Ta'aposeli 16 - Ata New Testament

Timoti mupita noxi'a Polu ilou Sailasi so milai

¹ Ioxe, Polu ilou Sailasi milutu xo la mixali no tuala ne Tevi mo milai avile ne Lisitila. Xe no tuala ne la lopala vile a muxoxolu, ualasou lexe Timoti. Anu ne sema Iuta vile ilie xe momu so Kiliki. Nenu ne lopala vile kalumo.

² Ane'i tavi­vinge talopala ne Lisitila xe ne Aikoniamu milemolu ilixou lexe laixe.

³ Milemolu axone xe Polu mumasaxa lexe oli'a ilai. Ia tei la mu'oxo lexe i'oxo ilixo so ixotosou Timoti vasimolu. Mu'oxo axone xo muxavutala noxi'a Taiuta ane mixoxolu no anu apu ne. Xo aloxo 'o, ane'i Taiuta ne milavu lexe Timoti momu Kiliki mo ane'i i'oxonu ilixo ne no molomoloxu uasi.

⁴ Ioxe, ane'i milutu mimuamua'i milai no anu pitapita noxou Tatananenge no tuatuala. Milai la mivikala lamana lexe ta'aposeli oli'a tamitema so saxila'u ne Ielusalemo milovonixu tu'umaxu e muxali mala'o mukalu. Xe mipa­la'anixu mimi e mi'italonu noxi'a talopala noale'ale so imulinu.

⁵ Tatemanu pitapita milomu axone laso lopala noxi'a pakia'u mo ta'alavua mi'una noxi'a voxovoxo utotomu.

Polu muai musaxisou itema vile Masetonia

⁶ Poluena milutu mimuamua'i mixixao no xale lia ne Pilixia xe Xalesia. Xo ane'i la imasaxau ilai ne Esia polovinisi so ivotovoto, ia Ulenu Laixe mu'apixa'a.

⁷ Mixixao xo la mixali no pilixasou xale lia ne Misia la mimasaxau i'unalai ne Vitinia polovinisi ia Ulenu Iesua mu'apixa'ala.

⁸ Laso ane'i miua'u­lixu Misia xe milai avile ne Toloasi.

⁹ Mixali ne Toloasi xe no olovoxo la Polu muai musaxi. Muai la musaxi lexe itema vile so Masetonia polovinisi mutulu mu'ava noxou aloxo 'o, “Ngingi ngane'e noxixe ne Masetonia so ngasu'ulinexi.”

¹⁰ Polu musaxisou mi ne mukalu laso alaxu vilesisi nexi telalaxi so talai ne Masetonia. Xo nexi te'oxo lexe, “E uasi, Mosinge a u'avalinge so tavotovoto noxi'a.”

Sema so Pilipai, ane Litia, mixali lamana

¹¹ Ioxe, telutu ne Toloasi la lasipi muno'ixe telai avile ne Samotelesi. Xe no voxo loxo ne'ielala la telai texali ne Neapolisi.

¹² Telutu ne Neapolisi la temuamua'i telai texali avile ne Pilipai. Pilipai ne anu taoni ane tila no xale lia ne. Ane'i Talomu tapiena mitalupexa ne. Texali la texolu ne voxo se'i.

¹³ Texolu xe no Voxo so Ma'ila la tela no aitengaxu vimelusou tuala mo telai no lexa pa'umolu. Telai ne xo tekamulinu tanixu e Taiuta ipita so ivikala noxou Mosinge. Texali ne la tasema se'i mixolu mipita ne laso nexi tesoko'u so tavikala noxi'a.

¹⁴ La sema vile ualasie lexe Litia ane a mixolu milomusou vaikalamexi. Ane milavusou i'itinu Mosinge ualasou. Ane sema so tuala Taiataila mo ane milavusou isalimunu lavalava lauoinu so lailoto. Mixolu milomusou vaika­lamexi, xe Tatananenge mulama­nanixie la mi'osasou votovoto noxou Polu.

¹⁵ Milamana axone, laso ane oli'a tatemanu tasie mixalisou ilixo so kelele. Mukalu laso Litia mivikalanexi lexe, “Loxo ngatilovosilo lexe eni elopala manina noxou Tatananenge 'o laso ngane'e ngaxolu no tani noxilo.” Mivikala axone la miuolotetesi xo mole nexi telai.

Polu ilou Sailasi mikalavusu ne Pilipai

¹⁶ Xe mune'e la voxo vile nexi a temuamua'i so talai no tanixu e telavusou tavikala noxou Mosinge. Temuamua'i la texalisie sema vile ane mixolu so silevi noxi'a tatatanane. Xo aloxo 'o. Tamitema mine'e noxie sema ne so ane ivikala lexe mi ma'ia uxali noxi'a ili'i. Mi'oxonu axone xe milotone la tatatanane mixalisou lamoli tatila no anu anene. Ane ilemolu mi ma'ia uxali ili'i ne xo angelo masua muxolu noxie.

¹⁷ Texalisie laso ane mimulinexi noxi'a Poluena mo ane mi'ava'ava aloxo 'o, “Ai, tamitema ano'o tamitema so xaixai noxou Mosinge anu Mu'uli'uli. Ane'i ipela'ingexu vote'i so pamauli.”

¹⁸ La voxovoxo utotomu ane mi'ava'ava axone. Mi'ava'ava axone mune'e mune'e sila Polu oponu tu'umaxu laso anu muxiu muvikala noxou angelo masua ne lexe, “Eni apalusine no anu ualasou Iesua Kalaisiti lexe naxexesie sema ne mo nalai.” Sila alaxu vilesisi angelo masua muxe­xesie.

¹⁹ Ioxe, tatatanane milavu lexe vote'i so ixalisou lamoli ne mukalu laso ane'i mitetelisi'a Polu ilou Sailasi. Mitetelisi'a mo milaixi'a no loxomala so tatiatila no tuala ikotixa'a.

²⁰ Milaixi'a mitulusi'a no laxune'i tametisitileti la mivika­lane'i aloxo 'o. “Tamitema tamei 'o ane'i laili noxi'a Taiuta. Ane'i a mixaxalixu tu'utu'umaxu no tuala­singe 'o.

²¹ Mo ane'i ilou ilapunu xavutalai'a tamitema so imulinu ili'ilixo ane uxililiou lo noxinge nenge Talomu.”

²² La tamitema kalumo mine'ene'e mipita mito'o­me'a ilou no anu vaikala. Mito'ome'a no anu vaikala xo xe mukalu la tametisitileti ne mivika­lane'i tamitema so ixexenu lasiotii'a ilou mo ipuapuasi'a no anu maxei.

²³ Mipuapuasi'a e mi'okine'i manina mukalu laso mikala­vusune'i. Mikalavusune'i mukalu la tametisitileti mivikala pakia'u noxou itema so usaxila'u lakala­vusu lexe anu utuluxa'a laixe.

²⁴ Itema ne mulomuxu vaikala ne laso mumulaxa'a no ngiou upaila nonano avile. Mo anu mutakainanu tava'a no anu ovu mautunu tamei so imuamua'i uasi.

²⁵ Ioxe, no olovoxo lixinu la ilou mixolu mivivikala noxou Mosinge xe milexenu lexe so i'itinu ualasou. La ane'i takalavusu se'i ne mixolu milomusi'a.

²⁶ Mixolu mixolu sila uni'uni mukuni la mukunokunoxu tavatava'u tani ne. Mukunokunoxu laso aiaitengaxu mu'utupepesi mo seniseni misakine'i takalavusu no anu ne mululusi.

²⁷ Xe itema so usaxila'u lakalavusu mutulu xe mumalei lexe aiaitenga mukisi la mukalavoi lexe takalavusu mi'u­me'ume. Mukalavoi axone laso anu muno'u laviso so molu uvau no anu.

²⁸ Ia Polu mu'ava tatila lexe, “Navila'isine mamu, xo nexi a taxoxolu 'o.”

²⁹ Mosou lakalavusu mulomusou vaikalaou Polu laso anu mu'ava lexe evile ulexexu lalamo. Mukalu laso anu muiave mu'unalai no ngiou noxi'a Polu ilou Sailasi. Mu'unalai ne la mulapau no tava'a ilou la vasimolu mu'olo'olo kena.

³⁰ Mukalu la muno'a ilou milai noale la mutali'isi'a lexe, “Tatiatilao, vote'i so axalisou pamauli axova?”

³¹ La ane'i mikolinu lexe, “Nini nalopala noxou Tatananenge Iesuasi, laso Mosinge upamaulineni. Xe axone, la tatemanu tasine vote'isi'a kalumo.”

³² La ane'i ilou mivotovo noxou so vaikala laixe noxou Tatananenge xe mipitane'i tatemanu tasou mo mivotone'i kalumo.

³³ Anu olovoxo nesio, la anu tatila no anu lakalavusu mulaixi'a so mu'uinu xalexalevine'i e mipuasi'a ilou. Mu'uinu mukalu laso ane, ilou mi'oxonu ilixo so kelele noxou mo noxi'a laili noxou.

³⁴ Mukalu laso anu muno'a ilou mo mulaixi'a no tasou so mulosi'a la'ilali. La anu oli'a laili noxou mi'osa manina xo no voxo anenesi milopala noxou Mosinge.

³⁵ Xe mune'e no kakau laso tametisitileti mipalusi'a tapolisi mine'e noxou itema so usaxila'u lakalavusu mo mivikala aloxo 'o, “Ai, nini masi napilixine'i tatamei ne mo ilai.”

³⁶ La tatila no anu lakalavusu mulai muvikalanu Polu lexe, “Ane'i tametisitileti mikalanu vaikala mune'e lexe eni apilixi­ngengi ngilou so ngalai. Laso opongengi uai se'isisi mo ngalai.”

³⁷ Ia Polu muvikalane'i tapolisi lexe, “Ai, nexi noxou 'o Talomu a. Ia mei la tametisitileti ikotinexe laixe loxo no anu lo uasi. Mipuasixe vitanisi no ie'i tamitema latala mo mikalavusunexisi. Ia vaimomo 'o ane'i imasaxau so ipilixinexi se'isisi aloxo 'o? Uasi to! Ane'i me'a ine'e so ilanexi.”

³⁸ Polu muvikala axone laso tapolisi milaixu vaikalaou noxi'a tametisitileti. Milaixu xe ane'i olele milomu lexe ane'i ilou ne Talomu laso mi'ume.

³⁹ Mi'ume laso ane'i milai noxi'a no tasou lakalavusu so ilu'enu tane'i. Milai la me'a milane'i no lakalavusu mo milinga noxi'a lexe ixexesou tualasi'a ne.

⁴⁰ Ioxe, ilou milutu no tasou lakalavusu la milai no tasie Litia. Ilou milai xe tavivinge no anu lopala mipita la ilou milosi'a vaikala se'i so mi'oxonu pakia'a. Xe ili'i laso ane'i milutu so mixexesou tuala ne.