Ta'aposeli 27 - Ata New Testament

Polu mulutu so mulai ne Lomu

¹ Ioxe, ane'i tatiatila noxi'a Talomu milalaxinu xavutalai'a lexe Poluena itelo no lasipi so ilai ne Itali. La nexi noxi'a. La mipitanu Polu noxi'a takalavusu se'i ka mipi­lixine'i no avolu tatila noxi'a ta'ami 100. Tatila ne ualasou lexe Tiuliusi. Anu vile noxi'a ta'ami noxou Sisa u'isalili.

² Nexi telutu la tetelo no anu lasipi vile so tuala Atamitiumi. Anu lasipi ne so ulutu la tamosou mi'oxo lexe iaveiavexu umomoxu tuatuala muxolu no luaki ne Esia polovinisi. Nexi telutu mo telai la Masetonia vile, ualasou lexe Alisitakusi so tuala Tesalonaika a noxi'a telai.

³ Telutu telai xo xe loxo ne'iela la te'axa ne Saitoni. La Tiuliusi tanuxu Polu laso mu'ita­lonu mulai noxi'a tamenexu so misu'ulinu no anu la'ilali xe mi se'i.

⁴ Texolu xe ili'i telutula la telai noale no luaki. Ia sivo molu loxo no laxunexi mune'e xe mutanuxu lasipi xo mutavulenu laseli. Laso tepolo no tumalou ailani Saipilasi so tatalume no sivo.

⁵ Telai xe teua'ulixu ailani ne mukalu la tepolo noale avile no luakisou polovinisi Silisia xe Pamivilia. Laso telai tesua no tuala ne Maila ne Lisia polovinisi.

⁶ Tesua la tila noxi'a ta'ami mutali'isou lasipi vile lexe ulai ne Itali. Mutali'i xe muxalisou vile laso mulaixixe tetelo no anu. Lasipi ne so tuala Alekisanita.

⁷ Ioxe, milulusou lamotasou lasipi la telutu ia teiave palea malaxo uasi. Teiave teiave la ialaxu manina xo sivo tatila mutanunexe. Sivo mutanunexe xe voxo se'i mulai mukalu laso texali alai no tuala ne Nitasi. Sivo mu'oki'oki xe mutanuxu vote'isixe avile, laso nexi tepolo xalevile no ailani Kiliti so tatalumexu. Tepolo la teiave alai no kusinou ilemolu lexe Salimone.

⁸ Telai la tamitema so xaixai no lasipi ialuxu noxi'a so ipamupamuxanu lasipi. Telai telai xo la texali no apu vile ilemolu lexe Lautu Lailaixe. Anu uxolu alai no tuala Lasea.

⁹ Texali ia iave noxixe muvovoxo musuku axone la nexi tanexilili xo voxo noxi'a Taiuta so i'ani mamu a mulai mukalu. Mo nexi telavu lexe voxo anene ukalu la voxo so iave laixe a mukalu kalumo, mo tau masua a so uxali 'oe. Laso Polu muvikala lamana noxi'a lexe,

¹⁰ “Ai ngingi 'o, ngalomu. Eni alavu lexe loxo nenge talaisi, la nenge taxalisou mamulo. Mo lakako xe lasipi tasiauxu xe nenge tamitema kalumo.”

¹¹ Ia tatila noxi'a ta'ami ulomuxu Polu uasi mumulinu xavutalai'a itema so upamuxanu lasipi ilou mosou lasipi.

¹² Apu e lasipi mu'axa no anu ne anu laixe so tatalumexu tau masua uasi. Laso tatemanu lasipi tavu'alo opone'i lexe talutusi mo talai. Mi'oxo lexe talai avile ne Venixi so taxali tei no anu tau masua mo tatalume ne. Venixi ne anu lautu laixe vile no ailani Kiliti. Anu apu ne muai laixe xo sivo ulavusou u'una mo u'avutinoxu luaki uasi.

La'ave toxoxu mu'avutinoxu luaki

¹³ Ioxe, ane'i milalaxinu opone'i axone xe mimalei lexe sivo lailaixe molu no tumalixe laso mi'oxo lexe, “Anu ane, talai.” Mi'oxo lexe talai laso milapunu axa ka telutu telai. Telai la temulinu luaki pa'umolu no ailani Kiliti.

¹⁴ Telai teiave, ia maxuveni uasi la la'ave musoko'u. La'ave ne anu uxali no anu tautaunu la tamitema ilemolu lexe, “Notisiti”. Anu molu loxo no ailani Kiliti ka mune'e mukasixe.

¹⁵ Mukasixe la lasipi umomomo so ulai uasisi. Mo tamitema so xaixai mitovonu so ipamuxanu lasipi ia imomomo uasisi laso mipilixinu so sivo mutavulenusi.

¹⁶ Mipilixinu xe sivo mutavu­lenexi la telai xalevile no ailani sevile ilemolu lexe Kauta. Sivo mu'oki la pouti vile mulili no pa'umolu lasipi so upalasi. Tepolo xe ailani Kauta ne mutanunexe no anu sivo sevile, laso nexi texaxai tatila so tesasavunoxu.

¹⁷ Ane'i tamitema so xaixai mitelonu pouti mukalu ka misakinu. Mukalu la miisisinu lamota se'i no lasipi avile so pakia'u. Xe ane'i mi'ume xo loxo 'o io la lasipi u'oso no io'ii'oi ane upala'a no luaki alai ne Apilika. Mi'ume axone laso mixexenu laseli so lasipi mo mipilixinexi so sivo upamuxa­nexisi.

¹⁸ Texolu la sivo mu'oki­nexi avile. Laso voxo loxo ne'ielae la tamitema so xaixai misoko'u so ipeipeinu lakako so lexe lasipi papaxe.

¹⁹ Texolu xe voxo tatalu­soui la ane'i mino'u misomisou lasipi loxo laseli xe masisou ka mipeinu.

²⁰ Texolu texolu la voxo tavu'alo tamaisou aso o tataoto uasi xo sauma mutomusi. La la'ave ne mu'okinexi e mu'okinexi manina la nexi te'oxo lexe masi tasuae ane.

²¹ Nexi texolu axone la tamitema ino'u la'ilali uasi. Xe mune'e la Polu mutulu no taine'i la muvikala lexe, “Ai, ngingi ngalomu. Loxo ngamulinu vaikalaxeli lexe taxexesou Kiliti uasi, la ngingi ngaxalisou mamulo ano'o uasi. Mo mimimenge tasiauxu uasi.

²² Ia vaimomo avikalangengi aloxo 'o. Opongengi uai laixe, nga'ume uasi. Xo vile no tainenge masi tasiauxu uasi lasipisi umamulo.

²³ Eni amitemaou Mosinge mo eni alavusou a'itinu ualasou. Vaimomo 'o no olovoxo la angelou mutulu no pa'umelo mo muvikala lexe,

²⁴ 'Poluo, na'ume uasi, nini a so nalai natulu no laxunu Sisa ane. La Mosinge mu'oxonu iaiama noxine xo anu uutulungenge ngoli'a tamenexine no lasipi 'o.'

²⁵ Angelo muvikalaleli axone, laso ngingi nga'ume uasi. Xo eni alopala noxou Mosinge lexe anu uxali loxo anu mulemolu noxilo.

²⁶ Ia mi vilesisi aloxo 'o. Sivo masi uleanu lasipi so umamulo no ailani vile.”

²⁷ Mune'e mune'e la nexi texolu no luakisi. Tepuati no anu luaki ilemolu lexe Atilia. Tepuati xo xe muxali no anu olovoxo so voxo 14-sixe. Mune'e xe olovoxo lixinu, la tamitema so xaixai no lasipi mixamuli lexe nexi masi a so taxali no anu lia vile.

²⁸ Mixamuli axone laso misakinu aini telexu no anu lamota vile ka misu'anu mulu'elai so itilovosou lexe lautu axova. Mitilovosou la mitasou 40. Xe tesuku sevilela xe misu'anula, la mitasou 30-si.

²⁹ Mimaisou axone lexe anu so masapae la mi'ume xo mi'oxo lexe lasipi masi umamulo no lavolavo'o. Laso misu'anu axa tami'a no lasipi ta'u so utetelisou. Mukalu la mixolu mitatamasou lamana lexe upaleasi.

³⁰ Ioxe, tamitema so xaixai se'i mikamulinu vote'i so i'ume no lasipi. Ane'i mikalavoi lexe ilai no kusinou lasipi so ileanu axa se'ila. La uasi, ane'i milai so ilulusou pouti so i'ume ilai no anu. Milulusou xe mupuati no pa'umolu lasipi.

³¹ Ia Polu muvikalanu tatila noxi'a ta'ami oli'a ta'amiou lexe, “Loxo tamitema olele ixolu no lasipi 'osi uasi, la ngingi mukalusi ngamasua.”

³² Ta'ami milomuxu vaikalaou Polu laso mixotonu lamotasou pouti. Sila pouti mupuati mulai.

³³ Ioxe, aso so upau la Polu mupelototosi'a latala lexe i'ani. Muvikala lexe, “Maxuveni mise­vile opongengi kalauasi mo nga'ani uasi. Ngexolu vitanisi voxongenge 14.

³⁴ Eni apelototosinge lexe nga'ou la'ilali se'i so u'oxo pakia'inge. Xo uasi la ngamauli uasi. Mo ngalomu, avikala lamana lexe vile noxinge uxatele no taingengi 'o uasi.”

³⁵ Muvikala axone mukalu la muno'u pileti mo muvikala laixe noxou Mosinge no laxune'i. Mukalu la muse'inu ka mu'ou.

³⁶ Ane'i mimaisou Polu mu'oxo axone la opone'i laixe. Laso ane'i kalumo mino'u se'i mo mi'ani.

³⁷ Nexi tamitema e texolu no lasipi ne navasixe 276.

³⁸ Mi'ani xe mikalusou masaxa na'a laso mipeipeinu la'ilali uiti no luaki so lasipi papaxe.

Lasipi mumamulo

³⁹ Ioxe, aso mukulupa mukalu xe tamitema so xaixai no lasipi mimaisou lia ane tepuati tene'e alai no anu, ia ilavusou uasi. Ia mimaisou lautu vile ane io'isou lailaixe, laso mi'oxo lexe, “Ai tatovo tapamuxanu lasipi utuvu no tasii olele.”

⁴⁰ Xe ane'i mi'avuti mixotosou lamotasou axa'axa mo musu'a avile. Mo milulusou pulu so ipamuxanu lasipi xe mitulusou laseli sevile no kusinou so sivo utavulenexi no anu. Mi'oxo axone laso lasipi muiave mulai loxo no tasii ne.

⁴¹ Muiave ia taxali no tasii uao sila mutuvu mu'oso no anu io'i mupala'a no luaki. Kusinou mutuvu mu'oso avile no io'i xe xasi toxotoxoxu mutuvutuvu no ta'u sila mumamulo.

⁴² Lasipi a so umamulo oe, la ta'ami milalaxinu opone'i lexe ive'ave'a takalavusu isoisoli. Xo mi'oxo lexe masi inou mo i'ume avile.

⁴³ Ia tatila noxi'a ta'ami umasaxa lexe Polu usoli uasi laso anu mu'apixa'a ta'ami lexe ive'ave'a takalavusu uasi. Anu muvikala lexe ane'i ta'ei ilavusou inou la i'uli iili'e inou so ixali noale.

⁴⁴ Xe ane'i se'i la itetelisou lapalapalanga xe pa'upa'usou no anu lasipi muma­mulo so ipuati no anu. Te'oxonu axone laso nexi mukalusi texali noale mo laixenexisi.