Ta'aposeli 26 - Ata New Testament

Polu mulanu vaikala mulai noxou Axilipa

¹ Ioxe, Axilipa muvikalanu Polu lexe, “Io' nini mene naa'aloxene.” Laso Polu mutolosou avolu so lexe uvikala la muvikala aloxo 'o,

² “Kingi Axilipao, eni axamulinu osa so atulu no laxuneni mo akolinu vaikalai'a Taiuta ane ito'omelo no anu.

³ Xo nini nelavu no anu ilixo noxixe nexi Taiuta mo tava'u vaikala so oto'otonexe. Laso nini masi naxolusi mo nalomu­nganiou vaikalaxeli 'o.

⁴ Ane'i Taiuta tavu'alo milavusilo laixe. Xo no mi ne Atie mivo'oleli no tualasixe la eni exolu no taine'i. Xe ili'i ene'e exolu ne Ielusalemo la ane'i milavusou xoluxolu noxilo.

⁵ Milavusou xoluxolu noxilo tatei axone, mo loxo imasaxau la ivalaxu vaikalaxeli 'o. Ane'i ilavu lexe eni vile noxi'a laili Tapalisi mo emulimulinu lavuloto noxixe. Tapalisi ne i'oki'oki so imulinu mi kitukitusou lavuloto. No anu anene la ane'i iua'ulixu laili se'i no anu lalotu noxixe.

⁶ Emulinu lavuloto noxixe axone mo alopala no anu vavalima noxou Mosinge mu'o­xonu noxi'a ta'ilusunexi tatei. Lopala noxilo axone anu tava'u so atulu no lakoti vaimomo 'o.

⁷ Tamitema so laili 12 noxixe Taiuta mukalusi opone'i ututulu so ixomaiou nene'axu vavalima anene. Ixoxomaiou mo no anu aso xe olovoxo ane'i i'itinu Mosinge ualasousi. Ia Kingi, nalomu, opone'i axone la eni kalumo, ia ane'i a ito'omeloxu lopala noxilo 'o.

⁸ Mo atali'isine aloxo 'o. Tava'u axova so tangengilili no anu vaikala ane lexe Mosinge umo­momo so upamauline'i tamitema misoisoli?

⁹ Tatei eni xavileliou so axililiou ualasou Iesua so Nasaleti, la eni ekalavoi lexe ilixo laixe ane.

¹⁰ Exolu ne Ielusalemo la e'oxo axonesi. Tatiatila noxi'a tapilisiti mivalaxo so ekalavusune'i se'i noxi'a tamitemaou Mosinge u'isalili. Xe no voxo loxo mipitanu vaikala so lexe ive'a isoli la eni kalumo evikala axone.

¹¹ Mo alaxu tavu'alo eni e'una'unalai no anu tatasou lavuloto so ekamuline'i talopala. Ekamuline'i xe exalisi'a la epilixine'i noxi'a tatiatila so ixalisou tu'umaxu. Mo ekamulinu vote'i so tamitemaou Iesua ivikala masuasou ualasou. Mo eni opoleli sixulai'a axone la ekakamuline'i no tuatuala nopaxapaxa kalumo.”

¹² Mo Polu musolonu vaikala noxou aloxo 'ola, “Ekakamuline'i xe voxo vile la elai ne Tamasikusi. Elai xo tatiatila noxi'a tapilisiti mivalaxo mo etulu no anu xavi noxi'a.

¹³ Mo Kingio, noxi'a tamenexilo telutu xola velo muxalisixe no vote'i. Sila emaisou mi vile iaxu mulu'e no loxotolo. Anu iaxu e mutalosixe loxo aso, ia anu ne mu'oki musuku.

¹⁴ Nexi telapau teai no lia. Sila eni elomusou xolinu vile muvikala no anu vaikala Ipilu. La mutali'isilo aloxo 'o, 'Saulio, Sauli, loxova so nalosilo tu'umaxu 'o? Ilixo ne nini na'oxonu no anu la'ia noxine, nini mene natavulenu navunavusou. Anu loxo nakikinu mi vile anaxu. Nakikinu nakikinu ia anu uto'omene mo navuxenesi.'

¹⁵ La eni ekolinu lexe, 'Tatilao, nini ena'ei?' La anu muvikala lexe, 'Eni Iesua anu ane nalosilo tu'umaxu 'o.

¹⁶ Ia nini na'avuti natulu. Eni epa noxine aloxo 'o so asosovosine lexe nini namitemaxeli. Mo nini naa'aloxu mimi ane nemaisou 'o mo mimi ane alosoienixu ili'i.

¹⁷ Tamitemameni Taiuta i'oxoneni masua ia eni a'oxonu latolosine. Xe tamitema noale'ale kalumo imolo vila'isine ia autululuneni. Xo eni melo apalusine.

¹⁸ Apalusine nalai noxi'a so nalemolu vaikalaxeli manina mo so ie'i uka mo ixiunu tumali'a no anu isivoxo xe ine'e no anu lamana. Laso axone la xavi noxou Uluaou ne ukamakulune'i uasi, ane'i ivula mo ixolu no anu xavi noxou Mosinge. Mo tina'u so susu noxi'a uiasi la ane'i ixali tamitemaxeli u'isalili. Ane'i oli'a tamitema mukalusi ane ilopala noxilo.'”

¹⁹ Xe Polu muvikala aloxo 'ola, “Kingi Axilipao, elomusou xolinu molu no loxotolo axone la eni elomuxusi.

²⁰ Laso tei la eni evotovoto noxi'a tamitema ne Tamasikusi. Xe mune'e la ene'e ne Ielusalemo xe no xale tuatuala ne Iutea. Mo esuku avile elai noxi'a tamitema noale'ale kalumo. Evoto­voto lexe ane'i ixiunu opone'i mo i'isalilinoxu noxou Mosinge. Xe loxo i'oxo axone la anu uxalixu nene'axu no anu xoluxolu noxi'a.

²¹ Eni utotomu evotovoto axone laso anene tava'u so Taiuta mite­telisilo no anu mataunaxu tasou Mosinge mo mimolo soli noxilo.

²² Ia Mosinge musu'ulileli la exolu laixe mo a muxali vaimomo 'o. Laso atutulu 'o mo avikalangengi tatiatila xe tamitema vitanisi. Avikalangengi lamana lexe amulinu xavutala na'a xeli uasi, amulinu vaikalai'a tapolopeti xe Mosisi e milemolu tatei u'isalili.

²³ Ane'i mivikala lexe itema ane Mosinge musosovosou lexe Kalaisiti la utavulenu tu'umaxu. Xe ili'i la anu u'uli tei noxi'a tamitema ane itulu no anu soli. Mo anu upala'anixu lamana noxi'a tamite­maou xe noxi'a tamitema noale'ale kalumo.”

Polu muvikala lexe umasaxau so Axilipa ulopala

²⁴ Ioxe, Polu a ua'alo la Vesitusi muxixotonu vaikalaou la mu'ava lexe, “Polu, nini naxovulaulau ane. Nini nesitati utotomu laso lavulavu noxinge muxovulaunixu xavuta­lameni.”

²⁵ La Polu mukolinu lexe, “Uasi to! Tatilasixe laixe Vesitusi, eni axovulaulau uasi. Vaikalaxeli 'o manina mo avikala no anu xavutala mulapusi.

²⁶ Kingi Axilipa 'o anu mulamana no anu mimi ane elemolu, laso eni amomomo so avikala noxou. Eni elavu lexe mimi e'aloxu ne anu mulomusou mo mumaisou. Xo mimi ne anu utalume uasi muxali no taine'i tamitema latala.

²⁷ Kingi Axilipa, nini oponeni mukasou vaikalai'a tapolopeti lexe manina, ne? Eni alavu lexe oponeni axone.”

²⁸ Ia Axilipa mukolinu lexe, “Loxova, naxavutala lexe alomu­sou vaikalameni ataxu se 'osi ka alopala mo axali itemaou Kalaisiti?”

²⁹ La Polu muvikalanu lexe, “Loxo vaikala ataxu o veveni ne, anu mi vitanisi. Eni linga noxilo noxou Mosinge lexe ngingi latala ane ngalomusou vaikalaxeli 'o ngaxali loxo eni 'o. Ngaxali lamana loxo eni la laixe, ia seni isakileli no anu 'osi. Anenesi laixe so uxali noxinge uasi.”

³⁰ Ane'i vaikalai'a mutalo axone laso kingi oli'a tatiatila no anu xamani xe Venaisi mitulu ka milala.

³¹ Milala xe ili'i la mivikalane'i ngato'o lexe, “Ai itema anene u'oxonu susu vile so takalavusunu o tavauxu uasi.”

³² Mo Axilipa muvikalanu Vesi­tusi lexe, “Loxo anu muvikala lexe ukoti noxou Sisa uasi, la anu umomomo so napilixinusi mo ulai. Ia mulemolu laso vote'i uasi.”