Ta'aposeli 8 - Ata New Testament

¹ La Sauli mumaisi'a mivau Sitiveni axone la anu mu'osa xo oponu vilesisi axone. Ioxe, no anu voxo anene la tamitema misoko'u so itovonu so imamulonu pita ne Ielusalemo. Laso ane'i tatemanu pita ne mipaxelele mo milailai no xale lia ne Iutea xe ne Samalia. Ane'i ta'aposelisi mixolu ne Ielusalemo.

Tatemanu pita mipaxelele

² Sitiveni musoli xe tamitema se'i ane mimama'u noxou Mosinge la mi'asixu. Mi'asixu mo tane'ixu misevile.

³ Ia Sauli anu u'oxo so umasuanu pita noxou Tatananenge. Anu muxixao no tatasi'a tamitema so lopala so ulaixi'a no lakalavusu, tasema oli'a tamulu.

Pilipi muvotovoto ne Samalia

⁴ La ane'i tamitema so lopala ane mipaxelele la mivulunu vaikalaou Mosinge no tuala aneva ane'i milai no anu.

⁵ Xe itema e ualasou lexe Pilipi, anu mulai no tuala vile no xale lia ne Samalia mo mua'aloxu Kalaisiti noxi'a.

⁶ Mua'aloi'a la tamitema tapiena e tapiena mipita noxou. Mipita noxou xe milomusou vaikalaou mo mimaisou sosovo so xavi ane mu'oxonu laso ane'i milomuxu.

⁷ Anu mu'oxonu sosovo so xavi so mukusai'a ta'angelo tamasua noxi'a tamitema se'i. Mukusai'a la mi'ava tatila ka mixexesou vasime'a tamitema ne. Xe tamitema ane xine'i musoisoli o tava'a mukilikalu ne laixene'isi.

⁸ Tamitema milomusou vaikalaou xe mimaisou sosovo so xavi laso 'osa toxoxu muxali no tuala ne.

Itema so sa iouiou ualasou lexe Saimoni

⁹ Ioxe, la itema vile so tuala ne ualasou lexe Saimoni. Anu itema so u'oxonu sa iouiou. Anu utotomu mu'oxonu ilixo ne xe loxo nene'axu muxali la tamitema mikuluke no anu. Ane'i mikuluke axone laso anu mutoxu mo u'itinu lexe anu itema tila.

¹⁰ La ane'i tamitema tatiatila xe tamulu xe tasema vitanisi ane'i itaxanu Saimoni. Xo mi'oxo lexe, “Xavi noxou 'o molu noxou Mosinge ilemolu lexe Mosou Xavi.”

¹¹ Ane'i milomuxu vaikalaou xo tatei mune'e muxali no voxo anene la mimaisou lexe u'oxonu ilixo iouiou ane tane'ililiou.

¹² Ia voxo loxo Pilipi muvotovoto no anu vaikala laixe so voxo loxo Mosinge molu u'uli laxune'i tamitemaou mo mua'aloxu Iesua Kalaisiti, la ane'i milopala. Ane'i milopala mukalu la mi'oxonu ilixo so kelele, tasema xe tamulu.

¹³ La Saimoni kalumo mulopala mo muxalisou kelele. Mo loxo Pilipi mulai no tuala ne'ei la anu ilou mixixaoxao xe musaxisou sososovo so xavi Pilipi mu'oxonu mo anu tanulili misevile.

¹⁴ Ioxe, ane'i ta'aposeli mixolu ne Ielusalemo la milomu lexe Tasa­malia mi'osasou mo milomuxu vaikalaou Mosinge. Milomu axone laso mipalusi'a Pita ilou Tioni so milai noxi'a.

¹⁵ Ilou milutu xo xe mixali la ilou mivikala noxou Mosinge lexe Ulenu Laixe uxali noxi'a Tasamalia kalumo.

¹⁶ Xo Ulenu Laixe uxali noxi'a uao. Ane'i mi'oxonu ilixo so lexa lumamo ia mi'oxonu no anu ualasou Iesuasi.

¹⁷ Ane'i ilou mivikala noxou Mosinge la mimulaxu avo'a no kisikisi'a tamitema laso Ulenu Laixe muxali noxi'a kalumo.

¹⁸ La Saimoni mumalei lexe Ulenu Laixe uxali noxi'a talopala loxo ta'aposeli tamei mimulaxu avo'a no kisikisi'a axone. Laso anu muno'u lamoli mune'e so lexe ulotonu xavi anene.

¹⁹ La muvikala aloxo 'o, “Ai, ngingi ngilou ngalosilo xavi axone. Mo so loxo eni amulaxu avolo no kisou itema vile la Ulenu Laixe uxali noxou. Lamolisou ano'o.”

²⁰ Ia Pita muvikalanu Saimoni aloxo 'o, “Lamolimeni ne ngolou ngamamulosi. Mi anene Mosinge ulosinge no anu iaiamasi la ne'oxo lexe nalotonu no anu lamoli? Uasi to!

²¹ Nini namo­momo so na'una no anu xaixai Mosinge mulosixe 'o uasi. Xo oponeni ulovou Mosinge uasi manina.

²² Laso nini naxiunu oponeni no anu susu ano'o mo na'isalilinoxu no anu Mosinge vaikalaou. Mo nakatu noxou Tatananenge so anu ukalusou tina'uxene so susu ano'o.

²³ Xo eni emaisou lexe nini oponeni ututulu no anu ili'ilixo so isivoxo mo susu a ukasinesi.”

²⁴ Laso Saimoni muko­linu lexe, “Ngingi ngilou ngalinga noxou Tatananenge so mimi tu'utu'umaxu ngelemolu 'o uxali noxilo uasi.”

²⁵ Ioxe, ta'aposeli tamei mivoto­voto mo mia'aloxu Tatananenge vaikalaou noxi'a tamitema mukalu, laso ilou milivu ne Ielusalemo. Milivu xe mipolo no anu tuala aneva noxi'a Tasamalia la ilou mivotone'i no anu vaikala laixe noxou Mosinge.

Pilipi muvotovoto noxou itema Itiopia vile

²⁶ Ioxe, angelou Tatananenge vile muvikalanu Pilipi aloxo 'o, “Nini nalutu nalai no anu vote'i e molu ne Ielusalemo ulai no tuala ne Xasa. Vote'i e upolo no xale lia esi'esi.”

²⁷ Pilipi mulomu mukalu la mulutu mulai. Mulutu mulai xe no vote'i la muxalisou itema so xale lia ne Itiopia. Anu itema tila no anu xamani, xaixai noxou so usaxila'u lamoliie xe mimiie kuinii'a Ta'itiopia. Kuini ne, mimoxo'e lexe Kanitasi. Itema tila ne mune'e ne Ielusalemo so mu'itinu Mosinge ualasou xe anu a ulalai so ulivu no tualasou.

²⁸ Anu ulalai la uxoxolu no anu kali e ta'osi ilapunu. Anu uxoxolu no kali la u'itisou vaikalaou Mosinge polopeti Aisaia mukaukavunu tatei.

²⁹ La Pilipi mumaleisou sila Ulenu Laixe muvikalanu lexe ulai mo umuamua'i alai noxou itema tila ne.

³⁰ Ioxe, Pilipi muiave mulai muxali no kali pa'umolu la mulomusou itema ne lexe mu'itisou vaikalaou polopeti Aisaia. La Pilipi mutali'isou lexe, “Xo nini nalavu­sou laxu vaikala ane na'itisou ne, o uasi?”

³¹ La anu mukolinu Pilipi lexe, “Alamana axovae? Evile uxolu so ululusou noxilo uasi.” Mukalu la anu mulinga noxou Pilipi lexe utelo so ilou ixolu no kali.

³² Itema tila ne a u'itisou vaikala vile ane uxolu no anu lavukuou Mosinge aloxo 'o. “Anu mu'italonu mumuline'i loxo tasipisipi i'oxo loxo tamitema so ive'a. Xe anu mutomunu anaxu mo muxolu tasiau loxo tasipisipi ta'ili'a i'oxonu no voxo loxo tamitema ixotosou laxusi'a.

³³ Anu ilixou axone no voxo ane tamitema mito'omolu no anu vaikala kalavoi so mimolo maila noxou. Taa'aloxu ilixo noxi'a laili ne axova? Xo mauli noxou mukalu no lialia 'o.”

³⁴ Ioxe, mu'itisou mukalu la muvikalanu Pilipi lexe, “Maula, eni atali'isine, polopeti mukaukavunu vaikalasou ena'ei 'o? Anu molu o itema vilemo?”

³⁵ Mutali'i axone laso Pilipi musoko'u so muvoto­votou. Tei la mululusou laxu vaikala nesi. Mukalu laso anu musisimulinu vaikala laixe so Iesua.

³⁶ La ane'i a ilalai no vote'i xe mixali no lexa la itema tila ne muvikalanu Pilipi lexe, “Namalei, lexa ano'o. Mi vile u'apinenge so na'oxonu ilixo so kelele noxilo uasi, ne?”

³⁷ Pilipi mutali'isou lexe, “Xo nini nalopala no oponeni lexe vaikala e elemolu noxine manina?” La itema ne mukolinu lexe, “Ani, eni alopala lexe Iesua Kalaisiti ne anu Mosinge Olu manina.”

³⁸ Laso itema tila ne muvikalanu voiou ne lexe upamu­xanu osi so kali utulusi. La Pilipi ilou itema tila ne milu'elai no lexa. Milu'elai no lexa mukalu laso Pilipi mu'oxonu ilixo so kelele noxou.

³⁹ Pilipi mukelenixu mukalu xe ilou mitelo no lexa sila alaxu vilesisi Ulenu Tatananenge muno'u Pilipi mulai. La itema tila ne umaisoula uasi. Umaisoula uasi ia mulutu so mulai la oponu mu'osa manina.

⁴⁰ Xe loxo Pilipi, la anu mumalei lexe anu muxolu no tuala Asitoti. La anu mulalai no tuatuala mo muvotovotosou vaikala laixe noxou Mosinge. Mulalai xo la muxali no tuala ne Sisalia.