Ta'aposeli 23 - Ata New Testament

¹ Ioxe, Polu mutulu no laxune'i tatiatila noxi'a Taiuta la iou mumatakisi'a. Mo muvikala aloxo 'o, “Ai tavivilo, eni taleli uai laixe no iou Mosinge uasi. xo emulinu vaikala noxou Mosinge tatei mo mune'e muxali vaimomo 'o.”

² Muvikala axone, la tatila noxi'a tapilisiti Ananaiasi muvikalane'i tamitema ane itulu alai noxou Polu lexe isavalou Polu anaxu.

³ Mivau Polu mukalu la anu muvikalanu Ananaiasi lexe, “Mosinge molu uvene ane. Xo nini loxo kakapi ane milailavenu no anu peni kea so usaxi laixe noale ia nonano ne mu'ui mo masua. Nini mene na'oxo lexe natilovosilo no anu lo, laso maixene nene'e 'o ia nini mene nexola'u, xo nepalusi'a tamitema so mivelo.”

⁴ Ia ane'i ane mitulu alai mivikalanu Polu lexe, “Ai, nenava nevikala masua noxou pilisiti tatila noxou Mosinge 'o?”

⁵ La Polu mu'oxo lexe, “Ne? Eni esusu xe alavu lexe anu tatila noxi'a tapilisiti uasi. Loxo alavu la avikala axone uasi. Xo no anu lavukuou Mosinge la vaikala mukaukavu lexe, “Ngingi ngavikala masuaou tila noxi'a tamitemamengi uasi.'”

⁶ Ioxe, Polu mulavu lexe tatiatila se'i ne ane'i so laili Satusi xe se'i so laili Palisi laso anu muvikala tatila lexe, “Tavivilo, eni vile noxi'a Tapalisi xe mamilo anu Palisi kalumo. Eni atutulu no lakoti 'o, tava'u xo eni alopala lexe tamitema ane misoisoli la imamaulila.”

⁷ Polu muvikala axone la ane'i tatiatila me'a misoko'u so mipelesou anaxa'a. Tapalisi xe Tasatusi ane mipita ne mixililii'o ngato'o mo mikalipala.

⁸ Mixililii'e ngato'o xo Tasatusi xavutala noxi'a lexe tamitema loxo isoli la imaulila uasi. Mo ane'i i'oxo lexe ta'angelo o ta'ulenu la ixolu uasi kalumo. Ia ane'i Tapalisi opone'i axone uasi, ane'i opone'i ututulu lexe mimi anene maninasi.

⁹ Mixililii'e axone laso mikaikaitolone'i ngato'o la vaikalai'a ne mutomunu tani. La tatisa so lo se'i noxi'a Tapalisi mitulu mo mivikala pakia'u lexe, “Nexi tatongonu itema ano'o lexe u'oxonu susu vile uasi. Masi ulenu vile o angelo vile mulosou mupilixinu vaikala noxou 'o.”

¹⁰ Mipelesou anaxa'a axone xo mo ane'i so i'oto la tatila noxi'a ta'ami mu'ume xo muxavutala lexe masi ane'i imamulonu Polu vasimolu ane. Mu'ume laso muvikalane'i ta'ami lexe ipalea ilai so iutululunu Polu mo i'umenu ilaixu no tasi'a ta'ami.

¹¹ Ioxe, mi'umenu xe muxolu no tasi'a ta'ami xo xe olovoxo la anu Polu musaxisou Tatananenge a utulu no pa'umolu la muvikala lexe, “Poluo, na'ume uasi, oponeni uai se'isisi. Xo loxo nea'aloxo ne Ielusalemo 'o la anu axonesi naa'aloxo ne Lomu kalumo.”

Taiuta ivotoxu Polu so ivau usoli

¹² Mune'e xe no kakau la Taiuta se'i mipitanu opone'i so ikamulinu vote'i so ivau Polu usoli. La ane'i mivavalima pakia'u lexe loxo uxoxolusio la ane'i iie o i'ani uasi. Ane'i mi'oxo lexe ivau usoli tei kaso iie mo i'anila.

¹³ Ane'i ane mivavalima ne, navasi'a teitexi no anu 40.

¹⁴ Tamitema anene milailai noxi'a tatiatilasi'a tapilisiti mo tatiatila noxi'a Taiuta la mipala'anixu noxi'a lexe, “Ai nexi oponexi pakia'u mo tevavalima lexe nexi ta'ani uasi, taxolusi uxali no anu voxo loxo tavau Polu usoli.

¹⁵ Laso ngingi ngoli'a tatiatila mukalusi ngakalanu vaikala ulai noxou tatila noxi'a ta'ami. Ngavi­kalanu lexe une'enu Polu noxinge 'o. Ngakalavoi lexe ngamasaxau une'e so ngatali'i noxou sevilela. Laso axone, la nexi taloxu no vote'i so tavau usoli.”

¹⁶ Mivotoxu Polu axone, ia Polu vimou sema ilie mulomusou sivo so mi ne la anu mulai no tasi'a ta'ami la mua'aloxu noxou Polu.

¹⁷ Polu mulomu laso mu'avalou tatila vile noxi'a ta'ami mo mu'oxo lexe, “Nalaixu soxu 'o noxou tilasinge xo anu vaikala vile so ulemolu noxou.”

¹⁸ Mulaixu xo xe muxalixu noxou tatila ne la muvikalanu lexe, “Polu e tekala­vusunu mu'avalilo lexe ane'enu soxu 'o noxine xo anu uvika­lanenixu mi vile.”

¹⁹ Ioxe, tatila noxi'a ta'ami mutila'u maulu ne mulaixu va'axu sevile mo muta­li'isou lexe, “Ai maula, ne'oxe nalemolu mi ma'ia noxilo a?”

²⁰ La anu mupela'u lexe, “Ane'i Taiuta milalaxinu opone'i mukalu lexe ne'iela la ilinga noxine lexe nalu'elaixu Polu noxi'a tatiatilasi'a. Ane'i ikalavoi lexe itatali'i noxou Polu xo mi se'i uxali lamana noxi'a uao.

²¹ Ia nalomuxu vaikalai'a uasi xo tamitema se'i, navasi'a uua'ulixu 40 a iloxu no vote'i. Ane'i miva­valima lexe i'ani mo iie uasi umomomo no anu voxo loxo ivau Polu usoli. Ane'i a ixoxolu iloxu, ixomaienisi so nakolinu linga noxi'a mo napalusou Polu ulai.”

²² Mua'alou mukalu la tatila noxi'a ta'ami mupalusou mulivu la mupelototosou lexe, “Napala'a­nixene lexe nene'e nea'aloxeli 'o uasi.”

Ta'ami mivulanu Polu mulai ne Sisalia

²³ Ioxe, mukalu laso tatila noxi'a ta'ami mu'avali'a tamitemaou tamei. Ane'i tatamei ne mi'uli laxune'i ta'ami tapiena. Mu'avali'a la muvikalane'i lexe, “Ngolou ngapitane'i ta'ami ane imuamua'isi so ixali loxo 200 mo ta'ami 70 ane iiave noxi'a ta'osi mo ta'ami 200 ane itavulenu lalumiso. Ngapitane'i xo masi no olovoxo no anu 9 kiloko la ngalai ne Sisalia.

²⁴ Mo ngalalaxinu iou Polu osi vile mo ngasaxanu ulai noxou tatila no anu xamani e Peliki.”

²⁵ Mo kalumo anu mukaukavunu lapasi so ilaixu aloxo 'o.

²⁶ “Eni Kalautiusi Lisiasi ano'o. Lapasi ano'o ulai noxine Peliki, nini tatila no anu xamani. Aso noxine.

²⁷ Itema a ine'enu noxine 'o ane'i Taiuta mitetelisou mo ane'i a so ivau usoli. Ia eni elomu lexe anu Lomu vile, laso nexi noxi'a ta'amixeli teutululunu no avo'a.

²⁸ Eni emasaxau so alomusou lexe mu'oxonu susu ma'ia so ane'i la'iaxa'aou 'o. Laso eni elaixu no anu pita noxi'a tatiatila noxi'a.

²⁹ Elaixu xe etali'isi'a la eni etilovosou lexe anu uxola'u lo vile so usoli o ukalavususou uasi. Ane'i mito'o­molu no anu vaikala so lo noxi'asi.

³⁰ Xe mune'e la evile mupela'ilo lexe ane'i se'i mivotoxu so ivau usoli. Laso maixene epalusou mune'e noxine. Xe ane'i ane ito'omolu no anu vaikala la evikalane'i lexe ine'e noxine kalumo. Mo so loxo ixali noxine la nini mene natilovosou vaikalai'a e ito'omolu no anu.”

³¹ Ioxe, ta'ami mimulinu vaikalaou tatila noxi'a la no olovoxo nesi misaxanu Polu milaixu ne Aniti­patilisi.

³² Mixolu ne xe no kakau la ta'ami ane mimuamua'i la mipilixine'i mo milivu no tasi'a ne Ielusalemo. La ane'i ta'ami ane miiave noxi'a ta'osisi la oli'a Polu milai.

³³ Oli'a milai xo xe mixali ne Sisalia la ta'ami milosou tila so xamani lapasi mo mipilixinu Polu no avolu.

³⁴ Milosou lapasi xe mu'itisou la mutali'i noxou Polu lexe, “Nini so polovinisi aneva?” La Polu mu'oxo lexe, “Eni so Silisia polovinisi.”

³⁵ La tatila ne muvikala lexe, “Loxo tamitema ane ito'omene no anu vaikala ixali oe, laso atongonu tu'umaxu ano'o laixe.” Mo muvikalane'i ta'amiou lexe Polu uxolu no anu tasou lakalavusu noxou Eloti so uxo­maiou voxosou lakoti.