Tioni 9 - Ata New Testament

Tatananenge mupaipounu itema ane iou selevenu

¹ Ioxe, Iesua mumuamua'i mulai la mumaisou itema vile iou selevenu no mi ne nenu mivo'onumo.

² Xe tatisaipeliou Iesua mutali'isou lexe, “Tisa, ena'ei mususu kaio itema ano'o iou selevenu no mi ne nenu mivo'onu? Anu molu mususu o momu olie nenu?”

³ La Iesua mukoline'i lexe, “Ano'o muxali so lakolisou susu vile noxou o noxi'a momu olie nenu uasi. Mi 'o muxali mo so loxo xavi noxou Mosinge uxaxaisou la upala'a no ie'i tamitema.

⁴ Vai­momo 'o anu asosio laso nenge xavinengeou xaixai noxou anu ane mupalusilo ene'e 'o. Xo olovoxo a unene'e xe uxalii la itema vile uxaxaila uasi.

⁵ No voxo loxo axoxolu no lialia 'osio la eni 'osi a lamana so lialia.”

⁶ Iesua muvikala axone mukalu la mutuve no lia kaio muilanu ilou lialia. Muilanu xe muxali loxo pita 'oe laso muno'u ka mulutunu se no iou itema olele.

⁷ Mukalu la Iesua muvikalanu lexe, “Nalai na'ulo no anu kupa e Siloamu.” Anu ualasou kupa ne laxu lexe Mipalusou. La itema ne mulai mu'ulo xe anu a ulilivu sila anu musaxisaxi.

⁸ Ioxe, mulivu xe tatemanu tanitani ala'alai ne oli'a tamitema ane tei milavusou imaisou uxolu utotomu so ulingalinga la mivikala lexe, “Anu mosou ano'o e mulavusou utalupexa so ulinga­lingau lamoli xe mi ma'ia a, ne?”

⁹ La leviani mi'oxo lexe, “Ani, anu mosou ane.” xe se'i lexe, “Uasi, anu usaxi loxo ane olele ia ano'o ne vilemo.” Ia anu molu mu'oxo lexe, “Ua, eni a mosou to a.”

¹⁰ Sila ane'i mitali'isou lexe, “Vote'i axova so ieni muka aloxo 'o?”

¹¹ La anu mukoline'i lexe, “A itema e ilemolu lexe Iesua muxalixu pita se no anu lia kaio mulutunu no ieli 'o. Mukalu la muvikalaleli lexe alai no kupa Siloamu so a'ulo. Laso eni elai e'ulo sila ieli laixe mole a asaxisaxi 'oe.”

¹² La ane'i mitali'isou lexe, “La itema ne uxolu ne'ei?” La anu mulivuxa'a lexe, “E, alavusou uae.”

¹³ Ioxe, ane'i mi'avuti la mino'u itema e iou selevenu tei ne ka milaixu noxi'a Tapalisi.

¹⁴ La no voxo e Iesua muxalixu pita se no anu lia mo mupaipounu itema ne iou so muka, a no Voxo so Ma'ila ane.

¹⁵ Milaixu itema ne laso Tapalisi mitatali'i noxou lexe vote'i axova so iou muka axone. La anu mukoline'i lexe, “Anu mulutunu pita se no ieli xe e'ulo sila asaxisaxi laixe 'oe.”

¹⁶ Xe Tapalisi se'i la mivikala lexe, “Anu e mupaipounu 'o, molu noxou Mosinge uasi xo umulinu lavuloto so Voxo so Ma'ila uasi.” Ia leviani la mivikala lexe, “Uasi, xo loxo anu itema so susu la uxalixu sosovo so xavi aloxo 'o axovaio?” Mixililiie'i ngato'o axone laso kalipala muxali no taine'i.

¹⁷ La ane'i mitali'i noxou itema e iou selevenu tei olelela lexe, “Nini namosou e na'oxo lexe mupaipounu ieni ne, laso nini navikalasou axova?” La anu mukoline'i lexe, “Anu polopeti vile ane.”

¹⁸ Ia vaikalaou itema ne lexe tei iou selevenu ka musaxi ne ane'i tatiatila noxi'a Taiuta ilomuxu uasi. Ane'i mi'oxo lexe mukalavoisi laso mi'avali'a momu olie nenu itema e iou muka ne.

¹⁹ Ilou mixali mukalu laso tatiatila mitali'isi'a aloxo 'o, “Ano'o ilinge ne? Mo nge'oxo lexe iou selevenu no anu lavulo'o noxou, laso axova so usaxisaxi aloxo 'o?”

²⁰ La momu olie nenu mikoline'i lexe, “A nexi telavu lexe ano'o ilixe. Mo telavu lexe no anu lavulo'o noxou la iou selevenusi.

²¹ Ia no anu vote'i so usaxisaxi aloxo 'o la nexi talavu uasi. Xe itema aneva so mu'oxonu iou muka la nexi talavusou uasi kalumo. Ngingi menge ngatali'isou xo anu tanu mukalu laso molu upela'inge.”

²² Momu olie nenu mivikalane'i axone xo mi'ume'a tatiatila noxi'a Taiuta ne. Mi'ume'a xo tatiatila opone'i vilesisi mukalu lexe loxo itema vile ulanu vaikala lexe Iesua anu ane so Kalaisiti, la ikusaou itema ne so u'una no anu tasou lavulotola uasi.

²³ Laso maixene momu olie nenu mivikala lexe, “Ngingi menge ngatali'isou xo anu tanu mukalu.”

²⁴ Ioxe, alaxu tameisou mi'avalou itema e iou selevenu tei olele kaio mivikalanu lexe, “Nasakinu vaikala lexe nini na'itinu Mosinge ualasousi mo navikala maninasi. Nexi telavu lexe anu e mupai­pouneni, anu itema so susu, ne?”

²⁵ Laso anu mulivuxa'a lexe, “Anu itema so susu o uasi, anene eni alavusou to uasi. Mi ane elavusou aloxo 'o. Tei la exolu ieli seleve­nusi ia ano'o ne asaxisaxisi.”

²⁶ La ane'i mitali'isoula lexe, “Anu mu'oxonu mi ma'ia noxine? Vote'i axova so mu'oxonu ieni muka 'o?”

²⁷ La anu mulivuxa'a lexe, “A epala'anixu noxinge mukalu ia ngalomuxu to uasi. Ngamasaxau ngalomusou a'alosoula xo ma'ia? Masi ngingi ngamasaxau lexe ngaxali tatisaipeliou kalumo, ne?”

²⁸ Xe ane'i Tapalisi mipupuiou mo mi'oxo lexe, “A ninisisi natisai­peliou ane, ia nexi 'o ne tatisaipeliou Mosisi a.

²⁹ Nexi telavu lexe Mosinge mupilixinu vaikalaou a noxou Mosisi, ia itema anene molu a ne'ei? Nexi talavusou to uasi.”

³⁰ La itema ne mulivuxa'a lexe, “Iu, vaikalamenge ne anu mi so tanengeliliou manina. Xo mosou e mu'oxonu ieli muka 'o nge'oxo lexe ngalavu lexe anu molu ne'ei uasi.

³¹ Nenge telavu lexe Mosinge ulomuxu linga noxi'a tamitema so susu uasisi. Ia loxo itema ena'ei umama'u mo umulinu masaxa noxou Mosingesi, la Mosinge ulomuxu linga noxou.

³² No anu tei tei manina mune'e muxali 'o la a'alo vile uxolu lexe itema iou selevenu no mi ne nenu mivo'onu kaio evile u'oxonu iou uka uasi. Nenge talomusou a'alo vile axone uasisi.

³³ Loxo itema ane mupaipoleli molu noxou Mosinge uasi, la vote'i so u'oxonu mi vile uasisi.”

³⁴ Ioxe, ane'i Tapalisi milomusou vaikalaou axone sila mivikalanu lexe, “Loxova, nini nexoxolu no anu susu mi ne nevo'o mo mune'e avile vaimomo 'o, ia ne'oxo lexe napela'ixe 'o, ne?” La ane'i miku­saousi.

Iesua muvikala lexe ane'i tavu'alo aloxo ie'i selevenu xo ilomuxu uasi

³⁵ Xe mune'e la Iesua mulomu lexe mikusaou itema olele laso anu mulai so uxalisou. Muxalisoui la Iesua muvikalanu lexe, “Nini nelopala noxou Itema ane molu noxou Mosinge, o uasi?”

³⁶ La itema ne mukolinu lexe, “Tilao, itema e nelemolu ne a ena'eio? Napela'iloxu mo so alopala noxou.”

³⁷ La Iesua muvikalanu lexe, “Nini a nemaisou mukalu 'oe. Anu ane ngilou ngavivikala 'o.”

³⁸ Sila anu muvikalanu lexe, “Tatanaleli, eni alopalasi.” La muxolasou tava'u mo mutanga­tuluou Iesua xe mu'itinu ualasou.

³⁹ Ioxe, la Iesua muvikala lexe, “Eni ene'e no lialia 'o so apala'a­nixu susu noxi'a tatemanu. Mo so axone la tamitema ane ixolu loxo ie'i selevenu la isaxisaxi xe ane'i ane isaxisaxi la ixolu loxo ie'i selevenusi.”

⁴⁰ Xe Tapalisi se'i mixolu alai noxou Iesua ne milomu axone la mitali'isou lexe, “Xo axova, na'oxo lexe nexi taxolu iexi selevenu kalumo, ne?”

⁴¹ La Iesua mulivuxa'a aloxo 'o, “Loxo ngingi ngaxolu iengi selevenusi la vaikalasou susu so uto'omengexu uasi. Ia xo ngingi a nga'oxo lexe ngasaxisaxi 'o, laso maixene susu noxinge a uxoxolusi.”