Ta'aposeli 2 - Ata New Testament

Ulenu Laixe mune'e muxali

¹ Ioxe, no anu voxo tatila noxi'a Taiuta e ilemolu lexe Penikosi la ane'i talopala mukalusi mixolu mipita tanixa'a vilesisi.

² Mixolu mipita sila alaxu vilesisi milo­musou mi vile loxo sivo toxoxu loxu mulu'e no loxotolo. Loxu mu'oki'oki mo mukasi'a tatemanu tani ne.

³ Mimalei loxo 'o la mi loxo navu levelevexu mukalipala mo mumomoxa'a so mu'italo noxi'a vilevilesi.

⁴ La Ulenu Laixe muxali noxi'a latala ne mo ane'i mi'ana'ana noxou. La Ulenu mulosi'a xavi so ane'i misoko'u so mivikala no anu vaikala iouiou ane ilavusou tei uasi.

⁵ Ioxe, no voxo anene la Taiuta tose'i so tuatuala nopaxapaxa mine'e mo a ixolu ne Ielusalemo. Ane'i tamitema so i'itinu Mosinge ualasou mo imulimulinu lavuloto ane mulosi'a Taiuta tatei.

⁶ Ane'i a ixoxolu ne Ielusalemo xe milo­musou mi loxo sivo loxu ne la ane'i mine'ene'e mo mipita no tani ne. La ane'i tane'ilili xo ane'i milomusou vaikala so tuala noxi'a vilevilesi mu'isalili.

⁷ Ane'i Taiuta so tuatuala nopaxapaxa ne tane'ilili mo mivikalane'i ngato'o lexe, “Ai tamitema ano'o so Xalilisi.

⁸ Ia loxova laso nenge mukalusi talomusi'a ilemolu vaikalamenge vilevilesi?”

⁹ Ane'i mivikala axone xo ane'i so tuatuala iouiou. Loxo ne Palitia xe Mitia xe Elamu xe Mesopotemia xe Iutea xe Kapatosia xe Ponitusi xe Esia

¹⁰ xe Vilixia xe Pamivilia xe Isipi xe Livia ane alai ne Sailini, xe ane'i se'i so Lomu mixolu kalumo.

¹¹ Xe ane'i se'i ne Takiliti xe Ta'alevia. Se'i noxi'a ne Taiuta maninasou. Xe se'i ne so laili vilemo ia ane'i mimulinu ilixo mo lavuloto noxi'a Taiuta. La ane'i mi'oxo lexe, “Nenge talomusi'a tamitema ano'o ilulusou xaixai xavinu noxou Mosinge no anu vaikalamenge vilevilesi.”

¹² La ane'i mukalusi mikuluke mo tane'ilili la mitali'isi'a ngato'o lexe, “Ma'ia laxu no anu mi ano'o?”

¹³ Ia ane'i se'i mimolo sukusi'a talopala lexe, “Ane'i mane miie la misipaki ane.”

Pita muvotone'i tamitema latala

¹⁴ Ioxe, Pita oli'a ta'aposeli 11 ne mitulu sila anu muvikala no anu xolinu tatila aloxo 'o, “Ngingi tavivilo Taiuta xe ngingi so tuala nopaxapaxa ane ngene'e ngaxolu ne Ielusalemo 'o. Ngalomunganiou vaikalaxeli xo alulusou laxu mi ane muxali 'o.

¹⁵ Ngingi tose'i nge'oxo lexe tamitema ano'o misipaki, ne? Uasi to! Alala'e 'o uao kakausi. Tamitema iie mo isipaki no kakau aloxo 'o uasi.

¹⁶ Mi ane muxali 'o nene'axu vaikalaou polopeti Ioeli mukaukavunu tatei aloxo 'o,

¹⁷ 'Mosinge muvikala aloxo 'o, Alai no anu voxo so lialia ukalu la eni akalanu Uleleli uxali noxinge tamitema. La ta'ilinge tamulu xe tasema ipela'axu vaikalaxeli. Xe tamaulumengi xe tatiatilamengi iai isaxi.

¹⁸ Xe no voxo anene la eni akalanu Uleleli uxali noxi'a tamitema so xaixai noxilo, tamulu xe tasema. La ane'i ivotone'i tamitema no anu vaikalaxeli.

¹⁹ La eni alosoie'i tamitema mimi iou vilemo manina no loxotolo. Xe a'oxonu sosovo no anu xavileli no lia, sialu xe navu xe umuxu tatila.

²⁰ La aso usita mo so'io uxali lauoinu loxo sialu. Anu sosovo lexe ili'i la voxo mutoxoxa'a mo tu'umaxu noxou Tatananenge a uxali ne.

²¹ Xe no voxo anene la tamitema mukalusi loxo ilingau su'uli noxou Tatananenge, la ixalisou pamauli.' Anene vaikalaou polopeti Ioeli.”

²² La Pita musolonu vaikalaou aloxo 'ola, “Ta'isilaeli, ngalomu. Iesua so Nasaleti mu'oxonu sosovo so xavi iouiou no taingengi. Anu mu'oxonu sosovo ngemaisou ne, ia Mosinge molu mu'oxonu noxou so upela'inge lexe anu molu noxou Mosingesi.

²³ Xe mune'e la Mosinge mu'italonu noxinge so uxali loxo anu mulalaxinu oponu mo mulavu lumamo. Laso ngingi ngepilixinu noxi'a tamitema tamasua so mililinu no ovu valautu so musoli.

²⁴ Ia Mosinge mutulu­sou mu'umenu no anu soli mo no anu navunavu so soli. Xo soli umomomo so utetelisou itema anene uasi.

²⁵ Xo tatei Teviti kalumo muvikalasou aloxo 'o, 'Eni emaisou Tatananenge uxolu no laxuleli utotomu mo uveisa'ileli. Laso eni a'ume mo a'olo'olo uasi.

²⁶ Mo eni opoleli uai se'isisi mo alemolu vaikala so osasi mo eni axoxolu no anu lopalasi.

²⁷ Opoleli axone xo nini na'italoleli no tanixa'a tamitema misoisoli uasi. Mo napilixileli eni amitemameni amalemalenga a'ui no lamatimati uasi.

²⁸ Nini nelosoielixu vote'isou mauli mukalu. Mo nini naxolu noxilo laso eni osa'ila misevile.'” Pita muvulunu vaikalaou Teviti aloxone.

²⁹ Mukalu la Pita muvikala aloxo 'ola, “Tavivilo. Eni avikalangengi manina so ilusunenge Teviti. Anu vaikalaou ne anu vaikalasou uasi. Xo anu musoli mo mi'asixu mo lulusou a uxolu 'o, anu utulu umaulila uasi.

³⁰ Ia anu Teviti ne anu polopeti, mo mulavu lexe Mosinge mulemolu vavalima tu'umaxu noxou lexe ili'i la anu utulusou ilusunu vile no anu tanixu kingi.

³¹ Anu musaxi mu'uli laso mua'alo lexe ili'i la Mosinge utulusou itema ane musosovosou mo u'umenu no anu soli. Laso maixene anu mulemolu vaikala anene lexe Mosinge u'italonu no tanixa'a tamitema misoisoli uasi mo vasimolu u'ui uasi. Teviti ne uvikalasou uasi, anu muvikalasou Kalaisitisi.

³² Ioxe, anu itema e Iesua, Mosinge mutulusou mu'u­menu no anu soli. Mo nexi latala temaisou lexe mumaulila laso nexi taa'aloxu.

³³ Mosinge mutulusou no anu soli ka mulaixu mo mutalupexasou no avolu tema so u'itinu. Mo mulosou Ulenu Laixe la munixi'u noxixe vaimomo 'o aloxo ngingi ngasaxisou mo ngalomusou.

³⁴ Xo Teviti utelai teitexi no tualasou Mosinge loxo Iesua mutelai 'o uasi. Ia Teviti muvulunu vaikalaou Kaluxu Uasi ane mulemolu noxou Tatananenge aloxo 'o, 'Nini natalupexa no avolo tema 'o,

³⁵ mo so ili'i la eni a'italone'i tauluameni so nataxa­palisi'a.'

³⁶ Pita muvulunu vaika­laou Teviti ne mukalu la muvikala aloxo 'ola, “Ngingi Ta'isilaeli mukalusi ngalamana lexe Iesua e ngelilinu no ovu valautu ne, Mosinge musosovosou lexe anu Kalaisiti mo anu Tatananenge.”

³⁷ Ioxe, tamitema milomusou vaikala ane Pita mulemolu la mixamulinu lexe muto'omolu opone'i. La ane'i mitali'isou oli'a tamenexu ta'aposeli aloxo 'o, “Tavivixe, laso nexi tanavaio?”

³⁸ La Pita muvikalane'i lexe, “Ngingi mukalusi ngaxiunu mo nga'isalilinoxu opongengi no anu Mosinge vaikalaou. Ukalu laso nexi ta'oxonu ilixo so kelele noxinge no anu lexa. Takeleni­ngenge axone no anu ualasou Iesua Kalaisiti xo anu ukalusou tina'u­ngenge so susu xe u'oxonu iaiama so ulosinge Ulenu Laixe.

³⁹ Xo vavalima noxou Mosinge so singe xe ta'ilinge xe tamitema latala nopaxapaxa. Vavalima ne so si'a tamitema mukalusi Tatananenge anu Mosinge u'avali'a.

⁴⁰ Pita muvikala axone mukalu la mupelototosi'a no anu vaivaikala se'ila. La muvikala pakia'u lexe, “Ngalaxa'i laixe. Xo uasi la ngingi ngoli'a laili noxinge so susu 'o ngamamulo.”

⁴¹ La ane'i ane milomuxu votovoto noxou Pita la ta'aposeli mi'oxonu ilixo so kelele noxi'a. La no voxo anene tamitema ta'alavua navasi'a 3000 mi'una noxi'a ane'i ane milopala.

Ane'i tamitema so lopala mixolu opone'i vilesisi

⁴² Ioxe, mixolu la opone'i mutu­tulu so ilomusou votovoto noxi'a ta'apo­seli xe so isu'uline'i ngato'o xe so ipita ivelunuxa'a pileti xe so ivikala noxou Mosinge.

⁴³ Xe ane'i latala mimama'u xo mimaisou sosovo so xavi Mosinge mu'oxonu no avo'a ta'aposeli.

⁴⁴ La tami­tema so lopala ne mixolu opone'i vilesisi la i'apisou mimii'a ngato'o uasi. Mimii'a ne mi'italonu mo miva'i­va'isuxusi.

⁴⁵ Xo aloxo 'o, loxo vile noxi'a uno'u lamoli so lia o mi ma'ia, la anu uvelunu noxi'a ane'i ane loxo umaisi'a lexe la'ilalixa'a uasi o xoluxolu noxi'a masuasi.

⁴⁶ Mo no voxo utotomu ane'i mipita no mataunaxu tasou Mosinge. Xe ane'i mipita so i'ani no tatasi'a la opone'i laixe mo mi'osasi'a ngato'o.

⁴⁷ La ane'i mixolu mi'itinu Mosinge ualasou mo tamitema mimaisi'a la mi'oxo lexe ilixo noxi'a ne laixe. La voxo utotomu Tatananenge mupa­mau­­line'i se'ila, ka mupitane'i kalumo noxi'a tamitema so lopala.