, xo mitongonu lexe Mosinge molu mupilixinu vaikala laixe noxilo so si'a tamitema noale'ale. Anu iou vilesisi aloxo mupilixinu noxou Pita so si'a Taiuta.

⁸ Ani, Mosinge mulosou Pita xavi so anu aposeliou noxi'a Taiuta. Xe anu axonesi noxilo, xo mulosilo xavi so eni a aposeliou noxi'a tamitema noale'ale.

⁹ Xe ane'i ane ualasi'a lexe tatiatila no anu pita e Tiemisi xe Pita xe Tioni ne mitongonu lexe Mosinge muiaiama so mulosilo xaixai ano'o u'isalili. Laso ane'i misixalinexi noxou Vanavasi so imaxa'u lexe nexi noxi'a oponexi vilesisi no anu xaixai noxixe. Mo mipilixinexi axone so nexi taxa­xaisi'a tamitema noale'ale xe ane'i so si'a Taiuta.

¹⁰ Ia mi vilesisi milemolu noxixe lexe nexi tane­xixa'a ane'i ane no taine'i mixolu loxo ta'oloxola. La anu laixe xo mi ne opoleli mututuluou lumamo mo a e'axonu 'oe.

Polu mulovonixu Pita no anu ilixou

¹¹ Ioxe, ia ili'i loxo Pita mune'e no taoni ne Anitioki la epala'anixu ilixou vile no iousi xo mupalasi lexe anu mupolo va'axu no anu.

¹² Xo Pita mu'oxonu aloxo 'o. Tei la ulavusou u'ani noxi'a Mosinge ta'olu ane so laili noale'ale. Ia mune'e xe tamitema e Tiemisi mupalusi'a mixalii laso Pita mumama'u noxi'a Taiuta ane opone'i mututuluou sosovo so vasimenge olele. Mumama'u laso anu mulala mo mu'umenu vasimolu noxi'a laili noale'ale ne.

¹³ Xe ane'i Taiuta mukalusi kalumo mipita no anu kakalavoi noxou to ne. Mo ili'i la kalavoi noxi'a ne mulapunu Vanavasi mole mu'una noxi'a kalumo.

¹⁴ Ia etilovosi'a lexe mipolo va'axu no anu vaikala laixe anu temanu maninasi axone laso evikala noxou Pita no ie'i latala aloxo 'o, “Nini na Iuta to ane. Ia nini xoluxoluxene loxo tamitema noale'alemo, anu loxo noxi'a Taiuta uasisi. Laso axova so nasousoune'i tamitema noale'ale so ixolu loxo Taiuta 'oe?”

Vote'i so itema uxali ulapu no iou Mosinge a no anu lopalasi

¹⁵ Ioxe, nexi ta'ei Taiuta 'o, texali no anu laili Iuta mu'isalili. Xo no anu laili noale'ale e ilemolu lexe laili so susu, nexi taxali no anu uasi.

¹⁶ Ia loxo nenge telavu, vote'i so itema uxali ulapu no iou Mosinge a so umulimulinu lo uasi. Vote'isou a so ulopala noxou Kalaisiti Iesuasi. Laso ane, nexi kalumo telopala noxou Kalaisiti Iesua. Xo talavu lexe vote'i so nexi kalumo taxali talapu no iou Mosinge a so tamulimulinu lo uasi. Nexi vote'isixe kalumo a so talopala noxou Kalaisitisi. Xo umomomo uasisi manina so itema uxali ulapu no iou Mosinge no anu vote'i so lo.

¹⁷ Ia axova, loxo nexi tamulinu vote'i so talopala noxou Kalaisitisi so taxali talapu no iou Mosinge, la masi upalasi lexe nexi Taiuta a laili so susu kalumo. Laso no anu ngiou anene la nenge tavikala lexe Kalaisiti upalupa­lusixe no anu susu? Mamusi! Xavutala ne usu'asi.

¹⁸ Tei la elamana lexe lo anu vote'isilo uasi, laso anu loxo tani so ekisilala'usi. Ia loxo alivuou so atulusoula, la no anene la anu upalasi lexe axililiou temanu lo manina ane.

¹⁹ Xo losi a mulosoielixu vote'i so asoli mo akalipala no anu xaviou lo to ne. Esoli mo ekalipala no anu so axolu mo mauli noxilo a noxou Mosingesi.

²⁰ Xo loxo mililixu Kalaisiti no ovu valautu so musoli la eni kalumo ane. Laso no anu xoluxoluxo alavua 'o la enisi uasi, Kalaisiti a upolonu maulixu noxilo 'o. Mo so no anu xolu­xoluxo so lialia 'o la eni alopala noxou Mosinge Olusi e muse­xelaxo ka mupilixinu maulixu so silo.

²¹ La telexu aloxo 'o. Mamu so avila'isou iaiama noxou Mosinge vitanisi. Xo loxo vote'i so taxali talapu no iou Mosinge a no anu lo, la tava'u so Kalaisiti musoli uasisi.