Pilipai 1 - Ata New Testament

¹ Nexi Polu xe Timoti a. Nexi noxou tamitema so xaixai noxou Kalaisiti Iesua. Takaukavunu lapasi 'o so ulai noxinge tamitemaou Kalaisiti Iesua u'isalili e so taoni Pilipai oli'a tamitema so ivu'ulinu xe tamitema so su'uli no anu pita ne.

² Eni amasaxau lexe ngaxa­mulinu iaiama ilou xoluxolu lalavulusi noxi'a Mosinge anu Maminge xe Tatananenge Iesua Kalaisiti.

Polu muvikala laixesi'a mo mupilixine'i noxou Mosinge

³ No anu mimi mukalusi axavu­talangengi no anu la avikalasinge laixe noxou Mosilo.

⁴ Laso loxo apilixingengi noxou la vaikala mukalusi alemolu no anu osasi.

⁵ Tava'u osa noxilo ne xo musoko'u no anu voxo tei xo mo muxali avile vaimomo 'osi, la ngeva'isu no anu xaixai so talanu vaikala laixe.

⁶ Laso elavu manina no opoleli lexe anu ane mu'avutinoxu xaixai laixe nonano noxinge la u'oxonu axone xo mo no anu voxosou Kalaisiti Iesua la uxali ulomotele avile.

⁷ Ngingi ngaxolu no anu e'eleli 'o laso anu laixe so axavutalangengi axone. Xo Mosinge muiaiama noxilo so axolu akalavusu 'o xe so a'oxonu latolo mo avalaxu vaikala manina. La ngingi nge'una so ngava'isuleli no anu mukalusi.

⁸ Mosinge molu mulavu lexe vaikalaxeli 'o manina. Eni talelingenge misevile no anu sexela noxou Kalaisiti Iesua mu'isalili.

⁹ La utotomu alinga noxou Mosinge lexe u'oxonu sexela noxinge u'oki mo ulolutisi. Ia sexelasi uasi, upita no anu lavulavu laixe ilou tilovo lamanasi.

¹⁰ Mo so axone la ngingi ngatilovosou mimi mukalusi ka ngailounu aneva laixe mu'uli'uli. Laso no anu voxo noxou Kalaisiti olele la ngingi ngaxolu ngamalemalenga mo mi vile so ngamailamulinu uasi.

¹¹ Xe ilixo ulapu ane molu noxou Iesua Kalaisiti uxalixu nene'axu mo uana'ana noxinge. Mo so tamitema imaisou la itoxu Mosinge mo i'itinu ualasou.

Polu mukalavusu la mu'oxonu pakia'u vaikala laixe

¹² Ioxe tavivilo, eni amasaxau lexe ngalavu aloxo 'o. Mi e muxali noxilo 'o ne anu so u'apixu vaikala laixe uasi, anu musounu musu­kusuku ane.

¹³ Xo ta'ami so latolosou tasou kingi Sisa xe tamotu lai 'o mukalusi milavu lexe tava'u vilela uasi, e'oxonu xaixai noxou Kalaisitisi laso maixene ekalavusou 'o.

¹⁴ Xe tavu'alo noxi'a tavivinge milavu lexe axolu akalavusu 'o la anene mu'oxo pakia'u lopala noxi'a noxou Tata­nanenge. Laso i'ume uasi, xavine'i so ilalanu vaikalaou Mosingesi.

¹⁵ Xo manina, se'i iisuxo mo opone'i tu'umaxuilo so ivotovo­tosou Kalaisiti. Ia leviani la masaxa no opone'i mulovo laixesi so ilanu vaikala ne.

¹⁶ Ane'i ane opone'i laixe 'o, la tava'u xaixai noxi'a no anu sexelasi. Xo milavu lexe axolu no anu tanixo no lakalavusu 'o so a'oxonu latolosou vaikala laixe.

¹⁷ Ia ane'i se'i olele ne ilanu vaikala so Kalaisiti mo so ualasi'a utila no anusi. Tane'i malemalenga no anu uasi, imasa­xau ipitanu navunavu se'ila noxilo loxo akalavusu 'o.

¹⁸ Ia mi vile uasi, xo se'i tane'i ukilikalu sevile xe se'i la ulapusi. Laso eni 'o, loxo alavu lexe vaikalasou Kalaisiti ulala axonesi la a'osa'osasi.

Polu oponu tamei lexe u'osa so usoli o umaulisi

¹⁹ Ia utotomu ngingi ngalingau su'ulisilo noxou Mosinge mo Ulenu Iesua Kalaisiti a usu'ulileli. Laso eni alavu manina lexe eni masi amauli mo ala no lakalavusu 'o.

²⁰ Mo mi ane alopalanu xe opoleli u'oxoxu aloxo 'o. A'oxonu mi vile so atavulenu maila no anu uasi. Mo loxo amauli o asoli la amama'u uasi. Mi ma'ia a'oxonu no anu vasimelo vaimomo 'o mo ili'i avile la so a'itinu ualasou Kalaisiti no anusi.

²¹ Xo loxo noxilo 'o la mauli noxilo e Kalaisitisi, xe loxo asoli la apalavasi.

²² Ia loxo axolu amauli la xaixai noxilo masi uxalixu nene'axu laso eni alavu lexe a'osasou vote'i aneva uasi.

²³ Xo mi tamei ulapunu opoleli. Masaxa noxilo lexe axexe mo noxou Kalaisiti tapita taxolui xo axone la lailaixe lapilai uasisi.

²⁴ Ia loxo axolu no lialia la anu masi laixe xo anene vote'i so asu'ulingengi.

²⁵ Ani, opoleli ututulu axonesi laso alavu lexe eni masi amauli mo nenge nenge'a taxolusi. Mo so axone la asu'uli­ngengi so ngaleme mo nga'osa no anu lopala na'a nenge.

²⁶ Laso loxo ane'e axali noxingela la opongengi u'osasilo misevile mo nga'itinu ualasou Kalaisiti Iesuasi.

Mosinge mu'alaunane'i Tapilipai so itavulenu tu'utu'umaxu

²⁷ Ioxe, mi e mutiatila aloxo 'o. Xoluxolungenge laixe umomomo no anu vaikala laixe so Kalaisiti. Laso loxo ane'e amaisinge o loxo alomusou a'alosingesi la alavu manina lexe ngingi ngaxolu tangengi pumuxu mo vilesisi. Xe masaxa noxinge upita ka ngasoa vilesisi so ngalapune'i tamitema ilopalanu vaikala laixe nesi.

²⁸ Mo mamu so opongengi u'avuti so nga'ume'a ane'i ane ixililiiengi. Xo loxo imaisinge lexe nga'ume uasi la anene upela'a lexe ipune'isi xe Mosinge usu'ulingengi so ngaua'uli.

²⁹ Ai ngalomu, Mosinge mu'alaunasinge xo mu'italongengi so nga'oxonu xaixai noxou Kalaisiti. Ia so ngalopalasi uasi, anu so ngatavulenu navunavu no anu ualasou kalumo.

³⁰ Xo ngingi a nge'una mo ngaxamulinu oto ane ngemaisou lexe exolu no anu tei mo ngelomu lexe axolu no anu vaimomo 'osio.