Ta'aposeli 20 - Ata New Testament

Polu muxixao ne Masetonia xe ne Kiliki

¹ Ioxe, tu'umaxu lelemesoui laso Polu mu'avali'a talopala so ipita. Mipita mukalu la anu mu'oxonu pakia'a no anu vaikala xo xe mukalu la anu mu'italone'i. Mu'ita­lone'i xe mulutu so ulai ne Masetonia polovinisi.

² Anu mumuamua'i xe muxali no tuala aneva talopala mixolu no anu, la anu mulemolu vaikala tavu'alo so uvalaxu lopala noxi'a. Mulai axone xo la muxali ne xale lia noxi'a Takiliki.

³ Muxali ne Kiliki la muxolu so'io tatalu. Xe ili'i la anu so utelo no lasipi so ulai ne Silia ia anu mulomu sivo lexe Taiuta milalaxinu xavutalai'a so lexe ivau usoli. Sila anu muxiunu oponu mo mumuamua'i mulivu mulai ne Masetonia.

⁴ Mulai la oli'a tamitema ano'o. Sopateli so tuala ne Velia, anu Pilusu olu. Xe Alisitakusi ilou Sekunutusi, ane'i so tuala Tesalonaika. Xe Xaiusi ne anu so Tevi xe Timoti oli'a tamitema tameila, ane'i so Esia polovinisi. Ualasi'a lexe Tikikusi xe Tolovimusi.

⁵ Ane'i ane, tamitema ano'o mi'uli so mixo­maiexi ne Toloasi.

⁶ Xe nexi, la texolu ne Pilipai xo mo la'ilali So Pileti Ane Isitisou Uasi mukalui laso nexi tetelo no lasipi la telutu. Telutu ne Pilipai la teiave voxo ta'uve mukalu la texali noxi'a ne Toloasi. Texali la texolu voxo 7 ne.

Tatananenge mutulusou maulu vile no avolu Polu

⁷ Texolu xo xe no anu voxo tei la tepita noxi'a talopala so tavelunu pileti. La Polu muvotovoto noxi'a tamitema xo voxo loxo ne'iela la anu so ulai. Muvotovoto muvoto­voto xo la muxali no olovoxo lixinu.

⁸ La no anu ngiou teitexi texolu no anu la lalamo tavu'alo.

⁹ Tani ne, sitolisou tatalu, vile no lia xe vile nonixi xe ane tatalusou la nexi texolu ane. Polu muvo­tovoto la maulu vile ualasou lexe Iutikusi anu a mutalupexa no anu uinitoa vile. Anu muvotovoto muvotovoto la maulu ne iou muvuvu si mole muai. Muai la muai avile sila mulapau avile mulai no lia. Mulapau xe tamitema milu'elai mi'itinu ia musoli mukalu.

¹⁰ Ia Polu musavunoxu maulu ne mo muvikalane'i tamitema lexe, “Ai, opongengi tu'umaxu uasi. Anu a umauli 'o.”

¹¹ Mumauli mukalu la oli'a Polu milivu teitexi la anu Polu muno'u pileti ka mu'ou. Mu'ou mukalu la anu muvotovotola. Muvotovotola xo la lamana mupau laso Polu muxexesi'a.

¹² La maulu ne anu muxolu mumauli mo milaixu no tasou. La ane'i opone'i mu'osa misevile.

Polu muvetalosi'a tamitema so saxila'u no pita ne Epesusi

¹³ Ioxe, nexi telutu la te'uli noxou Polu. Te'uli la tetelo no lasipi so talai ne Asosi. Ia anu uasi, xo anu u'oxo lexe umuamua'isi. Nexi te'uli xe texali ne Asosi la texomaiou Polu so loxo uxali, la noxi'a tatelo no lasipi.

¹⁴ Texolu xo xe Polu muxali noxixe laso nexi noxi'a tetelo. Tetelo la telutu telai no tuala ne Mitilini.

¹⁵ Texali ne Mitilini la texolu xe no kakau nexi telutu texali no ailani ne Kiosi. Xe no anu voxo vilela la tesua no tuala ne Samosi. Teai ne Samosi xe kakau xe telutu, la texali avile ne Miletusi.

¹⁶ Polu mulalaxinu oponu lexe uua'ulixu tuala ne Epesusi xo anu umasaxau so upalea ulai uxali ne Ielusalemo. U'oxo lexe uvovoxo ne Esia polovinisi uasi xo loxo vote'i la umasaxau uxali ne Ielusalemo tei no anu voxo so Penikosi.

¹⁷ Texali ne Miletusi la Polu mukalanu vaikala mulai noxi'a tamitema so saxila'u no pita ne Epesusi lexe ine'e noxou ne Miletusi.

¹⁸ Vaikala ne muxali noxi'a xe mixalixali noxou Polu la anu muvikalane'i aloxo 'o, “No voxo tei exali noxinge ne Esia 'o la ngemaisou ilixo noxilo. Ngingi menge ngelavusou xoluxolu noxilo no taingengi 'o.

¹⁹ Ane'i Taiuta mitovotovoleli xo mipitanu opone'i so lexe imasualeli. Ia eni opoleli mututulu no anu xaixai noxou Tatananengesi. Ngingi ngelavu lexe eni elu'eleli mo ieli lexaxu munixisingesi.

²⁰ Eni atukala­ngengi no anu vaikalasou Tatana­nenge uasi, mo a'apisou mi vile laixe so usu'ulingengi uasi. Xo evotongengi voxovoxo utotomu, alaxu se'i no ie'i tamitema xe alaxu se'i no tatasinge vilevilesi.

²¹ Uto­tomu eni epilixinu vaikala lamana noxi'a Taiuta xe noxi'a Takiliki lexe vote'i vilesisi ane so ta'isalilinoxu oponenge so susu noxinge mo talopala noxou Tatananenge Iesuasi.

²² Ia ngalomu, Ulenu Laixesi upamuxaleli so alai ne Ielusalemo ia mi ma'ia so uxali noxilo ne eni alavusou uasi.

²³ Mi ano'osi mulamana noxilo. Elailai no tuala ne'ei, la Ulenu Laixe upela'ilo lexe lakalavusu mo tu'utu'umaxu a uloxosi so axalisou ili'i.

²⁴ Ia eni opoleli lexe maulixo anu utiatila uasi, xo loxo tamitema ivelo la anu mi vitanisi. Eni a'oxonu latilovo aloxo 'o. Eni loxo alesisi, mo opoleli ututulu lexe axali avile no anu lamakisi. Lesisi ne, anu latilovosou xaixai noxou Mosinge. Mo eni opoleli ututulu lexe asivitanoxu xaixai ane Tatana­nenge mupilixinu noxilo e so alanu vaikala laixe so iaiama noxou Mosinge.

²⁵ Laso tavivilo ngalomu. Tatei eni exolu no taingengi so epela'ingexu voxo ane Mosinge molu u'uli laxune'i tamitemaou. Ia vaimomo 'o eni alavu lexe ngingi mukalusi ngamaisou ielila uasi.

²⁶ Laso avikalangengi lamana vaimomo 'o aloxo 'o. Loxo itema vile umasua la anu tava'u noxilo uasi.

²⁷ Xo eni avovoxo so apala'anixu Mosinge oponu loloni noxinge uasi, opoleli mututulu no anu mi nesi.

²⁸ Ia ngingi ngalaxa'i laixe mo ngautululune'i Mosinge ta'olu laixe xo Ulenu Laixe molu musoso­vosinge so ngasaxila'a. Tami­temaou ne anu molu mulotone'i no anu sialuxu. Tatemanu pita noxou Mosinge ne ane'i loxo tasipisipiou, mo ngingi loxo tamitema so ngasaxila'a.

²⁹ Xe no anu latilovo ne telexu aloxo 'o. Eni alavu lexe loxo a'umesinge la anu loxo ta'a'a tavova i'una no taingengi mo imolo mamulo noxi'a tasipisipi.

³⁰ Ane'i se'i no taingengi 'o kalumo. Ane'i i'avuti ixalixu kalakalavoi so ilapune'i talopala se'i so imuline'i.

³¹ Laso ngalaxa'i laixe, tangengi­vulusiou pelototo noxilo uasi. Xo exolu no taingengi tau ie tatalu mo kakau olovoxo atalo so avikala lamana noxinge vilevilesi uasi. La ieli lexaxu munixi so emolo lolomumengi.

³² Ia vaimomo 'o apilixingengi no avolu Mosinge. Xo amasaxau so opongengi ututulu no anu vaika­lasou iaiama noxousi. Xo anenesi umomomo so u'oxo pakia'inge. Xe ili'i la Mosinge molu ulosinge mimi lailaixe. Anu ulosinge nenge ane musosovosinge lexe tamite­maou u'isalili.

³³ Xo eni, la aisuxu o alingau lamoliou o mimiou itema vile uasi.

³⁴ Ngingi menge ngelavu lexe eni melo exaxai so eno'u mimixeli no avolosi. Mo la'ilalinexe noxi'a tamitema ane misu'ulileli, la eni melo elotonusi.

³⁵ Eni exaxai tatila axone so asu'uline'i tami­tema ane lamolii'a uasi. Emaxa'u noxinge so ngamaisou lexe anu vote'i laixe ane. Xo nenge masi taxavutalanu vaikalaou Tata­nanenge Iesua aloxo 'o, 'Loxo itema vile u'itinenge mi ma'i, la ta'osa sevile. Ia loxo nenge ta'itiou menexinge mi ma'ia la taxamulinu osa tatila.'”

³⁶ Polu muvikala axone mukalu la anu oli'a mitangatulu so mivikala noxou Mosinge.

³⁷ Mivikala noxou Mosinge mukalu, la ane'i misavunoxu xe mimaxa'u sexela noxou mo ane'i mitatamasi.

³⁸ Ane'i tane'ixu manina mo opone'i tu'umaxu noxou vaikalaou Polu lexe anu umaisou ie'ila uasi. Mukalu laso misaxanu so mutelo no lasipi.