Taitusi 2 - Ata New Testament

Pelototosi'a tatiatila

¹ Ia loxo nini, la napelototo u'isalili mo so xoluxoluxa'a Mosinge ta'olu ulovou vaikala pumuxusi.

² Laso noxi'a tamulu tatiatila la napelototosi'a aloxo 'o. Masama­saxa noxi'a upalusi'a uasi. Xe no anu vaikalai'a la isu'asu'anu vuluvulusi uasi mo so axone la tamitema itaxane'i. Mo lopala xe sexela noxi'a ututulu pumuxusi, uxiuxiu uasi.

³ Xe noxi'a tasema tatiatila la axone kalumo. No anu ilixo noxi'a la ilu'ene'i mo imulinu masaxa noxou Mosingesi. Xe ixixaoxao so itunana uasi mo ipilixine'i so ixolu iie uaini utotomu uasi. Ixolu la opone'i ututulu so ipelototo no anu vaikala mulapusi.

⁴ Mo so axone la tasema tatiatila isu'uline'i tasema so isexela'a tamului'a xe ta'ili'a.

⁵ Xe ipelototosi'a lexe ixolaxola uasi ixolu no anu malemalengasi. Xe no anu tasi'a la ivu'ulinu laixe mo tane'ixa'a tatemanu laixe. Mo ilu'ene'i noxi'a tamului'a mo so loxo tamitema imaisou ilixo noxi'a la ivikala masuaou Mosinge vaika­laou uasi.

Taitusi u'oxonu ilixo ane u'isalili mo so tamaulu imulinu

⁶ Xe noxi'a tamaulu kalumo. Napelototosi'a lexe xoluxoluxa'a vuluvulusi uasi.

⁷ No anu xoluxolu noxine la mi ma'ia na'oxonu ne u'isalili mo so loxo ane'i imaisou la imulinusi. Xe loxo nalulusou Mosinge vaikalaou la napolo va'axu sevile uasi. Mo no anu ilixo noxine la naxolaxola uasi mo so ane'i itaxaneni.

⁸ Xe vaikalameni ulapusi mo so mi vile so tamitema ito'omenexu uasi. Laso axone la tamitema so xilili ne ixalisou maila xo ivikalasinge masua axova.

Tamitema so xaixai ilomuxa'a tavosi'asi

⁹ Xe noxi'a tamitema so xaixai la napelototosi'a kalumo lexe ilu'ene'i noxi'a tavosi'a, so loxo imulinu vaikalai'a mukalusi, la i'osasi'asi. Loxo tavosi'a ipalusi'a no anu mi ma'ia la ilivuxa'a uasi, i'oxonusi.

¹⁰ Mo ipulumaou mimii'a uasi. Xe loxo tavosi'a ilopalane'i no anu mi ma'ia la ane'i i'oxonu laixesi. Laso axone la no anu xoluxoluxa'a mukalusi la i'itinu vaikalaou Mosinge e mosou pamauli no ie'i tamitema.

Taxolu no anu iaiama noxou Mosingesi so taxomaiou Tatananenge

¹¹ Xo aloxo 'o. Iaiama noxou Mosinge mupala'a mukalu mo anu vote'isou pamauli noxi'a tamitema mukalusi.

¹² Xe iaiama noxou Mosinge ne ulosoiengixu vote'i so tapilixinu ili'ilixo ane uxilililiou Mosinge oponu. Mo so masama­saxa so mimi so lialia xe no anu vasimenge upamuxanenge uasi. Nenge taxolu no taitaine'i tamitema so lialia 'o ia iaiama noxou ne mulosoiengixu xoluxolu ane mula­pusi mo u'isalili no anu masaxa noxou.

¹³ La taxolu tautitiou mi lailaixe e talopalanu taxomaiou. Mi e taxomaiou ne, voxosou Mosinge U'uli'uli anu Itema so Pamauli e Iesua Kalaisiti so upala'a no anu iaxu.

¹⁴ Anu mu'italonu maulixu so mulotonu lakolisou ili'ilixo noxinge mukalusi ane muxolaxola'u lo noxou Mosinge. Xe mu'ulosinge so texali tamitemaou malemalenga mu'isa­lili. Laso maixene oponenge utata­ma so ta'oxonu ili'ilixo ane laixesi.

¹⁵ Laso utotomo nalemolu mimi ano'o noxi'a tamitema. Napeloto­tosi'a xe loxo se'i ipolo va'axu la nalovonixi'a no anu xavisi. Masi oponeni lexe ilomuxene uasi, ia mamu so namama'u, navikalasi.