Mupala'a 9 - Ata New Testament

Angelo ta'uvesi'a mutaunu piuka noxou

¹ Ioxe, angelo ta'uvesi'a mutaunu piuka noxou. La emaisou taoto ane mulapau no tualasou Mosinge mulu'e no lialia. La ane'i milosou lakisou taxa tatila ane mulu'elai avile mo taxalisou tava'u uasi.

² La anu mukisinu taxa mulu'elai avile ne. Mukisinu la umuxu molu no taxa ne mutelai a loxo tasexetelu 'o. Xe umuxu musu'asou aso ilou loxotolo la isivoxosi.

³ Xe tamimi loxo tamusia'e me'a no anu umuxu mixali la misu'asou lialia mukalusi. Ane'i mino'u xavi loxo tatanga xavine'i so ilosi'a tamitema navu­navu.

⁴ Ia mi'apixa'a lexe mamu so imamulonu laxalasi o mimi uleme­leme o ovuovu. Mi'oxo lexe tami­temasi ane sosovo noxou Mosinge uxolu no alaie'i uasi, la ilosi'a navunavu.

⁵ Ilosi'a tamitema ne navunavu mo uxolu umomomo no anu so'io ta'uve. Navunavu ne u'oki a iou vilesisi loxo tanga ukapi­nenge. Milosi'a tami loxo tamusia'e xavi so ilosi'a tamitema navunavu axone ia mi'apixa'a lexe umomomo no anu soli mamu.

⁶ La no voxo anene tamitema ikamulinu vote'i lexe isoli axova ia ane'i imomomo uasi xo soli u'ume avile.

⁷ Xe emalei la tamusia'e ne misaxi loxo ta'osi ane tamitema milala­xine'i so ilutu i'oto. La no kisi'a la ati koli. Mo ala'alaie'i a loxo tamitema 'o.

⁸ Mo laxusi'a veveni kalumo loxo laxusi'a tasema. Xe anaxa'a anaxu loxo anaxa'a talaioni.

⁹ Xe no lutune'i la mi loxo lasioti aioni a loxo ta'ami itanu so i'oto. Mo vivisi'a luluxu loxo kali kali tavu'alo ane ta'osi ilapunu no anu oto.

¹⁰ La ane'i tamusia'e ne xela'a xe mi so uto'omenge kalumo a loxo tatanga 'o. Xavi so ilosi'a tamitema navunavu uxolu umo­momo no anu so'io ta'uve a muxolu no xela'a ne.

¹¹ La ane'i kingii'a so u'uli laxune'i ne anu angelo e tatananu taxa e mulu'elai avile. No anu vaikala Ipilu la imoxo'u lexe Avatoni. Xe loxo nenge la talemolu lexe Mosou Mamulo.

¹² Anu ane. Tu'umaxu e mu'oki tei a mukalu 'oe. Ia ngalomu, tu'umaxu tatamei a so umulinula.

Angelo 6-si'a mutaunu piuka noxou

¹³ Ioxe, angelo 6-si'a mutaunu piuka noxou. Xe no anu tanixu navu koli e mutulu no laxunu Mosinge la elomusou xoli vile. Anu molu no tainu mi loxo kau komonu tami'a e mutulu no mailu'axu tami'a.

¹⁴ La xoli ne mupela'u 6-si'a ta'angelo e mute­telisou piuka aloxo 'o, “Ta'angelo tami'a e miloiloki no lexa tatila e Iupeletisi, ne nalulusi'a ilaisi.”

¹⁵ Ane'i ta'angelo tami'a ne a milalaxine'i so aso iou xe voxo xe so'io xe tau ie ne u'isalili. Mixolu milalaxi axone so loxo takali­palane'i tamitema ixali laili tatalu la no anu laili vile la ive'ave'a isoisoli avile. Laso ane, milulusi'a so i'oxonu xaixai anene.

¹⁶ La emaisi'a ta'ami mitaluta­lupexa noxi'a ta'osi. La elomusou mile­molu navasi'a lexe 200 milioni.

¹⁷ Xe no anu aisaxi ne la emaisi'a ta'osi xe ane'i ane mitalupexa noxi'a aloxo 'o. Ane'i mivaxanu lasioti aini kalasou lauoinu xe ela'ela xe ponu. Xe kisi'a ta'osi a loxo kisi'a talaioni. Xe no anaxa'a navu xe umuxu xe lavo'o axexaxu mulala.

¹⁸ Laso mimi tatalu masua e mula no anaxa'a ta'osi ne la muxalixu mamulosi'a tamitema. Mo so loxo takalipalane'i tamitema no lialia mukalusi ixali laili tatalu, la laili vile ne misoisoli mukalusi.

¹⁹ Xo xavi noxi'a ta'osi ne a uxolu no anaxa'a xe no xela'a. Xo xela'a loxo sineke, mo kisokisou kalumo. Laso ixalixu mamulosi'a tamitema no anu.

²⁰ Ioxe, tu'utu'umaxu ne muma­mulone'i laili toxoxu e toxoxu. Ia ane'i loxo mixoxolusio ixiunu opone'i uasi no anu mimi masua loxo me'a mixalixu no avo'avo'a. Xo ane'i mi'itine'i ta'angelo tamasua. Mo mixalixu momosi'a kalavoi no anu koli xe siliva xe valasi. Mo mipuinu lavo'o ilou ovu so lexe momosi'a ia mi axone umauli so umalei o ulomu o umuamua'i uasi to!

²¹ Ane'i tamitema anene mive'ave'a tami­tema misoisoli xe mi'oxonu ta'uluxu xe ili'ilixo nuni'u xe mipakapakali. Mi'oxo axone ia ixiunu opone'i mo i'isalilinoxu so susu noxi'a ne uasi.