Ta'aposeli 7 - Ata New Testament

Sitiveni mulanu vaikala no lakoti

¹ Tamitema mikalavoisou Sitiveni axone mukalu laso tatila noxi'a tapilisiti mutali'isou lexe, “Vaikala ano'o ito'omene no anu manina o uasi?”

² Ioxe, Sitiveni mukolinu mo mua'alo aloxo 'o, “Tavivilo, tamamilo, ngalomu laixe. Tatei ilusunenge Apala'amu muxolu no xale lia ne Mesopotemiasio, ulai ne Alanu uao. La Mosinge anu Mosou Iaxu muxali noxou.

³ Muxali noxou la muvikala aloxo 'o, 'Nini na'umesou tualasine mo tamine­mineni mo nalai no xale lia eni alosoienixu.'

⁴ Laso Apala'amuena mi'umesou xale lia noxi'a Takalitia ne mo milai mixolu ne Alanu. Mixolu xo xe momu musolii laso Mosinge mupalusou la oli'a mine'e mixolu no xale lia ane taxolu no anu 'o.

⁵ Mine'e mixolu ia Mosinge upilixinu lia vile noxou Apala'amu uasi manina. Ia no voxo ne muvavalima lexe, 'Eni apilixinu xale lia ano'o noxine xe noxi'a ta'ilusuneni.' Muvavalima noxou axone ia anu olu uao.

⁶ Mo Mosinge muvikalanu aloxo 'ola, 'Ili'i la ta'ilusuneni i'umesou xale lia ano'o mo ilai ixolu no xale lia vile. Xale lia ne noxi'a uasi, ane'i loxo taasilasi. Mo tatemanu xale lia ne itulu no tumali'a so i'oxonu xaixai ialuxu vitanisi. Itulu no tumali'a mo ilosi'a tu'umaxu axone umomomo no anu tau ie 400.

⁷ Tau ie 400 ukalu xe ili'i la akolinu tu'umaxu anene so milosi'a xoluxolu masua. Akolinu ukalu, la ta'ilusuneni ila ine'e i'itinu ualasilo no xale lia ano'o.'

⁸ Mosinge muvikalanu Apala'amu axone mukalu la mupelototosou no anu sosovo ane so ixotosou tamulu vasime'a. Muxolu xo xe ili'i la olu e Aisaki muxali mo mixolu voxo 8 mukalu laso Apala'amu muxotonu olu vasimolu. Mune'e xe ili'i, la Aisaki muxalixu olu Iakovo. Xe Iakovo, la muxalixa'a ta'olu tamulu 12 ane tavatava'u laili noxinge.

⁹ Ane'i ta'ilusunenge mi'isuxu vimo'a Iosepu xo mimaisou lexe mami'a musexelaxu misevile. Mi'isuxu laso ane'i mi'italonu no avo'a tamitema so lailoto se'i. Tamitema ne milaixu ne Isipi la itema vile mulotonu so anu muxali sileviou. Ia Mosinge muxolu noxou Iosepu.

¹⁰ Mosinge muxolu noxou mo mu'umenu no anu tu'utu'umaxu mukalusi ne. Mo anu mulosou Iosepu lavulavu tatila laso kingi ne Isipi mu'osasou. Kingi ne Isipi mu'osasou laso mutulusou so mu'uli laxunu xale lia ne Isipi oli'a tatemanu. Xe anu musaxila'u tasou kingi kalumo.

¹¹ Ioxe, ili'i xe vitolo toxoxu muxali no xale lia ne Isipi xe muxali avile ne Kenani 'o. La ane'i tamitema mo ta'ilusunenge ne mitavulenu tu'umaxu xo la'ilalixa'a uasi.

¹² Ia Iakovo mulomu lexe uiti a muai ne Isipi laso anu mupalusi'a ta'olu ta'ilusunenge milai milo­toxa'a la'ilali. Milai ka milivusi.

¹³ Ioxe, alaxu tameisou milai, laso vimo'a Iosepu mupala'anixu noxi'a lexe anu Iosepu ane. Laso anu kingi kalumo mulavu lexe ane'i Iosepu tavimovimou.

¹⁴ Mukalu la Iosepu mukalanu vaikala mulai noxou momu Iakovo lexe, 'Ta'ei ane ngoli'a ngaxolu ne ngane'e.' La ane'i laili noxou mukalusi navasi'a 75.

¹⁵ Laso Iakovo oli'a taminu­minu mivula milai ne Isipi axone. Mixolu xo xe ili'i la Iakovo musoli. Musoli mukalu xe ili'i la ta'ilusu­nenge kalumo misoisoli.

¹⁶ No voxo loxo ena'ei noxi'a musoli la mitavulenu mi'asixu ne Sekemi. Mi'asixu no maia taxanu ane muxolu no lia Apala'amu mulotonu noxi'a Amoli ta'olu tatei.

¹⁷ Ioxe, ane'i mixoxolu ne Isipisio. Mixoxolu xo mo vavalima e Mosinge mulosou Apala'amu tatei nene'axu a so uxali. La no voxo ne tatiatilasinge mixali tavu'alo e tavu'alo.

¹⁸ Xe ili'i la kingi vilela mutulu ne Isipi la ulavusou Iosepu uasi, xo Iosepu musoli tatei.

¹⁹ Ulavusou Iosepu uasi mo mumaisi'a tatiatilasixe lexe mixali milolutu laso mu'ume'a. Mu'ume'a laso mulosi'a tu'umaxu mo muka­si'a no vaikala lexe ipilixine'i ta'ili'a takeakea so isoisolisi.

²⁰ Xe no voxo anene la Mosisi nenu mivo'onu. Mivo'onu la anu molomolo laixe misevile. La mivu'ulinu mixolu umomomo no anu so'io tatalu.

²¹ So'io tatalu mukalu xe ili'i la ane'i mimulaxu noale laso kingi olu mino'u xe misaxila'u loxo ili'esi.

²² La Mosisi musikulu no anu lavulavu noxi'a Ta'isipi. Xe anu muxali itema so loxo ulemolu vaikala ma'ia la tu'umaxu mo loxo u'oxonu xaixai ma'ia la xavinusi.

²³ Ioxe, Mosisi muxoxolu no tasou kingi xo xe tau iexu 40 mukalu la anu muxavutalane'i laili noxou e Ta'isilaeli a ixoxolu ne Isipi lexe uxixaosi'a.

²⁴ Muxi­xaosi'a la mumaisou Isipi vile mu'oxonu masuaou Isilaeli vile. Mumaisou axone xe mu'avuti la mukolinu Isipi ne mo muvau musoli.

²⁵ Mosisi mu'oxo axone xo mukalavoi lexe laili noxou milavu lexe Mosinge musoso­vosou so u'umene'i ila. Ia uasi, ane'i mi'oxo lexe itema vitanisi ane.

²⁶ Xo aloxo 'o. Anu muxi­xaosi'a no voxo loxo ne'iela la mumaisi'a Ta'isilaeli tamei a i'oto'oto la anu mulai so lexe ulu'enu tane'i, la muvikala lexe, 'Ai, ngingi ngilou ne tavivingesi. Loxova so ngavi­la'isinge axone?'

²⁷ La anu ane musoko'u oto ne musounu Mosisi mo mutali'isou lexe, 'Ena'ei musosovosine so na'uli laxunexi mo natongonexi aloxo 'o?

²⁸ Xo ne'oxo lexe navelo asoli loxo nevau Isipi mei 'o, ne?'

²⁹ Xe Mosisi mulomusou muvi­kala axone la mu'ume mulai muxolu no xale lia ne Mitiani. La muxolu loxo asilasi. Muxolu xo laso mutaula'i la muxalixa'a ta'olu tamulu tamei.

³⁰ Ioxe, la muxolu muxolu xo mole tau ie 40 mulai mukalu laso angelou Mosinge mupa noxou Mosisi no xale lia esi'esi alai no la'olu Sainai. Mupa la loxo navu u'ani'ani no ovu kitua. U'ani'ani no ovu tainu ia anu u'ela uasi.

³¹ La Mosisi mumaisou sila tanulili no anu mi anene, mo mu'oxo lexe usuku alai so umaisou laixe. Anu a so usukulai ia xolinu Tatana­nenge muxali no anu mo muvikala lexe,

³² 'Eni a Mosi'a tamamine. Eni a Mosi'a Apala'amu xe Aisaki xe Iakovo.' Mosisi mulomusou la mu'olo'olo mo mu'ume so umalei­sou.

³³ Mo Tatananenge muvika­lala lexe, 'Naluvunu lasumeni xo lia ane natutulu no anu ne, eni esosovosou lexe eni na'a xelimo.

³⁴ Nalomu. Eni elavu mukalu no anu ilixo Ta'isipi i'oxonu noxi'a tamitemaxeli. Eni elomusou katu noxi'a mukalu laso maixene elu'e so alane'i mo so vasime'a manamana'u. Laso nini ne, eni apalusine nalai ne Isipi.'”

³⁵ Sitiveni mua'aloi'a mukalu la mululusou aloxo 'o, “Xo tei, la Ta'isilaeli mixililiou Mosisi mo mivikala lexe, 'Ena'ei musosovo­sine so na'uli laxunexi mo natongonexi?' Ia itema Mosisi ne Mosinge molu mupalusou so u'uli laxune'i mo u'umene'i ila. Mupa­lusou no voxo ane angelou mupa noxou no ovu kitua e navu mu'ani no anu.

³⁶ Mu'umene'i mila ne Isipi. La Mosisi ne mu'oxonu sososovo so xavi ne Isipi xe no Luaki Lauoinu xe no voxo ane mixolu no xale lia esi'esi. Voxo ne umomomo no anu tau ie 40.

³⁷ La itema Mosisi nesi, anu itema ane muvikalane'i tatiatilasinge Ta'isilaeli tatei lexe, 'Mosinge usosovosou polopeti vile loxo eni 'o. Anu molu noxinge u'isalili.'

³⁸ Xe ili'i anu oli'a ta'ilusunenge milai mixolu mipita no xale lia esi'esi. Milai mixolu la anu mutelai no la'olu Sainai mo angelo mulosou vaivaikala ane umamauli. Mulosou so une'e avile uxali noxinge.

³⁹ Ia ta'ilusunenge ilomuxu Mosisi uasi, mixililiousi. Mixililiou mo opone'i mulivu no anu xoluxolu noxi'a ne Isipi.

⁴⁰ Xo no voxo e muxolu teitexi no la'olu la tamitema mivikalanu Aloni lexe, 'Nexi talavu uasi lexe mi ma'ia muxali noxou Mosisi e mulanenge ne Isipi. Laso nini na'oxonu mosinge se'i so ilosoiengixu vote'i.'

⁴¹ Laso no voxo anene ane'i mi'oxonu mosi'a kalavoi musaxi loxo kau olu. Mi'oxonu mukalu la ane'i mi'oxonu lavilelusou mo mine'enu la'ilali so mi'itinu ualasou mi ane me'a mi'oxonu no avo'asi.

⁴² Mi'oxo axone laso Mosinge muxiunu tumalou noxi'a mo mu'italone'i so i'itinu momosi'a kalavoi. Mi'itinu momosi'a kalavoi loxo aso xe so'io xe tataoto. Anene polopetiou Mosinge vile mulemolu tatei lexe, 'Ngingi Ta'isilaeli to ne, tau ie 40 ngexolu no xale lia esi'esi la ngenava? Ngeve'a tamisoposi mo ngene'enu mimi noxilo so nge'itinu ualasilo? Ne? Uasi manina!

⁴³ Ngingi ngelavusou nge'itinu ualaualasi'a momosinge kalavoisi. Xo loxo ngingi ngexi­xao la ngetavulenu tani laseli so mosinge kalavoi ualasou lexe Moleki. Xe ngetavulenu mi vile so usosovosou taoto ilemolu lexe Levani mo nge'itinu lexe mosinge vile ane. Ngingi nge'oxo axone, laso eni akusaingexu xale lia noxinge mo apalusinge ngalai ngaxolu xalevile ne Vaviloni.'”

⁴⁴ Sitiveni muvulunu vaikalaou polopeti axone mukalu la musolonu vaikalaoula lexe, “No voxo ane ta'ilusunenge mixolu no xale lia esi'esi la tasou Mosinge laseli a uxoxolu. Uxoxolu so umaxa'u lexe Mosinge a uxoxolu no taine'i. Tani anene, ane'i mi'oxonu mo mimulinu loxo Mosinge mupela'uxu Mosisi. Mi'oxonu la mimulinu mi kitukitusou so uxali ulovo loxo Mosinge mulosoiouxu Mosisi.

⁴⁵ Xe ili'i la lasililixa'a mino'u tanixa'a mo Iosua mu'uli laxune'i. Mu'uli laxune'i so i'una no xale lia ano'o. Ane'i a mi'una'una la Mosinge molu mu'uli mo muku­sai'a tatemanu ane mixolu tei. Mi'una, la mitavulenu tasou Mosinge laseli so itulusou no taine'i. Mitulusou mo muxolu muxolu avile umomomo no anu voxo loxo Teviti muxali.

⁴⁶ Teviti ne anu itema ane Mosinge mu'osasou misevile laso Teviti mutali'i aloxo 'o, 'Mosixeo, nini ane nepala'a noxou Iakovo tatei. Umomomo so eni atulusou tasine vile?'

⁴⁷ Mutali'isou axone ia Teviti utulusou uasi, anu olu Solomoni mutulusou tani ne.

⁴⁸ Ia ngalomu, Mosinge anu U'uli'uli ulavusou uxolu no anu tatani ane tamitema me'a i'oxonu uasi. Xo loxo polopeti vile mule­molu Tatananenge vaikalaou tatei aloxo 'o,

⁴⁹ 'Loxotolo anu sia kingi noxilo xe lialia anu tava'ilo tanixu. Laso ngingi nga'oxonu tani vile umomomo noxilo axova? O tanixo so ama'ila no anu ava?

⁵⁰ E eni melo e'oxonu mimi ano'o mukalusi.'”

⁵¹ Ioxe, la Sitiveni muvikala pakia'u noxi'a tatiatila aloxo 'ola, “Ningi ngalomusauesi. Ngingi sangalinge mutomu mo opo­ngengi pakia'u misevile so ututulu no anu sususi. Ilixomengi iou vilesisi loxo ta'ilusungengi ane mi'oxonu tatei. Ngingi ngaxililiou Ulenu Laixe loxo ane'isi.

⁵² Xo polopeti aneva ta'ilusungengi mi'oxo laixesou? E uasi! Ane'i mixililiie'i mo mi'oxo­ne'i masua mukalusi. Mo ane'i ane misaxi mu'uli mo mia'aloxu Itema Malemalenga lexe une'e, la mive'ave'a misoisoli. Xe Itema Malemalenga e mia'aloxu ne muxa­li ia ngingi nge'italonu no avo'a tauluaou mo mivau musoli.

⁵³ Xe ngingi 'o, lavuloto noxou Mosinge a uxoxolu noxinge. Xo anu mupalu­si'a ta'angelou so mipala'anixu noxi'a tamitema ne tatei. Mipala'a­nixu mo a uxoxolu noxinge vaimomo 'o ia ngingi ngalomuxu to uasi.”

Mivau Sitiveni musoli

⁵⁴ Ioxe, ane'i tatiatila milomusou vaikalaou Sitiveni la la'iaxa'a manina mole anaxa'a mukala­kikiou.

⁵⁵ Ia Sitiveni ne, Ulenu Laixe a mupamuxanusi. Sila mutala mutelo no loxotolo mo mumaisou iaxu Mosinge xe Iesua a ututulu no avolu tema.

⁵⁶ La Sitiveni muvikala aloxo 'o, “Ai, ngamalei. Eni amaisou loxotolo mukisi. Mo Itema ane molu noxou Mosinge a ututulu no anu Mosinge avolu tema.”

⁵⁷ Ane'i milomusou axone la mi'ava'ava tatila mo mitomunu sangali'a. La ane'i mipisikei mipita so mitetelisou Sitiveni.

⁵⁸ Mitete­lisou mukalu la milaixu noale no utu la milealeaxu no anu lavolavo'o so ivau usoli. La tamitema e mito'omolu no anu vaikala no lakoti, mixexenu lasotii'a veveni mo mimulaxu no tava'u maulu vile. Maulu ne ualasou lexe Sauli.

⁵⁹ Ane'i a ivavau Sitiveni, la anu muvikala lexe, “Tatanaleli Iesua, uleleli a so ulai noxine.”

⁶⁰ La anu muxo­lasou tava'u mo muvikala tatila lexe, “Tatanaleli, nakolinu susu ane i'oxonu noxilo 'o uasi.” Muvi­kala axone mukalu la musoli.