Mupala'a 3 - Ata New Testament

Pelototo so pita ne Salitisi

¹ La anu muvikala aloxo 'ola, “Nini nakaukavunu vaikala ano'o ulai noxou angelosou pita noxilo ne Salitisi. Eni ane Mosinge Ulenu noxou 7 a uxolu noxilo mo atete­lisou tataoto 7. Akalanu vaikala ano'o ulai noxinge. Eni elavu no anu ili'ilixo ngalavusou nga'oxonu. Tamitema ilavusou ivikalasinge lexe pita noxinge ne Salitisi ne mauli no anu. Ia uasi, elavusinge lexe soli mukasingesi.

² Laso ngaai uasi, ngatulu mo so utu'utuxu no anu xoluxolu noxinge laixe tei la nga'oxonu pakia'usoula. Xo elavu lexe ilixomengi laixe aneva ngesoko'u la no iou Mosinge ngasivitanoxu uae.

³ Xe vaikala laixe nge'osasou mo ngelomuxu mala'o la tangengioula. Ngaxiunu opongengi so susu noxinge mo nga'isalilinoxu no anu vaikala anenela. Xo loxo ngatulu no anu ai ne uasi la eni ane'e akulukengengi a loxo itema so pakali. La ngala­vusou voxosilo uasi ane, axali noxingesi.

⁴ Ia ane'i se'i noxinge so pita ne Salitisi la elavusi'a lexe nuni uxolu no anu lavuluti noxi'a uasi. Laso noxi'a la a'osasi'a so lavuluti kea usu'asi'a so noxi'a tamuamua'i.

⁵ Ane'i tamitema so iua'uli ne eni asu'asi'a no anu lavuluti kea ne. Mo umomomo uasi manina so axexenu ualasi'a no anu lavuku so mauli. Axexenu uasi, alemolu no laxunu Mamilo xe no laxune'i ta'angelou.

⁶ Anu ane, loxo itema sangalou la ulomuxu vaikalaou Ulenu Laixe anu upilixinu noxinge no anu pitapita.”

Pelototo so pita ne Vilatelevia

⁷ La anu muvikala aloxo 'ola, “Nini nakaukavunu vaikala ano'o ulai noxou angelosou pita noxilo ne Vilatelevia. Eni ane a malemale­ngasi mo eni tava'u vaikala maninasi. Eni a atetelisou laki noxou Teviti laso aitenga ane akisinu la evile umomomo so utatusou uasi. Xe aitenga ane atatu­sou la evile umomomo so ukisinu uasi. Akalanu vaikala ano'o ulai noxinge.

⁸ Eni alavu no anu ili'ilixo ngalavusou nga'oxonu. Ngamaisou, eni ekisinu aitenga no laxungengi mukalu mo evile umomomo so utatusou uasi ane. Eni alavu lexe xavi sevile a uxoxolu noxingesio laso maixene ngemulinu vaikala­xeli mo ngaxiunu tumalingeou ualasilo uasi.

⁹ Ngalomu. Ane'i e tatemanu pita noxou Uluaou i'oxo lexe ane'i Taiuta. La uasi, ane'i ikalavoi ane. Laso ili'i eni ane'ene'i noxinge so itangatulu no tava'inge mo apela'a lexe eni asexelangenge misevile.

¹⁰ Ia loxo ngingi la vaikalaxeli muxolu no alaiengi laso tu'utu'u­maxu muxalisinge ia pakia'ingesi. Laso eni a'oxonu latolosinge no anu voxo so tovotovo ane so uxali. Eni apilixinu tu'umaxu no lialia muka­lusi so atovone'i tatemanu, ia ngingi la uxalisinge uasi.

¹¹ Xo maxuveni uasi la eni ane'e noxinge. Laso mi ane ngexalisou no anu vaikalaxeli la ngatulu pakia'inge no anu. Xo uasi, la masi evile ulapungengi mo ngaxalisou palaisi na'a ngingila uae.

¹² Noxi'a tamitema ane iua'uli la atulusi'a pumuxa'a a loxo posipo­sixu tasou Mosinge. Mo ixolu se'isisi no anu avile, ixexela uasi. Xe kalumo la akaukavunu ualasou Mosinge noxi'a. Mo akaukavunu ualasou taoni noxou Mosinge. Taoni ne Ielusalemo alavua molu noxou Mosinge no tualasou teitexi ulu'e. Mo akaukavunu ualasilo alavua noxi'a kalumo.

¹³ Anu ane, loxo itema sangalou la ulomuxu vaikalaou Ulenu Laixe anu upili­xinu noxinge no anu pitapita.”

Pelototo so pita ne Laotisea

¹⁴ La anu muvikala aloxo 'ola, “Nini nakaukavunu vaikala ano'o ulai noxou angelosou pita noxilo ne Laotisea. Eni amosou vaikala manina. Mi ma'ia Mosinge muxa­lixu la aa'aloxu u'isalilisi. Eni tava'u mimi mukalusi e Mosinge mukoinu a. Akalanu vaikala ano'o ulai noxinge.

¹⁵ Eni elavusou ili'ilixo noxinge. Ngingi ngaxili­liou vaikalaxeli avile uasi ia opongengi u'osasou uasi kalumo. Eni amasaxau ngaxolu nonixi axone uasi.

¹⁶ Ngingi loxo la'ilali ane xale'a avile o uxutu avile uasi, uieiieisousi. Axamulingengi axone laso eni alevengengi ngaxexe no anaxosi.

¹⁷ Xo ngingi nga'oxo lexe ngingi ngaxolu no latanu lamoli xe lavuluti mo ngakamulinu mi vilela uasi. Ia uasi, ngingi ngalavu uasi ia loxo manina la xoluxolungenge masuasi. Ngingi loxo ta'oloxola so ngasolingenge xe ienge selevenu xe pangapanga'ingesi.

¹⁸ Laso apelototosinge aloxo 'o. Ngane'e noxilo so ngaxalisou koli e navu mu'elaxu so uxexenu mimi masua no anu. Ngaxalisou laso ane, ngaxolu no latanu mimi lailaixe ne. Xe ngaxalisou lavuluti kea so ngasu'asinge no anu mo so ngamailamulinu vasimenge vita­nisi ne uasi. Xe ngaxalisou lamalasini mo ngamulaxu no iengi so ngasaxisaxi.

¹⁹ Loxo eni asexe­laxa'a ta'ei la alosi'a tu'umaxu so alovonixi'a. Laso xavingengi so ngaxiunu opongengi so susu noxinge mo nga'isalilinoxu.

²⁰ Ngalomu. Eni atulu no aitenga mo apolopolo. Loxo itema ulo­muxu vaikalaxeli mo ukisinu aitenga laso ane. Eni a'una so nexi noxou taxolu mo ta'ani.

²¹ Noxi'a tamitema ane iua'uli la alaixi'a so noxi'a tatalupexa no sia kingi noxilo. Iou vilesisi aloxo eni eua'uli mo a noxou Mamilo tatalupexa no anu sia kingi noxou.

²² Anu ane, loxo itema sangalou la ulomuxu vaikalaou Ulenu Laixe anu upili­xinu noxinge no anu pitapita.”