Taitusi 3 - Ata New Testament

Pelototo so xoluxoluxa'a Mosinge ta'olu

¹ Ioxe, mo aloxo 'ola. Na'avuti­noxu xavutalai'a lexe itaxane'i tatiatila xe taxamani mo ilomuxa'a no anu mi ane laixe so i'oxonu.

² Mo ane'i ivikala masuai'a tamenexi'a uasi. Xe ane'i tamitema so i'avutinoxu tu'utu'umaxu uasi, ixolu se'isisi mo opone'i lexa noxi'a tamenexi'a mukalusi.

³ Xo nenge tei la texolu texovulaulau mo talomuxu Mosinge vaikalaou uasi. Texovulaulau xo Uluaou mu'oxo lolonenge mo masamasaxa no anu vasimenge mu'avutinoxu osa vita­nisi no oponenge. Texolu opo­nenge sixula mo teisuisu mo tematapianenge ngato'o.

⁴ Texolu axone ia Mosinge anu mosou pamauli tanunenge misevile la sexela noxou singe tamitema mupala'a.

⁵ Sila maixene anu mupamaulinenge. Mupamauli­nenge ia tava'u noxinge uasi xo nenge ta'oxonu mi vile ulapu uasi. Mi ne, mi so alauna noxou xo ukolinu susu noxinge uasi. Anu mu'ulosinge mo muxalinenge ta'olu ta'alavua noxou Ulenu Laixe.

⁶ Xo no anu xaixai noxou Iesua Kalaisiti anu Itema so Pamauli la anu munixi'u Ulenu Laixe noxinge laso tepalava noxou.

⁷ Kalaisiti muiaiamanenge laso Mosinge mumoxo'inge lexe tamalemalenga no iou. Mo musosovosinge nenge ta'olu lexe taxalisou mauli kaluxu uasi ane talopalanu taxomaiou.

⁸ Vaikala ano'o manina e maninasi. Laso loxo nalemolu la amasaxau lexe xavineniou. Mo so axone la tamitema ane ilopalanu Mosinge la ilaxa'i laixe so i'oxonu ilixo laixesi. Xo axone la ane'i latala ino'u su'uli laixe no anu.

⁹ Ioxe, anene su'uli laixe. Ia mi loxo oto'oto vitanisi no anu vaikala xe nana vuluvulusi xe so ipelesou anaxa'a no anu vaikala kitukitu so lo, la usu'ulinenenge axova? Mi axone nene'axu laixe uasi.

¹⁰ Xe loxo itema ane uxili­liou Mosinge vaikalaou mo uxalixu kalipala no anu pita, la ngalovonixu. Ngalovonixu alaxu vile, alaxu tamei xe loxo oponu pumuxusi, la ngaxiunu tumali­ngeou avile.

¹¹ Ngaxiunu tumali­ngeou xo itema axone ngalavu lexe susu noxou ne usakinui ane. Anu molu mumaxa'u oponu no anu ilixo noxou ne.

Vaikalaou Polu kaluxusou

¹² Ioxe, no voxo loxo apalusi'a Atemasi ilou Tikikusi ine'e noxine la xavineni so nane'e naxalisilo no tuala ne Nikopolisi. Nane'e xo eni opoleli lexe axolu ne no anu sivo lelemosou taunu.

¹³ Xe Senasi anu itema so lavulavu no anu lo noxou xamani ilou Apolosi la nasu'uline'i laixe. Mo so loxo ilutu so imua­mua'i la isoti no anu mi vile uasi.

¹⁴ Xe napelototosi'a tamitema­menge so ilavu laixe no anu vote'i so su'uli. Laso loxo tamitema isoti no anu mi ma'ia xe isu'uline'i la uxalixu nene'axu laixe ane.

¹⁵ Tamitema mukalusi noxi'a taxoxolu 'o, ivikala aso noxine. Mo kalumo navikala aso noxi'a tami­tema ane isexelanexe ne, xo lopala noxixe noxi'a vilesisi. Mo ngaxa­mulinu iaiama noxou Mosinge ane usu'asinge ne. Anu anesi.