Ta'aposeli 18 - Ata New Testament

Polu mulanu vaikala ne Kolini

¹ Ioxe, mune'e la Polu mulutu ne Atenisi la mulai no tuala ne Kolini.

² Mulai la muxalisou Iuta vile ualasou lexe Akuila. Semau ualasie lexe Pilisila. Ane'i ilou so Ponitusi polovinisi. Ilou mixexesou xale lia ne Itali mala'o se'osi xo kingi noxi'a Talomu e ualasou lexe Kalautiusi mu'oxonu lo lexe mamu so Taiuta ixolu no tualasi'a Talomu. Ioxe, Polu muxalisi'a ilou ne Kolini.

³ Muxalisi'a sila mulai muxolu noxi'a xo xaixai noxi'a oli'a Polu vilesisi. Xaixai noxi'a ne so misumapinu tasou laseli so lailoto.

⁴ Polu muxoxolu ne mo no anu Voxo so Ma'ila utotomu anu mu'unalai no tasou lavuloto noxi'a Taiuta. Mu'unalai so upalasinoxu Mosinge vaikalaou laxulaxu noxi'a Taiuta oli'a Takiliki.

⁵ Xe muxolu muxolu xo xe Sailasi ilou Timoti me'a ne Masetonia la mixali noxou. Ane'i mixali noxoui laso ane, anu muxolu no anu xaixai so votovoto voxovoxo utotomu. Muvotovoto xe mutovonu so upela'a Taiuta lexe Iesua anu ane so Kalaisiti ane.

⁶ Ia ane'i Taiuta mixililiou Polu mo mivikala masua noxou. Laso anu mu'umu'umunu kalai no lasiotiou veveni so latilovosou ilixo masua noxi'a. La anu muvikala lexe, “Mi na'a ngingisi. Loxo ngamamulo, anu tava'u noxingesi, eni uasi. Ngalomu uasi axone, laso ngingi ngaxolu ane, eni alai noxi'a tamitema noale'alesi.”

⁷ Polu muvikala axone mukalu la mula no tasou lavuloto xe mu'unalai no tani vile a muxolu no pa'umolu. Tani ne, mosou ualasou lexe Titiusi Iasitusi. Itema ano'o ulavusou umama'u noxou Mosinge.

⁸ Ioxe, mune'e la itema e musa­xila'u tasou lavuloto ne, ualasou lexe Kilisipusi oli'a ta'olu milopala noxou Tatananenge. Xe ane'i Takolini tapiena ane milomulo­musou votovoto noxou Polu la ane'i kalumo milopala. Milopala laso mi'oxonu ilixo so kelele noxi'a.

⁹ Muxoxolu xo xe olovoxo vile, la Tatananenge muvikala noxou Polu no anu ai saxi. La muvikala aloxo 'o, “Nini na'ume uasi. Naxolu tasiau uasi, navikalasi.

¹⁰ Xo eni axolu noxine mo a'oxonu latolosine. Itema vile u'oxoneni masua uasi, xo eni tamitemaxeli tavu'alo a ixolu no tuala ano'o.”

¹¹ Polu mulomusou vaikala anene laso muxolu ne Kolini tau ie vile mo so'io 6. Muxolu muvotovotosou Mosinge vaikalaou noxi'a tamitema.

¹² Ia mune'e mune'e la xamani vile ualasou lexe Xaliou mutulu mutiatila no Akaia polovinisi. No voxo loxo mutulu la ane'i Taiuta mipita mixililiou Polu. Mixililiou laso mino'u milaixu no lakoti so Xaliou utongonu.

¹³ Mo mivikala aloxo 'o, “Itema ano'o ulavusou uxiunu opone'i tamitema so i'itinu Mosinge ualasou no anu ili'ilixo se'i. Ia ili'ilixo ne, uxililiou lo noxinge Talomu.”

¹⁴ Mivikala axone la Polu a so ukolinu vaikalai'a. Ia Xaliou muvikalane'i Taiuta aloxo 'o, “Ai, loxo ngingi ngato'omolu no anu vaikala vile so muxola'u lo vile o so lexe mususu tatila, laso eni alomu­ngengi.

¹⁵ Ia mi ano'o utiatila so atongonu uasi. Ngingi ngatulusou no anu vaikala so ualauala o vaikala kitukitu so lo noxinge Taiutasi. Laso ngingi menge ngalovonixu, mi na'a xeli uasi.”

¹⁶ Laso anu mukusai'a no anu lakoti.

¹⁷ Mukusai'a no anu lakoti laso mitetelisou itema tila no anu tasou lavuloto ualasou lexe Sosotenisi. Mitetelisou laso mi'o­tu'otunu. Mi'otu'otunu xe Xaliou mumaisi'a ia muvikala mi vile no anu anene uasi.

Lailivu noxou Polu so mulai ne Anitioki

¹⁸ Ioxe, Polu muxolu ne Kolini voxo se'i. Xe mune'e la anu mupilixine'i tavivinge no anu lopala xe mulutu mulai no tuala ne Senikilia. Muxali ne la anu mu'oxonu vavalima noxou Mosinge la muluinu kisou so usosovosou vavalima ne. Mukalu la oli'a Pilisila xe Akuila mitelo no lasipi so ilai ne Silia.

¹⁹ Milutu xo la mixali no tuala ne Epesusi. Mixali ia Polu mupilixine'i xo anu uxolu ne Epesusi avile uasi. Anu muxolu voxo se'isisi mo mu'unalai no anu tasou lavuloto noxi'a Taiuta so mutovonu so upalasinoxu Mosinge vaikalaou laxu noxi'a.

²⁰ Mupalasinoxu xe milomusou la ane'i mivikalanu lexe, “Nenge nenge'a taxolu maxuveni sevileo.” Ia anu oponu mutulu lexe ulaisi.

²¹ Laso anu so ulutu la muvikala lamana noxi'a lexe, “Loxo Mosinge umasaxau la eni alivu ane'e noxingela.” Muvikala axone mukalu la mutelo no lasipi so mu'umesou tuala ne Epesusi mulai.

²² Muxolu no lasipi mulai mulai xo la muxali avile ne Sisalia la lasipi musua ane. Lasipi musua ne laso Polu mulu'e so mulai mumaisi'a talopala ne Ielusalemo. Mukalu la mulivu mulai avile ne Anitioki.

²³ Polu muxali ne Anitioki xe muxolu maxuveni sevile ka mulutula. Mulutula la muxixao no tuatuala no xale lia ne Xalesia xe ne Vilixia so mu'oxonu pakia'a talopala no tuatuala ne.

Apolosi muvulunu vaikala ne Epesusi.

²⁴ Ioxe, no voxo anene la Iuta vile anu so tuala ne Alekisanita mulai ne Epesusi. Anu ualasou lexe Apolosi. Apolosi ne anu lavulavu noxou mutiatila no anu Mosinge vaikalaou mo anu itema so vaikala laixe.

²⁵ La talopala mipela'u no anu vote'i noxou Tatananenge laixe mo oponu mututulu so uvotovoto. Anu muvotovoto no anu xavi mo loxo mua'aloxu Iesua la a'alo noxou ne mulovosi. Ia anu mulavusou ilixo so kelele noxou Tionisi.

²⁶ Mune'e la anu musoko'u so uvotovoto no tasou lavuloto ne Epesusi utotomu, u'ume'a Taiuta uasi. Muvotovoto axone xe Pilisila ilou Akuila milomusou la ilou mi'avalou so mulai no tasi'a. Mulai la ilou mipela'uxu mi se'i no anu vote'i noxou Mosinge ane ulamana no anu malaxo uasi.

²⁷ Ioxe, Apolosi mumasaxau ulai ne Akaia polovinisi la talopala opone'i vilesisi so ulaisi. La ane'i mikaukavunu lapasi mulai noxi'a talopala ne Akaia so ivikalane'i lexe i'unanu noxi'a. Ioxe, Apolosi mulutu xo la muxali ne Akaia noxi'a ane'i ane milopala no anu iaiama noxou Mosinge, la musu'uline'i misevile.

²⁸ Musu'uline'i xo anu pakia'u mo mukasi'a Taiuta no anu vaikala no taine'i tamitema latala. Mukasi'a mo mupalasinoxu lexe Iesua anu Itema so Pamauli ane lavukuou Mosinge a ulelemolu 'o.