Ta'aposeli 3 - Ata New Testament

Mosinge mupaipounu itema tava'u mukilikalu

¹ Ioxe, no o'olovoxo vile no aso iou tatalu la Pita ilou Tioni milai no tasou Mosinge. Xo anu aso iou anene ane'i milavusou mivikala noxou Mosinge.

² Ane'i ilou milai la mimaisi'a tamitema mivo'onu itema vile tava'u masua. Anu voxo utotomu ane'i ine'enu mo italupe­xasou no aitengaxu vimelusou tasou Mosinge. Aitenga ne mile­molu lexe Lailaixe. Anu mutalu­pexa ne so ulingalingau lamoli noxi'a tamitema ane mipolo no aitenga ne. Itema ne tava'u muki­likalu no mi ne nenu mivo'onumo.

³ Itema ne muxolu xo xe Pita ilou Tioni so i'unalai no tasou Mosinge sila anu mulingalinga noxi'a ilou.

⁴ Sila Pita ilou Tioni mimatakisou la Pita muvikalanu lexe, “Nini nasaxisixe.”

⁵ La itema ne muma­takisi'a ilou xo mukalavoi lexe ane'i ilosou mi vile ane.

⁶ Ia Pita muvikalanu aloxo 'o, “Eni lamoli uasi, ia mi ane uxolu noxilo, la alosinesi. No anu ualasou Iesua Kalaisiti so Nasaleti avikalaneni aloxo 'o. Natulu mo namuamua'i.”

⁷ La Pita mutetelisou no avolu tema so mutulusou. Sila alaxu vilesisi tava'u ilou vo'uvo'uxu pakia'u avile.

⁸ La anu muili'e mutulu mo mu­mua­mua'i. Mumua­mua'i la oli'a mi'unalai no tasou Mosinge. Mu'u­na­­lai la muili'eli'e la mu'iti'itinu Mosinge ualasou.

⁹ Xe tamitema mukalusi mimaisou lexe anu mumuamua'i mo u'iti'itinu Mosinge ualasou.

¹⁰ La ane'i mitongonu mo mi'oxo lexe “A itema e utotomu utalupexa ulinga­linga no aitenga Lailaixe ane.” Ane'i mimaisou lexe laixenu mo mikuluke la tane'ilili.

Pita muvotone'i tamitema no tasou Mosinge

¹¹ Ioxe, a'alosou mi ne muxali noxi'a tamitema noale la mikuluke mo miiaveiave mine'ene'e noxi'a Pita ilou Tioni. La ilou a ixoxolu no tasou Mosinge no matauna ilemolu lexe noxou Solomoni. Mine'ene'e la misaxisou itema Mosinge mupai­pounu a mutetelisi'a ilou.

¹² Pita mumaisi'a milasi mine'ene'e axone, la anu muvikala lexe, “Ngingi Ta'isilaeli, ngakuluke molu mi 'o xo ma'ia? Mo loxova so ngamatakisixe loxo ne? Xo nge'oxo lexe nexi mexe xavinexi o nexi tamitema malema­lenga no iou Mosinge laso tepai­pounu itema umuamua'i 'o? Ne? Uasi to. Nexi mexe uasi.

¹³ Ngalo­mu. Mosinge e Mosi'a Apala'amu xe Aisaki xe Iakovo xe ta'ilusu­nenge, anu molu mu'itinu itema so xaixai noxou e Iesua. Itema e ngingi nge'italonu no avo'a ta'ulaou so ivau usoli. Pailati mulalaxinu oponu lexe u'oxo mi vile noxou uasi, ia ngingi menge ngexiunu tumalinge noxou mo ngevikala lexe uvau.

¹⁴ Ngingi ngexiunu tumalinge noxou itema ne anu malemalenga mo ulapu. Ngexiunu tumalinge noxou ia itema ane so uve'a tamitema isoisoli ne nge'ava noxou Pailati lexe ulanu no lakalavusu.

¹⁵ Ngingi ngevau Mosou Mauli musoli, ia Mosinge mutulusou mu'umenu no anu soli. Nexi taa'alomengi xo nexi mexe temaisou mi ne.

¹⁶ Nexi noxou telopala noxou Iesua laso tepai­pounu itema ngamaisou mo ngalavusou 'o no anu ualasou Iesuasi. Lopala noxixe noxou Iesua mo ualasousi muxalixu pamauli loloni loxo ngingi ngamaisou 'o.

¹⁷ Tavivilo, eni alavu lexe ngingi ngoli'a tatiatilasinge ngalamana uasi laso nge'oxonu Iesua aloxo ne.

¹⁸ Ia mi ane nge'oxonu ne, anene vote'i so Mosinge muxalixu nene'a­xu vaikala mulemolu no anaxa'a tapolopeti tatei. Vaikala milemolu lexe Kalaisiti utavulenu tu'umaxu.

¹⁹ Laso ngingi ngaxiu­nu opo­ngengi so susu noxinge mo nga'isa­lilinoxu no anu Mosinge vaikalaou. Laso Mosinge uiasou susu noxinge mo Tatananenge u'oxonu vasi­menge uxolu mana­mana'u.

²⁰ Xo axone la anu upalu­sou itema ane anu musoso­vosou so usu'ulingengi e Iesua.

²¹ Ia vaimomo 'o anu a uxoxolu no tualasou Mosinge so uxomaiou voxo ane Mosinge musoso­vosou lexe anu upaipounu mimi mo ulivunoxu uxolu laixe loxo tei manina. Mosinge molu muvikala axone no anaxa'a tapolo­petiou tatei.

²² Xo Mosisi mule­molu vaikala vile aloxo 'o, 'Mosinge anu Tatana­nenge anu utulusou polo­peti vile no anu laili noxinge uxali loxo eni 'o. La ngingi ngalomuxu mi ma'ia anu ulemolu noxinge.

²³ Loxo ena'ei ulomuxu vaikalaou uasi la Mosinge uxexenu no taine'i laili noxou mo umamulonu avile.'

²⁴ Ane'i tapolopeti misoko'u noxou Samueli mo mune'e la misaxi mu'uli ka mia'aloxu mi ane uxaxali 'o.

²⁵ Ngingi laili noxi'a tapolopeti, mo vavalima e Mosinge mu'oxonu noxi'a ta'ilusungengi la mulu'e muxali noxinge vaimomo 'o. Xo muvikalanu Apala'amu aloxo 'o, 'Tamitema so xale tuatuala muka­lusi ixalisou su'uli noxi'a laili noxine.'”

²⁶ Pita mulemolu Mosisi vaikalaou axone mukalu la muvi­kala lexe, “Laso maixene Mosinge mutulusou itema so xaixai noxou mo mupalusou muxali noxinge tei so uxiungengi no anu vote'i so susu ngamulinu 'o.”