Ta'aposeli 5 - Ata New Testament

Ananaiasi olie Sapaila

¹ Ioxe, itema vilela noxi'a ualasou lexe Ananaiasi. Olie semau ualasie lexe Sapaila misalimunu liaxa'a vile.

² Misalimunu la Ananaiasi mutalumeu lamolisou pa'usou xe semau milavusou mi ne kalumo. Mutalumeu pa'usou xe pa'usou mulosi'a ta'aposeli mo so ukalavoi lexe lamolisou lia loloni ane.

³ Mulosi'a la Pita muvikala aloxo 'o, “Ananaiasi, loxova so ne'italo­neni mo Uluaou mupamuxaneni? Mo nini ne'oxo lexe nakalavoinu Ulenu Laixe mo netalumeu lamoli pa'usou so lia.

⁴ Xo lia ne nini na'a ninisi. Mo nexalisou lamolisou, la anu mi na'a nini lexe nanavanu. Laso axova so nini nelalaxinu oponeni mo nemulinu ilixo aloxo 'o? Xo nini nekalavoinexi tami­temasi uasi. Anene ne'oxonu noxou Mosinge ane.”

^5-6 Xe Ananaiasi mulomusou vaikala anene sila alaxu vilesisi mulapau mo musoli. Mulapau mo musoli laso tamaulu se'i mi'avuti mine'e miisisinu vasimolu mo mitavulenu milai mi'asixu. Xe tamitema ta'ei milomusou a'alo so mi ne, la mama'u tatila mukasi'a.

⁷ Aso iou 3 mulai mukalu la semau mi'una noxi'a ta'aposeli. Ane milavusou mi ane muxali noxou mulue uasi.

⁸ Mixali noxi'a la Pita mulosoie lamoli la mutali'isie lexe, “Navikalalelisi. Lamoli so lia ano'osi, ne?” La ane mikolinu lexe, “Ani, anu anesi.”

⁹ La Pita mu'oxo lexe, “Ai, loxova so ngolou xavutalamengi vilesisi so ngato­vonu Tatananenge Ulenu Laixe? Namaisou, tamitema so mi'asixu mulumeni a i'una'una 'o, la masi ilaneni kalumo.

¹⁰ Pita a muvi­kalasi ka ane milapau no tava'u mo misoli. La tamaulu ane mi'una'una ne mimaisie lexe misoli mukalu, sika ane'i mitavulene mo mi'asixe no pa'umolu mulue.

¹¹ La mama'u mukasi'a tamitema so pita noxou Tatananenge xe tamitema mukalusi ane milomusou a'alo so mi ne.

Mosinge mu'oxonu sosovo so xavi iouiou no avo'a ta'aposeli

¹² Ioxe, ta'aposeli mi'oxonu sosovo so xavi iouiou no taine'i tamitema. La tamitema so lopala milavusou mipita voxo utotomu no tasou Mosinge no mataunaxu e ilemolu lexe noxou Solomoni.

¹³ La ane'i tamitema latala mitaxane'i mo mi'osasi'a. Ia ane'i loxo ilopala uasi la ilai ipita noxi'a vitanisi uasi xo mi'ume'a tatiatilasi'a Taiuta.

¹⁴ Mi'ume'a axone ia tamitema tapiena milolopala noxou Tatana­nengesi. Milolopala laso ane'i mitoxo noxi'a talopala.

¹⁵ Ta'apo­seli mi'oxonu sosovo so xavi iouiou axone, xe tamitema milomusou a'alosi'a laso mine'ene'i tamitema tapipiena iouiou. Mine'ene'i xe mimulaxa'a no anu lu o mo'e no vote'i pa'umolu so lexe Pita umuamua'i la masi xalexu ulai noxi'a se'i.

¹⁶ La tamitema tavu'alo e tavu'alo so tuatuala no pa'umolu Ielusalemo, ane'i kalumo mine'e noxi'a ta'aposeli. Mine'e la mine'ene'i tamenexi'a pipiena iouiou xe ane'i ane ta'ulenu tamasua mixolu no vasime'a. La ane'i ane mine'ene'i noxi'a ta'apo­seli la laixene'i mukalusi.

Angelo musu'uline'i ta'aposeli so mulane'i no anu lakalavusu

¹⁷ Xe tiatila noxi'a tapilisiti oli'a tamenexu ane laili noxi'a Tasatusi mimalei lexe tamitema latala milailai noxi'a ta'aposeli, la mi'isuisu manina.

¹⁸ Mi'isuisu axone laso mi'avuti mipalusi'a tavoii'a so mitetelisi'a ta'aposeli mo mimulaxa'a no tasou lakala­vusu.

¹⁹ Ia no olovoxosi la angelou Tatananenge mune'e muki­sinu aitengaxu lakalavusu. Mukisinu mukalu laso mulane'i mo muvikala lexe,

²⁰ “Ngingi ngalai ngatulu no anu matama­taunaxu tasou Mosinge. Ngatulu mo ngaa'aloi'a tamitema no anu a'alo so mauli alavua e muxali noxinge.

²¹ Milomu axone mu­kalu xe no lamana mupau la ane'i milai mo mia'alo no matama­taunaxu tasou Mosinge aloxo angelo mupalusi'a. Ioxe, tiatila noxi'a tapilisiti oli'a tamenexu mi'avali'a tatiatila noxi'a Ta'isilaeli mukalusi so ipita. Mipita mukalu la mipalusi'a tavoii'a ilai so lexe ilane'i ta'aposeli no lakalavusu mo ine'ene'i so itulu no laxune'i. Mipalusi'a axone xo tatiatila ne ilavu uasi lexe ta'aposeli mila no lakalavusu mukalu.

²² Tavoii'a milutu xe milai mixali no tasou lakalavusu ia mikuluke xo ixolu uasi. Laso milivu mia'aloi'a tatiatila lexe,

²³ “Nexi temaisou aitengaxu lakalavusu lexe mitatusou pakia'u mo tapolisi mitulutulu no aitenga. Ia nexi tekisinu aitenga xe te'una la tamaisou evile uxolu nonano uasi.”

²⁴ Xe tatila noxi'a tamitema so latolo no tasou Mosinge oli'a tatiatila noxi'a tapilisiti milomusou a'alo anene la ane'i tane'ilili. Tane'ilili mo mivikala lexe, “Ai, mi mai'a uxali no anu mi ano'o?”

²⁵ Ane'i tane'ilili mo ivikala axonesio la itema vile muxali mo muvikala lexe, “Ai, ngalomu. Ta'aposeli e ngingi ngemulaxa'a no tasou lakalavusu a itutulu no matamataunaxu tasou Mosinge mo a ivotone'i tamitema.”

²⁶ Muvika­lane'i axone mukalu la tiatila so latolo oli'a tavoiou milaii'a ta'aposeli so ine'ene'i. Mine'ene'i se'isisi mo vasime'a mulu'e xo mi'ume xo loxo 'o io tamitema latala ive'a no anu lavo'o. Mi'ume xo milavu lexe tamitema latala mi'osasi'a ta'aposeli mo loxo tamitema so latolo ne i'oxonu mi vile noxi'a, la tamitema la'iaxa'a.

Ta'aposeli i'ume so ikoline'i tatiatila uasi

²⁷ Ioxe, mine'ene'i ta'aposeli muka­lu la mitulusi'a no laxune'i tatiatila. La tiatila noxi'a tapilisiti muvika­lane'i lexe,

²⁸ “Loxova? Mala'o nexi te'apingenge lexe ngavotovoto no anu uala anene mamu. Ia ngingi ngea'alo ngea'alosi. La a'alo mu­su'a­sou Ielusalemo avile mo ngingi ngato'omexe no anu soli noxou.”

²⁹ Pilisiti tatila muvikala axone mukalu ia Pitaena mikolinu aloxo 'o, “Loxo vaikalai'a tamitema uxililiou vaikalaou Mosinge la nexi tamulinu anene noxou Mosingesi.

³⁰ Xo ngingi menge ngelilixu Iesua no anu ovu so musoli. Ia Mosi'a ta'ilusunenge mutulusou mu'umenu no anu soli.

³¹ Mo muno'u mulaixu mutalu­pexasou no avolu tema so uxolu Tiatilasinge mo tava'u pamauli. La uxolu ne so loxo nenge Ta'isilaeli taxiunu oponenge mo ta'isalilinoxu no anu vaikalaou la anu ukalusou tina'unenge so susu.

³² Ia nexi 'o, nexi tamitemaou so tapala'anixu xaixai noxou. Xo temaisou, laso maixene nexi taa'aloxu 'o. Mo Ulenu Laixe kalumo a uxoxolu so upala'anixu xaixai noxou Iesua. Uxoxolu noxi'a tamitema ane'i ane ilomuxu vaikalaou, xo Mosinge molu upilixinu noxi'a.”

Tatila vile, ualasou lexe Xamalieli muvikala

³³ Xe ane'i tatiatila milomusou vaikala anene, la mixamulinu lexe muto'omolu opone'i. La la'iaxa'a manina, mo mi'oxo lexe ive'ave'a ta'aposeli isoli.

³⁴ Ia vile noxi'a, ualasou lexe Xamalieli, mu'avuti mutulu no taine'i. Anu tisa vile so lavuloto no anu laili noxi'a Tapalisi. Tamitema milavusou i'itinu ualasou itema ne lexe lavulavuou mutoxoxa'a. Mutulu no taine'i la muvikala lexe tamitema so latolo ilaixi'a ta'aposeli noale sevileo.

³⁵ Milai noale mukalu la anu muvikalane'i tamenexu lexe, “Nenge tamitema so Isilaeli 'o, ngaxavutala laixe tei lexe nga'o­xone'i tamitema ano'o axova.

³⁶ Xo mala'o la itema e Teutasi mu'itinu lexe anu itema tila. La tamitema tavu'alo sevile loxo 400 mipita noxou so loxo anu tatilasi'a. Ia mune'e la tamitema mivau musoli. Mivau musoli laso tami­tema ane mipita noxou mipaxelele mo mi ne tasiaxu vitanisi.

³⁷ Xe mala'o se'o no anu voxo so senisisi la itema vilela ualasou lexe Iutasi so Xalili mutulula. Mutulu la mulapune'i tamitema so imulinu mo i'otoxu xamani. Ia ane'i mivau kalumo sila ane'i tamitemaou mipaxelelesi.

³⁸ Laso eni avikala­ngengi lexe nga'oxo mi vile noxi'a tamitema ano'o uasi. Nga'italone'i mo ilaisi. Loxo xaixai ano'o muxali no anu xavutala noxi'asi, anu ulapau vitanisi ane.

³⁹ Ia loxo anu molu noxou Mosinge, la ngingi vote'i so nga'apixu uasi, ngapu­ngengisi. Ngapungengi xo axone la ngaxililiou Mosinge molu.” Tatiatila milomusou vaikala anene laso milomuxu.

⁴⁰ Ioxe, ane'i mi'avali'a ta'aposeli mi'unala la mivikalane'i tamitema so latolo lexe ipuapuasi'a no anu leti tavalanu ane misakinu mimi ana'anaxu no anu. Mo ane'i mivikala pakia'ula lexe mamu so ivotovoto no anu ualasou Iesua. Mukalu la mi'italone'i milaisi.

⁴¹ Ane'i mila la mivikalane'i ngato'o lexe, “Ai, aloxo 'o laixe xo Mosinge muilonenge so tatavulenu tu'umaxu mo maila no anu ualasou Iesua.”

⁴² Mi'osa axone la voxo­voxo ne ane'i mixixaoxao no matamataunaxu tasou Mosinge mo no anu tatasi'a tamitema. Mixixao­xao axone mo italo no anu xaixai so ivotovoto uasi. Mo utotomu mivulunu vaikala laixe lexe Iesua anu ane so Kalaisiti, itema e Mosinge musosovosou.