Ta'aposeli 21 - Ata New Testament

Polu mulutu mulai ne Ielusalemo

¹ Ioxe, nexi telutu te'umesi'a telai, la lasipi muxexesou tasii. La muiave mulovo no anu ailani ne Kosi. Texali ne xe voxo loxo ne'iela la telutula xo xe texali no ailani ne Lotesi. Telutu ne Lotesi la texali avile ne Patala.

² Lasipi musua ne Patala la lasipi vile a so ulai no xale lia ne Vonisia, sila nexi tetelo no anu.

³ Tetelo no anu lasipi ne xe teiave teiave. Teiave xo la tesu'anu iexi loxo 'o la ailani Saipilasi muxolu no avoxe kaisi. Teiave xo xe tepolopepenu la telai avile tesua no tuala ne Taili no anu Silia polovinisi. Lasipi mulai ne xo mulu'enu lakako se'i.

⁴ Texali ne xe telu'e la texalisi'a talopala so tuala ne la noxi'a texolu voxo 7. Noxi'a texolu la Ulenu Laixe mupamuxane'i so mivikala lamana noxou Polu lexe masi la ulai ne Ielusalemo uasi.

⁵ Ia voxo e tesosovosou lexe talai a muxalii la te'umesi'a telaisi. Telai la talopala oli'a tasemasemai'a xe ta'ili'a misaxanexi telai. Telai xe texali no luaki la nexi mukalusi texola'u tava'ixe mo tetangatulu no tasii so tevikala noxou Mosinge.

⁶ Mukalu la ane'i mipilixine'i xe mililivu ia nexi tetelo no lasipi.

⁷ Nexi telutu ne Taili xo la texali ne Tolemesi. Texali la tevikala aso noxi'a talopala mo noxi'a texolu olovoxo nesi.

⁸ Texolu xe no kakaula la nexi telutu teiave no lasipila. Telutu teiave xo la texali avile tesua no tuala ne Sisalia. Telu'e la telai no tani noxou Pilipi e itema so votovoto. Pilipi e anu vile noxi'a tamitema 7 so su'uli e misosovosi'a mala'o. Telai no tasou so noxi'a texolu.

⁹ Anu ta'olu tavuanga tami'a la Ulenu Laixe mupamuxane'i so milemolu vaika­la so pela'a.

¹⁰ Ioxe, nexi texolu voxo se'ila ne Sisalia. La itema vile so pela'a ualasou lexe Axavusi molu no xale lia ne Iutea la mune'e muxali noxixe.

¹¹ Muxali noxixe la muno'u laletiou Polu xe molu musakinu tava'u ilou avolu mo muvikala aloxo 'o, “Ngamalei 'o. Ulenu Laixe upala'anixu lexe Taiuta so Ielusalemo isakinu mosou laleti 'o aloxo 'osi. Ane'i isakinu ka ipilixinu noxi'a tami­tema noale'ale.”

¹² Nexi telomusou vaikalaou ne laso noxi'a tamitema so tuala ne tetama noxou Polu lexe ulai uasi.

¹³ Ia anu muvikala lexe, “Loxova so ngatatama mo nga'oxonu opoleli tu'umaxu aloxo 'o? Anu mi vile uasi loxo ane'i isakileli. Mo loxo asoli ne Ielusalemo xe soli noxilo u'itinu ualasou Iesua la anu mi vile uasi. Axone la eni a'osasi, opoleli mulalaxisi.”

¹⁴ Ioxe, nexi temaisou lexe Polu pakia'usi lexe ulai laso nexi texolusi. Tatovonu so taxiunu oponula uasi. Tevikala lexe, “Mi noxou Mosingesi.”

¹⁵ Texolu texolu xo xe nexi so talutui la telalaxi mimi so talai ne Ielusalemo.

¹⁶ La ane'i talopala se'i so tuala ne Sisalia misaxanexi. Misaxanexi xo la milaixixe no tani noxou Nasoni so taxolu ne. Anu so Saipilasi mo anu lopala vile tei manina.

¹⁷ Texali ne Ielusalemo la talopala mi'osasixe manina.

¹⁸ Ioxe, texolu xe loxo ne'iela la Polu mu'avalixe so lexe talai tapita noxi'a Tiemisi oli'a tamitema so saxila'u.

¹⁹ Tepita mukalu la Polu muvikala kakau laixe noxi'a. Mukalu la anu mua'alo no anu mimi ane Mosinge muxalixu no avolu no taine'i tamitema noale'ale.

Polu mulai no tasou Mosinge ne Ielusalemo

²⁰ Anu Polu mua'aloi'a xe milo­musou mukalu la ane'i mi'itinu Mosinge ualasou. Ia mivikalanu aloxo 'o, “Ai vivixeo, nini nelavu mukalu lexe Taiuta tavu'alo e tavu'alo milopala noxou Iesua mukalu. Milopala ia ane'i opone'i ututulu so imulinu lavuloto no anu lo.

²¹ Mo tamitema se'i mivika­lane'i lexe nini napamuxane'i Taiuta ane ixoxolu no taine'i tamitema noale'ale. Napamuxane'i so ixiunu tumali'a no anu lavuloto Mosisi mulosinge. Mo i'oxo lexe nini napelototosi'a lexe ane'i ixotosou vasime'a ta'ili'a tamulu uasi. Mo imulinu ili'ilixo noxi'a tatiatila noxinge uasi.

²² Ane'i ivikalasine aloxo ne, laso nenge tanava? Xo ane'i masi milomu lexe nini a nexali 'oe.

²³ Laso nexi oponexi lexe nini na'oxo aloxo 'o. Tamitema tami'a ixolu no tainexi la mi'oxonu vavalima vile noxou Mosinge.

²⁴ Laso nini napita noxi'a no anu ili'ilixo so tamalemalenga no iou Mosinge mo nini nalotonu i'a mi ane so ilixo so navu. Mo so ukalu, la ane'i iluinu kisi'a. Xo axone la ane'i tamitema mukalusi imaisine lexe namulinu lavuloto kalumo laso ilavu lexe vaikala ito'omene no anu ne kalavoisi.

²⁵ Xe loxo tamitema noale'ale ane milopala noxou Iesua, la nexi tekalanu lapasi mulai noxi'a mukalu. No anu lapasi ne tepelototosi'a mimi aloxo 'o. Vile lexe ane'i i'ou misoposi ane tamitema milaixu no anu momosi'a kalavoi uasi. Xe vile lexe i'ou misoposi ane sialuxu uxolusio uasi. Xe vile lexe i'ou misoposi ane mikapilaxu uasi. Xe kaluxusou lexe ilailai noxi'a tasema vitanisi uasi.”

²⁶ Ioxe, no voxo loxo ne'iela la Polu mu'avali'a tamitema e mi'oxonu vavalima ne. La oli'a mi'oxonu ili'ilixo so ixali male­malenga no anu iou Mosinge. Mukalu la Polu mu'unalai no anu tasou Mosinge so uvikalane'i tapilisiti lamana lexe lexe ili'ilixo so malemalenga ne ukalu no anu voxo aneva. Xe muvikala aloxo 'o, “Voxo anene uxali, laso nexi tane'ene'i tami so nga'elaxa'a noxixe.”

Tamitema mitetelisou Polu

²⁷ Mune'e xe voxo 7 so ili'ilixo so malemalenga a so ukalui la Polu muxolu no tasou Mosinge. La Taiuta se'i so Esia polovinisi mine'e la mimaisou Polu a muxolu nonano ne. Mimaisou axone la ane'i mi'avutinoxu tamitema opone'i so la'iaxa'aou Polu, sila ane'i mite­telisou avile mo mi'ava'ava tatila lexe,

²⁸ “Ai, ngingi tamitema so Isilaeli. Ngasu'ulinexi uaio? Itema ano'o ulavusou uvikala masua sou lo noxinge xe si'a tamitema xe sou tani ano'o. Anu mosou ano'o. Mo kalumo anu mune'enu Kiliki vile mu'una no tasou Mosinge 'o mole muxalixu loxo nuni'u no iou Mosinge.”

²⁹ Ane'i mivikala axone xo mala'o se'o ane'i mimaisi'a Polu ilou itema vile so Epesusi mixixao no tuala. Itema ne ualasou lexe Tolovimusi. Mimaisi'a mixixao laso ane'i mikalavoi lexe Polu muno'u mu'unalaixu no tasou Mosinge.

³⁰ Ioxe, tamitema milomusou ava'ava noxi'a ne mo lexe tu'umaxu muxali laso ane'i milasi mine'ene'e mipita. Mipita la misavunoxu Polu mo milapulapunu muuatu no tasou Mosinge. Xe alaxu vilesisi la mitatusou aitengaxu vimelusou tasou Mosinge.

³¹ Milapulapunu muuatu la ane'i a i'otu'otunu Polu so lexe ivau usoli. Ia tatila so ta'ami noxi'a Talomu mulomu lexe tu'umaxu vile mu'avutinoxu opone'i Taielusalemo mo miiaukakasi.

³² Laso anu alaxu vilesisi mu'avali'a ta'ami se'i oli'a tatia­tilasi'a no anu ami. La oli'a mipalea miiave milai no taine'i tamitema e miiauiaukaka ne. Miiave milai xe tamitema mimaisi'a sila mitalo so mi'otu'otunu Polu.

³³ Ioxe, mixali mukalu la tatila ne muvikalane'i ta'amiou lexe iteteli­sou Polu mo isakinu no anu seni tamei. Mukalu la mutali'i lexe, “Itema ano'o ena'ei? Anu mu'oxonu mi ma'ia?”

³⁴ La tamitema ane mitulutulu ne se'i mi'ava mi vile xe se'i mi'ava mi vile. Tatila so ami mutali'isou tava'u tu'umaxu axone ia uno'u lavulavu laixe uasi xo ane'i mivikala vuluvulusi. Ikoli lamana uasi laso muvikalane'i ta'amiou lexe ilaixu Polu no anu tasi'a ta'ami.

³⁵ Milaixu xe mixali no anu valovalo so tani ne, ia ta'ami mimalei lexe tamitema opone'i ututulu lexe ivau Polusio. Sila ane'i ta'ami mivo'onu teitexi so tamitema avo'a imomomo so ixalisou uasi.

³⁶ La ane'i tamitema mimuline'i mo mi'ava'ava lexe, “Ngavau usoli.”

Polu mupala'anixu tava'u lopala noxou noxi'a Taiuta

³⁷ Ioxe, ane'i ta'ami a so i'unalaixu Polu no tasi'ae, la anu muvikalanu tatila noxi'a ta'ami no anu vaikala Kiliki lexe, “Avikalaneni sevileo.” La anu mukuluke, mo muvikala lexe, “Ai, nalavusou vaikala Kiliki ne?

³⁸ Eni ekalavoi lexe nini Isipi ane mu'avutinoxu opone'i tamitema so i'oto noxou xamani. Mo anu mu'uli laxune'i tamitema 4000 milai no xale lia esi'esi. Milai mixolu ne xe mive'ave'a tamitema.”

³⁹ La Polu muvikalanu lexe, “Uasi, eni Iuta ano'o. Eni so tuala ne Tasusi so xale lia Silisia. Tualasilo ne anu ualasou tatila, tamitema latala ilavusou. Laso maula, eni amasaxau avikalane'i tamitema.”

⁴⁰ Laso tatila noxi'a ta'ami mu'oxo lexe, “Ioxe.” La Polu mutulu no valovalo mo mutolosou avolu lexe tamitema ixolu tasiau. Ane'i mixolu tasiau mukalu la Polu muvikalane'i no anu vaikala Ipilu.