Tioni 4 - Ata New Testament

Iesua muxalisie sema Samalia vile

¹ Ioxe, Tapalisi milomusou a'alo lexe Iesua mu'oxonu ilixo so kelele noxi'a tamitema tavu'alo ka tamitema anene mixali tatisai­peliou. La navasi'a muua'ulixu navasi'a tatisaipeliou Tioni.

² Mi­lo­mu axone, ia loxo manina la Iesua molu u'oxonu ilixo so kelele noxi'a tamitema uasi, ane'i tatisaipeliou mu'isalili a mi'oxonu.

³ Ioxe, loxo Iesua mulavu lexe Tapalisi milo­musou a'alosou axone, laso anu mulutu muxexesou xale lia ne Iutea mo so ulivu ne Xalili.

⁴ La vote'i e so umulinu ne mupolo mulai ne xale lia ne Samalia.

⁵ Mumulinu xo laso muxali no taoni vile ne Samalia ilemolu lexe Sikali. Taoni ne uxolu alai no lia e Iakovo mupilixinu noxou olu Iosepu tatei.

⁶ La lexa taxasou e Iakovo mu'asou tatei a muxolu ne. Ioxe, Iesua mumuamua'i xo mo aso lixinu, mole mutotosa sila mutalu­pexa so uma'ila no pa'umolu lexa taxasou ne.

⁷ Mutalupexa la sema Samalia vile mine'e so lexe itau lexa. La Iesua muvikalane lexe, “Nalosilo lexa so aiexu.”

⁸ Anusisi muxolu xo tatisaipeli milai mi'una no taoni so ilotoxa'a la'ilali.

⁹ Ia sema Samalia ne mi'oxo lexe, “Ai nini Naiuta ane, xe eni sema Samaliamo, laso axova so nelingau lexa noxilo aloxo 'o?” Ane mivikala axone xo ane'i Taiuta ilavusou ikalitotone'i noxi'a Tasamalia.

¹⁰ La Iesua muvikalane lexe, “Loxo nelavusou mi lailaixe ane Mosinge mipilixinu 'o, mo loxo nelavu lexe eni ena'ei a elingau lexa noxine ne, la nini masi nelinga noxilo kaio elosine lexa so mauli. La ua.”

¹¹ La sema ne mikolinu lexe, “Ia Tilao, nini lapaxete so natau no anu uasi mo taxa ano'o mulu'elai no liamo, laso lexa so mauli e nelemolu ne naxalisou a ne'eio?

¹² Anu lexa taxasou ano'o e nexi tatau no anu vaimomo 'o, la texalisou noxou ilusunenge Iakovo e mu'asou tatei. Anu molu muie no anu xe ta'olu xe tamisoposiou, ia nini la masi natiatila noxou, ne?”

¹³ La Iesua mukoline lexe, “Tamitema mukalusi ane iie no anu lexa ano'o la ixolu maxuveni uasi sika isolioula.

¹⁴ Ia itema ena'ei uie no anu lexa ane eni aitixu la usolioula uasi. Xo lexa aitixu ne uxolu nonano noxou loxo lexa luxu mo u'opu'opu so ulosou mauli kaluxu uasi.”

¹⁵ Sila sema ne mivikalanu Iesua lexe, “Ai Tilao, na'itixo lexa anene mo so asoliou lexa la uasi mo anene'e 'o so atau no taxa 'ola uasi.”

¹⁶ Ioxe, laso Iesua muvikalane aloxo 'o, “Nini nalai na'avalou mulumeni kaio ngilou ngalivu ngane'e 'o.”

¹⁷ La sema ne miko­linu lexe, “Eni a ataula'ixu mulu vile uasio.” Xe Iesua muvikalane lexe, “No anu vaikalameni lexe a nataula'ixu mulu vile uasi ne anu manina ane.

¹⁸ Xo nini netatau­la'ixa'a tamulu ta'uve xe mune'e noxou anu ane naxoxolu noxou vaimomo 'o, la anu mulumeni to uasi, ngilou ngaxolu to xo nesi. Ani, laso vaikalameni maninasi.”

¹⁹ Sila sema ne mivikalanu lexe, “Tilao, anu mupalasi noxilo lexe nini masi polopeti vile ane.

²⁰ Ane'i tatiatilasixe milavusou ipita no anu la'olu 'o so i'itinu Mosinge ualasou. Ia ngingi Taiuta nga'oxo lexe tanixu u'isalili so tamitema i'itinu Mosinge ualasou a uxolu ne Ielusalemosi.”

²¹ La Iesua muvikalane lexe, “Sema, nano'u vaikalaxeli 'o. Voxo vile a unene'e la ngingi nga'itinu Maminge ualasou no la'olu 'o la uasi xe ne Ielusalemo la uasi kalumo.

²² Ngingi Tasamalia ne nga'itinu Mosinge ualasou ia anu la ngalavusou to uasi. Io nexi Taiuta 'o ta'itinu ualasou mo nexi a telavusou manina, xo vote'isou pamauli a noxixe 'osi.

²³ Ia voxo vile unene'e mo a muxali mukalu 'oe la tamitema ane so i'itinu ualasou Maminge manina la i'oxonu no anu vote'i noxou Ulenusi xe no anu maninasi. Xo tamitema ane Maminge oponu u'oxoxa'a so i'itinu ualasou, a ane'i axonesi.

²⁴ Mosinge anu ulenumo, laso ta'ei so i'itinu ualasou la i'oxonu no anu vote'i noxou Ulenusi xe no anu maninasi.”

²⁵ Mukalu la sema ne mivikala noxou lexe, “Eni elavu lexe Mesaia e ilemolu lexe Kalaisiti a une'e. Laso loxo anu ne une'e la upela'ingexu mimi mukalusi.”

²⁶ Sila Iesua muvikalane lexe, “A enisi ane axoxolu avikalaneni 'o.”

²⁷ Iesua muvikala se axone sika tatisaipeliou milivu mixali. La ane'i tane'ilili lexe xo ma'ia uvivikala noxie sema axone. Ia vile utali'i lexe, “Nini namasaxau nano'u mi ma'ia?” o “Navikala noxie sema ne so ma'ia?” uasi. Itali'isou axone uasisi.

²⁸ Ioxe, sema ne mi'avuti la mipilixinu lexa vexasou io milai mi'una no taoni la mivikalane'i tamotu lexe,

²⁹ “Ai, ngane'e ngamaisou itema vile. Anu muvikalalelixu mimi mukalusi e e'oxonu tatei mo mune'e 'o. Masi anu ane so Kalaisiti, ne?”

³⁰ Ioxe, ane'i milala no taoni so ine'ene'e noxou Iesua.

³¹ Ine'ene'e ia ixali uao la tatisaipeli mitatali'i noxou lexe, “Axova Tisa, nini na'ani uasi? Ano'o, na'oui.”

³² Ia anu muvikalane'i lexe, “Eni la'ilali so a'ou ane ngingi ngala­vusou to uasi.”

³³ Laso ane'i tatisaipeli mivikalane'i ngato'o lexe, “Ai masi evile mune'enu xou ani'ani mane, ne?”

³⁴ Xe Iesua muvika­lane'i lexe, “Eni la'ilalixo ane so amulinu masaxa noxou anu ane mupalusilo ene'e 'o, xe so amo­momoxu xaixai noxou e mupilixinu noxilo.

³⁵ Xo ngingi ngalavusou ngavikala lexe, 'So'io tami'a a uao uxolusio xo laso uxali no anu voxo so ta'elesou xai temanu.' Ia ngamalei, eni avikalangengi lexe ngasu'anu iengiou xai 'o xo munene'a mo a lingamo mukalu.

³⁶ La itema ane so u'elesou la a uxaxalisou lapesou mo a upipitanu xai nene'axu e so mauli kaluxu uasi. Laso itema ane so utotou xai xe ane so u'elesou temanu la ilou ipita no anu osa'ilasi.

³⁷ Laso maixene vaikala ane lexe itema vile so utounu xai xe vile so u'elesou temanu ne, anu maninasi.

³⁸ La ngingi ne esosovosinge so apalusinge ngalai nga'elesou temanu xai ane sasaiengi so ngaxaxaisou lumamo uasi. Tami­tema leviani sasaie'i so mixaxaisou la ngingi a so ngaxalisou nene'axu xaixai noxi'a.”

³⁹ Ioxe, Tasamalia so taoni ne milomusou vaikalaie sema olele e milemolu lexe, “Anu muvikala­lelixu mimi mukalusi e e'oxonu tatei mo mune'e 'o.” Milomusou la tavu'alo noxi'a milopala noxou.

⁴⁰ Laso loxo Tasamalia mine'e mixali noxou la milinga lexe oli'a ixolu sevileo. La anu muxolu no tualasi'a voxo tamei.

⁴¹ Muxolu la tamitema tavu'alola milopala xo milomusou vaikalaou mulanu.

⁴² La mivivikala noxie sema olele lexe, “A tava'u so talopala aloxo xo no anu vaikalamenila uasi. Nexi mexe telomusou vaikalaousi laso telavu lexe anu ano'osi a Itema so pamaulisi'a tatemanu lialia.”

Iesua mupaipounu olu tila vile no anu xaixai noxou kingi

⁴³ Ioxe, Iesua muxolu voxo tamei mukalu kaio mulutu mulai avile no xale lia ne Xalili.

⁴⁴ Iesua molu mulanu vaikala lexe, “Tatemanu nunisou polopeti mu'isalili la itaxanu to uasi.”

⁴⁵ Mulutu xo xe muxali ne Xalili la Taxalili mi'osa so i'unanu noxi'a. Mi'osasou xo ane'i kalumo milai no anu lavilelu ne Ielusalemo la mimaisou mimi mukalusi e mu'oxonu no anu voxo anene.

⁴⁶ Ioxe, Iesua muxixao ne Xalili la muxali no taoni vile ne, e ne Kana. Anu taoni e muxiunu lexa muxali uaini no anu mala'o. Muxali ne Kana la no voxo ne tila vile no anu xaixai noxou kingi muxolu no taoni vile ane ne Kapeniamu, la siki mukasou olu.

⁴⁷ Ioxe, itema ne mulomu lexe Iesua molu ne Iutea mo a mune'e ne Xalili laso anu mulutu so ulai noxou. Mulutu xo xe muxali la mulinga noxou Iesua lexe anu ulu'e no taoni ne Kapeniamu so upamaulinu olu xo anu a so usoli.

⁴⁸ La Iesua muvikalanu lexe, “Ngingi tamitema ano'o loxo ngamaisou sosovo so xavi uasi mo loxo ngasaxisou mimi lailaixe so tangengililiou uasi, la ngingi ngalopalasi uasisi.”

⁴⁹ Ia tila no anu xaixai noxou kingi muvika­lanusi lexe, “Tilao, napalea nalue no tualasixe xo masi la alixeli usoli ane.”

⁵⁰ Sila Iesua muvikalanu lexe, “Nini nalaisi, iline a umauli ne.” La itema ne mulopalanu Iesua vaikalaou laso mulutu mulaisi.

⁵¹ Mulai xo xe a ululu'esio la tamitema so xaixai se'i noxou me'a no tuala mine'e mixalisou no vote'i la mivikalanu lexe, “Iline mumauli mo a laixenusi.”

⁵² Xe anu muta­li'isi'a lexe, “Anu laixenu no aso iou aneva?” La mikolinu lexe, “A mei ne anu vasimolu ialuxu ia no anu aso iou muxexe la pipiena mupaxelesousi.”

⁵³ La molomolo momu mulavu lexe aso iou milemolu ne anu mulovo mu'isalili no anu Iesua vaikalaou lexe, “Iline a umauli ne.” Laso anu oli'a tatemanu tasou mukalusi ne milo­palasi.

⁵⁴ La anene sosovo so xavi tameisou e Iesua mu'oxonu ili'i loxo muxexesou Iutea mune'e ne Xalili mukalu.