Xalesia 1 - Ata New Testament

¹ Eni aposeli Polu a. Tamitema ipalusilo aloxo 'o uasi xe itema vile utulusilo no anu xaixai ano'o uasi. Eni exali a aposeli xo noxou Iesua Kalaisiti ilou Mosinge anu Maminge e mutulusou Kalaisiti no anu soli.

² Nexi noxi'a tavivinge mukalusi e taxolu 'o takalanu lapasi ano'o ulai noxinge tatemanu pitapita ne Xalesia polovinisi.

³ Eni amasaxau lexe ngaxoxolu no anu iaiama ilou xoluxolu lalavulusi noxi'a Mosinge anu Maminge ilou Tatananenge Iesua Kalaisiti.

⁴ Anu Kalaisiti mumulinu masaxa noxou Mosinge anu Maminge la molu mupilixinu mauli noxou so ukalusou tina'unenge so susu. Mo so axone la anu u'umenenge no anu xoluxolu so susu no lialia 'o.

⁵ Laso nenge ta'itinu ualasou Mosinge ulai ulai mole kaluxu uasisi.

Se'i mixiuxiunu vaikala laixe

⁶ Ai, eni akuluke manina noxinge. Xo no anu iaiama noxou Kalaisiti la Mosinge mu'avalinge ka ngexali tamitemaou. Ia ngingi to ne ngepalea so nga'ume'umesou mo ngalomuxu vaikala vilemo ane upolo va'axu no anu vaikala laixe.

⁷ Xo se'i no taingengi itovonu so ixovulaulaunixinge mo ixiuxiunu vaikala laixe so Kalaisiti. Ia vaikala laixe uxiuxiu uasi, anu uxolu axonesi.

⁸ Vaikala laixe ne, nexi tevotongengixu mala'o. Laso loxo nexi o angelo vile so tualasou Mosinge une'e uxiunu vaikala laixe ne so uvotongengixu la anu laixe so umamulo no navu avilesi.

⁹ Aloxo telemolu noxinge mukalu, mo a alemolu 'ola, loxo itema vile ulanu vaikala ane upolo va'axu no anu vaikala laixe ngexalisou mukalu, la anu laixe so umamulo no navu avilesi.

¹⁰ Xo axova, nga'oxo lexe alemolu vaikala ano'o so tamitema i'osasilo o so Mosinge u'osasilo? Eni sasaieli so axilisine'i tamitema, ne? Uasi to, xo loxo eni opoleli ututulu lexe tamitema i'osasilosi, la vote'i so axolu amitema so xaixai noxou Kalaisiti uasisi.

Polu mua'alo lexe muxali aposeli axova

¹¹ Xo tavivilo, eni avikalangengi manina lexe vaikala laixe e evotongengixu mala'o ne anu mu'avuti noxi'a tamitema uasi.

¹² Eni ano'u noxou itema vile uasi mo tamitema ipela'iloxu uasi. Anu Iesua Kalaisiti molu mupala'anixu vaikala laixe ne noxilo.

¹³ Ngingi ngelomusou a'alosou xoluxolu noxilo tatei so emulinu ili'ilixo no anu lopala noxi'a Taiuta. Xe elolutu so elosi'a tatemanu pita noxou Mosinge tu'utu'umaxu mo etovonu so epaxelelene'i.

¹⁴ La opoleli mututuluou mo mu'oxoxu ili'ilixo noxi'a tatiatila noxixe Taiuta so lexe amulinusi. La no anu vote'i anene eni e'uli noxi'a tamaulu Taiuta ane lasililinexe vilesisi.

¹⁵ Ia loxo atie ivo'oleli uao la Mosinge musosovosilo mukalu. Mo no anu iaiama noxousi la mu'avalilo xo exolu xo xe no voxo loxo Mosinge musosovosou laso ane.

¹⁶ Anu mupala'anixu Olu noxilo mo so eni alanu vaikala laixesou noxi'a tamitema noale'ale. Xe no voxo e mupala'anixu noxilo ne la etatali'i noxou itema vile so upela'iloxu uasi.

¹⁷ Mo eni alai avile ne Ielusalemo so axalisi'a ane'i ane mixali ta'aposeli tei noxilo uasi. Eni elai exolu no anu xale lia ne Alevia. Exolu xo xe mukalui laso elivu ene'e ne Tamasikusi.

¹⁸ Ioxe, tau ie tatalu mulai mukalui laso elai Ielusalemo so ano'u lavulavu noxou Pita. La noxou texolu umomomo no anu voxo 15.

¹⁹ Ia no voxo anene amaisi'a ta'aposeli se'ila uasi. Anu Tiemisi e Tatananenge vimou anusisi a emaisou.

²⁰ La no anu vaikalaxeli e alemolu 'o avikala­ngengi no iou Mosinge lexe akala­voingengi uasi.

²¹ Xe mune'e la exixaosou polovinisi tamei ne Silia xe Silisia.

²² Ia tamitemaou Kalaisiti so pitapita ne Iutea ilavusou ieli to uasi.

²³ Ane'i milomusou a'alo­silosi lexe, “Mosou e mulavusou ulosinge navunavu tatei a vai­momo 'o ulanu vaikala laixe so lopala e molu mutovonu so umamulonu.”

²⁴ Milomusou a'alo­sou mimi ane Mosinge muxalixu noxilo axone la mi'iti'itinu Mosinge ualasouxu.