Ta'aposeli 11 - Ata New Testament

Pita mulivu ne Ielusalemo so ua'aloi'a talopala

¹ Ioxe, ta'aposeli oli'a tavimovimo'a no anu lopala so tuatuala ne Iutea milomu lexe tamitema noale'ale kalumo a milomuxu vaikalaou Mosinge.

² Milomu axone laso no voxo loxo Pita mulai ne Ielusalemo la talopala Taiuta ane opone'i mututuluou ilixo so ixotosou vasime'a la milavixu lexe,

³ “Ai, tamitema ne ilavusou ixotosou vasime'a uasi, loxova so ne'una no tasi'a so ngoli'a nge'ani?”

⁴ Pita mukoline'i la mua'aloi'a no anu mimi kitukitu ane muxali noxou.

⁵ Mua'aloi'a aloxo 'o. “Eni exolu ne Iopa xe voxo vile la exolu evivikala noxou Mosinge. Evivikala sila emaisou mi vile loxo eai esaxi. La emaisou mi vile loxo lavalava toxoxu mulu'e no loxotolo. Lavalava ne mi vile mutetelisou no anu susunu tami'a, mo mulili mulu'e noxilo.

⁶ Ieli mu'una nonano la emaisi'a tamisoposi tatemene xe tavova xe tangiala xe tasineke iouiou.

⁷ Emalei axone la elomusou xolinu vile muvikalaleli lexe, 'Pitao, na'avuti nave'a se'i mo na'ani.'

⁸ Ia eni evikala lexe, 'Tatanaleli, uasi to! Eni mi vile masua o nuni'u u'una no anaxo uasi.'

⁹ Ia xoli mulu'e no loxotolo alaxu tameisou lexe, 'Mi ane Mosinge muxalixu malemalenga, la nini namoxo'u lexe anu nuni'u mamu.'

¹⁰ Mi anene muxali alaxu tatalu. Muxali alaxu tatalusoui, sila alaxu vilesisi mi ne mulivu teitexi no loxotolo.

¹¹ Ioxe, a mulivu mutetelai la tamitema tatalu mixali no tani. Tilasi'a mupalusi'a me'a ne Sisalia mine'e'ilo so lexe alai noxou.

¹² Mivikalaleli axone la eni talelilili ia Ulenu muvikalaleli lexe, 'Naxavutala uasi, nalaisi.' La ane'i tavivinge 6 'o ane'i kalumo noxi'a telai. Telai xo la te'unalai no tasou itema e mu'avalilo ne.

¹³ Te'unalai laso anu mua'alomexi so mumaisou angelo vile mupa noxou no tani ne. Angelo mupa la muvikalanu lexe upalusi'a tavoiou i'avalilo ne Iopa.

¹⁴ La angelo muvikalanu lexe eni alanu votovoto se'i mo no anu votovoto anenesi la anu oli'a taminuminu ixalisou pamauli.

¹⁵ Ioxe, itema mu'avalilo ne mua'alo mukalu laso eni esoko'u so evotovoto. Eni a avotovotosio la Ulenu Laixe muxali noxi'a a loxo muxali noxinge tei manina.

¹⁶ Laso eni exavutalanu vaikalaou Tatananenge mulemolu lexe, 'Tioni mukelenixa'a tamitema no lexa, ia Mosinge molu ukeleningenge noxou Ulenu Laixe so anu uxolu noxinge.'

¹⁷ Laso emaisou lexe Mosinge muiti'a mi laixe iou vilesisi loxo muitimenge Taiuta no voxo loxo telopala noxou Tatana­nenge Iesua Kalaisiti. Laso eni a'apixu mi ane Mosinge mu'oxonu noxi'a axova? Eni amitema tosi.”

¹⁸ Taiuta talopala ne milomusou vaikalaou Pita laso ane'i opone'i lelemesou mo ivikala mi vilela uasi. Ane'i mi'itinu Mosinge ualasou mo mivikala lexe, “Ai vaimomo 'o nenge talamana. Mosinge mu'oxonu vote'i so tamitema noale'ale kalumo loxo ixali lamana no anu susu noxi'a la ixalisou pamauli.”

Pita noxou Tatananenge muxali ne Anitioki

¹⁹ Ioxe, mala'o no voxo loxo mivau Sitiveni musoli la talopala mixalisou tu'umaxu kaio mipa­xelele milai no xale tuatuala. Se'i milai nopaxapaxa mo mixali avile ne Vonisia xe ne Saipilasi xe ne Anitioki. Ane'i milailai la mivo­tone'i Taiutasi.

²⁰ Ia se'i no taine'i ane'i tamitema so xale lia ne Saipilasi xe so tuala Sailini, ane'i kalumo milai ne Anitioki. Milai la misoko'u so mivotovoto noxi'a Takiliki kalumo. Mivotovoto no anu a'alo laixe so Tatananenge Iesua.

²¹ Mivotovoto la xavi noxou Tatananenge muxolu noxi'a. Laso ane'i tamitema tavu'alo mixiunu opone'i mo mi'isalilinoxu xe milopala noxou Tatananenge.

²² Ioxe, tatemanu pita ne Ielusa­lemo milomusou a'alosou mi ne laso mipalusou Vanavasi mulai ne Anitioki.

²³ Vanavasi mulutu xo xe muxali la mumalei lexe nene'axu iaiama noxou Mosinge muxali noxi'a Ta'anitioki. Mumalei axone la anu mu'osa misevile mo mupelototosi'a talopala ne lexe ane'i masi opone'i ututulu noxou Tatananengesi.

²⁴ Anu Vanavasi ne anu itema laixe mo Ulenu Laixe mupamuxanusi mo loxo mi ma'ia uxali la mulopalasi. Anu itema axone laso loxo muvotovoto la tamitema milomuxu mo milopala noxou Tatananenge.

²⁵ Vanavasi muxolu ne Anitioki xo xe mukalu la mulutu mulai ne Tasusi so mukamulinu Sauli.

²⁶ Mulai mukamulinu Sauli xo xe muxalisoui laso ilou milivu ne Anitioki. La ilou mixolu tau ie vile loloni. Ilou mixolu la utotomu mipita no anu pita noxou Tatana­nenge ne Anitioki mo mivotone'i tamitema tavu'alo e tavu'alo. La no tuala anene anu tei manina noxi'a so tamitema mimo­xo'a talopala lexe “tamitemaou Kalaisiti”.

²⁷ Ioxe, no voxo anene la tamitema so pela'a se'i me'a ne Ielusalemo mixali ne Anitioki.

²⁸ Anu itema vile noxi'a ualasou lexe Axavusi mutulu mo muvikala no anu xavi noxou Ulenu Laixe. Muvikala mupela'a lexe vitolo toxoxu uxali ili'i no xale tuatuala mukalusi. Nene'axu vaikalaou muxali ili'i no voxo loxo kingi vile noxi'a Talomu ualasou lexe Kalautiusi muxolu.

²⁹ Xe talopala ne Anitioki milo­musou vaikalaou Axavusi la ane'i milalaxinu opone'i lexe ane'i isu'uline'i tavimovimo'a no anu lopala ne Iutea. Misu'uline'i la mikalanu lamoli so iloto xa'a la'ilali no anu voxo so vitolo. Loxo itema vile lamolixu la ukalanu lamoli tatila. Xe loxo vile lamolixu malaxo uasi, la mukalanu isusu'a sesi.

³⁰ Mipitanu mukalu laso milosi'a Vanavasi ilou Sauli so ilaixu noxi'a tamitema so saxila'u ne Iutea.