Tioni 2 - Ata New Testament

Iesua mulai no anu taula'i noxou itema vile ne Kana

¹ Ioxe, mixolu xo xe voxo tatalu­soui, la tamitema mipita no taoni ne Kana no xale lia ne Xalili so isosovosou taula'i vile. La Iesua nenu milai kalumo.

² La tamitema miali'a Iesua oli'a tatisaipeliou so milai no anu lavilelu so taula'i ne kalumo.

³ Xe tamotu mixolu misosovosou taula'i xo xe uaini mukalui la Iesua nenu mivikalanu lexe, “Ane'i uaini so iieixula uae.”

⁴ La Iesua mukoline lexe, “Atie, nalemolu noxilo xo ma'ia, anu mi na'a xeli to uasi. Noxilo voxo a uao.”

⁵ Ia nenu mivikalane'i tami­tema so xaixai no anu tani lexe, “Loxo uvikalangengixu mi ma'ia la nga'oxonusi.”

⁶ La no tani anene lexa vexasou e toxoxu 6 e mi'oxonu no anu lavo'o a muta'olu ne. Anu vilevilesi ne umomomo no anu lexa litasou loxo 100. A muta'olu mulalaxi so tami­tema i'uini vasime'a uxali male­malenga aloxo lavuloto noxi'a Taiuta ulemolu.

⁷ Laso Iesua muvi­kalane'i tamitema so xaixai ne lexe, “Ngatatau lexa une'e so nga'a­na'anixu lexa vexasou 6 'o.” Laso ane'i mitatau xo mole muana'ana mumomomo avile.

⁸ Mukalu la Iesua muvikalane'ila lexe, “Io', ngatau se'i ngalaixu noxou itema so uvosinu la'ilali.” Laso ane'i milaixu noxou olele.

⁹ Milaixu, ia anu lexa la uasi, anu muxiu muxali uaini mukalu. Xe itema so uvosinu la'ilali olele muiexu sevile so utovonu ia ulavu lexe mino'u a ne'ei uasi. Ane'i tamitema so xaixai e mitau nesi a milavusou. Mutovonu uaini ne xe mukalu sila mu'avalou itema mutaula'i alavua ne.

¹⁰ La muvikalanu lexe, “Ai, tamitema ilavusou ivelunu uaini lailaixe tei mo tamitema iiexu xo xe isoliou malaxo uae, laso ane, ivelunu ane lailaixe malaxo uasi. Ia loxo nini la ne'apisou uaini lailaixe 'o ia mune'e alala'e se'osi a so navelunu to 'oe.”

¹¹ La mi e Iesua mu'oxonu ne Kana no xale lia ne Xalili ne anene soko'u no anu sosovo so xavi e mu'oxo'o­xonu. Anu mu'oxonu so umaxa'u lavulavu ilou xavi mu'uli'uli noxou. La ane'i tati­saipeliou milopala noxou.

¹² Mukalu la Iesua oli'a nenu xe tavimovimou xe tatisapeliou milutu milu'elai ne Kapeniamu. Milai xo xe mixali la mixolu ne voxo se'i.

Iesua mukusai'a tamitema ane mimaketi no tasou Mosinge

¹³ Ioxe, voxo so Taiuta i'oxonu lavilelu so Mosinge Mualasi'a a so uxali. Laso Iesua mulutu mulai ne Ielusalemo.

¹⁴ Muxali lai ne xe mu'unalai no vimelusou tasou Mosinge la mumaisi'a tamitema imaketi noxi'a takau xe tasipisipi xe tangiala e utu. Xe se'i la mitatalupexa so isenisimunu lamo­li.

¹⁵ Ioxe, Iesua mu'avuti la mu'oxonu puate no anu lamola­mota. Mukalu la mumuamuainu so ukusai'a tamitema oli'a takau xe tasipisipii'a ne mukalusi no anu tasou Mosinge. Mo munixinixi'u lamoli siliva noxi'a tamosou senisi olele ka mutitalenu latevolo noxi'a.

¹⁶ Xe noxi'a tamitema e misali­mune'i tangiala la muvikalane'i lexe, “Ngataxusi'a tangiala mo ngalailai. Mamu so nga'oxonu tasou Mamilo uxali tasou maketi.”

¹⁷ Xe tatisaipeliou mimaisou mi e mu'oxonu ne la mixavutalanu vaikala vile muxolu mukaukavu no anu Mosinge vaikalaou lexe, “Opoleli u'oxoxu tasine so uxolu laixesi mo masaxa anene ukasi­losi.”

¹⁸ Ia loxo Taiuta la mivikalanu lexe, “Ioxe, namaxa'u sosovo so xavi axova so nalosoiexi lexe anu tanixene so ne'oxonu mi to ne.”

¹⁹ La Iesua mukoline'i lexe, “Aloxo 'o. Ngingi ngamamulonu tasou Mosinge ano'o laso no anu voxo tatalusousi la eni atulusoula.”

²⁰ Xe Taiuta mikolinu lexe, “Uo ane'i tamitema mixaxai tau ie 46 so mitulusou tani ano'o, ia nini natulusou no anu voxo tatalusi, ne?”

²¹ Ia tasou Mosinge ane Iesua mulemolu ne a vasimolusi.

²² Laso no voxo ili'i loxo Mosinge mutulusou no anu soli so mumaulila, la tatisaipeliou mixa­vu­talanu vaikalaou ne. Mixavu­talanu la milopalanu vaikala ane uxolu no anu lavukuou Mosinge xe milopalanu vaikala e Iesua mule­molu kalumo.

Iesua ulavusou opone'i tamitema mukalusi

²³ No anu voxo so lavilelusou Mualasi'a la Iesua muxolu ne Ielusalemo. Muxolu la tamitema tavu'alo mimaisou sosovo so xavi ane mu'oxo'oxonu laso milopala noxousi.

²⁴ Ia loxo noxou Iesua la anu ulopalane'i tamitema ne lexe opone'i ulapu no anu anene uasi xo mulavusou ilixone'i tamitema mukalusi.

²⁵ Laso tava'u so evile upela'u no anu ilixone'i uasi xo anu mulavusou xavutala ma'ia muxolu no opone'i mukalusi.