Ta'aposeli 13 - Ata New Testament

Misosovosi'a Sauli ilou Vanavasi so ixixaou ivotovoto

¹ Ioxe, no anu pita noxou Tatananenge ne Anitioki ne tamitema so pela'a xe tatisa so votovoto se'i a mixoxolu. Ualaua­lasi'a aloxo 'o. Vanavasi xe Simioni ualasou vilela lexe Nixeli xe Lusiusi so tuala Sailini xe Sauli xe Manaini. Manaini ne anu menexu itema tila no anu xamani so xale lia ne, ualasou lexe Eloti.

² No voxo vile la tamitema no anu pita ne mixolu so ivikala noxou Mosinge. Opone'i mutulu no anu anene la mixolu maxuveni mo i'ani uasi. Ane'i a ivikala noxou Mosinge sila Ulenu Laixe upala'anixu noxi'a lexe, “Ningi ngatulusi'a Vanavasi ilou Sauli no anu xaixai vile esosovosi'a no anu.”

³ Laso ane'i mixolu mixolu i'ani uasi, mivikala noxou Mosingesi. Mixolu xo la mimulaxu avo'a no kisi'a ilou so lexe ipilixine'i noxou Mosinge no anu xaixai noxi'a ne. Mukalu laso mipalusi'a milai.

Vanavasi ilou Sauli mivotovoto ne Saipilasi

⁴ Ioxe, ilou milutu la Ulenu Laixe mupamuxane'i so ilou milai no tuala ne Selusia. Mixali ne Selusia la mitelo no lasipi so ilou milai no ailani vile no luaki ne Saipilasi.

⁵ Ilou mixali no ailani Saipilasi la mi'unalai no tuala vile ne Salamisi. Ilou milai no tasou lavuloto noxi'a Taiuta so mia'aloxu vaikala laixe noxou Mosinge. La itema e ualasou lexe Tioni Maki ne anu oli'a so musu'uline'i no anu xaixai noxi'a.

⁶ La ane'i ilou mixixaosou ailani Saipilasi ne avile. Mixixao xo la mixali no tuala ne Pavosi. No tuala ne ane'i ilou mixalisou Iuta vile ualasou lexe Vaiesusi. Anu itema so u'oxonu sa iouiou mo anu polopeti kalavoi.

⁷ Anu utotomu muvaitami noxou tatila vile no anu xamani ualasou lexe Sexusi Paulusu. Itema tila ne anu itema vile so lavulavu laso anu mu'avali'a Vanavasi ilou Sauli so ine'e noxou xo anu mumasaxau ulomusou vaikalaou Mosinge.

⁸ Mu'avali'a ia menexu e Vaiesusi ne anu muxilili'a Vanavasi ilou Sauli xo anu umasaxa so tatila no anu xamani ne ulopala noxou Iesua uasi. Vaiesusi ne anu ualasou vilela lexe Elimasi xo anu uala ne laxu lexe itema so sa iouiou.

⁹ Ia Ulenu Laixe mupamuxanu Sauli e ualasou vilela lexe Polu. Ulenu Laixe a mupamupamuxanu laso anu mumatakisou Elimasi mo muvikala lexe,

¹⁰ “Nini Uluaou olu to! Nini naxililiou mimi ane laixe mukalusi. Nini namulinu ilixo so kalavoi mo ilixo masuma­sua. Mo utotomu nini na'oxonu loloxa'a tamitema so ilomusou Mosinge vaikalaou uasi.

¹¹ Laso nalomu. Alala'e 'osi Mosinge u'italonu avolu noxine mo ulosine tu'umaxu so ieni isivoxo mo voxo mose'i namisou lamanaxu aso uasi.” Sila alaxu vilesisi iou isivoxo mo umaleila ua'. Laso anu muvava'o so ukakamulinu evile so lexe utila'u.

¹² Xe itema tila no anu xamani mumaisou mi ne lexe xavinu musuku laso anu mulopala xo mukulukemolu mo mu'osasou vaikalasou Tatananenge.

Vanavasi ilou Polu milai no tuala Anitioki no xale lia ne Pisitia

¹³ Ioxe, Poluena milutu no tuala ne Pavosi la lasipi muno'a milai no tuala Pexa e no xale lia ne Pamivilia. Mixali ne Pamivilia la Tioni Maki mupilixine'i ane so mulivu mulai ne Ielusalemo.

¹⁴ Ia ane'i ilou milutu ne Pexa la milai xo la mixali no tuala vile milemolu lexe Anitioki kalumo. Tuala Ani­tioki 'o a muxolu no xale lia ne Pisitia. Mixali xe no anu Voxo so Ma'ila la ilou mi'unalai no tasou lavuloto noxi'a Taiuta mo mitalu­pexa nonano.

¹⁵ Ane'i tatiatila no anu tasou lavuloto ne mi'itisou pa'usou no anu lo e Mosisi mukau­kavunu tatei xe vaikalai'a tapolo­peti. Mukalu la mitali'isi'a ilou lexe, “Tavivixe, loxo ngilou pelo­toto vile so ngapilixinu noxi'a tamotu 'o, la ngalemolusi.”

¹⁶ Ioxe, Polu mutulu la mutolosou avolu so lexe uvikala. La anu muvikala aloxo 'o, “Ngingi Ta'isi­laeli xe ngingi se'io, ngingi ane ngamama'u noxou Mosinge, ngalo­mu laixe.

¹⁷ Mosinge e Mosi'a Ta'isilaeli musosovosi'a ta'ilusu­nenge lexe tamitemaou mu'isalili. Xe ane'i mi'umesou tualasi'a mo milai mixolu ne Isipi. Mixolu ia anu molu mu'oxone'i laixe mo mixali tapiena e tapiena. Xe ili'i la anu molu mulane'i no xale lia ne no anu xavi noxousi.

¹⁸ Mo no anu tau ie 40 e mixixao no xale lia vitanisi la anu mutavulenu tu'uma­xusi'a.

¹⁹ Mulivunixi'a no xale lia ne Kenani, la anu mumasuane'i tatemanu. Tatemanu ne ane'i toki­pelesii'a 7. Mumasuane'i tatemanu mukalu la mu'italonu xale lia ne noxi'a Ta'isilaeli mu'isalili.

²⁰ Ioxe, mimi anene mukalusou tau ie 450. Mukalu xe ili'i la Mosinge mutu­lusi'a Tatiasi so isaxila'a Ta'isilaeli mulai mulai avile muxali noxou polopeti Samueli.

²¹ Ioxe, no voxo loxo Samueli muxolu la ane'i milinga so Mosinge utulusou kingii'a vile. Milinga noxou axone la anu musosovosou Sauli e Kisi olu no anu laili noxou Peniamini. La anu mukingi tau iexu 40.

²² Ia Mosinge mukusaou Sauli no anu tanixu kingi mo mutulusou Teviti so lakolisou. La anu muvikalasou Teviti aloxo 'o, 'Eni etongonu Teviti e Iesi olu lexe nexi noxou oponexi vilesisi. Anu umulinu masaxa noxilo mukalusi.'”

²³ La Polu musolonu vaikalaou aloxo 'ola, “No anu laili noxou Teviti ne la Mosinge muxalixu itema vile mune'e noxi'a Ta'isilaeli. Itema ne anu Itema so Pamauli Iesua e Mosinge muvavalimasou tatei.

²⁴ Ioxe, no voxo loxo Iesua upala'a uao, la Tioni muvotovoto tei noxi'a Ta'isilaeli. Muvotovoto lexe ixiunu opone'i mo i'isalilinoxu so susu noxi'a xe i'oxonu ilixo so lexa.

²⁵ Mune'e mune'e xo xe Tioni so ukalusou xaixai noxoui, la anu muvikalane'i tamitema aloxo 'o, 'Xo ngingi ngaxavutala lexe eni ena'ei? Eni itema ane ngingi ngaxoxomaiou uasi. Uasi manina. Xo aloxo 'o, ili'i la itema anene une'e. Ia eni amitema alaixe so alulusou lamotasou lasuou uasi mo a'oxonu xaixai vile noxou uasi, eni amitema vitanisi.'”

²⁶ La Polu muvikalala lexe, “Tavivilo, ngingi laili noxou Apala'amu xe ngingi tamitema so noale'ale ane ngamama'u noxou Mosinge, ngalomu. Vaikala so pamauli ano'o muxali noxinge nenge'a.

²⁷ Xo Taielusalemo oli'a tatiatilasi'a, ane'i ilamana uasi noxou Iesua lexe anu itema e tapolopeti milemolu. Ia no voxo loxo mivau la ane'i me'a mixalixu nene'axu vaikalai'a tapolopeti e ane'i utotomu i'itisou no anu Voxovoxo so Ma'ila.

²⁸ Ixalisou susu vile noxou so ikotixu mo ivauxu uasi ia ane'i mi'italonu no avolu Pailati so lexe uvau usolisi.

²⁹ Ioxe, ane'i mixalixu nene'axu vaikalai'a tapolopeti loxo milemo­lusou mukalusi, laso milu'enu no anu ovu valautu. Milu'enu no ovu valautu mukalu la milai mimulaxu no lulu.

³⁰ Ia Mosinge mutulusou mu'umenu no anu soli.

³¹ Mo ili'i no anu soli noxou voxo tapiena ane'i tamitema se'i mimaisou. Tamitema ne ane'i tamenexu e oli'a milutu ne Xalili milai ne Ielusa­lemo tatei. Vaimomo 'o nexi noxi'a tamitema ne taa'aloxu noxi'a laili noxixe Ta'isilaeli xo nexi mexe temaisou no iexisi.

³² Mo nexi talemolu a'alo laixe aloxo 'o. Mosinge muxalixu nene'axu vava­lima e mu'oxonu noxi'a ta'ilusunexi Ta'isilaeli tatei mukalu 'oe.

³³ Muxalixu nene'axu noxixe ta'ilusune'i vaimomo 'o no anu mi e so mutulusou Iesua no anu soli. Vaikalasou mi ne a uxolu no anu Lexelexe mautunu tamei. Uvikala aloxo 'o, 'Nini alixeli, vaimomo 'o asosovosine lexe eni amamine'.

³⁴ Mosinge mu'umenu no anu soli mo u'ui no lamatimati uasi. Anu muxali loxo Mosinge mulemolu no anaxu polopeti vile tatei lexe, 'Vaikala laixe mo manina so xoluxolu noxou Teviti la axalixu nene'axu noxine.'

³⁵ Xo no anu Lexelexe vile la anu uvikala aloxo 'ola, 'Nini na'italonu Itemameni Malemalenga so u'ui no lamatimati uasi.'

³⁶ Teviti muvikala axone, ia anu uvikalasou anu molu uasi. Xo nenge talavu lexe anu mumulinu masaxa noxou Mosinge no taine'i tamenexu xo xe mukalu, la musoli. Musoli xe mi'asixu no lamati­matisi'a ta'ilusunu la vasimolu mu'ui nesi.

³⁷ Ia itema ane Mosinge mutulusou mu'umenu no anu soli ne, vasimolu u'ui uasi.

³⁸ Laso maixene tavivilo, nexi tapela'inge mo so ngalavu laixe lexe Iesua anusisi vote'i so tina'ungenge so susu ukalu.

³⁹ Xo lo noxou Mosisi ne anu umomomo uasi manina so uiasou susu mo uxalixinge malemalenge no iou Mosinge. Ia ane'i ane ilopala noxou Iesuasi la susu noxi'a uiasi mo Mosinge umoxo'a lexe ane'i tamalemalenga no iou ane.

⁴⁰ Laso ngingi ngalaxa'i laixe xo mi ane tapolopeti milemolu tatei ne anu masi uxali noxinge. Ane'i milemolu vaikalaou Mosinge aloxo 'o,

⁴¹ 'Ngingi tamitema ane ngamolo sukusou vaikala manina, ngingi masi tangengilili mo ngakuluke loxo 'o, sila ngamamulo. Xo no anu voxo so ngaxoxolusio la eni axalixu xaixai vile iou vilemo manina. Mo loxo evile ua'alome­ngixu la umomomo so opongengi ukasou lexe manina uasi.'

⁴² Ioxe, Polu muvotone'i mukalu la tamitema milala no anu tasou lavuloto. Milala sila tamitema mivikala noxi'a ilou lexe no anu Voxo so Ma'ila u'uli 'o la ilou ilivu ine'e so ia'aloi'ala.

⁴³ Xe tamotu mixexesou tasou lavuloto mukalu la ane'i tapiena mimuline'i Polu ilou Vanavasi no vote'i. Ane'i ane mimuline'i ne, ane'i se'i Taiuta xe se'i tamitema noale'ale ane mila­vusou mi'itinu Mosinge ualasou no anu ilixo noxi'a Taiuta. Mimuli­muline'i la ilou mipeloto­tosi'a lexe opone'i utulu no anu iaiama noxou Mosingesi.

⁴⁴ Xe mune'e la Voxo so Ma'ila a muxalila la tamitema latala no taoni ne mipita so ilomusou vaikalaou Tatananenge.

⁴⁵ Ia tatia­tila noxi'a Taiuta mimaisi'a tami­tema lexe ane'i latala mipita axone la ane'i mi'isu. Mi'isu mo mivikala masua so ixililiou vaikalaou Polu.

⁴⁶ La Polu ilou Vanavasi mivikala pakia'u noxi'a tatiatila ne aloxo 'o, “Anu masaxa noxou Mosinge so nexi tapala'anixu vaikala laixe ano'o noxinge ngingi Taiuta tei. Ia ngingi a ngaxiunu tumalinge no anu vaikala ano'o mo ngingi menge ngemaxa'u lexe xoluxolu kaluxu uasi 'o la opongengi uxililousi. Laso ngingi ngalomu, vaimomo 'o nexi noxou taa'alomengila uasi. Nexi tapala'anixu vaikala laixe ano'o noxi'a tamitema noale'alesi.

⁴⁷ Xo mi ane Tatananexi mupalu­sixexu anesi. Xo muvikala no anu anaxu polopetiou tatei lexe, 'Eni exalixinge loxo lalamo noxi'a tamitema noale'ale. Ngingi ngalai­lai no xale tuatuala no lialia mukalusi so ngalosoie'ixu vote'i so pamauli noxilo.'”

⁴⁸ Ioxe, tamitema noale'ale loxo milomusou vaikala anene la mi'osa manina mo opone'i mukasou vaikalaou Polu. Xe ane'i ta'ei Mosinge musosovosi'a lexe ixalisou xoluxolu kaluxu uasi la milopala.

⁴⁹ La vaikalaou Tatananenge muia­veiave no tuatuala no xale lia ne.

⁵⁰ Ia Taiuta se'i mi'avutinoxu opone'i tasema Taiuta tatiatila ane opone'i mututulu no anu ili'ilixo so lavuloto noxou Mosinge. Xe mi'avutinoxu tatiatila no tuala ne kalumo. Mi'avutinoxu opone'i tami­tema axone laso ane'i misoko'u so ivikalasi'a Polu ilou Vanavasi masua. Mivikalasi'a masua xo xe mukalu la mikusai'a no xale lia noxi'a ne.

⁵¹ Mikusai'a laso ilou mipupanu tava'a so liasou xale lia ne upei. Ane'i mi'oxo axone so isosovo lexe i'italone'i tamitema anene no anu ilixo masua noxi'asi. Mipupanu tava'a mukalu laso milutu milai no anu tuala ne Aiko­niamu.

⁵² Ia Ulenu Laixe mupamu­xane'i tamitema ane milomuxu vaikalai'a ilou ka milopala noxou Iesua, mo ane'i mixolu mi'osa manina.