Taitusi 1 - Ata New Testament

¹ Eni Polu a. Eni amitema so xaixai noxou Mosinge xe eni aposeliou Iesua Kalaisiti. Anu mupalusilo so a'oxonu pakia'u lopala noxi'a tamitema ane Mosinge musoso­vosi'a lexe tanoxou. Mo so ilavu­lavu no anu vaikala manina e ulovo u'isalili no anu masaxa noxou.

² Mo asu'uline'i so ixolu ilopalanu mauli kaluxu uasi ane Mosinge muvavalimasou tatei loxo mi vile uxali uao. Xo loxo telavu, anu ukalavoi uasi ane.

³ Muvavali­masou axone xo xe no anu voxosou mu'isalilii la musosovosi'a se'i so ipalasinoxu vaikalaou. La Mosinge anu mosou pamauli mupilixinu vaikalaou nesi noxilo so alanu noxi'a tamitema.

⁴ Lapasi ano'o ulai noxine nini Taitusi. Lopala na'a nenge vilesisi mo nini na'alixeli no anu lopala ne. Eni amasaxau lexe nini naxamulinu iaiama mo xoluxolu lalavulusi noxou Mosinge anu Maminge ilou Kalaisiti Iesua anu Mosou Pamauli noxinge.

Taitusi so utulusi'a tamitema so saxila'u

⁵ Ioxe, eni e'italoneni nexolu no ailani Kiliti so na'isalilinoxu xaixai teletelexu ne. Mo kalumo so natulusi'a tamitema so isaxila'u pitapita no tuatuala, loxo epalusi­nexu mala'o.

⁶ Natulusou itema axone la mi vile no anu xoluxoluxu so tamitema ito'omolu no anu uasi. Loxo utaula'i la semau vilesisi. Xe loxo ta'olu, la lopala noxi'a noxou Kalaisitisi. Mo no anu xoluxo­luxa'a, la nuni'u no ie'i tamitema uasi xe ixililiie'i tamami'a taneni'a uasi.

⁷ Xo itema so uvu'ulinu pita axone la xoluxoluxu lamanasi no ie'i tamitema xo anu so ulaxa'inu xaixai noxou Mosinge. Anu itema so usoune'i tamitema so imulinu masaxa noxoumo uasi. Anu itema so la'iaxu palea uasi xe itema so usipaki uasi. Xe itema so u'oto uasi mo kalumo oponu ututuluou lamoli ilou mimi so vasimenge uasi.

⁸ Mo loxo tamitema ine'e no tasou la uvu'uline'i laixe. Itema loxo natulusou ne la oponu utulu no anu mi ane laixe mo mulapusi. Loxo mi vile uxali la anu utilovosou laixe xo oponu ututu­luou masaxa noxou Mosingesi. Xe masamasaxa noxou upalusou vitanisi uasi, anu molu upamuxanu laixe.

⁹ Mo anu itema so ukama­kulunu vaikala manina loxo mulomusou no anu votovoto. Mo so loxo upeloto la upolo va'axu uasi, ulanu vaikala e pumuxu nesi. Xe loxo tamitema ixilili la uko­line'i no anu vaikala ne la saexa'a uxolasi.

Ane'i mose'i mitovonu so ixovulaulaunixi'a talopala

¹⁰ Xo no taingengi ne tamitema so xilili tavu'alo ixolu ne. Ane'i tami­tema ne ilemolu vaikala vuluvulusi so ixovulaulaunixi'a tamitema. Ane'i tavu'alo ne no anu laili noxi'a Taiuta e opone'i ututulu no anu sosovo so vasimenge.

¹¹ Ane'i ilavusou ixixaoxao mo ilanu vaikala masumasua so ima­suanu lopala noxi'a tatemanu tanitani. I'oxo loloxa'a axone xo ikamulinu vote'i so ixalisou lamoli o mimi so vasime'a. Laso pakia'ine so na'api­xa'a no anu vaikali'a ne lexe ixolu tasiausi.

¹² Xo tatei itema so lavulavu vile noxi'a molu muvikala aloxo 'o, “Ane'i Takiliti ne tamitema so ikakalavoi to. Ilixo noxi'a masua loxo ta'a'a tavova. Ane'i tapauxe mo xavutali'a no anu ani'anisi.”

¹³ Vaikala ano'o manina. Laso napelototosi'a Mosinge ta'olu pakia'u mo so lopala noxi'a utulu pumuxusi.

¹⁴ Napelototosi'a lexe ilomuxu ngalo noxi'a Taiuta uasi. Xe ilomuanu lo noxi'a tamitema ane ixiunu tumali'aou vaikala manina.

¹⁵ Xo aloxo 'o. Noxi'a tamitema ane tamalemalenga no iou Mosinge la ani'ani mukalusi malemalengasi. Ia noxi'a ane'i ane ilopala uasi la ane'i nuni'a no iou Mosinge. Laso maixene mi vile malemalenga noxi'a uasi xo xavutalai'a mo tane'i nuni'u avile.

¹⁶ No anu anaxa'a la ivikala lexe ilavusou Mosinge oponu. Ia no anu xoluxoluxa'a la umaxa'u lexe ane'i ixililiou ane. Xo xoluxoluxa'a ne masua no iou Mosinge. Ane'i ilomuxu vaikalaou to uasi mo imomomo uasi manina so i'oxonu ilixo vile laixe.