Ta'aposeli 12 - Ata New Testament

Eloti muvau Tiemisi musoli xe mukalavusunu Pita

¹ No voxo anene la Kingi Eloti mukalavusune'i tamitema se'i no anu pita noxou Tatananenge so ulosi'a tu'umaxu.

² Mo anu muvi­kala laso tamitemaou mivau Tiemisi e Tioni vimou musoli. Ane'i mivau no anu laviso so oto.

³ La Eloti mumalei lexe Taiuta mi'osasou mi anene laso anu mutetelisou Pita kalumo. Anu mutetelisou no anu voxosou lavilelu so Pileti Isitisou Uasi.

⁴ Mutetelisou Pita mo mumulaxu no tasou lakalavusu ka mupilixinu no avo'a tamitami'a no anu laili tami'a noxi'a ta'ami. Mo ane'i mikolikoline'i so mituluxu Pita. Anu Eloti mulalaxinu oponu lexe no anu voxosou lavilelu so Mualasi'a ukalu la anu utulusou Pita no laxune'i tamitema latala no lakoti.

⁵ Laso Pita a muxoxolu no tasou lakalavusu mo ta'ami mixolu so ituluxu ia tatemanu pita opone'i mututulu so ipilipilixinu noxou Mosingesi.

Angelo vile mulanu Pita no tasou lakalavusu

⁶ Ioxe, Eloti musosovosou voxo so itulusou Pita no lakoti loxo ne'iela no kakau. Ia olovoxosio, la Pita muai no taine'i ta'ami tamei. Muai la ane'i misakinu no anu seni aini tamei xe ta'ami tamei a mixolu milo no anu aitengaxu lakalavusu kalumo.

⁷ Anu muai sila angelou Tatananenge mupa la lamana muka no ngiou ne. Xe angelo muvau se no alamanu so mutulusou la muvikala lexe, “Ai, napalea natulu.” Sila alaxu vilesisi seni mululu noxou Pita avolu mo mulapau.

⁸ Mukalu la angelo muvikalanu lexe, “Nasakinu laleti­meni mo natanu lasu.” Pita mu'o­xonu mukalu la angelo muvikala lexe, “Natanu lasiotimeni veveni ka namulileli.”

⁹ Laso Pita mumu­linu mula no ngiou so lakalavusu ne. Mula ia anu ulavu uasi lexe mi ane angelo mu'oxonu ne manina, mukalavoi lexe muai musaxisi ane.

¹⁰ Ane'i ilou mimuamua'i milai mo mipolope­pene'i ta'ami tamei ane milo no aitenga. Milai xo la mixali no aitenga aini ane musaxi mulai loxo no tuala. Mixali no aitenga ne la anu molu mukisisi laso ilou miuatu. Miuatu xe mimulinu vote'i vile la mixali no telexu, sila alaxu vilesisi angelo mu'umesou Pita.

¹¹ Ioxe, mu'umesou Pita la xavu­talaou Pita mupalea mulamana laso mukuluke mo muvikala lexe, “Ai, eni alavu mukalu. Alala'e se'o Mosinge mupalusou angelou ane mune'e so mu'umeleli no avolu Eloti. Mo aloxo 'o la masaxa noxi'a Taiuta so lexe i'oxonu mi ma'ia noxilo ne ulapau vitanisi.”

¹² Mula­mana axone mukalu la mulai muxali no tasie Malia e Tioni nenu. Tioni ne ualasou vilela lexe Maki. No tani ne talopala tapiena mipita mo ane'i a ivivikala noxou Mosinge.

¹³ Pita muxali no aitenga la mupolopolo. xe sema so xaixai no tani ne ualasie lexe Lota mine'e so lexe ikisinu aitenga.

¹⁴ Mine'e no aitenga xe milomusou Pita xolinu noale la opone mu'osa manina mole ikisinu aitenga to uasi. Miiave milivu nonano no tani la mi'ava noxi'a tamitema lexe, “Ai, Pita a no aitenga 'o!”

¹⁵ La tamitema mivi­ka­lane lexe, “Kalavoi, naxovu­laulau mane.” Ia ane miuolotete mo mivikala lexe, “Uasi, anu a noale!” La ane'i mi'oxo lexe, “Masi angelou ane.”

¹⁶ Ia Pita upolopolo no aitengasio. Upolopolo upolopolo xo xe ane'i mikisinu aitenga xe mimaisou Pita, sila mikuluke.

¹⁷ La Pita mulosi no avolu lexe ixolu tasiau. Mukalu la mua'alo no anu mi ane Tatananenge mu'oxonu noxou so mulanu no tasou lakalavusu. La anu muvikalane'i lexe, “Nga'aloi'a Tiemisi oli'a tavivinge so mimi 'o.” Muvikalane'i xe mukalu la anu mulutu mulai no apu vile.

¹⁸ Ioxe, no kakau la ta'ami mimalei lexe Pita uxolu uasi la mikuluke manina mo tane'ilili lexe mi ma'ia muxali noxou.

¹⁹ Xe Eloti mulomu lexe Pita mu'ume laso mupalusi'a se'i so ikamulinu, ia ixalisou uasi. Laso anu mukaikaitolone'i ta'ami ane miloxu Pita mo mutali'isi'a lexe mi ne muxali aloxova. Mutali'isi'a xo xe mukalu la anu mupalusi'a se'i so mive'a ta'ami ne misoli. Mukalu la Eloti mulutu ne Iutea so mulai ne Sisalia mo muxolu ne sevile.

Eloti musoli

²⁰ Kingi Eloti ne oli'a tatemanu tuala ne Taili xe Saitoni mipelesou anaxa'a mo tu'umaxu muxolu no taine'i. Laso ane'i tatiatila so tuala tamei ne mipita so ilai ivikala noxou Eloti. Ane'i mimasaxau lexe tu'umaxu ne ukalu xo ane'i milavusou ino'u xa'a la'ilali no xale lia noxou Eloti. Ane'i mivikala tei noxou Valasitusi so uvalaxu vaikalai'a. Valasitusi ne anu itema tila no anu tasou kingi xo anu musaxila'u ngiou so ai'ai noxou. Mivikala noxou Valasitusi mukalu laso mikalanu vaikala mulai noxou Eloti lexe ipita so isolixu tu'umaxu anene.

²¹ Ioxe, Eloti musosovosou voxo vile so oli'a ipita. No voxo anene la mutokolomo no anu lavulutiou kingi mo mutalupexa no anu sia noxi'a takingi. Mutalupexa mo mu'uli laxune'i tamitema no anu vaikala.

²² Tamitema milomusou vaikalaou mukalu la mi'ava lexe, “Anu 'o xolinu loxo itema uasi, xolinu Mosingesi.”

²³ Xe Eloti mulomusou vaikalai'a la anu mu'osasou mo mu'itinu no anu. Anu uvikalane'i tamitema lexe i'itinu Mosinge ualasousi uasi. Sila alaxu vilesisi angelou Mosinge muvau mo siki toxoxu muxalisou. Mo tasineke kitukitu mi'ou la musoli avile.

²⁴ Ia vaikalaou Mosinge xavinu mo musukusuku no xalexale tua­tuala.

²⁵ Xe Vanavasi ilou Sauli mikalusou xaixai noxi'a ne Ielusalemo la oli'a Tioni Maki milivu milai ne Anitioki.