Pilipai 2 - Ata New Testament

Pelototo lexe Tapilipai ixolu opone'i vilesisi

¹ Ioxe atali'i noxinge aloxo 'o. Ngingi ngalavusou ngaxalisou mamatola noxou Kalaisiti, ne? Mo ngaxamulinu sexela noxou u'oxonu opongengi uai se'isisi, ne? Mo nge'una ngepita no anu xoluxolu noxou Ulenu, ne? Mo tangengi­ngenge so nga'oxonu alauna noxinge ngato'o, ne?

² Loxo anene manina, la nga'oxonu osa noxilo uxali loloni avile no anu vote'i aloxo 'o. Ngaxolu no anu xavutala vilesisi mo ngateteli no anu sexela vilesisi mo ngapita opongengi vilesisi mo xavingengiou masaxa vilesisi.

³ Mamu so nga'oxonu mi vile no anu masaxa noxingemo o so ngaxalixu ualasinge utila no anu. Ngingi vilevilesi ngalu'engengi no anu opongengi mo ngasaxisinge lexe ngingi tami vitanisi no taine'i tamenexinge.

⁴ Opongengi ututu­luou mimi so ngingi menge ngaxalisou su'uli no anu uasi, ngaxavutalanu mimi so leviani ixalisou su'uli no anu kalumo.

Kalaisiti molu mulu'enu laso Mosinge mu'itinu avile

⁵ Anu laixe so tangengi iou vilesisi aloxo noxou Kalaisiti Iesua.

⁶ Muxolu la temanu xoluxoluxu iou vilesisi noxou Mosingesi. Ia anu usaxisou tanixu so mumomomo noxou Mosinge ne lexe anu mi so ukamakulunu uasi.

⁷ Laso anu molu mululusou ka mu'italonu so muxali itema so xaixai vitanisi. La muxali loxo tamitema,

⁸ xe ane'i misaxisou loxo itema 'osi. Xe anu molu mulu'enu ka mumulinu masaxa noxou Mosinge xo mole mumomomo avile no soli. Ani, soli e no ovu valautu.

⁹ Laso maixene Mosinge mu'itinu teitexi musuku mo mulosou uala vile lailaixe ane uua'ulixu ualauala mukalusi.

¹⁰ Mo so loxo ualasou Iesua upala'a la tami mukalusi no tualasou Mosinge xe no lialia xe no laxu lialia la ixolasou tava'a so imaxa'u mama'u noxi'a.

¹¹ Mo vaikala lexe Iesua Kalaisiti anu Tatananu mimi mukalusi ula no anaxa'a tami ne mukalusi. La no anu vote'i anene la ualasou Mosinge utilasi.

Mosinge ta'olu so ixolu loxo lalamo no lialia

¹² Ai tamaula, utotomu ngingi ngalavusou ngalomuxu pelototo noxilo, laso ngalomuxu ano'ola. Anu laixe so ngalomuxo loxo axolu no taingengisi uasi, xo axolu nopaxa noxinge a ia ngalomuxu pelototo ano'o laixe manina. No anu pamauli e ngexalisou mukalu la ngamama'u mo opongengi u'olo'olou so ngamomosou avile.

¹³ Xo anu ane so uxaxai nonano noxinge, a Mosingesi. Anu a uxaxai so u'avutinoxu osa no opongengi so ngamulinu masaxa noxou u'isalili ka ulosinge xavi so nga'oxonu.

¹⁴ No anu mi ma'ia so nga'oxonu la no anu osasi. Ngakalapusou uasi mo ngapelesou anangenge no anu uasi.

¹⁵ Mo so axone la ngingi menge ngapala'aningenge lexe ngingi Mosinge ta'olu ane xolu­xolungenge mulapusi mo lama­nasi. Xo ngingi ngaxolu no tainu laili so ilixo ukilikalu mo xililisi laso laixe so mi vile no anu xoluxolungenge so ito'omengexu uasi. Ngaxolu loxo lalamo no anu isivoxo so lialia 'osi.

¹⁶ Xe ngatolosou vaikala so mauli noxi'a. Mo so no anu voxo noxou Kalaisiti olele la tava'u osa noxilo a ngingi nesi. Xo upala'a lexe eni esoa mo sasaieli no taingengi, la epuleli uasi.

¹⁷ Laso loxo tava'u maulixo 'o so unixi ula la anu loxo usiali upita ilou mi e ngepilixinu no anu lopala noxinge lexe noxou Mosinge. Eni a'osa so uxali axone mo amasaxau lexe ngingi kalumo ngaxamulinu osa noxilo 'o.

¹⁸ La avikalangengi lexe laixe so nga'osa mo so eni kalumo axamulinu osa noxinge ne.

Polu muvikala lexe anu upalusou Timoti ulai ne Pilipai

¹⁹ Ioxe, eni alopalanu Tatananenge Iesua lexe anu u'oxonu vote'i so maxuveni uasi la apalusou Timoti une'e noxinge. Mo so loxo ua'alo­ngenge noxilo no anu lailivuxu la u'avutinoxu osa noxilo.

²⁰ Apalu­sou Timoti xo itema vilela oponu vilesisi noxilo aloxo anu 'o uasi. Xo anu oponu u'oxoxu xoluxolu noxinge manina ane.

²¹ Io ane'i leviani la opone'i ututuluou mimi noxi'amo, ixavutalanu mimi noxou Iesua Kalaisiti so ixaxaisou uasi.

²² Ia loxo noxou Timoti 'o la ngingi ngelavusou ilixo noxou. Anu upalasi lexe musu'ulileli so texaxaisou vaikala laixe aloxo itema olu usu'ulinu no anu xaixai noxou.

²³ Laso taxolu sevileo mo amalei lexe mi ma'ia uxali noxilo laso ane, alaxu vilesisi apalusou une'e noxinge.

²⁴ Ia lopala noxilo lexe Tatananenge ukisinu vote'isilo so eni melo apalea ane'e noxinge ne.

Polu muvikalasou Epavilotitusi

²⁵ Ia exavutala lexe laixe so apalusou vivinge Epavilotitusi ulivu une'e noxinge. Anu muva'i­suleli no anu xaixai noxilo mo muveisa'ileli no anu oto e taxolu no anu 'o. Musu'ulileli aloxo ngingi menge ngepalusouxu 'o.

²⁶ Apalu­sou ulivu xo anu oponu utama lexe umaisingela. Anu muuali xo mulavu lexe ngingi ngelomusou a'alo so siki noxou.

²⁷ Xo manina mane la usoli, ia Mosinge mu'alaunasou mo mupamaulinu. Ia anusi uasi, Mosinge mu'alaunasilo no anene kalumo xo loxo 'o io tu'umaxusou upita no anu tu'u­maxu ane atavulenu 'o.

²⁸ Laso maixene opoleli u'osa manina so apalusou une'e noxinge so loxo ngamaisou la nga'osa'ilasi. Xe loxo ngamaisou lexe laixenusi la eni kalumo opoleli uualisingela uae.

²⁹ Laso nga'osa so ngalivunoxu u'una no taingengila no anu ualasou Tatananenge. La tamitema ane xo ne ngataxane'i laixe.

³⁰ Xo anu mu'oxonu xaixai noxou Kalaisiti la mulai alai no anu soli. Anu uxavutalanu mauli noxou so ulaxa'inumo uasi. Oponu mututu­luou xaixai ngepilixinu no avolu e so usu'ulilelisi.