Mupala'a 5 - Ata New Testament

Tioni mumaisou lavuku vile mutei pakia'u

¹ Ioxe, anu ane mutalupexa no sia kingi mutetelisou lavuku vile no avolu tema. Lavuku ne lapepa veveni ia mupipisi. Anu kaukavu no anu xalevile xe xalevile. Lapepa veveni mupipi ne utei no anu tanixu 7 so uvula uasi. Mutei, la no anu keniteli lexaxu ane sosovo muxolu no anu.

² La emaisou angelo vile xavinu mu'ava xoli tatila lexe, “Ena'ei laixe umomomo so ulokenu sosovo e uteinoxu lavuku 'o so uvula?”

³ Mu'ava axone ia evile no tualasou Mosinge xe no lialia 'o xe no laxu lialia umomomo so ulokenu mo u'itisou lavuku ne uasi.

⁴ Emalei lexe itema vile laixe umomomo so ulokenu mo u'itisou uasi la etama tatilasi.

⁵ Etatama ia vile noxi'a tatiatila ne muvikalaleli lexe, “Natama uasi, natalo. Xo nalomu. Laioni vile muxali no anu laili noxou Iuta. Anu ilusunu Teviti. Anu muua'uli laso anu umomomo so ulokesou sosovo 7 no anu lavuku mo uxavulalanu.”

Tioni mumaisou Sipisipi Ilie

⁶ Ioxe, emalei loxo 'o la Sipisipi Ilie vile a ututulu nonixi manina no anu sia kingi e muxolu no taine'i tamimi tami'a oli'a tatiatila. Ututulu la musaxi loxo sipisipi ilie ane tamitema mivau ka musoli. Anu komonu 7 xe iou lavo'onu 7 kalumo. Anene usosovosou Mosinge Ulenu ane noxou 7 e Mosinge mupalusou so uxolu no lialia mukalusi.

⁷ Ioxe, anu ane mutalupexa no anu sia kingi a utetelisou lavuku olele no avolu temasio. La Sipisipi ilie mulai muno'u.

⁸ Mulai muno'u mukalu la tamimi tami'a oli'a tatiatila 24 ne mixolasou tava'a mo mitangatulu no tava'u. La ane'i vilevilesi mitetelisou mi loxo kita 'o xe lisi koli ane mi umuxu tuma'u lailaixe u'ela no anu. Anene usosovosou vaikalai'a tamitemaou Mosinge u'isalili ilemolu noxou.

⁹ Mitangatuluou la milexenu lexe alavua aloxo 'o, “Nini nalaixe umomomo so nano'u lavuku mo nalokenu sosovo e mutei no anu. Xo ane'i mivene nesoli so sialuxene mulotone'i tamitema milivulivu noxou Mosinge. Tamitema no anu lailaili latala xe vaikalai'a vilevilesi xe vasime'a iouiou xe no xale tuatuala mukalusi.

¹⁰ Mo nini nakingi noxi'a xe ixolu noxine laso ane'i tapilisiti noxou Mosinge ane. Xe ili'i la ane'i ixolu so i'uli laxune'i tatemanu lialia mukalusi.

Tamimi mi'itinu Sipisipi Ilie ualasou

¹¹ Ioxe, esaxila la ta'angelo talaixe tavu'alo mixolu ne. Ane'i milolutu e milolutusi, tautauseni e tautauseni, ta'itisi'a uasisi. La ta'angelo mixi­xaosi'a tamimi tami'a oli'a tatiatila ane mixolu alai no anu sia kingi.

¹² Sila ane'i mukalusi mipatanu anaxa'a mo mivikala tatila lexe, “Sipisipi Ilie e mivau musoli a. Anu anusisi laixe umomomo so tavika­lasou laixe. Anu u'uli laxunu mimi mukalusi mo mimiou mulolutusi mo lavulavu noxou mutoxoxa'a mo anu mosou xavi. Laso nenge tavikalasou ili'ilixo noxou laixe mo ta'itinu ualasou mo ta'osa'ilasou misevile.”

¹³ Mo kalumo elomusi'a tamimi mukalusi ane Mosinge mukoinu mipitanu anaxa'a. Tamimi e no tualasou Mosinge xe no lialia xe no laxu lialia xe no luaki. Mipitanu anaxa'a la mivikala aloxo 'o, “Anu ane utalupexa no anu sia kingi ilou Sipisipi Ilie a. Ta'osa'ilasi'a misevile mo tavika­lasou ili'ilixo noxi'a laixe mo ta'itinu ualasi'a xo ane'i ixolu i'uli laxunenge ulai ulai kaluxu uasi.”

¹⁴ La tamimi tami'a mivivikala lexe, “Ani manina misevile.” La tatiatila milalusi so mitangatulu mo mi'itinu ualasi'a ilou.