Ta'aposeli 10 - Ata New Testament

Angelo vile mupa noxou Koniliasi

¹ Ioxe, no tuala ne Sisalia itema vile ualasou lexe Koniliasi a muxoxolu. Anu tatila noxi'a ta'ami 100 noxi'a Talomu. Ta'ami laili anene ileme'a lexe ta'ami so Itali.

² Anu Koniliasi oli'a laili noxou ne milavusou milomuxu Mosinge vaikalaou mo mimama'u noxou. Ane'i milavusou isu'uline'i ane'i ane la'ilali o mimi uasi. Mo ane'i utotomu mivikala noxou Mosinge.

³ Xe no voxo vile no mi ne olo'olovoxo no aso iou tatalu la angelou Mosinge vile mupa noxou. Mupa la muvikala lexe, “Koniliasio.”

⁴ La Koniliasi mumatakisou la iou ne so umexusi la mukolinu lexe, “Tatila, ma'ia ne?” La angelo muvikalanu Koni­liasi aloxo 'o, “Mosinge mulomu­sou vaikalameni e nelemolu noxou mo mumaisou su'uli ane ne'oxonu noxi'a tamitema ta'oloxola. Anu mulavusou mi anene mo anu tanuxene.

⁵ Laso anu umasaxau lexe nini napalusi'a tavoimeni se'i ilai ne Iopa so ine'enu itema vile ualasou lexe Saimoni. Anu ualasou vilela lexe Pita.

⁶ Anu Pita ne a uxoxolu no tani noxou tauxuou Saimoni e itema so u'oxonu mimi no anu laleti. Tasou a utulu no luaki pa'umolu.”

⁷ Angelo muvi­kalanu mukalu xe mulai, la Koniliasi mu'avali'a tavoiou tamei xe ami vile. Anu ami ne utotomu usu'ulinu no anu xaixai noxou mo anu kalumo mumama'u noxou Mosinge.

⁸ Mu'avali'a xe mua'aloi'a so vaikalaou angelo mukalu, la mupalusi'a so ilai ne Iopa.

Mosinge mupala'anixu mi vile noxou Pita

⁹ Ioxe, tamitema Koniliasi mupalusi'a ne, mimuamua'i voxo tamei. Mimuamua'i voxo vile xo xe voxo loxo ne'iela no aso lixinu la ane'i so ixali no tuala ne Iopa. Ane'i a so ixali la Pita a teitexi no laxa'u tani uvivikala noxou Mosinge, mo ulavusi'a uasi.

¹⁰ Anu muvivikala noxou Mosinge xo mole musolixu. Musolixu ia ane'i no tani ne a ilalaxinu la'ilalisio la anu muma­leisou mi vile loxo muai musaxi.

¹¹ Mumalei aloxo 'o. Loxotolo mukisi la mi vile mulu'e loxo lavalava toxoxu. Lavalava ne mi vile mutetelisou no anu susunu tami'a so mulilixu mulu'e.

¹² Mo no lavalava ne tamisoposi iouiou loxo imuamua'i a nonano. Xe tasineke oli'a tangiala iouiou a mixolu kalumo.

¹³ Mumalei axone xe mulomusou xolinu vile muvikala lexe, “Pita, na'avuti nave'a se'i mo na'ani.”

¹⁴ Ia Pita mukolinu lexe, “Tatanaleli, uasi to! Eni alaxu vile a'ou misoposi vile nuni'u no ieni uasi.”

¹⁵ Ia alaxu tameisou la anu xolinu muvikalala aloxo 'o, “Mi anene Mosinge muxalixu lexe malemalenga la mamu so nalemolu lexe nuni'u.”

¹⁶ Mi ne muxali alaxu tatalu. Muxalisou alaxu tatalusou sila lavalava ne mulivu teitexi no loxotolo.

¹⁷ Ioxe, Pita muxolu la muxavu­xavutala xo tanulili lexe ai saxi ne laxu aloxova. Anu a uxavuxa­vutalasio la tamitema e Koniliasi mupalusi'a a mixali. Xo tamitema milosoie'ixu Saimoni tasou. Ane'i a mixali mo a mitutulu no aitengaxu vimelu.

¹⁸ Mitutulu ne mo mi'ava mu'una lexe, “Saimoni e ualasou vilela lexe Pita, anu a uxolu lai 'o, uasi?”

¹⁹ Ia Pita a muxolu teitexi muxavuxavutalasio la Ulenu muvi­kalanu lexe, “Nalomu, tamitema tatalu a ikamulineni.

²⁰ Laso nini nalutu mo nalu'elai noxi'a. Xe loxo ane'i ilivu ilai la ngoli'a ngalai xo eni melo epalusi'a mine'e 'o.”

²¹ Xe Pita mulu'e noxi'a, la muvikala lexe, “Eni ane ngaka­mulileli a. Ngene'e so ma'ia?”

²² La ane'i mivikalanu lexe, “A Koniliasi e tatila noxi'a ta'ami 100 mupalusixe tene'e 'o. Anu ilixo noxou laixe mo umama'u noxou Mosinge. Ane'i Taiuta mukalusi itaxanu mo ivikala lexe anu itema laixe. Anu mupalusixe tene'e xo angelo laixe vile muvikalanu lexe u'avaline nalai no tasou so ulomusou vaikalameni.”

²³ Ane'i mivikalanu mukalu la Pita muno'a mu'unalaixi'a no tani so oli'a miai no olovoxo ne. Miai xe no kakau milutu, la oli'a talopala se'i so tuala ne Iopa milai.

Pita muxolu no tasou Koniliasi

²⁴ Oli'a Pita milai xo la miai no vote'i. Miai xe no voxo loxo ne'iela la milutu mixali no tuala ne Sisalia. Mixali la Koniliasi a uxomaie'i. Ia tei la anu mu'avali'a taminuminu oli'a tamenexu la oli'a mipita miloxu Pita.

²⁵ Koniliasi a uxomaie'i xe Pita mu'una no tani la anu muxolasou tava'u mo mutangatuluou Pita so mumaxa'u mama'u noxou.

²⁶ Mutangatuluou ia Pita muvikala lexe, “Natulu, eni amitema vitanisi.”

²⁷ Mutulu la ilou mivivikala xe mi'unalai la Pita mumalei lexe tamitema tavu'alo a mipita mixoxolu.

²⁸ La anu muvikalane'i aloxo 'o, “Ngingi menge ngelavu lexe lavuloto vile noxixe nexi Taiuta lexe mamu so tapita noxi'a tami­tema noale'ale. Mo mamu so ta'una no tasi'a. Ia Mosinge molu mumaxa'u noxilo lexe alemolu itema vile nuni'u no iou Mosinge uasi.

²⁹ Laso loxo nge'avalilo la axilili uasi, ene'esi. Laso vaimomo 'o atali'isinge, loxova so nge'ava­lilo?”

³⁰ Ioxe, Koniliasi muvikalanu aloxo 'o, “Voxo tami'a mulai mukalu la mi vile muxali noxilo aloxo 'o. Eni exolu no tasilo no aso iou tatalu no olo'olovoxo la evikala noxou Mosinge. Sila alaxu vilesisi eni emaisou itema vile mutulu no ieli. Mimiou ne muvalu keasi.

³¹ Mutulu no ieli la muvikala lexe, 'Koniliasio, Mosinge mulomusou vaikalameni nelemolu noxou mo anu mulavu no anu mimi ane nepilipilixinu noxi'a ta'oloxola.

³² Laso napalusi'a se'i ilai ne Iopa so i'avalou Saimoni e ualasou vilela lexe Pita. Anu a uxoxolu no tasou tauxuou Saimoni e itema so u'oxonu mimi no anu laleti. Anu tasou a ututulu no luaki pa'umolu.'

³³ Laso maixene epalusi'a se'i milai mi'avaline. La laixe so nene'e noxilo xo vaimomo 'o nenge tapita no iou Mosinge mo nexi talalaxi so talomusou vaikala mukalusi ane Tatananenge mupalusine so nalo­sixe.”

Pita muvotovoto no tasou Koniliasi

³⁴ Ioxe, Pita muvikala aloxo 'o, “Eni tei la alamana uasi. Ia vaimomo 'o eno'u lavulavu. Ai manina, Mosinge oponu vilesisi noxi'a tamitema mukalusi.

³⁵ Anu u'apixa'a se'i uasi. Xo noxi'a tamitema so tuala iouiou ne anu u'osasi'a ane'i ta'ei imama'u noxou mo i'oxonu ilixo ane u'isalili no anu masaxa noxou.

³⁶ Ngingi ngelavu no anu vaikala laixe noxou Mosinge anu mulosixe nexi Ta'isilaeli. Vaikala laixe ne aloxo 'o. Iesua Kalaisiti anu Tatananenge mukalusi. Xo anu anusisi vote'i so nenge taxolu lalavulusi.

³⁷ Ngingi masi ngelomusou a'alo so mimi ane muxali ne Iutea. Anu musoko'u no xale lia ne Xalili ili'i no anu voxo loxo Tioni muvotovoto ka mu'oxonu ilixo so kelele.

³⁸ Ngingi ngelavu lexe Mosinge musosovosou Iesua so Nasaleti. Musosovosou no anu mi ne Ulenu Laixe muxolu noxou mo mulosou xavi. Mo anu muxixao so u'oxone'i tamitema laixe mo upamauline'i tamitema ane Uluaou mukasi'a. Anu mumaxa'u axone lexe Mosinge a muxolu noxou.

³⁹ Xo nexi tamitema ane temaisou mo taa'aloxu mimi ane mu'oxonu no xale lia noxi'a Taiuta xe no tualasi'a e Ielusalemo. Mune'e ne Ielusa­lemo laso ane'i mililinu no ovu valautu so musoli.

⁴⁰ Musoli xe muai voxo tatalu sika Mosinge mutulusou mu'umenu no anu soli.

⁴¹ Mosinge mutulusou ia anu umaxa'u noxi'a tamitema latala uasi. Anu mumaxa'u noxixe nexi ane Mosinge molu musosovosixe so taa'aloxu. Xo ili'i no anu soli noxou la nexi noxi'a tepita xe te'ani mo teie, laso maixene nexi taa'aloxu.

⁴² Taa'aloxu xo anu molu mupelototosixe lexe tavoto­voto noxi'a tamitema mo tapela'a. Tapela'a lexe anu ane Mosinge musosovosou lexe utongone'i tami­tema no lakoti noxou. Utongone'i tamitema imamaulisio xe ane'i isoisoli mukalusi.

⁴³ Xe tapolopeti mukalusi ipela'ingexu lexe ta'ei ane ilopala noxou la Mosinge ukalusou tina'uxa'a so susu no anu ualasou nesi.”

Ulenu Laixe musuku noxi'a tamitema noale'ale kalumo

⁴⁴ La Pita a uvikalasio, sila Ulenu Laixe muxali noxi'a tamitema ane milomuxu vaikala ne.

^45-46 La ane'i talopala Taiuta ane oli'a Pita mine'e milomu lexe ane'i mivi­vikala no anu vaikala iouiou xe mi'itinu Mosinge ualasou. Milomu axone la mikuluke mo mivikala lexe, “Ai ngamalei, Mosinge munixi'u Ulenu Laixe muxali noxi'a tamitema noale'ale kalumo.”

⁴⁷ Sila Pita muvikalane'i lexe, “Ane'i laili ano'o mino'u Ulenu Laixe iou vilesisi loxo nenge. Laso ena'ei u'apixa'a so ta'oxonu ilixo so kelele noxi'a?”

⁴⁸ Muvikalane'i axone mukalu la muxiu muvika­lane'i Koniliasiena lexe, “Ioxe, masi nexi ta'oxonu ilixo so takeleningenge no lexa no anu ualasou Iesua Kalaisiti.” Mikele­nixa'a mukalu la ane'i mivikalane'i Pitaena lexe oli'a ixoxolu voxo se'io.