Ta'aposeli 14 - Ata New Testament

Polu ilou Vanavasi mivotovoto ne Aikoniamu

¹ Ioxe, Polu ilou Vanavasi milai mixali ne Aikoniamu la ilou mimulinu ilixo aloxo milavusou i'oxonu no tuatuala, ane'i milai no tasou lavuloto noxi'a Taiuta. Milai ne xe mivotovoto no anu xavi, la tamitema tavu'alo noxi'a Taiuta xe Takiliki, milopala.

² Ia se'i noxi'a Taiuta mixilili mo ilopala uasi. Xe mi'ou tane'i tamitema so noale'ale se'i mo so la'iaxa'ai'a tavivinge talopala ne.

³ Laso Polu ilou Vanavasi mixolu ne Aikoniamu maxuveni sevile mo ilou i'ume'a tamitema uasi, mivotosou Tatana­nengesi. La anu musu'uline'i so mi'oxonu sosovo so xavi iouiou xe tamitema mimaisou la tane'ililiou. Laso axone, la Tatananenge muvalaxu vaikalai'a so iaiama noxou lexe manina.

⁴ Ia no tuala ne tamitema mikalipala. Se'i opone'i vilesisi noxi'a tatiatilasi'a Taiuta so mixilili xe se'i ne mivalaxa'a ta'aposeli.

⁵ Xe mune'e la Taiuta oli'a tami­tema so noale'ale se'i milai noxi'a tatiatilasi'a. Milai noxi'a so ipitanu xavutalai'a so imasuane'i Polu ilou Vanavasi. Mi'oxo lexe ileaxa'a no anu lavolavo'o so ive'a isoli.

⁶ Ia ilou milomusou mi ane milalaxinu so i'oxonu noxi'a ne, sila ilou mi'ume milai no xale lia ne Likonia. Milai no tuala tamei no apu ne, vile ualasou lexe Lisitila xe vile ualasou lexe Tevi. Mo mixixao no xale lia ne avile.

⁷ Mixixao xe mixali no tuala aneva la ilou mivotovoto so a'alo laixesou Iesua.

Ilou mixaxai ne Lisitila xe ne Tevi

⁸ Ioxe ne Lisitila ne, itema vile tava'u musoisoli a muxoxolu. Tava'u musoisoli no mi ne nenu mivo'onu mole anu a mutalupexasi.

⁹ Itema ne a muxolu ulomusou Polu muvotovoto. Sila Polu muma­takisou mo mutongonu lexe anu a mulopala lexe loxo Mosinge umasaxau, la anu upamaulinusi.

¹⁰ Mutongonu axone laso anu mu'ava tatila lexe, “Nini natulu!” Sila alaxu vilesisi itema ne mutulu avile mo mumuamua'i.

¹¹ Xe tamitema latala ane mixolu ne mimaisou Polu mu'oxo axone la mi'ava'ava no anu vaikalai'a Talikonia lexe, “Tamomosinge mixali tamitema, mo ane'i a!”

¹² La milemolu Vanavasi ualasou lexe Susi. Xe Polu ne anu itema so vaikala laso milemolu lexe Elemesi.

¹³ La tasou mosi'a kalavoi Susi ne uxolu alai no tuala ne. Xe itema so usaxila'u tani ne muno'a takau se'i ilou xixi tava­tavalanu. Muno'u mo mune'e­nu no aitengaxu vimelusou tuala ne. Mu'oxo axone xo oli'a tami­tema mimasaxau i'oxonu ilixo so navu so i'itinu ualasi'a ta'aposeli tamei ne.

¹⁴ Ia ta'aposeli Vanavasi ilou Polu milomusou mi anene la mikuluke mo miteanu mimii'a so imaxa'u lexe opone'i tu'umaxu. Ilou miiave mi'una no taitaine'i tamitema xe mi'ava'ava lexe,

¹⁵ “Ai tami­temao, loxova so nga'oxonu mi ane xo ne? Nexi 'o nexi tami­temasi, nenge nenge'a ienge vilesisi. Nexi noxou tene'e so taa'alomengixu vaikala laixesi mo so ngapilixinu ili'ilixo vuluvulusi aloxo nga'oxonu 'o. Ngapilixinu mo ngaxiungengi noxou Mosinge ane anusisi a uxoxolusi. Anu Mosinge ane mu'oxonu loxotolo ilou lialia xe luaki oli'a tatemanu.

¹⁶ Tatei la anu mupilixine'i tamitema no xale tuatuala so mixolu no anu xavutala na'asi.

¹⁷ Ia anu utalumenenge uasi manina. Anu upala'anixu no anu mimi ane mumulaxu so usoso­vosou. Anu mumaxa'u sexela noxou xo anu ulosinge uali molu no loxotolo xe u'oxonu mimi uleme mo uxali no anu tautaunu. Xe anu u'itinenge la'ilali mo u'oxonu oponenge u'osa.”

¹⁸ Ilou milemolu vaikala anene ia ialuxu noxi'a so ixiunu tamitema opone'i. Ane'i pakia'asi lexe i'oxonu ilixo so navu so i'itinu ualasi'a ilou.

¹⁹ Ioxe mune'e la Taiuta se'i me'a ne Anitioki xe ne Aikoniamu mixali ne Lisitila ne. Ane'i mixali la mi'unanu tane'i noxi'a tatemanu tuala ne so ixililie'i Poluena. Mixililiie'i sila mivavau no lavolavo'o xe milavenu vasimolu milaixu no utu xo mikalavoi lexe musoli.

²⁰ Ia talopala se'i mine'e mixalilixu Polu la anu mutulu mumauli mo mulivu mu'unalai no tuala. Xe loxo ne'iela la ilou Vanavasi milutu so ilai no tuala ne Tevi.

Ilou milivu milai ne Anitioki ne Silia

²¹ Ioxe, ilou mixali ne Tevi la mia'aloxu vaikala laixe noxou Tatananenge noxi'a tamitema. Mia'aloxu la tamitema tavu'alo milopala. Xe ili'i la ilou milivu milai ne Lisitila xe ne Aikoniamu xe ne Anitioki.

²² Ilou milivu no tuatuala ne so i'oxonu pakia'a talopala. Mipelototosi'a lexe, “Ngingi masi ngaxolu pakia'inge no anu lopalasi. Xo nenge'a ane so ta'una taxolu no voxo loxo Mosinge molu u'uli laxune'i tamitemaou, ia no vote'isou 'o la tatavulenu tu'umaxusou tavu'alo.”

²³ Mo ilou misosovosi'a tamitema so saxila'u no anu pita vilevilesi. Xe ilou opone'i mutulu so ivikalasi'a talopala noxou Mosinge mole i'ani uasisi. Mipilixine'i noxou Tatananengesi xo milopala noxousi.

²⁴ Ioxe, ilou milivu la mipolo no anu tuatuala ane tei mine'e no anu no xale lia ne Pisitia xe ne Pamivilia.

²⁵ Milai milai xo la mixali ne Pexa la mivotovoto nela. Xe milutula, la mixali ne Atalia.

²⁶ Mixali ne Atalia xe mitelo no lasipi la milai mixali avile ne Anitioki. Anitioki e talopala mi'italone'i noxou Mosinge mala'o no anu xaixai ane mi'oxonu ne.

²⁷ Ilou mixali mukalu la mipitane'i talopala so mia'aloi'a no anu muamua'i noxi'a. La mipala'anixu noxi'a lexe, “Ai, Mosinge mu'oxonu vote'isi'a tamitema noale'ale so ilopala kalumo.”

²⁸ La ilou mixolu noxi'a talopala ne Anitioki maxuveni sevile.