Ta'aposeli 22 - Ata New Testament

¹ Muvikalane'i aloxo 'o, “Tavivilo, tamamilo, ngalomu. Eni akolinu vaikala ane ngingi ngato'omelo no anu.”

² Ane'i milomusou Polu muvikala no anu Ipilu la mitomunu anaxa'asi. Xe Polu muvikala aloxo 'ola,

³ “Eni Iuta 'o. Atie mivo'oleli no tuala ne Tasusi e no xale lia ne Silisia. Ia eni ene'e ne Ielusalemo 'o mi ne molomoloxomo. La exolu esikulu noxou Xamalieli. Mo eno'u lavulavu laixe noxou so lavuloto noxi'a tatiatilasinge. Mo opoleli mutulu noxou Mosinge a loxo ngingi o'osi.

⁴ Xo tei la eni epilixinu tu'umaxu noxi'a ane'i ane imulinu vote'i noxou Iesua. Eni esakisakinu avo'a no anu seni mo ekalavusune'i. Mo se'i la exalixu soli noxi'a.

⁵ Xe eno'u lapasi noxou pilisiti tatila oli'a tatiatila noxinge Taiuta. Ane'i tamosou ixoxolusio mo loxo imasaxau la ivalaxu vaikalaxeli 'o. Ane'i mikaukavunu lapasi ne mulai noxi'a tatiatila ne Tamasikusi lexe isu'ulileli no anu xaixai noxilo. Xaixai ne so atetelisi'a tamitemaou Iesua xe ane'ene'i ne Ielusalemo so tatiatila ilosi'a nene'axu ilixo noxi'a.”

⁶ Xe Polu mua'aloi'a aloxo 'o, “Voxo vile emuamua'i so lexe alai ne Tamasikusi. Elutu xo xe loxo velo la eni so axali no tuala. Sila alaxu vilesisi iaxu mi vile molu no loxotolo mutalosilo.

⁷ Mo eni elapau elai no lia la elomusou xolinu evile mutali'isilo lexe, 'Saulio, Sauli. Loxova so nalosilo tu'umaxu?'

⁸ La eni evikala lexe, 'Tatila, nini ena'ei?' La anu mu'oxo lexe, 'Eni Iesua so Nasaleti a. Eni ane nini nalosilo tu'umaxu ne.'

⁹ Xe tamitema ane noxi'a telai ne, mimaisou iaxu mo milomusou xolinu ia vaikalaou ne lamana noxi'a uasi.

¹⁰ La eni evikala lexe, 'Tatila, laso eni anava?' La Tatananenge muvikalaleli lexe, 'Nini natulu mo na'unalai no tuala ne Tamasikusi. Naxolu ne la itema vile uvikalaneni so lexe xaixai ma'ia esosovosine no anu.'

¹¹ La anu iaxu ne mutalosou ieli mu'oki e mu'oki manina mole amomomo so asaxisaxi uasi. Laso ane'i ane noxi'a telai la mitetelisilo mo mitila'ilosi so te'unalai ne Tamasikusi.

¹² La no tuala Tamasikusi ne itema vile a muxoxolu, ualasou lexe Ananaiasi. Anu itema ne mumama'u noxou Mosinge mo oponu mututulu lexe umilunu lavuloto noxou. Taiuta no tuala ne ilavusou itaxanu itema ne.

¹³ Voxo vile eai no lu la Ananaiasi mune'e mutulu no pa'umelo la muvikala lexe, 'Vivilo Sauli 'o, nini masi nasaxisaxila.' Sila alaxu vilesisi eni ieli muka mo esaxisou.

¹⁴ La anu muvikala aloxo 'o, 'Mosinge ane Mosi'a ta'ilusunenge musosovosine so nini namaisou anu ane Mulapusi xe so nalomusou anaxu xe so nalavusou oponu.

¹⁵ Mo nini so naa'aloxu noxi'a tamitema latala. Naa'aloxu mi ma'ia nini mene nemaisou mo nelomusou.

¹⁶ Laso nini naxo­maiou mi ma'ia? Natulu mo so a'oxonu ilixo so kelele noxine. Xe nini, la navikala noxou Tata­nanenge so anu uiasou susu noxine.'”

¹⁷ Ioxe, Polu musolonu a'alo noxou aloxo 'ola, 'Elai xe ili'i elivu ene'e ne Ielusalemo la eni e'unalai no tasou Mosinge so avikala noxou. Evikala noxou la emaisou mi vile loxo ai saxi.

¹⁸ La emaisou Tatananenge mo muvikalaleli aloxo 'o, 'Nini napalea naxexesou Ielusalemo mo nalutu nalai. Xo naxolu naa'aloxo la ane'i ilomuxene uasi ane.'

¹⁹ La eni evikala lexe, 'Tatanaleli, ane'i me'a milavusilo. Xo mala'o eni elai no tatasou lavuloto so lexe atetelisi'a ka akalavusune'i xe so ave'ave'a ane'i ane milopala noxine.

²⁰ Xe no voxo ane mivau Sitiveni musoli mo sialuxu munixi xo mua'aloxene, la eni opoleli vilesisi noxi'a. Xo eni etulu alai so asaxila'u lasiotii'a tamitema a mivavau ne.'

²¹ Evikala noxou Tatananenge aloxo ne, ia anu muvikalaleli aloxo 'o, 'Uasi, nini nalai. Eni apalusine so nalai noxi'a tami­tema noale'ale.'”

Polu mupala'anixu lexe anu vile noxi'a Talomu

²² Ioxe, Polu muvivikala xe Taiuta mixolu milomusou. Ia mumoxo'a tamitema noale'ale, la ilomusoula uasi. Ane'i mi'ava'ava tatilasi lexe, “Ngavau usoli. Umomomo so itema ne uxolu umauli no lialiala uasi.”

²³ Mi'ava mi'ava'ava axonesi xe miteanu lasiotii'a veveni mo mila'unu io'i ka mipeipeinu. Ane'i mi'oxo axone so mimaxa'u lexe mimatapianu vaikalaou.

²⁴ Mi'oxo axone laso tatila noxi'a ta'ami mupalusi'a se'i so i'unalaixu Polu nonano no tasi'a ta'ami. Xe muvikalane'i lexe ipuapuasou mo itali'isou lexe tava'u tu'umaxu ne axova. Xo mumasaxau so ulavu lexe xo ma'ia tamitema la'iaxa'a mo i'ava'ava noxou Polu axone.

²⁵ Laso ane'i ta'ami misakinu tava'u ilou avolu mo milalaxi so ipuapuasou. Milalaxi axone ia Polu iou mukaou tila vile noxi'a ta'ami a mututulu la mutali'isou lexe, “Loxova? Loxo tiasi utongonu itema vile Lomu no anu lakoti uao, la anu laixe so ngapuasou vitanisi. Anu lo uvikala axone, ne?”

²⁶ Ioxe, tila ne mulomu axone la mulai muvikalanu tatila noxi'a ta'ami lexe, “Nini nanavao, e itema ne Lomu ane.”

²⁷ La tila noxi'a ta'ami mune'e noxou Polu la muvikalanu lexe, “Navikala lama­na, nini Lomu o uasi?” La Polu mukolinu lexe, “Ia xo ma'i.”

²⁸ La tila ne muvikala lexe, “Eni epilixinu lamoli tatila noxou xamani so exali Alomu.” Ia Polu muvikala lexe, “Eni uasi. Eni Alomusi. Atie mivo'oleli la axonesi.”

²⁹ La ta'ami ane milalaxi so ipuasou milomu axone, la alaxu vilesisi mi'ume. Mo tila noxi'a ta'ami oponu mu'olo'olo xo anu molu mupalusi'a ta'ami so misa­kinu Lomu vile e Polu no anu seni.

Polu muvikala no laxune'i tatiatila noxi'a Taiuta

³⁰ Xe mune'e loxo ne'iela la tatila noxi'a ta'ami umasaxau ulavu laixe lexe Taiuta mito'omolu Polu no anu vaikala ma'ia. Laso anu mululusou seni noxou Polu. Mukalu la mukalanu vaikala mulai noxi'a tatiatila noxi'a tapilisiti xe noxi'a tatiatila noxi'a Taiuta lexe ipita. Mipita mukalu la mune'enu Polu so mutulusou no laxune'i.