Ta'aposeli 19 - Ata New Testament

Polu muvotovoto ne Epesusila

¹ Ioxe, no voxo ane Apolosi muxolu ne Kolini la Polu mupolo no vote'i ane mu'unalai no la'ola'olu. Mupolo ne xo xe ili'i la muxali avile ne Epesusi la muxalisi'a talopala se'i ne.

² La mutali'isi'a aloxo 'o, “No voxo ane ngelopala la Ulenu Laixe muxali noxinge o uasi?” La ane'i mi'oxo lexe, “Uasi, uala ane Ulenu Laixe ne talavusou uasi.”

³ La Polu mutali'i lexe, “Ia nge'oxo ilixo so kelele aloxova?” La ane'i mi'oxo lexe, “E iou vilesisi loxo Tioni mu'oxonu.”

⁴ La Polu muvikala lexe, “Tatei la Tioni mu'oxonu ilixo so lexa noxi'a tamitema ane mixiunu opone'i so susu noxi'a mo mi'isalilinoxu noxou Mosinge. Mo muvikalane'i lexe ane'i ilopala noxou itema ane uili'i noxou. Itema e Tioni mulemolu ne, anu Iesuasi.”

⁵ Xe ane'i milomuxu, laso Polu mu'oxonu ilixo so kelele noxi'a, xo ane'i mixali lamana noxou Tata­nanenge Iesua.

⁶ Mi'oxo axone xe Polu mumulaxu avolu no kisi'a la Ulenu Laixe mune'e muxolu noxi'a. La ane'i mivikala no anu vaikala iouiou mo mipela'axu Mosinge vaikalaou.

⁷ Tamitema anene tamului'a loxo 12.

⁸ Ioxe, mune'e la Polu mu'u­na'unalai no anu tasou lavuloto noxi'a Taiuta. Mu'unalai la anu muvotovoto pakia'u so voxo ane Mosinge molu u'uli laxune'i tamitemaou. Anu mulanu vaikala so upela'a mo uxiunu oponu la mu'oxo axone mumomomo no anu so'io tatalu.

⁹ Ia se'i noxi'a ne opone'i pakia'u mo ilopala uasi xe no ie'i tamitema la mivikala masuaou Vote'i ane muvotovoto no anu. Ane'i mi'oxo axone laso Polu oli'a tamitema e milomuxu vaikalaou xe milopala la mivo­tovoto no tasou lavulotola uasi. No anu voxovoxo utotomu Polu mulanu vaikala no anu tasou lasikulu e milemolu lexe Tilanusu.

¹⁰ Anu muxolu mu'oxo axone mumomomo no anu tau ie tamei. Laso tatemanu Esia polovinisi, Taiuta xe Takiliki latala ne milomusou vaikalaou Tatana­nenge.

Sikeva ta'olu mitovonu so ikusai'a ta'angelo tamasua

¹¹ Ioxe, no avolu Polu la Mosinge mu'oxonu sosovo so xavi iouiou mo xavinu musuku.

¹² Xo aloxo 'o. Mi ma'ia mulaisou vasimolu Polu, loxo lavalava xasixu o mimi, la tamitema mino'u so imulaxu no vasime'a tamitema ipipiena. Mi'oxo axone la tamitema laixene'i xe ane'i ane ta'angelo tamasua mikasi'a, la mixexesi'a.

¹³ Ia Taiuta se'i ane xaixai noxi'a so ixixao no tuatuala so lexe ikusai'a ta'angelo tamasua la mi'oxo aloxo 'o. Ane'i mitovonu so ilemolu ualasou Tatananenge Iesua so i'oxonu mi ne. Loxo ane'i milai noxou itema vile ane angelo masua muxolu no vasimolu la mivikala lexe, “No anu ualasou Iesua ane Polu ulavusou uvotosou la eni avikalaneni lexe nini nalai.”

¹⁴ Ane'i tamitema 7 ane Sikeva ta'olu milavusou mi'oxo axone. Anu Sikeva ne anu tila vile noxi'a tapilisitii'a Taiuta.

¹⁵ Ane'i ta'olu mi'oxo axone xe voxo vile la mivikalanu angelo masua vile no vasimolu itema vile. Ia angelo ne mukoline'i lexe, “Eni alavusou Iesua mo alavusou Polu, ia ngingi ta'ei 'o?”

¹⁶ La itema ane angelo masua muxolu noxou musavu­nixi'a mo mu'otu'otune'i e mukasi'a avile. Mukusai'a mo mukakanu mimi'a la vasime'a ne sialusi mole mi'ume no tani ne la vasime'asi milai.

¹⁷ A'alo so mi ne muiaveiave la Taiuta oli'a Takiliki latala e mixolu ne Epesusi ne milomusou. Milomusou la ane'i mimama'u manina mo mitaxanu ualasou Tatananenge Iesua mo mi'itinusi.

¹⁸ La tavu'alo noxi'a ane milopala la mipala'anixu ili'ilixo masua noxi'a no ie'i tamitema.

¹⁹ Xe se'i noxi'a ane tei milavusou mi'oxo ilixo sa iouiou la mine'enu lavulavuku so upela'axu ili'ilixo ne. Mine'enu mo mi'elaxu no ie'i tamitema. Mi'itisou lexe lamolisou lavulavuku ne masi ta'ei mo, la mumomomo no anu siliva 50,000.

²⁰ Mi'oxo axone laso vaikalasou muiaveiave no tuatuala. La no anu vote'i anenesi vaikalaou Tatana­nenge musukusuku no tuatuala mo pakia'u misevile.

²¹ Mune'e mune'e xo xe mukalu, la Ulenu Laixe mupamuxanu xavu­talaou Polu lexe ulutu ulai ne Ielusalemo. Xe mupamuxanu lexe no anu muamua'i noxou la upolo ne Masetonia xe ne Akaia. La Polu muvikala aloxo 'o, “Eni alai no tuatuala ne mukalu la eni alai ne Lomu kalumo.”

²² La anu mupa­lusi'a tamitema tamei ane milavusou isu'ulinu e Timoti ilou Elasitusi so mi'uli milai ne Masetonia. Ia anu Polu muxolu sevile ne Esia polovinisio.

Tu'umaxu vile muxali ne Epesusi

²³ Ioxe, Polu ulutu uao uxolusio, la tu'umaxu vile mu'avuti. Tami­tema se'i la'iaxa'a mo mivikala masua no anu vaikala ane lexe Iesua anusisi Vote'i.

²⁴ La itema vile ane ualasou lexe Temitiusi, anu itema so u'oxonu momosi'a kalavoi no anu siliva so tamitema ilotonu. Mosi'a kalavoi mu'oxonu ne iou vilesisi loxo mosi'a kalavoi ilemolu lexe Atemisi, ia kituasi. Anu anusisi uasi, ane'i tavu'alo kalumo mino'u lamoli tatila no xaixai anene.

²⁵ Anu Temitiusi ne anu mupitane'i tamosou xaixai ne oli'a tamitema se'i ane xaixai noxi'a iou vilesisi. Mupitane'i xe muvikalane'i lexe, “Ai, nenge nenge'a xaixai noxinge vilesisi. Mo nenge taxalixu lamoli tatila no anu.

²⁶ Ia ngingi masi ngamaisou mo ngalomusou vaikalaou itema e Polu ne. Anu a ulapune'i tamitema tavu'alo mo uxovulaulaunixi'a. Anu a u'oxonu ne Epesusi xe no tuatuala no Esia polovinisi mukalusi. Mo anu utotomu uvikala lexe momosinge taxalixu no avonge 'o, anu mosinge maninasou uasi.

²⁷ Vaikalaou Polu ne loxo utila la masi tamitema ivikalasou xaixai noxinge masua. Mo vilela aloxo 'o. Vaikalaou umomomo so ulu'enu ualasou tasou mosinge lailaixe Atemisi kalumo. Mo vaimomo 'o tamitema ilavusou i'itinu ualasie Atemisi no Esia polovinisi xe no xale tuatuala mukalusi. Ia loxo vaikala noxou Polu ne xavinu la umamulonu ualasie toxoxu ne.”

²⁸ Ioxe, tamitema ne milomusou vaikala ne mukalu la la'iaxa'a manina mo mi'ava'ava tatila lexe, “Atemisi noxinge Ta'epesusi ne teitexi manina.”

²⁹ Mi'oxo axone laso tatemanu tuala ne miiauka­kasou e lapilai uasisi. La tamitema se'i mikasi'a Xaiusi ilou Alisita­kusi. Ane'i ilou oli'a Poluena me'a ne Masetonia mine'e mala'o. Mikasi'a xe alaxu vilesisi milaixi'a no tanixu pita so tuala ne.

³⁰ Xe Polu mulavu axone la anu umasaxa so u'unalai no taine'i tamitema latala ne ia talopala mi'apixu.

³¹ Xe kalumo la ane'i tamenexu Polu se'i e no anu xamani so polo­vinisi mikalanu vaikala mune'e noxou. Milinga pakia'u lexe anu ulai no anu tanixu pita uasi.

³² La tamitema latala ane mixolu no tanixu pita ne mixovulaulau mo mivikala vuluvulusi. Tavu'alo noxi'a ne ilavusou tava'u tu'umaxu ne uasi.

³³ Itema vile ualasou lexe Alekisana muxolu. Taiuta mikalanu so mutulu no ie'i tamitema ne. Anu mutolosou avolu so lexe ukolinu vaikalai'a ane mito'omolu no anu.

³⁴ Ia tamitema mitongonu mo milavusou lexe anu Iuta, laso ane'i mukalusi mitilatilanu anaxa'aou lexe, “Atemisi noxinge Ta'epesusi ne teitexi manina.” La mi'ava'ava mukei axone mumomomo no anu aso iou tamei.

³⁵ Mi'ava'ava axone xo xe kusu­kusu so tuala ne Epesusi ne mukaitolone'i so mitalo. Mitalo la muvikalane'i aloxo 'o, “Ngingi Ta'epesusio, ngalomu. Tamitema so xale tuatuala mukalusi milavu lexe nenge Ta'epesusi tasaxila'u mosinge tatila Atemisi. Mo lavo'o ane usaxi loxo ane la molu no loxotolo mulapau muxali noxinge 'o so tasaxila'u.

³⁶ Vaikala anene maninasi mo evile umomomo so uxililiou uasi. Laso ngingi ngatalo, nga'oxonu mi vile vuluvulusi uasi.

³⁷ Ngingi ngene'ene'i tamitema tamei 'o ia ane'i ipulumao mi vile no tasou mosinge o ivikalasie mosinge masua uasi.

³⁸ Laso loxo Temitiusi oli'a tamenexu no anu xaixai noxi'a ne vaikala vile so itulusou itema vile no anu, la i'oxo axo'. Loxo voxo so lakoti la ane'i ilai so tametisitileti ilovonixu. Axone, la ane'i imomomo so itulusi'a tamitema no anu vaikala.

³⁹ Xe loxo tu'utu'umaxu se'ila la ngamulinu lo so ngalovonixusi.

⁴⁰ Xo loxo ta'oxo loxo te'oxo vaimomo 'o la ane'i masi ikotinenge. Ikotinenge xo i'oxo lexe nenge taxalixu tu'umaxu vitanisi. Xe axone la takoline'i axova, xo te'oxonu vuluvulusi?”

⁴¹ Kusukusu ne muvikala axone mukalu laso mupaxelene'i so milai vilevilesi.