Ta'aposeli 25 - Ata New Testament

Vesitusi mutongonu Polu no anu lakoti

¹ Ioxe, Talomu mitulusou Vesitusi so anu tila no anu xamani so Iutea polovinisi. Mitulusou xe mune'e muxali ne Sisalia la muxolu ne voxo tatalu xe mukalu la mutelai ne Ielusalemo.

² Mulutu xe muxali la tatiatila noxi'a Tapilisiti xe tatiatila noxi'a Taiuta mipita noxou so milanu vaikala ane so ito'omolu Polu no anu.

³ Mo milinga pakia'u noxou lexe, “Ai, nini masi na'oxonu mi vile so nexi ta'osa­sinexu, navulanu Polu une'e ne Ielusalemo 'o.” Ane'i mivikala axone xo milalaxi lumamo lexe iloxu Polu no anu vote'i so ivau usoli.

⁴ Ane'i mivikala axone ia Vesitusi mukoline'i lexe, “Polu ukalavusu ne Sisalia mukalu mo eni so alivu alai ne kalumo.

⁵ Laso ngingi tatiatilasinge se'i noxi'a talailai mo so loxo itema ne mususu la ngingi ngalanu vaika­lasou susu ne.”

⁶ La anu Vesitusi oli'a mixolu ne voxo se'ila, loxo 8 o 10. Mukalu laso anu mulai ne Sisalia. Xe loxo ne'ielae la mukisinu lakoti mo muvikala lexe ine'enu Polu so utulu no laxunu.

⁷ Mixalixu Polu no lakoti mukalu, laso ane'i Taiuta me'a ne Ielusalemo mitulutulu no pa'umolu. La ane'i mito'omolu no anu vaikala tu'utu'umaxusi. Mi­to'o­­molu vitanisi, mi vile o itema vile so uvalaxu vaikalai'a uasi.

⁸ Ane'i mivikala mivikala xo xe mukalui laso Polu mukolinu vaikalai'a aloxo 'o. “Eni asu­sunoxu lo noxixe Taiuta uasi o tasou Mosinge o Kingi Sisa uasisi.”

⁹ Ia Vesitusi mumasaxau so u'oxonu mi vile so Taiuta i'osa­souxu, laso mutali'isou Polu lexe, “Axova? Nenge talai ne Ielusalemo so atongoneni no lakoti lai ne? Laso axone la vaikala a ilemolu 'o la atilovosou lai olele. Ne?”

¹⁰ Ia Polu mu'oxo lexe, “Eni vaimomo 'o atulu no anu lakoti noxinge nenge Talomu. Nenge tamitemaou Sisa laso anu aloxo 'o la laixe. Nini nelavu lexe eni a'oxonu susu vile noxi'a Taiuta uasi.

¹¹ Xe loxo ngatongoleli lexe susu vile noxilo so ngaveloxu, la ngaveloxusi. Ia loxo vaikala ane Taiuta ito'omelo no anu 'o manina uasi, la umomomo so itema vile upilixileli no avo'a uasi. Eni amasaxau aloxo 'o. Kingi noxinge Sisa molu utongoleli no lakoti.”

¹² Polu muvikala axone mukalu la Vesitusi muvikala noxi'a tamitema e so isu'ulinu no anu lavulavu. Muvi­kala noxi'a mukalu la muvikalanu Polu lexe, “Ioxe, nevikala lexe Sisasi utongoneni laso anu uxali axone. Eni apalusine nalai noxousi.”

Vesitusi mutali'isou Polu noxou Axilipa

¹³ Ioxe, voxo se'i mulai mukalu la Kingi Axilipa olie vimou Venaisi mine'e ne Sisalia so ivikala laixe noxou Vesitusi ne.

¹⁴ La ilou mixolu ne Sisalia maxuveni sevile laso Vesitusi mua'aloxu vaikala ane tamitema mito'omolu Polu no anu noxou kingi ne. La mua'aloxu aloxo 'o, “Ai, itema vile Peliki mukalavusunu mala'omo anu a uxolusio.

¹⁵ No voxo e elai ne Ielusalemo la tatiatila noxi'a tapilisiti xe tatiatila noxi'a Taiuta mito'omolu itema ne no anu vaikala se'i. Mito'omolu no anu vaikala mo milinga noxilo lexe tavauxu susu noxou.

¹⁶ Ia eni ekoline'i lexe anene ilixo noxixe Talomu uasi. Nexi tavau itema vile vitanisi axone uasi. Utotomu talosou voxo so ukolinu vaikala ane ito'omolu no anu no lakoti tei.

¹⁷ Evikalane'i ne Ielusalemo axone xe no voxo loxo elivu lai 'o la ane'i mimulileli mine'e 'o. Nexi texali la avovoxo uasi, no voxo loxo ne'ielasi la ekisinu lakoti mo evikalane'i ta'ami lexe i'unanu itema ne.

¹⁸ La tamitema e mito'omolu no anu vaikala, ane'i mitulu so ilemolu susu noxou. Eni ekalavoi lexe ane'i ilemolu lo vile anu muxola'u ane. Ia uasi.

¹⁹ Mito'omolu no anu vaikala se'i so lalotu noxi'asi. Xe kalumo anu Polu oli'a mipelesou anaxa'a so itema vile musoli mukalu, ualasou lexe Iesua. Itema ne musoli ia Polu uvikala lexe anu mumaulila.

²⁰ Eni etovonu so akamulinu tava'u tu'umaxu anene ia xavu­talaxeli lamana no anu uasi. Laso etali'i noxou lexe umomomo so anu utulu no lakoti ne Ielusalemo.

²¹ Ia Polu muvikala lexe Sisa molu utongonu no anu lakoti laso eni ekalavusunu ia akamulinu vote'i so apalusou ulai noxou Sisa.”

²² Vesitusi mua'alo axone mukalu la Axilipa mu'oxo lexe, “Ai, eni amasaxau alomusou vaikalaou itema anene.” Laso Vesitusi muko­linu lexe, “Ioxe, ne'iela laso nalo­musou.”

²³ Xe mune'e xe loxo ne'ilaie la Axilipa olie Venaisi mimulaxu lavuluti mo tokolomo lailaixe. Mukalu la mi'unalai no anu ngiou so vaivaikala. La oli'a tatiatila noxi'a ta'ami xe tatiatila so tuala mipita ne. Mipita mukalu la Vesitusi mu'ava lexe Polu une'e noxi'a.

²⁴ Polu mu'una mukalu la Vesitusi muvikala lexe, “Kingi Axilipa xe ngingi tatiatila e ngaxoxolu 'o, ngamaisou itema ano'o. Taiuta mukalusi mito'omolu itema ano'o ne Ielusalemo xe lai 'o no anu vaikala. Mo ane'i milinga pakia'u noxilo lexe itema ano'o umaulila uasi, usolisi.

²⁵ Ia eni atongonu lexe anu u'oxonu susu vile so usoli no anu uasi. Ia anu molu muvikala lexe Sisa molu utongonu no lakoti laso apalusou ulai noxou ne Lomu.

²⁶ Ia eni alavu no anu vaikalasou so akaukavunu ulai noxou tatilasinge uasi. Tu'umaxu ano'o ialuxu so alulusou noxou laso maixene ene'enu Polu no laxuneni nini Kingi Axilipa u'isalili xe ngingi latala 'o. Ene'enu so ngalomu laixe no anu vaikalaou mo so ngasu'uleli lexe akaukavunu lapasi ne axova.

²⁷ Xo loxo apalusou lakalavusu vile ulai ia alulusou tava'u lakoti noxou uasi, la axamuli lexe axone la masua.”