Mupala'a 8 - Ata New Testament

Sipisipi Ilie mulokenu sosovo 7-sou

¹ Ioxe, mune'e la Sipisipi Ilie mulokenu sosovo 7-sou e mutei­noxu lavuku ne. Mulokenu la no tualasou Mosinge mi vile kilaka uasisi. Tani muxolu tasiau e tasiau umomomo no anu 30 minitisi.

² Xe emalei loxo 'o la emaisi'a ta'angelo 7 e itulu no laxunu Mosinge, la milosi'a piuka 7.

³ Xe mukalu la angelo vilela mune'e mutulu alai no anu tanixu navu. Anu mutetelisou lisi koli so mi tuma'u lailaixe. La ane'i milosou mi tuma'u lailaixe tavu'alo mo so upitanu no anu vaikalai'a tamitemaou Mosinge u'isalili e ilemolu noxou. La mumulaxu no anu tanixu navu e mutulu no laxunu sia kingi. Mumulaxu ne so lexe noxou Mosinge.

⁴ Xe mi tuma'u lailaixe mupita ilou vaika­lai'a tamitemaou Mosinge mu'isa­lili. Mupita la umuxu molu no avolu angelo mutetelai no laxunu Mosinge.

⁵ Ioxe, angelo muno'u navu no anu tanixu navu ka mumulaxu no anu lisi so mi tuma'u lailaixe. Mukalu la musu'anu no lialia sila lele'e mupaupau mo mulamilami mo uni'uni mukuno­kunoxu lialia.

Ta'angelo tami'a mitausou piuka noxi'a

⁶ Ioxe, mukalu la ta'angelo 7 ane mitetelisou piuka a mitulu milalaxi so itaunu.

⁷ Xe angelo vile mutaunu piuka noxou la uali loxo aisi ilou navu mupita no anu sialu mulapau no lialia. Mulapau la loxo takalipalanu lialia uxali pa'usou tatalu la vile mu'ela avile. La anu axone no anu ovu ovu xe mimi mulemeleme kalumo.

⁸ Xe angelo tameisou mutaunu piuka noxou la mi loxo la'olu toxoxu navu mu'ani no anu mulapau no luaki. Mulapau la loxo takalipalanu luaki uxali pa'usou tatalu la vile no anu muxali sialusi.

⁹ La ane'i tamimi imamauli no luaki kalumo loxo takalipalane'i ixali pa'usi'a tatalu la vile ne mimamulo avile. Xe no anu lasi­lasipi kalumo, xo loxo takalipalanu pa'usou tatalu la vile mumamulo avile.

¹⁰ Ioxe, angelo tatalusi'a mutaunu piuka noxou la taoto vile toxoxu mulapau no loxotolo mulu'e la anu mu'ani loxo telu 'osi. Mulapau la loxo takalipalanu lexalexa mo luxuluxu uxali pa'usou tatalu la taoto ne muatasou pa'usou vile no anu mukalusi.

¹¹ La taoto ne ivotongalelenu no anu lamalasini vile sixula misevile. Mulapau xe muatasou lexalexa mo luxuluxu tavu'alo e tavu'alo axone laso muxali sixula misevile. Mole loxo tamitema iie no anu la isoisoli xo lamalasini masua no anu.

¹² Ioxe, angelo tami'asi'a mutaunu piuka noxou la aso xe so'io xe tataoto ika loxo teila uasi. Xo loxo takalipalane'i pa'usou tatalu la pa'usou vile musitasi. Laso no aso xe olovoxo la pa'usou vile axone isivoxosi.

¹³ Mukalu xe esaxi loxo 'o sila suluvi nenu muvava no tainu loxotolo. La elomusou mu'ava tatila lexe, “Iauo, iauo, iauo. Tanengexa'a tatemanu lialia. Mixa­lisou xoluxolu masua ia loxo ta'angelo tatalu ane ixoxolusio itaunu piuka noxi'a la tu'umaxu u'oki e u'oki avile.”