Ta'aposeli 6 - Ata New Testament

Ane'i misosovosi'a tamulu 7

¹ Ioxe, no voxovoxo ne tamitema mi'una'una noxi'a talopala mo navasi'a mutoxoxa'a. La ane'i se'i noxi'a vaikalai'a Kiliki mimunu­munuxa'a ane'i ane vaikalai'a Ipilu. Mimunumunuxa'a mo mivikala aloxo 'o, “Ai, tasema noxinge ane tamului'a misoisoli ne ngingi ngalavusou ngavelunuxa'a voxo­voxo utotomu to'. Ia ane'i noxixe 'o, ngingi ngavelunuxa'a malaxo uasi.”

² Xe ta'aposeli 12 milo­musou vaikalai'a axone la mi'avali'a talopala mine'e mipita. Mipita la mivikala lexe, “Nexi ta'au'au no anu xaixai noxixe so vaikalaou Mosinge. Laso umo­momo so nexi tatavulenu xaixai ane so tavelunu la'ilali kalumo uasi.

³ Laso tavivixe, ta'oxonu aloxo 'o. Ngingi menge ngailoune'i tamulu 7 no taingengi 'o. Ngai­loune'i ane'i ane ilixo noxi'a lamanasi mo ane'i ane Ulenu Laixe upamuxane'i mo lavulavui'a. Ukalu laso nenge tapilixine'i no anu xaixai ano'o.

⁴ Xo axone la nexi tamulaxu oponexi no anu xaixai noxixe ane so tavivikala noxou Mosinge mo so tavelunu vaika­laou.”

⁵ Tamitema milomusou vaikala anene la mi'osasou. Laso miso­sovosou Sitiveni. Anu itema ane Ulenu Laixesi mupamuxanu mo loxo mi ma'ia muxali la anu mulopalasi. Misosovosou Sitiveni xe misosovosi'a se'ila so tamenexu, ualasi'a aloxo 'o; Pilipi xe Pilokolusi xe Nikanoli xe Timoni xe Palimenasi xe Nikolasi. Nikolasi ne anu itema Iuta uasi. Anu so tuala Anitioki, ia anu mumulinu ilixo noxi'a Taiuta so i'itinu Mosinge ualasou.

⁶ Ane'i miilone'i mukalu la mine'ene'i noxi'a ta'aposeli 12. Mine'ene'i laso ta'aposeli mimulaxu avo'a no anu kisi'a tamulu 7 ne so isosovosi'a. Misosovosi'a mo milingau su'uli noxou Mosinge so xaixai noxi'a.

⁷ Ioxe, laso vaikala noxou Mosinge musukusuku la navasi'a tamitema so lopala ne Ielusalemo mutiatila e mutiatila manina. Mo tapilisiti tapiena kalumo milomuxu Mosinge vaikalaou mo milopala.

Taiuta mitulusou Sitiveni no anu vaikala

⁸ Ioxe, Mosinge mu'oxonu iaiama noxou Sitiveni mo mulosou xavi so u'oxonu sosovo so xavi tiatila iouiou no taine'i tamitema.

⁹ Ia tamitema se'i mixililiou. Ane'i tamitema ane mipita no anu tasou lavuloto ane milemolu lexe “Noxi'a Tamitema Lalavulusi”. Ane'i tamitema so tuala ne Sailini xe Alekisanita. Mo tamitema so xale lia ne Silisia xe Esia ane'i kalumo mixililiou Sitiveni.

¹⁰ Mixililiou ia Ulenu Laixe mulosou lavulavu laso imomomo so iua'ulixu vaikalaou uasi.

¹¹ Imomomo so iua'ulixu uasi laso mivikalane'i tamitema se'i so lexe ikalavoisou. Ikalavoisou lexe anu muvikala masua noxi'a Mosisi ilou Mosinge. Milalaxinu kalavoi axone ia mitalumeusi so evile ulavusou uasi.

¹² Ioxe, mikalavoisou axone mo tamitema xe tatiatila xe tatisa so lavuloto milomusou, la mu'avu­tinoxu opone'i mo la'iaxa'a. La'iaxa'a mo milai mitetelisou malamenge vitanisi xe milaixu no anu lakoti noxi'a tatiatila noxi'a Taiuta.

¹³ Milaixu mukalu la mipalusi'a se'i itulu no lakoti so ikalavoisou. Tamitema anene mitulu mo mivikala aloxo 'o, “Ai, voxovoxo utotomu itema ano'o usu'asu'anu anaxu no anu tani e Mosinge mukalipalanu lexe noxousi. Mo uvikala masua so lavuloto ane Mosisi muno'u mulosinge.

¹⁴ Xo nexi telomusou uvikala lexe itema e Iesua so Nasaleti umamulonu tani anene mo uxiunu ili'ilixo ane Mosisi mulosi'a ta'ilusunenge e muxali noxinge vaimomo 'o.”

¹⁵ Mivikala axone mukalu la tatiatila no lakoti mimatakisou Sitiveni la mimaisou alaiou lamanaxu loxo angelo.