Pilipai 4 - Ata New Testament

Pelototosi'a Mosinge ta'olu

¹ Laso tavivilo, ngatulu pumu­ngenge noxou Tatananenge. Eni asexelangenge misevile mo opo­leli utama so amaisinge. Eni a'osasinge manina xo ngingi loxo palaisi na'a xeli ane esoa so axalisou.

² Xe noxinge Iuotia xe Sinitike avikala pakia'u noxinge lexe ngingi tanoxou Tatananenge ane, laso ngaxolu opongengi vilesisisi.

³ La nini ane vaitamixeli manina no anu xaixai, eni alinga noxine so nasu'uline'i tasema tamei no anu tu'umaxu noxi'a ne. Xo ane'i ilou miva'isuleli no anu xaixai so alanu vaikala laixe. Xe Kilemeni oli'a tavaitamixeli mose'i mipita no anu xaixai kalumo. Ane'i ne ualasi'a uxolu ukaukavunu no anu lavuku so mauli.

⁴ Utotomu ngaxolu nga'osa no anu xoluxolu noxinge noxou Tatana­nenge. A alemolu 'ola, ngaxolu nga'osasi.

⁵ Anu laixe so upalasi no ie'i tamitema latala lexe opongengi lexasi noxi'a tamenexinge. Mo ngalavu aloxo 'o, Tatananenge alaimanasi.

⁶ Opongengi uuali uasi, no anu mi ma'ia la ngapili­xinu noxou Mosingesi. Ngavikala noxou mo ngavikala laixe so ngalingau su'uli no anu ngiou aneva.

⁷ Xo axone la Mosinge u'oxonu opongengi uai se'isisi e se'isisi. Vote'i so mi ne axovaio, xo uua'ulixu xavutalamenge avile? Ia tava'u xo ngaxolu noxou Kalaisiti Iesua, laso xoluxolu lalavulusi ulosinge ne uutululunu opongengi ilou tangengi.

⁸ Ioxe tavivilo, vaikalaxeli telexu aloxo 'o. Utotomu xavutalamengi uxoxolu no anu mi ane kalavoi no anu uasi xe mi laixe so tataxanu xe mi ane ulapusi xe mi ane malemalenga xe mi ane so sexelasi xe mi ane tamitema ivikalasou laixesi. Ani, ngaxavutalanu mimi ane lailaixe u'uli'uli xe mimi ane temanu laixe so ta'itinu axonesi.

⁹ Laso ane, mi ma'ia epela'ingexu xe ngekasou laixe mo mi ma'ia ngelomusilo elemolu mo ngemai­silo e'oxonu, la ngamulimulinu axone utotomusi. La anu Mosinge e mosou xoluxolu lalavulusi a uxolu noxinge ne.

Polu mu'osasou su'uli ane Tapilipai mipilixinu noxou

¹⁰ La eni a'itinu Tatananenge ualasou manina xo ngexolu xo mo muxali vaimomo 'o la opongengi mu'avuti so tangengixola. Mani­na, tei ngingi tangengixo mo mune'e axonesi ia vote'i so ngasu'ulileli uasi.

¹¹ Ia anu loxo axolu 'o mo opoleli ukakamuli mimi se'i asoti no anu ka avikala aloxo 'o uasi. Xo eni eno'u lavulavu no anu vote'i so loxo axolu kaini axova, la opoleli uai se'isisi no anusi.

¹² Loxo a'olo­xola o axolu no anu mimi latanu la anu mi vile uasi. Eni loxo exalisou laki no anu vote'i so opoleli uai se'isisi no anu xoluxolu iouiou. Laso loxo la'ilalixo ulolutu o asolixo xe loxo mimixeli tavu'alo o akamuli avile la eni axolu a'osasi.

¹³ Xo noxou anu ane ulavusou ulosilo xavi, la amo­momo no anu mimi mukalusi.

¹⁴ Ia ngingi ne nge'oxo laixe manina so nge'una no anu tu'u­maxu noxilo 'o ka ngekalanu su'uli mune'e.

¹⁵ La loxo ngingi Tapilipai ngelavu, tatei mi ne elanu vaikala laixe tei xe exexesou polovinisi Masetonia la tatemanu pita vilela i'una noxilo so isu'ulileli no anu mi vile uasi. A ngingi nesi ngeva'isu no anu xaixai noxilo axone.

¹⁶ Xo no voxo loxo exolu ne Tesalonaika la alaxu mose'i ngekalanu nene'axu alauna noxinge so ngesu'ulileli.

¹⁷ Ia anu loxo opoleli ukakamulinu avonge temanu axone uasi. Mi ane opoleli ututuluou a so alauna noxinge uleme mo so ngingi menge ngaxalisou nene'axu laixe no latanula.

¹⁸ Ia ano'o vaikala lamana lexe mimi e ngekalanu a exalisou avile, usoti no anu ngiou sevile uasisi. Exolu e'ana'ana mole akakamulinu mi vile uasi xo Epavilotitusi muxalixu avonge temanu noxilo. Anu mi ne anu loxo mi vile lailaixe ane ngepi­lixinu lexe noxou Mosinge ka tuma'u laixe muxali noxou mo u'osasousi.

¹⁹ La Mosilo muso­sovosou mimi lailaixe mulolutu noxou so taxalisou a noxou Kalaisiti Iesua. Laso mi ma'ia laixe so xoluxolu noxinge ane ngasoti no anu la anu umo­momosou ane.

²⁰ Laso nenge ta'itinu ualasou Mosinge e anu Mosinge xe Maminge ulai ulai mole utalo uasisi.

Vaikalaou Polu si'a Tapilipai kaluxusou

²¹ Eni avikala aso noxinge ngingi tamitemaou Kalaisiti Iesua u'isalili mukalusi. Xe ane'i tavivinge noxi'a taxoxolu 'o ivikala aso noxinge kalumo.

²² Ane'i tamite­maou Mosinge u'isalili lai 'o mukalusi ivikala aso noxinge. Ia ane'i noxi'a so ixaixai no tasou Sisa, la pakia'a manina lexe avikala aso noxingesi.

²³ La amasaxau lexe ngaxamulinu iaiama noxou Tatananenge Iesua Kalaisiti no anu ulengengi. Anu anesi.