Ta'aposeli 9 - Ata New Testament

Iesua mupala'a noxou Sauli

¹ Ioxe no voxo anene, la Sauli utotomu muvotoxa'a tamitema ane milopala noxou Tatananenge so umasuane'i. Laso anu mulai noxou tatila noxi'a tapilisiti.

² Mulai so mulinga noxou lexe ukaukavunu lapasi so anu Sauli ulaixu ne Tamasikusi. Ulaixu ne Tamasikusi mo ulosoie'ixu tatiatila no anu tatasou lavuloto noxi'a Taiuta. Lapasi ne muvikala lexe tatiatila noxi'a tapilisiti ivalaxu xaixai noxou Sauli. Mo so loxo Sauli uxalisi'a tamulu o tasema ta'ei imulinu vote'i noxou Iesua la anu utetelisi'a mo ulaixi'a ilivu ne Ielusalemo.

³ Pilisiti tatila mulosou lapasi mukalu la Sauli oli'a tavoiou milutu milai ne Tamasikusi. Milutu milai xo xe ane'i so ixali no tuala sila alaxu vilesisi mi vile lamixu molu no loxotolo mutalosou.

⁴ Mi lamixu mutalosou Sauli ne xavinu musuku, laso anu mulapau. Mulapau sila mulomusou xolinu evile uvikalanu lexe, “Ai Sauli, loxova so nalosilo tu'umaxu?”

⁵ La Sauli mutali'i lexe, “Tatila, nini ena'ei ne?” La anu mukolinu lexe, “Eni Iesua, eni ane nelosilo tu'umaxu ne.

⁶ Nini natulu ka na'unalai no tuala Tamasikusi 'o. Mo naxolu xe ili'i la itema vile ulemolu mi ma'ia so na'oxonu.”

⁷ Tavoiou Sauli oli'a milai ne mikuluke mo ilemolu mi vile uasi. Ane'i milomusou mi vile ia imaisou mi vile uasi.

⁸ Ioxe, Sauli mutulu xe iou muka ia iou isivoxosi. Iou isivoxo laso ane'i mitila'u so oli'a mi'unalai no tuala Tamasikusi.

⁹ La anu muxolu voxo tatalu ia anu iou isivoxosio. Muxolu muxolu la u'ani mo uie uasi.

¹⁰ No tuala Tamasikusi ne, itema so lopala vile a muxoxolu, ualasou lexe Ananaiasi. Ananaiasi muai musaxi lexe Tatananenge mumo­xo'u. La anu mukolinu lexe, “Tatanaleli, eni a axoxolu.”

¹¹ La Tatananenge muvikala lexe, “Nalutu mo nalai no vote'i e ilemolu lexe Lapusi. Nalai naka­mulinu tani noxou Iutasi mo natali'isouxu itema vile so tuala Tasusi. Itema ne ualasou lexe Sauli. Anu a uxoxolu oponu utatama noxilo.

¹² Anu iou isivoxo ia anu muai musaxi lexe nini Ananaiasi nexali nemulaxu avone noxou so iou ukala.”

¹³ Ia Ananaiasi mukolinu lexe, “Tata­naleli, eni elomusi'a tamitema tavu'alo ipitanu anaxa'aou itema anene. Ia'aloxu ilixo masumasua anu u'oxonu noxi'a tamitemameni u'isalili ne Ielusalemo.

¹⁴ Mo anu muno'u lapasi noxi'a tatiatila noxi'a tapilisiti so lexe anu ukalavusune'i tamitema ta'ei i'itinu ualasine no tuala ano'o.”

¹⁵ Ia Tatananenge muvikalanu lexe, “Nini nalai. Eni melo esosovosou itema anene so u'oxonu xaixai noxilo. Ili'i la anu ulaixu ualasilo noxi'a Ta'isilaeli mo uxalixu avile noxi'a tamitema noale'ale oli'a takingii'a.

¹⁶ La eni alosoiou lexe ua'aloxo axone mo utavulenu tu'umaxu xe navuna­vusou.”

¹⁷ Muvikalanu mukalu laso Ananaiasi mulutu mulai. Mulutu mulai xo xe muxali no tani xe mu'unalai laso mumulaxu avolu noxou Sauli mo muvikala aloxo 'o, “Vivilo Sauli, Tatananenge Iesua e muxali noxine no vote'i ne, mupalusilo ene'e noxine. Ene'e so ieni ukala mo Ulenu Laixe uxolu noxine mo upamuxaneni.”

¹⁸ Ana­naiasi muvikala axone mukalu sila alaxu vilesisi mi loxo sinana xielinu e mutanuxu iou ne mulapau muxexe kaio Sauli mumaleila. Mukalu la anu mutulu mo Ananaiasi mu'oxonu ilixo so kelele noxou.

¹⁹ Ananaiasi muke­lenixu mukalu xe ili'i la Sauli mu'ani mo mumaulila. La Sauli oli'a tamitema so lopala ne Tamasikusi mixolu voxo se'i.

Sauli muvotovoto ne Tamasikusi

²⁰ Ia no voxo ane Ananaiasi muxali noxou la Sauli musoko'u so uvotovoto no anu tatasou lavuloto. Anu muvotovoto lexe Iesua anu Mosinge Olu.

²¹ Muvotovoto xe tamitema milomusou la ane'i mikuluke manina mo mivikalane'i ngato'o lexe, “A itema e mutovonu so lexe umamulonu laili ane i'itinu ualasou Iesua ne Ielusalemo, xe mune'e lai 'o so ukalavusune'i mo ulaixi'a noxi'a tatiatilasi'a tapilisiti, anu itema ano'osi, ne?”

²² Ia Tatananenge mulosou xavi, mo mulemolu vaikala tu'umaxu noxi'a Taiuta so tuala Tamasikusi ne. Mupala'anixu lexe Iesua anu ane so Kalaisiti. Mupala'anixu axone mo vaikalaou tu'umaxu laso ane'i imomomo so ikoli uasi.

Taiuta la'iaxa'aou Sauli laso mu'ume

²³ Ioxe, muxoxolu xo xe voxo tapiena mulai mukalu la Taiuta mipita ka mimolo vote'i so ivau Sauli usoli.

²⁴ Ia vaikalasou xavutalai'a ne muxali noxou Sauli. Mimolo vote'i so ivau usoli laso utotomu miloxu no aiaitengaxu vimelusou tuala.

²⁵ Ia ane'i ane utotomu mimulinu so milomusou votovoto noxou mino'u no olovoxo mo milaixu no tuala pa'umolu vile. Oli'a mitelai no vimelu toxoxu e mi'oxonu no anu lavo'o. Mitelai mukalu la Sauli mutalupexa no ti'a ka mililixu mulu'elai no lia noale.

Sauli muxoxolu ne Ielusalemo

²⁶ Ioxe, mu'ume axone la mulai muxolu ne Ielusalemo. Anu umasaxa lexe u'una noxi'a talopala, ia ane'i mi'umolu. Mi'umolu xo ane'i ilavu lexe anu mulopala uasi ane.

²⁷ Ia itema vile ualasou lexe Vanavasi muno'u Sauli mo mulaixu noxi'a ta'aposeli. Mulaixu mo mua'aloi'a lexe Tatananenge mupala'a mo muvikala noxou Sauli no vote'i. Mo mua'alo lexe Sauli muvotovotosou Iesua ne Tamasi­kusi no anu xavisi.

²⁸ Vanavasi mua'aloi'a axone laso anu Sauli mu'una noxi'a talopala mo oli'a mixixao ne Ielusalemo. La anu u'ume so uvotovoto no anu ualasou Tatananenge uasi.

²⁹ Mo voxo tavu'alo oli'a Taiuta ane ivikala Kiliki mivivikala. Xe mune'e la oli'a mi'oto'oto no anu vaikala, la ane'i Takiliki ne la'iaxa'a mo mikamulinu vote'i so ivau Sauli usoli.

³⁰ Xe ane'i tavimovimou no anu lopala milavusoui la mi'umenu milaixu no tuala Sisalia, mo mipalusou avile mulai ne Tasusi.

³¹ Laso no voxo anene la tatemanu pitapita no xale lia ne Iutea xe ne Xalili xe ne Samalia mixolu se'isisi, itavulenu tu'umaxu vile uasi. Ane'i mixali pakia'a mo Ulenu Laixe mu'oxonu opone'i mu'osa. Mo tamitema tapiena mi'una noxi'a la oli'a mixolu so Tatananenge molu mu'uli laxune'i.

Pita mu'oxonu sosovo so xavi

³² Xe mune'e la Pita muxixaosou xale tuatuala. La mulai no tuala vile ualasou lexe Lita so ukiloloi'a tamitemaou Mosinge u'isalili e mixolu ne.

³³ Xe no tuala ne anu muxalisou itema vile ualasou lexe Aineasi. Anu xixinu musoisoli mo muai no lusousi umomomo no anu tau ie 8 mukalu 'oe.

³⁴ La Pita muvikalanu aloxo 'o, “Aineasi, alala'e 'osi Iesua Kalaisiti upaipou­neni. Natulu mo nano'u lusine.” Sila anu mutulu alaxu vilesisi.

³⁵ Anu laixenu axone la tamitema so tuala ne Lita xe latia toxoxu ne Saloni milavu no anu mi ne. Milavu no anu sosovo so xavi anene laso ane'i mixiunu opone'i mo mi'isalilinoxu noxou Tatanane­ngesi.

Pita mupamauline sema vile

³⁶ Ioxe, no tuala vile ne Iopa la sema vile ualasie lexe Tavita a mixoxolu. Io no anu vaikala Kiliki la ilemolu ualasi lexe Tokasi. No anu xoluxolu noxie ane milavusou i'oxonu ilixo laixe so isu'uline'i tamitema ane la'ilalixa'a ilou mimii'a uasi.

³⁷ La sema ne pipiena toxoxu muno'e mo misoli. Misoli laso ane'i mi'ulosie mukalu la mimulaxe no ngiou vile teitexi.

³⁸ Anu tualasie Iopa ne anu muxolu alai no tuala Lita. Xe talopala milomu lexe Pita a uxolu ne Lita laso ane'i mipalusi'a tamitema tamei so ivikalanu lexe, “Nini napalea nane'e, navovoxo uasi.”

³⁹ Mivikalanu la Pita mulutu so oli'a milai. Milutu xo xe mixali ne Iopa la ane'i mitelaixu Pita no ngiou ane vasimele Tavita uai no anu. La tasema ane tamului'a misoisoli mukalu mine'e mitulu alai noxou Pita mo mitatama. Mitatama mo mimaxa­maxa'u lakolosi xe lasioti ane Tavita mi'oxonu no voxo loxo mimaulisio.

⁴⁰ Mitatama mitatama xo la Pita mupalusi'a milai noale. Ia anu muxolasou tava'u mo muvikala noxou Mosinge. Muvi­kala noxou Mosinge xe iou mukaie Tavita la muvikala lexe, “Tavita, natulu.” Sila alaxu vilesisi iei muka. Iei muka xe mimaisou Pita la ane mitulu mitalupexa.

⁴¹ Mita­lupexa laso Pita mutila'e mitulu. Mukalu la anu mu'avali'a talopala xe tasema tamului'a misoisoli mi'una mo muvikala lexe, “Nga­malei, mimauli”.

⁴² Xe a'alosou mi ne muiaveiave noxi'a tatemanu tuala ne Iopa la ane'i tavu'alo e tavu'alo milopala noxou Tatana­nenge.

⁴³ Pita muxolu maxuveni sevile no tuala ne Iopa ne. Muxoxolu no tasou itema vile ualasou lexe Saimoni. Saimoni ne anu xaixai noxou so u'oxonu mimi no anu tamisoposi sosoie'i.