Ta'aposeli 4 - Ata New Testament

Tatiatila noxi'a Taiuta mikalavusune'i Pita ilou Tioni

¹ La Pita ilou Tioni a ivivikalane'i tamitemasio, la tapilisiti xe Tasatusi oli'a tatila so latolosou tasou Mosinge mixali noxi'a.

² Mixali noxi'a xo milomu lexe ilou ivotone'i tamitema lexe Mosinge mutulusou Iesua mu'umenu no anu soli. La la'iaxa'a xo mi'oxo lexe vaikala noxi'a ilou ne uxalixu xavutala lexe ili'i la tamitema latala imauli no anu soli kalumo.

³ La'iaxa'a laso mitetelisi'a ilou so ikotixa'a. Ia aso so u'una laso ane'i mikalavusune'i mo so ikotixa'a loxo ne'iela.

⁴ Mikalavusune'i ia tamitema tapiena e tapiena ane milomusou votovoto ne milopala, la navasi'a muxali 5000.

Pita ilou Tioni mitulu no anu lakoti

⁵ Ioxe, no voxo loxo ne'iela la tatiatila noxi'a tapilisiti xe tatiatila noxi'a Taiuta xe tatisa so lavuloto mipita ne Ielusalemo.

⁶ Anu tiatila noxi'a tapilisiti e Anasi oli'a Kaiavasi xe Tioni xe Alekisana oli'a tamulu so laili noxou pilisiti tatila mipita kalumo.

⁷ Mipita mukalu la mi'avali'a Pita ilou Tioni mine'e so itulusi'a no laxune'i. La mitali'isi'a aloxo 'o, “Ngingi ngexalisou xavi axova o nge'oxonu mi ne no anu ualasou ena'ei?”

⁸ Ioxe, Ulenu Laixe a mupamu­xanu Pita, la muvikala aloxo 'o, “Ngingi tatiatila so Isilaeli.

⁹ Ngingi mane ngatulusixe mo ngatali'isixe so su'uli e muxali noxou itema tava'u mukilikalu lexe anu mumauli axova.

¹⁰ Loxo ngatali'i axone, la ngingi ngoli'a Ta'isilaeli mukalusi ngalavu lamana axo. Itema ane ututulu no laxungengi mo ngamaisou lexe laixenu la muno'u mauli no anu ualasou Iesua Kalaisiti so Nasaleti. Itema anene ngingi ngelilixu no ovu valautu so musoli, ia Mosinge molu mu'umenu mutulusou no anu soli.”

¹¹ Pita muvikala axone mukalu la mulivunoxu xavutali'a no anu latilovo vile uxolu no anu Mosinge vaikalaou aloxo 'o, “'Iesua anu lavo'o ane ngingi tamitema so ngatulusou tani a ngematapianu. Ia vaimomo 'o lavo'o ne muxali lavo'o so tani kisou.'

¹² Tava'u pamauli vilela uasi. Nenge tamitema no lialia 'o Mosinge mulosinge uala vilesisi so tano'u mauli no anu. Uala e noxou Iesuasi.”

¹³ Tatiatila mimaisi'a lexe i'ume so ivikala no laxune'i uasi laso mikuluke mo tane'ilili. Tane'ilili xo Pita ilou Tioni ne tamitema vitanisi, loxo isikulu malaxo uasi. Laso ane'i mixavutala lexe, “Uasi, ane'i ilou ilixo noxi'a aloxo 'o xo mala'o se'o, ane'i oli'a Iesua mivaitami utotomu.”

¹⁴ Xe kalumo ane'i mimaisou itema ane muxalisou pamauli a oli'a mitulu, laso ane'i saexa'a muxola.

¹⁵ Saexa'a muxola laso ane'i mipalusi'a ilou mila no lakoti so ixolu no ngiou noale xo tatiatila me'a imasaxau ivikalane'i ngato'o sevileo.

¹⁶ Mipalusi'a mila mukalu la ane'i mivikala lexe, “Masi nenge ta'oxonu mi ma'ia noxi'a tamei 'o? E ane'i mi'oxonu sosovo so xavi mutoxoxa'a mo tamitema ne Ielusalemo milavusouio'. Mo nenge vote'i so tasolixu a'alosou uasi.

¹⁷ Ia masi vaikala uiaveiave no xale tuatuala, laso nenge tavikala pakia'u noxi'a ilou lexe mamu so ane'i ivotovoto no anu ualasou Iesua.”

¹⁸ Mivikalane'i ngato'o aloxone mukalu, laso ane'i mi'avali'a ilou lexe i'unala. Mi'unala laso mivi­kala pakia'u manina noxi'a lexe mamu so ane'i ivikala o ivotovoto no anu ualasou Iesua.

¹⁹ Ia Pita ilou Tioni mikoline'i lexe, “Ngingi menge ngatilovo lexe vote'i aneva laixe no iou Mosinge. Nexi tamulinu vaikala­mengi o vaika­laou Mosingesi?

²⁰ Laso nexi tanava, taxolu tasiau axova? Xo mi ma'ia temaisou mo telomusou ne taa'aloxusi.”

²¹ Ioxe, tatiatila mivikala pakia'u noxi'a iloula xo xe mukalu la mipilixine'isi. Mipilixine'isi xo tamitema latala mi'itinu Mosinge ualasou no anu sosovo so xavi ne. Laso tatiatila mi'ume so ixililiou tamitema latala opone'i, mo vote'i vile so imasuane'i Pita ilou Tioni uasi.

²² Tamitema latala mikuluke mo mi'itinu Mosinge ualasou xo sosovo so xavi ne mutoxoxa'a. Mutoxoxa'a xo itema tava'u muki­likalu no mi ne molomoloxu mo mune'e avile tau iexu 40 'o.

Tamitema so lopala mivikala noxou Mosinge

²³ Ioxe, tatiatila noxi'a tapilisiti oli'a tatiatila noxi'a Taiuta mipi­lixine'i axone mukalu la ane'i ilou milivu milai noxi'a tamenexi'a talopala. Laso ilou mia'aloi'a no anu vaikala kitukitu ane tatiatila milemolu noxi'a.

²⁴ Talopala milomu mukalu laso ane'i opone'i vilesisi mo mivikala noxou Mosinge lexe, “Tatananexi, nini Namosou mimi mukalusi xo nekoinu loxotolo xe lialia xe luaki ilou tatemanu.

²⁵ Tatei Uleneni Laixe mulemolu vaikalameni no anu anaxu itema so xaixai noxine e ilusunexi Teviti aloxo 'o, 'Loxova so tamitema no xale tuatuala tane'i la'ia, mo ipune'i so ilalaxinu opone'i so ixililiieni?

²⁶ La takingi so lialia opone'i ututulu vilesisi. Xe taluluai ipita no anu mi anesi so ixililiieni Tatananexi mo so ixililiou Itema ane nesosovosou tatei.'

²⁷ Mosixe, manina misevile, ane'i Eloti ilou Ponitiasi Pailati oli'a Ta'isilaeli xe tamitema so tuatuala noale'ale, ane'i mipita no tuala 'o so milalaxinu opone'i. Milalaxinu opone'i so imasuanu itema so xaixai noxine malemalenga nesosovosou e Iesua no anu vote'i axova.

²⁸ Mimi ane mi'oxonu ne muxali no anu xavi noxine loxo nini nelalaxinu oponeni no anu lumamo.

²⁹ Laso Tatananexi, nini namalei no anu tu'umaxu ane so mimolo umenexe. Mo na'oxo pakia'ixe nexi tamitema so xaixai noxine so talemolu vaikalameni mo ta'ume uasi.

³⁰ Mo nini namexinu avone so napamaulinu tamitema vasime'a xe na'oxonu sosovo so xavi no anu ualasou Itemameni malemalenga Iesua.”

³¹ Ioxe, mivikala noxou Mosinge mukalu la tani ane mipita no anu ne mukunikuni. La Ulenu Laixe mupamuxane'i ka milemolu vaikala noxou Mosinge mo i'ume uasi.

Talopala misu'uline'i ngato'o

³² Xe ane'i talopala mixolu opone'i mo xavutalai'a vilesisi. Laso vile noxi'a u'apisou mimiou noxi'a leviani uasi, ane'i mivelunui'a ngato'osi.

³³ La ane'i ta'aposeli utotomu mia'aloxu Tatananenge Iesua lexe Mosinge mutulusou mu'umenu no anu soli. Mo vaikalai'a mulapau noxi'a tamitema la mutu'umaxu misevile. Laso iaiama noxou Mosinge musu'asou xoluxolu noxi'a talopala mukalusi.

³⁴ La itema vile no taine'i uxolu vitanisi no anu ani'ani uasi. Xo aloxo 'o, loxo itema vile liaxu o tasou xe usalimunu, la anu uno'u lamolisou une'enu ulosi'a ta'apo­seli.

³⁵ Ulosi'a ta'aposeli mukalu laso ane'i ivelunui'a tamitema ane la'ilali uasi.

³⁶ Ioxe, vile noxi'a ualasou lexe Iosepu. Ta'aposeli mivotongalelenu lexe Vanavasi, xo laxu lexe, “itema so su'uli”. Iosepu ne anu so laili Livai ia molu no ailani ilemolu lexe Saipilasi.

³⁷ Anu musalimunu liaxu vile xe lamolisou la mune'enu noxi'a ta'aposeli. Ane'i mino'u so ivelunu noxi'a ta'ei mimaisi'a lexe xoluxolu noxi'a vitanisi.