Ta'aposeli 17 - Ata New Testament

Polu ilou Sailasi milai ne Tesalonaika

¹ Ioxe, Poluena mixexesou tuala ne Pilipai la milai. Milai la mipolo no tuala ne Amivipolisi xe ne Apolonia. Milai milai xo la mixali avile ne Tesalonaika. No tuala ne Tesalonaika tasou lavuloto noxi'a Taiuta a muxolu ne.

² Poluena mixali la anu mumulinu ilixo aloxo mu'oxonu no tuatuala. Anu mu'unalai no tasou lavuloto no anu Voxo so Ma'ila. Xe viki vilela, no anu Voxo so Ma'ila, la anu mu'una'unalai. Mu'oxo axone alaxu tatalu. Mo anu oli'a tamitema ne mivivikala, la anu mupala­palasinoxu laxulaxu Mosinge vaikalaou noxi'a.

³ Mupalapala­sinoxu lexe anu ane so Kalaisiti la vote'i vilela uasi, vote'i so upamau­linenge vilesisi ane so mutavulenu navunavu mo musoli xe mutulu no anu soli. La Polu muvikala lexe, “Iesua ane eni avotongengixu 'o, anu ane so Kalaisitisi.”

⁴ Muvikala axone la Taiuta se'i no taine'i milamana mo mipita noxi'a Polu ilou Sailasi. Xe Takiliki tapiena ane mimama'u noxou Mosinge oli'a tasema mose'i ane tamitema no tuala mitaxane'i, la ane'i kalumo mipita noxi'a ilou.

⁵ Ia Taiuta mimaisi'a lexe tami­tema tapiena mipita noxi'a la mi'isu laso mitakunune'i talasikeli ane mixixaoxao vitanisi no loxomala. Mitakunune'i ka mi'avuti mipita so ixalixu tu'umaxu mo mamulo no tuala. Mi'avuti la miiaveiave mipita no tasou itema vile ualasou lexe Iesoni ka mi'unalai so ikaka­muline'i Polu ilou Sailasi. Xo imasaxa lexe ilaixi'a so ipilixine'i no avo'a tamitema latala noale ne.

⁶ Mikamuline'i ia ixalisi'a ilou uasi laso ane'i milaxine'i Iesoni oli'a talopala se'i mo mitulusi'a no laxune'i tatiatila so tuala. Mo mi'ava'ava lexe “Nenge telomusou sivo lexe tamitema se'i ilavusou ixixao mo ixalixu tu'utu'umaxu no xale tuatuala mukalusi. La ane'i a mixali no tualasinge 'o.

⁷ Xe Iesoni 'o mu'osasi'a mo mu'unalaixi'a no tasou. La nexi tavikala lamana lexe ane'i latala ne ixililiou lo noxou kingi noxinge Sisa. Xo ane'i ivikala lexe kingi vilela a uxoxolu, ualasou lexe Iesua.”

⁸ Xe ane'i tamitema latala oli'a tatiatilasi'a no tuala milomu axone la mitilatilanu anaxa'asou.

⁹ Mukalu laso tatiatila mi'oxo lexe Iesoniena ilotonu lakoti. Milotonu mukalu laso mi'italone'i so milai.

Polu ilou Sailasi misolonu xaixai noxi'a ne Velia

¹⁰ Xe mune'e xe no olovoxo, la tavivinge Mosinge ta'olu mipa­lusi'a Polu ilou Sailasi milai no tuala ne Velia. Ilou milutu xo xe no voxo loxo mixali la mi'unalai no tasou lavuloto noxi'a Taiuta.

¹¹ Ioxe, Tavelia ne ane'i loxo tamitema latala ne Tesalonaika uasi xo opone'i muloxu vaikalaou Mosinge. Xe loxo milomusou votovoto noxou Polu la opone'i mu'osasou. La voxovoxo utotomu ane'i mino'u lavukuou Mosinge mo mikilolo lexe votovoto noxou ne ulovou o uasi.

¹² Mi'oxo axone laso ane'i Taiuta tavu'alo milopala. Mo tamitema tatiatila noxi'a Takiliki tapiena milopala, tasema xe tamulu.

¹³ Xe mune'e la Taiuta so tuala ne Tesalonaika milomu lexe Polu muvotovotou Mosinge vaikalaou ne Velia. Milomu axone laso ane'i milutu milai no tuala ne mo mi'unanu tane'i noxi'a. Mo mi'avutinoxu opone'i Tavelia so ixililiie'i Polu ilou Sailasi kalumo.

¹⁴ Tu'umaxu ane a mu'avuti la alaxu vilesisi Mosinge ta'olu mipalusou Polu mulai no luaki. Ia Sailasi ilou Timoti a mixolu ne Velia sevileo.

¹⁵ Mosinge ta'olu mipalusou Polu, la se'i misaxanu. Misaxanu xo xe mixali no luaki la oli'a mitelo no lasipi so milai avile ne Atenisi. Milai mixali ne Atenisi xe ane'i ane misaxanu milivu, la Polu mukalanu vaikala noxi'a lexe Sailasi ilou Timoti ipalea ixali noxou.

Polu muvotovoto ne Atenisi

¹⁶ Ioxe, Polu muxolu la muxomai'a Sailasi ilou Timoti so ine'e noxou ne Atenisi. Muxolu ne la mumaisou tuala ne lexe mi'itinu ualasou momosi'a kalavoi mulolutu e mulolutu. No anu ngiou anene la anu mu'oxonu oponu tu'umaxu misevile.

¹⁷ Mumalei axone laso anu oponu mututulusi lexe uvo­tovoto. Laso anu mu'una'unalai no tasou lavuloto so upalasinoxu Mosinge vaikalaou noxi'a Taiuta xe noxi'a Takiliki ane mimama'u noxou Mosinge. Mo no anu voxo­voxo utotomu la mulai no loxomala no tanixu e tamitema milavusou ipita no anu. La anu mutovonu so upalasinoxu Mosinge vaikalaou noxi'a ta'ei mixolu ne.

¹⁸ Anu muxolu no loxomala ne la tami­tema so lavulavu se'i mine'e mitaxunu vaikalaou mo so oli'a ikolikoline'i ngato'o. Ane'i ne so laili Epikulia xe Sitoiki. Se'i mivikala lexe, “Ai, itema ano'o uvikala vuluvulusi ane.” Xe se'i mi'oxo lexe, “Anu masi u'itinu ualasou momosi'a tamitema so tuatuala se'i ane.” Ane'i mixovulaulau axone xo milomusou Polu uvotovotosou Iesua lexe Mosinge mu'umenu no anu soli. Milomusou axone ia tane'ilili no anu laxu.

¹⁹ Tane'ilili laso mino'u Polu milaixu noxi'a tatiatilasi'a so itilovosou vaikalaou. Tatiatila ne mipita no anu la'olu Aleopaxusi. Mixalixu noxi'a la ane'i mitali'isou lexe, “Votovoto alavua utotomu napilixunu 'o, nalulusou laixe noxixe.

²⁰ Nexi talomusou vaikalameni lexe iou vilemo manina, laso nexi tama­saxau talavusou laxu.”

²¹ Ane'i Ta'atenisi oli'a tamitema ta'ei mixolu no tuala ne, mi'oxonu mi vilela uasi, mixolu mi'ole'olesi so loxo vaikala ma'ia alavua uxali la mivulunu mivikalasousi.

²² Tatiatila mitali'isou Polu no la'olu Aleopaxusi axone, laso anu mutulu mo muvikala lexe, “Ngingi Ta'atenisi 'o, eni exixao no tualasinge la eni emaisou mimi ane nga'itinu lexe momosinge. Eni emalei lexe opongengi ututulu no anu mi nesi.

²³ Exixaoxao, la exali no tanixu so ngamaxa'u mama'u noxinge noxou mosinge vile. No anu tanixu ne eni emaisou kaukavu no anu lexe, 'Ano'o so mosinge ane talavusou uasi.' Ioxe, Mosinge ane nga'oxo lexe ngalavusou uasi, anusi ane apalasinoxu noxinge 'oe.

²⁴ Mosinge anu ane mukoikoinu lialia ilou temanu ne anu anusisi Tatananu loxotolo ilou lialia. Anu a uxoxolu no tatani ane tamitema mi'oxonu uasi.

²⁵ Nenge tamitema ta'oxonu mi vile so tasu'ulinu no avonge uasi. Xo axova, anu umasaxau mi vile noxinge tamitema? E uasi. Anu molu ulosinge mauli mo taunenge mo mimi mukalusi.

²⁶ Xo noxou itema vilesisi, anu muxalinenge laili mukalusi. Anu molu mupilixinenge so taxolu no anu taninenge loxo no anu masaxa noxou. Mo anu molu usosovosou voxosinge.

²⁷ Anu muxalinenge axone xo anu oponu lexe takamulinu so nenge taxali lamana noxou mo so talavusou. Xo anu uxolu va'axu noxinge vilevilesi uasi, uxolu alaisi.

²⁸ Xo anu anusisi tava'u mauli. Mo anu molu ulosinge xavi so taxixao. Xoluxolu noxinge 'o ne anu molu noxousi. A loxo tamitema so lavulavu se'i noxinge menge milemolu lexe, 'Nenge ta'olu Mosingesi'.

²⁹ Laso loxo nenge ta'olu axone, la mamu so nenge taxavutala lexe Mosinge ne anu loxo lavo'o koli o siliva o lavo'o kaini axova. Anu loxo mi ane tamitema me'a i'oxonu no anu lavulavu noxi'asi uasi.

³⁰ Xo tatei la tamitema ilamana axone uasi la Mosinge iou muvaxaousi. Ia vaimomo 'o anu uvikala pakia'u lexe tamitema ixiunu opone'i mo i'isalilinoxu noxou.

³¹ Xo anu musosovosou voxo mukalu so tamitema latala no lialia 'o ikoti ili'i. Xe anu musosovosou Itema vile so uto­ngone'i tamitema mo utilovosi'a lexe ilixo noxi'a axova. Anu mumaxa'u noxinge latala lexe anu musosovosou Itema ena'ei no anu xaixai ne. Mumaxa'u no anu vote'i e so mutulusou mu'umenu no anu soli.”

³² Tatiatila milomusou vaikala ne so Mosinge mutulusou Iesua no anu soli, la se'i mimolo suku. Ia tose'i mivikala lexe, “Ai, ili'i la nexi temasaxa so talomusine navi­kalasou mi ano'ola.”

³³ Xe mukalu la Polu mulutu la muxexesi'a.

³⁴ Muxolu xo xe ili'i la ane'i se'i milopala mo mipita noxou Polu. Vile ualasou lexe Tionisiusi. Anu vile noxi'a tatiatila ane mipita no la'olu Aleopaxusi. Xe sema vile ualasie lexe Tamalisi xe ane'i se'ila milopala kalumo.